ما نَضجّتِش بالقدر الكافي
في شِيل الشِّعر على كتافي
والجري معاكي في طول أرضِك بفؤاد حافي
علشان أكتب لِك نَص قصيدة يغنيكِ
ما رَميتش جِنيهي في قلب النيل وإتمنيتك
ولا كنت علاء الدين ..
يجري له الحظ وياخد بِيِدُه لغاية نِن عنيكِ!
لكن.. ما أكدِبش عليكِ..
أنا كُنت الفقر بذاتُه لكنه بنبض وصورة!
أنا كنت الكورة بتشبع ضرب ..
وجري ما بين رجلين البني آدمين ..
صرخِتها إن وقعت تحت كاوتش العربيات
بتكون إعلان للمتنافسين بنهاية الفورة!
تلاقيني صنايعي يُومية ..
في حتة ما تِعرفهاش طوابير العيش
ولا سِمْعِت عن حكايات بوابير الجاز
فـ يدوبَك بتعشيه البَصّة لسيخ الكُفتة
وبيلبس كام أمنية لطقم جديد مِـ العتبة
وبيرسم راحتُه في شكل لِحاف وسرير
أنا كنت الثايِر في التحرير ..
من بَحِّة صوته تحسي بقَهرُه الكافر
أنا حُبي لطينِك يِغلب حُب السلاطين لعروش السُلطة
ويفُوق ضعفين حُبك للموت ..
أنا ضهري ما يوجَعنيش من ضرب السوط
لكن.. يقتلني أشوفِك مش سانداني في عز الحُوجَة

•••

غلَبتني عيونِك يا حبيبتي
وغلَبني الشوق ..
وغلِّبّني ..
من تحت لفوق واخداني الدنيا في مِيت دُوكَة
ورَبْطَاني بطوق!
                                                                                          ••

غلِّبني الخوف يا حبيبتي معاكِ
وقلِّبّني! ..
وسلَبني الفرحة وراحة البال وتركني حزين
غلِّبّني الشِّين في عمايلِك رغم وقوفِي في صَفّك!!
                                                                                          ••

وفي صَمتِك لمّا تشوفي سنون العجز 
بتِنخُر فيا الرغبة ..
وأنا أصلاً ما بقاش فيا الحيل لجدال ومعاتبة
خمسينة شاي قادرة تفَهِّمّني فجور الواقع لكن من منظور أوضَح! ..
فَـ الأرجح إني الشخص الواعي لأصل الحِسبة
والأصلح ليكِ الفُرجة ولىّ الموت عَـ المسرَح!

•••

تحويشة دمي في حُبِك راحت حِرز في محضَر!
كلبِشني الموت من إيدي وقالي :
إتنيل جاوِب ..
من إمتى الحُكم بيُصدَر لو ما نَدَهش الحاجِب؟!
من إمتى نهاية جوعَك كانت شيئ مضمون؟!
دي حاجات معروفة يا جاهل ..
قبل بداية الكون ..
منظور الشوف في عيونَك خارج عَـ المألوف!
منظور الخوف في مشاعرك عاقل مش مجنون!
قادر يستوعب مين مِتداري ..
ومين مكشوف ..
بيلَيّن مُخّه الناشِف وقت ما يبقى حديد
بيبَيّن غُلبُه الطافِح من غُشم التجاعيد
وبيسمح للأحلام إنها تتخلل قلبه ..
وبيسمح للأقلام إنها تتخيل دربه ..
وبيسمح للخفافيش أنصار "هنموت والفكرة تعيش"
حواليه يتكاتروا ويبقوا ..
وده أثره خطير ع الصحة إن عرفوا وفهموا الليلة
وضريبته تقيلة وبلوى كبيرة إن شالوا الشيلة
تحويشة دمك مش هتكفي السَحلة طويلة
فـ الأولى تراجع نفسك قبل ما تغّرَق
فوق!! ..
ما تقولش العيب في عنيكِ
قول غلِّبّني الشوق!

 ________________________

غلِّبّني الشوق | مارس ٢٠٢١
عبدالرحمن رضا

غلِّبّني الشوق | عبدالرحمن رضا

الزمن بيلف بينا إنما رايح لفين؟!
والدول والأنظمة بيغيروها بالمزاج والدِين
والشعوب بيصنفوها بالميزان الغير مساوِ الكفتين
والحمام بيطيروه في الجَو
علشان يصطادوه..
والعقل بيفضّوه..
والجعان بيطفّحوه السِّم حاف
والورق بيفنطوه..
والجبان يَأووه ويمسّكُوه الطلقة والمحّفظة
ويلبّسُوه الكِيباه والبُرنيطة
ويسكِّنوه في أراضي مِتجهِّزة
"إختر ما شئت من الخريطة"
•••
على أرض البسيطة 
في ناس بسيطة..
في ناس بتهوى الزيطة وقت الولادة  
وفي ناس توصِّى عيالها قبل الموت
"ما تِعّملوش القهوة سادة"
يكفي الحياه سادة..
يكفي الظروف سادة..
يكفي الكفوف سادة..
يا سادة..
يكفي ما في الكون من الخوف والبَلادة
يكفي إعتبار اليأس عادة
•••
قُلْ لَنْ يُصِيبنا الهَم
والإمتعاض..
والذَّم..
عيش الحياه وإهرب من الأحزان بضِحكة
الضِحكة باقية..
وعايشة في الوريد والدَّم
عيش الحياه بالـ كَيف مش بالـ كَم
عيش الحياه ودَندِن أغاني حليم
رَتِّل آيات الذِكْر..
قول "يا كريم"..
فَتَّح عِنِيك وقت إنشغالهُم باللي رايح
واللي جاي..
وإتحَوِّل أعمَى لو يبُصّوا عَليك
وفي الحالتين..
هتخرج بإنتصار أكبر من الخوف اللي فِيك
إسند دماغك عَـ المخدّة ونام
ما أحلى لِإستسلام..
تعرف؟!..
معنى السلام يَكمُن في شَقِّة فول
أو دعوتين صادقين وانت نازل جَري عَـ السِّلم
كالعادة صاحي وفاتَك لِإمتحان
معنى الأمان مش هتلاقيه 
غير في حُضن أبوك وهو راجع مِـ السَّفر
معنى الحياه في عنِيها وقت المَطَر
قُلْ لَنْ يُصِيبنا الإنفطار في القَدر
ولا النصيب..
والإمتعاض..
والذَّم..
قُلْ لَنْ يُصِيبنا الهَم

       ________________________

قُلْ لَن يُصِيبنا الهَم | يونيو ٢٠٢١
#عبدالرحمن_رضا

قُلْ لَنْ يُصِيبنا الهَمْ | عبدالرحمن رضا

الدقايق
كات بتتحايل على العقرب يسَرَّع
وأنا التكَّات في راسي..
كات تسَمَّع الناس جنب مني
كات بتِوصَل للمدى المعزول في عقلي
صدى الصوت اللي فيها..
أعلى من صوت الزعيق في خناقة بين سواق 
ورُكَّاب في المحطة..
من صِريخ قطرين وجايين عكس بعض
كل واحد منُّهم..
خايف لَـ يِدي التاني خبطة!
في انتظارِك.. 
كانت الدَّقات بتُعرُج مش بتمشي!
نُص ثانية..
رُبع لحظة..
¾ دقيقة..
وأنا..
لسّة واقف وحدي ضِد جيوش هزايمي
وأم كلثوم بتحاوطني بالحقيقة
أنا في انتظارك..
خـليـت..
أنا في انتظارك..
حطيت..
أنا في انتظارك..
عديـت..
شيلت السماعات..
دخلتَها في جيب الچاكيت
وكتمت أنفاس أم كلثوم للأبد
والأبد مفهومه عندي..
مش معناه خلود..
بل هو أقصر عمر ممكن يتحسب
بين إحتمال الفُرقَة..
أو ريحة الورود!..
الورد أسهل سبيل استخدمه الخَونَة 
لجَذب العاشقين..
أشيك أداة اغتيال تقتلك بهدوء!
والإنتظار.. 
يشبِه حانات القمار؛ يسرَقَك بالذوق!
والفجر مصيدة الأمل
والشروق..
الزحام..
كائن عجيب!..
يظهر في شكل الغياب
والسراب الكئيب..!
العزيمة خيوط متمزعة في عقلك
الهزيمة خطوط متوزعة في شكلك
كل احتمالات النجاة
مايلة لنهايتك!..
في كل مرة بتوصل للنهاية تموت!!
وترجع تاني للوحدة
بحزن جديد..
ونور الأوضة بيزاولَك
تفَتَّح عين بَقِيت عُمرَك وتقفِل عين
تمِد الخطوة بخيالك
وتِجرح بالحنين روحَك
يزيد البُعد في جروحك
وتتألم أماكن..
أغنيات..
وسنين..
زمانك يا حزين بردان
ما بين الغِيبة..
والأحزان..
ما فيش ولا حضن بيدفيك
ولسَّة الدنيا بتساومك وتخنق فيك
ولسَّة الوقت ما بيمشيش.

أنا في انتظارك | أغسطس ٢٠٢٢
#عبدالرحمن_رضا

VideoToMp3

أنا في انتظارك | عبدالرحمن رضا

مونتاج الشاعر العبقري أحمد سعيد بكير : 
https://www.facebook.com/ahmedsaid14?mibextid=ZbWKwL

من امتى الدنيا..
بتِحسِب للمهلوك تَمن الهَلكة
مين فينا ما عاشش الدنيا الحظ..
بيتجاهله؟!
عالَم بيساوى الفارس والصُعلوك في العَركة!
لو شافُه الخِضر مكانش هيسلَم..
من جهله!
في حاجة اسمها متلازمة " مش عارف "..
تسمع عنها؟!
دي الحل السحري.. 
اللي أنا بالجأ له إن عوزت اهرب
والخلطة السرية اللي محدش أعلنها
والكلمة الخارجة المحذوفة فِـ مشهد مِتسَرب
كلمة مش عارف..
هي الكنز اللي محدش..
عارف قيمته 
هي الحضارات اللي هتبني العالم تاني
هي اللي هتقدر تنشِيء عالم إنساني
متلازمة " مش عارف "..
هي المخرج مـ الأزمة
هي المرض اللي هيضرب عقلنا بالجزمة
وهتقدر ما تخليش العالم بيعاني
وتخلي الناس مش عارفة حاجات ياما
وعشان تبعِد عن عقل الناس أي علامة
ممكن بالوقت..
تنَشط هاردات أفكارهم :
هتفرمت كل علوم الأرض في ثانية
وتسيب فولدر مليان حبِة أسئلة..
في دماغهم
وهتكتب إسمه :
" إزاي ربنا خلَق الدنيا؟! "
وإن دوست Click يمين وفتحته..
هتقدر تفهم
إن " الإنسان الأوَل " كان إنسان بالفِطرة
ما حاوِلش يغَيَّر شكل الكون..
بعيون منظورُه
ولا فرَّق بين الناس باللون
ولا بَدِّل دورُه
وهتعرف ليه المركب شالت زوج..
من كل اتنين
وهتعرف إن العالم جِه من نفس الطين
مَعرِفتَك بالأشياء أو جهلك..
مش كارثة
والحل الأسلم..
هو سكوتَك في الحالتين
دلوقتي زمانك بتفكر في اللي أنا قولته..
أو يمكن خايف 
فَـ بلاش تسألني عرفت إزاي.. 
علشان..
" مش عارف "

متلازمة " مش عارف " | مارس ٢٠٢٣
#عبدالرحمن_رضا

متلازمة " مش عارف " | عبدالرحمن رضا

BEDAYA - ALI KHAFAGA | بداية - علي خفاجة

• شاعر مصري مواليد أكتوبر ١٩٩٨ بالقاهرة.
• مهندس زراعي تخرج من قسم الأراضي والمياه بكلية الزراعة جامعة عين شمس  عام ٢٠٢٣.
• حاز على المركز الأول في شعر العامية بكلية الزراعة جامعة عين شمس لعامي « ٢٠٢٢ - ٢٠٢٣ »

Abdelrahman Reda

Popular tracks