والله وشبت يا عبد الرُّحمن ..
عجّزت يا واد .؟
مُسْرَعْ؟
متى وكيف؟
عاد اللي يعجّز في بلاده
غير اللي يعجز ضيف.!!
هلكوك النسوان؟
شفتك مرة في التلفزيون
ومرة .. وروني صورتك في الجورنان
قلت : كبر عبد الرحمن.!!
أمال انا على كده مت بقى لي ميت حول.!!
والله خايفة يا وليدي القعدة لتطول.
مات الشيخ محمود
وماتت فاطنة ابْ قنديل
واتباع كرم ابْ غبّان
وانا لسة حية ..
وباين حاحيا كمان وكمان .
عشت كتير .
عشت لحد ماشفتك عجّزت يا عبد الرحمن.
وقالولي قال خَلَّفت
وانت عجوز خلَّفت يا اخوي ؟؟
وبنات..!!؟
أمال كنت بتعمل إيه
طيلة العمر اللي فات؟
دلوقت مافقت ؟
وجايبهم دِلْوكْ تعمل بيهم إيه ؟
على كلٍّ ..
أهي ريحة من ريحتك ع الأرض
يونسُّوا بعض .
ماشي يا عبد الرحمن .
أهو عشنا وطلنا منك بصة وشمة .
دلوك بس ما فكرت ف يامنة وقلت: يا عمة؟؟
حبيبي انت يا عبد الرحمان
والله حبيبي .. وتتحب.
على قد ماسارقاك الغربة
لكن ليك قلب.
مش زي ولاد الكلب
اللي نسيونا زمان
حلوة مرتك وعويْلاتك
والاّ شبهنا..؟
سميتهم إيه؟
قالولي : آية ونور.
ماعارفشي تجيب لك حتة واد؟
والاّ أقولك :
يعني اللي جبناهم..
نفعونا في الدنيا بإيه؟
غيرشي الانسان مغرور.!!


 

ولسه يامنة حاتعيش وحاتلبس
لمّا جايب لي قطيفة وكستور؟
كنت اديتهمني فلوس
اشتري للركبه دهان.
آ..با..ي ما مجلّع قوي يا عبد الرحمان.
طب ده انا ليّا ستّ سنين
مزروعة في ظهر الباب
لم طلّوا علينا أحبة ولا أغراب.
خليهم..
ينفعوا
أعملهم أكفان.!!
كرمش وشي
فاكر يامنة وفاكر الوش؟
إوعى تصدقها الدنيا..
غش ف غش.!!
إذا جاك الموت يا وليدي
موت على طول.
اللي اتخطفوا فضلوا أحباب
صاحيين في القلب
كإن ماحدش غاب.
واللي ماتوا حتة حتة
ونشفوا وهم حيين..
حتى سلامو عليكم مش بتعدي
من بره الأعتاب
أول مايجيك الموت .. افتح.
أو ماينادي عليك .. إجلح.
إنت الكسبان.
إوعى تحسبها حساب.!!
بلا واد .. بلا بت..
ده زمن يوم مايصدق .. كداب.!!
سيبها لهم بالحال والمال وانفد
إوعى تبص وراك.
الورث تراب
وحيطان الأيام طين
وعيالك بيك مش بيك عايشين..!!
يو…..ه يا رمان..
مشوار طولان
واللي يطوِّله يوم عن يومه يا حبيبي .. حمار
الدوا عاوزاه لوجيعة الركبة
مش لطوالة العمر.
إوعى تصدق ألوانها صفر وحمر.
مش كنت جميلة يا واد؟
مش كنت وكنت
وجَدَعَة تخاف مني الرجال ..؟
لكن فين شفتوني ..؟
كنتوا عيال.!!
بناتي رضية ونجية ماتوا وراحوا
وأنا اللي قعدت.
طيِّب يا زمان..!!



 

إوعى تعيش يوم واحد بعد عيالك
إوعى يا عبد الرحمان.
في الدنيا أوجاع وهموم أشكال والوان.
الناس مابتعرفهاش.
أوعرهم لو حتعيش
بعد عيالك ماتموت.
ساعتها بس ..
حاتعرف إيه هوّه الموت.!!
أول مايجي لك .. نط
لسه بتحكي لهم بحرى حكاية
فاطنة وحراجي القط..؟
آ.. باي ماكنت شقي وعفريت
من دون كل الولدات.
كنت مخالف..
برّاوي..
وكنت مخبي في عينيك السحراوي
تمللي حاجات.
زي الحداية ..
تخوي ع الحاجة .. وتطير .
من صغرك بضوافر واعرة .. ومناقير.
بس ماكنتش كداب.
وآديني استنيت في الدنيا
لما شعرك شاب ..!!
قِدِم البيت.
اتهدت قبله بيوت وبيوت.
وأصيل هوه ..
مستنيني لما أموت ..!!
حاتيجي العيد الجاي؟
واذا جيت
حاتجيني لجاي؟
وحتشرب مع يامنة الشاي .؟؟
حاجي ياعمة وجيت ..
لالقيت يامنة ولا البيت ..!!

قصيدةيامنة ( مع الكلمات ) -عبد الرحمن الأبنودي

جميع أغاني مسلسل حدائق الشيطان - علي الحجار

زعيـــــــــــــم الأمه العربيه كلها 
للمتابعه :

https://www.facebook.com/MohamedAlemdar0

اغنية لصدام حسين

تتر مسلسل المداح ٣ - أسطورة العشق  - حمادة هلال.mp3

موسيقى مسلسل ستهم ناي | Cover

حمزة نمرة - عالم كدابة 2023

أم كلثوم - القلب يعشق كل جميل -ستوديو

هشام الجخ  _  الطناش

مــــــدد يا رســـــــــــول الله ,, محمد منـــــــــــــير

مـــــدد يا رســـــــول الله

صاحبة السعادة| "مولاي إني ببابك" بصوت المطرب ماهر محمود وفرقة أيامنا الحلوة

النقشبندى - ماشى بنور الله

إن النفس لو سَمَعَت ما يُطربها يشتعِل مِنها ما خَمد🎼
⬇️ INSTAGRAM ⬇️
https://www.instagram.com/abadermahrous?igsh=MTg3MWV4NnZpaWxzaA==

موسيقى مسلسل ستهم ناي | Cover

أبــــاديــر •III•

Related tracks