احمد الطيب درتي الغالية

الكابلي -نوم عيني

رسالة في بريد المحبوب الراحل المقيم في وجدان كل سوداني، محمد طه القدال عليه رحمة الله.
***************************************

‏يكفيني السؤال يا صاحي
يكفيني السؤال والدنيا ما لاقية الغُنا الصباحي،
ولو غرّد حمَام في العتمة
خلّو يغش معاه مُزاحي
حين قالولي سار في رحمة عند رب السما الفتّاحِ،
قلت أكيد طلع في نهمة، يرعى ويحتويلو مَناحي،
قلت أكيد هو راح واِستحْمَى،
والمشوار طِوِل روّاحي
قلت أكيد نتَف من ريشو شان يصرفلو هم ونواحي،
إلا الريش وقت كتّح لي معناهو التقول جرّاحي
وإلا العين وكت رفّتلي غوّر لي الجرح في جناحي
فاض من دمعي قدر الدنيا
ضيق الدُنيا صار لي مُراحي،
واتمردغت،
اتلولحت، درويشاً فلَت في الحضرة،
واستجدى الحُزن مدّاحي
يكفيني السؤال يا صاحي
تكفيني العبارة الرايحــة،
تكفيني العيون والحسرة وأحلام ود حليوة براحي.
 ونحن أهل الفرحة جينا،
جينا والكون نفَسه طالع
جينا من كوكب عيونك، وبين عيون أطفالنا شارِع
اتكّلنا على الله سمعاً
وما فضَل في السِكة شافِع
يقرأ من لوحَك ويرتّل ٱية الفرحة ويصارِع
عد يروح الضيق خلالَك ومن خلالَك نوره شاسِع،
ٱية ٱية ونوره شاسِع
غاية غاية وقلبُو ناصع،
راية راية وأنت فاتِح للغلابة الصدر واسع
ٱه يا زينة بلادي،
يا بِلاد في روح بِلادي، كنت ما بقدَر أتاوِق
وألمَحك ما تكون قُصادي،
يادي يادي، يادي تعليقة الروادي
اتكّيت على غُنوة مِنّك
وانتشيت في ليل سُهادي
ومنّي طار جلدي المنمِل
جنّي في حِنّي وبُعادي
وما عِرف غنّاي حديثك غير حُزن كجّني غادي
وما اختبى الشوق من ونيسك
إلا عرّفتو بمِدادي
طلّة من جنّة حثيثكَ وقدلة تهديني لرشَادي
يادي يادي، الضُل بِنادي،
الكُل بنادي،
الكُل بعلّق صورة في دولاب محبة
الكل وليف غنّايو في زمن النوادي.
وأُغنّيك لي مِنو، وأغنّيك يات زمن
وأعزّيك عِن منو، ونيلينك بكَن
غناويك مافي زول
ولا حد يُمتحن
تقول ليو مرة قول، يقول ليك اتنسن!
أغنّيك وأنت ماف؟
بعيد عنّك بخاف
بخاف من حُسن حظنّك، وجنحيك الخُفاف
قبل ما أبدأ أكتِب
قبل يرتَد حِنّك
يقومَن يسبِقنّك
يجيبنَك لُطاف، ظُراف واِت كأنّك ملاك راح وشاف
وقبُل ما نروى منّك،
يقولن غصب عنَك: (مراويدك ضُعاف)
يقومن، يختِفنّك
بعيد ياخي عنّك!
بعيد ياخي عنّك، غُناك طعمو أحلى،
وأكيد لو جا منّك، حلاوته اختلاف، أغنيك وأنت ماف؟
بحاوِل، بس لأنّك، عظيم وأنت عايش، كريم وأنت ماف.
(وشِن القعدة يا أبو السرة)
شن القعدة في ضل النخيلات أمْ تمُرةً مُرة
رُحت وروّحت كايساك مديدة الغُرة
صِبحت كوتة التمباك وطاية جمرة
والويقود حِرق من جوفو يطلع برة
ووكتين شقلبَت شقّيش،
طلقنا أمُرنا في بلد (اللِجان) الحُرة
واتلفحنا من تالاك،
شِلنا عمُرنا،
شِلنا جمُرنا،
(ما لاقانا من يغبانا، ناس عارفاكا)
ناس عارفانا
ناس خابراكا
ناس رطّانة،
ناس تجبُرنا، والكسر التركتو وراكا، مجبور بي كشِفة الضُرة، (وأنا ما بجيب سيرة الخبوب)،
ما بجيب الجاي وماشي،
كل زول في لوحه مكتوب، يقرأ يتعلّم يمَاشي
البِضل تلقاهو معطـوب،
جاري توب الخجلة كاشّي
والبِخون تلقاهو مكتـوب
في جبينو الوصمة: غاشّي
والبفوز في الٱخرة، محبوب
سيرتو شلال غيمة، راشّي
سُقيا في كل جلسة مسكوب
رحمة من عند الله هاشّي
(وأنا ما بجيب سيرة الجنوب)
رجّعت، يا هاشّي، رجعت جواي الشعر، يوم حُزتني، وقُلت: القصيدة
دي بِت بلد، واِت جنّها!
لو كنت بعدَك شُفتني،
أهو كُت سرقتَك مِنها،
خاطِر سديرك يضُمّني
وأغرق في نيلك وحِنّها
تلقاني باسِم كنَّني
في الكون أميرا وسجنَها،
رجعتّني؟ كيف؟ لسة غايب عنّها،
هذا التناقض فَنّني
في دائرة قُطرها سِنّها
عمر الزهور لو ينحني، تكبَر حليوة أظِنها!
ٱخر قصيدة ورُدّني، لك في نوازِع دَنّها
أشرب، أغني، وأنحني،
وكل المحبّة أكِنها
وأضحك، حقيقي يهمّني
تعرفني هارِب، مِنّها، أهو جِنها، ٱخر قصيدة ورُدني، ليك منّها.
(ويا محبوبي - بعد القيام على طول - هاك منّي مكتوبي)
دة الحُزن ما حيطول،
ولو 
خُضت
في ذنوبي،
حبّ البِلاد مجبول على صبر أيوبي،
وحُب العباد معقول وأنا أمري مغلوبي،
علّمني معنى القول
وفصّلني في توبي،
وعرّفني بالمجهول، وحنينَك النوبي!
عين الحقيقة دخول في
قلب محبوبي،
وأنا قلبي تب مكتول في قلب محبوبي،
في قلب محبوبي،
في قلب محبوبي،
ويا محبوبي، دي الخرطوم! دي الخرطوم يا قدّال،
عيون الحق ما نامت ولا نامْ في هواها عيال
ولا غادرتَ من تالاها
ساعة الثورة كُت شبّال،
كُت زغرودة حين الهدرة كُت نبّاه صلاتنا القال: 
(أعرفني إنك الزمن اللي جايي شروق)
أعرفي إنك الوطن الحديثو نِضال،
صدَح
 في
 كل
 بيت
 صوتَك،
صدح
في
كل
صوت
بيتَك،
مرق صدّاح غُناك كالفال،
دخل في روحنا، ساقنا وقال، هتفنا وراهو كالأطفال:
ضميرَك حي، ضميرَك حي، في كل مقال
ضميرَك زهرة يا قدال.

رسالةٌ في بريد المحبوب محمد طه القدال/ ملِك

يا سليم الذوق
لو تعرف الشوق
ابقى انزل يوم من علاك الفوق
شوف عمايل الحب في الحشا المحروق 

انت كالأنسام لم تهدا تروق
وانت كالأضواء بعد كل شروق
لو بتذكرنا كنا نحنا نضوق
للسعادة طعم في رضاء المعشوق

انحن حلفناك بالغرام والريد
بي صفا الأحلام في عيون الغيد
وبالقليب الضاق لذة التسهيد
ابقى زاورنا حتى يوم العيد
 
يا أمل بسام دابه هال جديد
تخلي شوقنا الطال في ثواني يزيد
بعتاب صامت يشبه التغريد
نبقى نار في ناره لي لهيبها نزيد

محمد وردي - سليم الذوق - كلمات ابراهيم الرشيد

زمني الخاين .aac

الكابلي عمر الطيب الدوش_سعاد

الجرح الابيض - لونعيم الدنيا عندك احرميني - صلاح ابن البادية

الجرح الأبيض - ابن الباديه .. ؛

KHARTOUM/MUSIKRAUM: Aswat Almadina / Nos Kobaya Shai Be Aisha أصوات المدينة / نص كباية شاي بعيشة

نوم عيني البقا لي سهر

مصطفى سيد أحمد - لمَحتك - عود

حمدي السمر - ارض الحبايب - دندنة عود

جيتني زيارة في المِيعاد كما حبّيت
جيتني زيارة في النوم يا وليف البيت 

مصطفى سيد أحمد - لمَحتك - عود

Abdelrhman Elzain

Related tracks