الله يرضى عنك يا حسام⁦❤️⁩

والله الموت أهون بكتير

الله ياعم ، سلمت يداك 💙💙

( شالوم - Shalom )
..
في عصور ما بعد التظبيط ..
ما بعد البيع و التفريط ..
بعد التطبيع و التخريط ..

ياسر عبدالله الشوّان ..
ماشي بيتعكز ع الحيط ..
ولا عاد له شارع ولا بيت ..
طب فين هينام الغلبان ؟

بيبص شمال لقى بيت (ليشَع) ..
بيبص يمين لقى بيت (عِزرا) ..
بيبص هناك لقى حوش واسع ..
حواليه أسلاك ..
جوّاه أسرى ..

بيبص وراه مالقاش غيره ..
و (شاليط) جاي رافع مناخيره ..
بضفاير تحت البرنيطة ..
و وراه مجموعة برانيط ..

ياسر !
ع الحوش من غير زيطة ..
بمزاجك أو بالشلاليط ..
..

ياسر بيخُش على الأسرى ..
ع الباب مكتوب :-
نَصرك يا أسير .. و ان كنت أسير فمفيش نَصْرة ..
يقراها و يدخل يهتفها
و كأنه اتجنن م الحسرة ..
..
أول ما لمحته
لمحت سجون مافيهاش أقفال ولا حتى أجراس ..
و لمحت جنون الثاير لما زميله يموت برصاص في الراس ..
و لمحت جيفارا بيصرخ في الجلاد بيقوله .. خلاص ..
و لمحت إيديا بتكتب إسم ضحية جديدة في الكرّاس ..

و ساعتها لمحت الصول (شمعون) و اتنين حُرّاس ..
جايين على ياسر بيشدوه على نص الحوش ..
بيقولوا بعلو الصوت :-
(يا جحوش .. ده مصيركم لو في دماغكم تبقوا وحوش)

و وقفنا نودع ياسر بالنظرات و نسينا نحوش ..
نستنى عيالنا يجيبوا عيالهم و يحلّونا .. ماجوش ..

و في وسط الحشد بيصرخ ياسر و المشنقة حواليه و يقول :-

والله الموت أهون بكتير
من إني أروح المطعم أجيب بالـ(شيكَل) فول ..
أو أأجر شقة يومين في الساحل من (إسحاق إشمول) ..
من إني أشوف النجمة الزرقا بدال النسر على الأعلام ..
أو أشوف الدم بيرسم لوجو على البرميل النفط الخام ..
من إني أشوف الجامع معبد و القسيس حاخام ..
من إني أشوف صعاليك الأرض بقالهم طين و مكان ..
محسوبكم ..
ياسر عبدالله الشوّان ..

آخر أحرار الأرض و آخر خاين خان ..
أخر ترنيمة (لأ) اتقالت ضد الظلم ..

بيقولوا تعاتب ميت تبقى خسيس و جبان ..
فـ أنا آسف إني بعاتب ع الأموات و بالوم ..

و أخيرا
ماتوافقوش على أي معاهدة سلم ..
الحرب هتبدأ فعلا لما يقولوا (شالوم) ..
..

#حسام_إبراهيم

شالوم / Shalom - حسام إبراهيم

• شاعر عامية مصري ، مواليد 14 أبريل 1994 ، محافظة دمياط
• أنهى دراسته الجامعية في الهندسة المدنية / جامعة المنصورة عام 2019
• أصدر ديوانه الأول بعنوان "مفيشاليا" عن دار تويتة للنشر والتوزيع في يناير 2017
• أصدر ديوانه الثاني " سجن أس أربعة " في يناير 2019 والذي حصل به على جائزة أحمد فؤاد نجم في ديسمبر 2019
• أصدر ديوانه الثالث بشيكل فول وبنص طعمية في مارس 2020 ، والذي حصل به على جائزة المجلس الأعلى للثقافة 2020 (الكبرى)
• أصدر ديوانه الرابع البني أشياء عن دار تويتة للنشر والتوزيع في يونيو 2021
• قام بكتابة برنامج مش مسامح حسين الذي تم عرضه في ديسمبر 2021

Comments

Rody Ali

domyate

محمود إبن فكري

مصطفى عناني/ Moustafa Anany

mohamed nassar

Sara Samir

ahmad salama