العالم بره ف حاله حرب
خليك نايم
جسمك مبقاش مستحمل ضرب
ولا حمل هزايم
ولا حمل شعور واحد بالذنب
او خوف دايم

عينك بتفتّح بصعوبه من بعد النوم
كالعاده خارج م المعركه مهزوم
بس غريبه
انت كان عندك حماس
و انت اللي اطلقت الرصاص
و انت اللي شنيت الهجوم
و اديك دلوقتي اهو
مرمي على الارصفه
و مش قادر تقوم
زي ما تكون غرقان ف رمال متحركه
و بتحاول تعوم
هتعلق فشلك علي مين
و هترمي علي ايه اللوم
ع الوقت.. ؟
ادعي انه يجري
او انك تفضل سليم لحد اخر اليوم ..

حالة حرب

العالم بيتحرك بسرعة رهيبه
و كل يوم بنشوف اثار العولمة
بكره ..
اللغة مش هتحتاج ترجمة
بكره ..
 المباني العالية هتغطي السما
و تتلاشى الحدود
و كل حاجه  هتتحرك "بكود"
انا خايف كمان كام يوم
مقدرش احرّك دراعي
و الأدوية ..
تخلّص على جهازنا المناعي
و يبدلونا بالالات 
و الذكاء الاصطناعي.

من ديواني الجديد "دواير"
قريبا

عبدالرحمن مُحمَّد

Popular tracks