Written by : Abdelrhman Mostafa
Fb.com/Abdoulrahman95

إلى أغبى بنات الكون

واكتر بنت حبتها

انا نفسي اكون راجل

بيقفل بابه على بيتها

انا واحد ، معقد ف الهوى جدا

واكتر حد بيريدك

هتفرق ايه

هموت م الحب او فيكي

مادام الموتة بين ايديك

…

جواب مركون فـ أول درج

لبنت بحبها فـ سِرّي

 

فـ أول سطر

بطلُب سَتر

عشان الحُب بيعرّي ..

 

وببدأ بالبُكا دايماً ، على الاطلال

وبسألها عن الأحوال

وهل فكراني او ناسية

حقيقي قلبها طيب

ولكن من بعيد ، قاسية

وبحكيلها ،

برغم الضيق ، حبيبتي القلب بيساعك

سواء ضاحكة وبكّاية

سواء تحكي وشكّاية

سواء ساكتة ورغّاية

تعيشي بردو جوايا ، و زي ما تبقَى أوضاعك

وتبقِي شِعر بيصُمّه

وتبقِي المدح من ذمُّه

وتبقِي حضن من أمه

فـ ساعة فجر بيطمّن

بيفضل يدعي ويأمِّن

ويحلم لما تبقَى الدِبلة فـ صباعك

….

انا فاكر .. زمان لما انتي قولتيلي

يا واد اخلص وقوم ذاكر

وقومت ذاكرت ومحلتش

وجيت زي العيال عندك وقولت الامتحان بايخ

ومثلت اني متأثر ، بقع من طولي قال يعني خلاص دايخ

فقومتي جريتي جبتيلي …

بلاش اقول جبتيلي ايه

ولا اقول !

جبتيلي خوفك

واهتمامك

ودمعة بتجري من مجري الدموع ف عنيكي

رافضة تجيني قدامك

ولهفة ف قلبك المكسوف بصمت جميل تحلفني

وصوت مكتوم بيحكيلي

يا واد بطل تخوفني

….

وفاكر بردو يوم ما شكيتي من آية

ومن نرمين ومن يارا

وقولتيلي بإن الشلة اياها بتعزم كل صبحيه

عليكي ب قهوة وسجارة

وقولتيلي بإن الدنيا دي خيارة

ولو كانت ف ايدي اليوم

اكيد بكرة هتبقى ف حتة غير ايدي

وانك حابة اني بغير عشان الحب يحلى اكيد لو العاشق بقى صعيدي

وقولتي كلام ميهصحش اقوله عشان ميحسدوكيش

وقولتيلي بإن ما بنا ألف حكاية وحكاية وشكله مفيش

انا والله يا بنتي بحبك .. كيف محبتنيش !

….

طب افتكري

ف يوم الرحلة إياها

ومواقفنا اللي قولتيلي بانك لسه فكراها

ولما جرينا وتعبنا

وصوتك وانتي مبسوطة

انا نفسي اغمض عين وافتح عين الاقي

الحاجة بتسمعنا زغروطة

بدل ما يجيلي 100 جلطة

اقولك شئ ..

انا لو عمري كان غلطة

ف حبك انتي كان التوبة من بعديه

انا طلبي مهوش انك تحبيني

كفاية على الفؤاد الفرحة لما تعدي من جنبيه

….

قوليلي صحيح

سمعتي آخر الأخبار !

أكيد لاءّا

بحوّش كل اول شهر

واحوّش م اللي يتبقَّى

عشان أبنيلنا مخروبة

وطوبة فـ طوبة وفـ طوبة

هنقرا الفاتحة وخطوبة

و تبقِي مراتي ساندة عليا مش خايفة

….

وعارفة ..!

أنا عارف انك لسه مش عارفة

فَـ يمكن ابعت الجوابات

وتيجي تقولي ” إحنا اخوات “

ويبقى كأني عايش فوق

وبتفاجأ بنفسي بَترِمي من بُرج

لذلك ، هقفل الورقة

وتبقى زي اخواتها

” جواب مركون فـ أول درج “

إلى أغبى بنات الكون

إعداد ومكساج : محمد عمر
أداء وكلمات : عبدالرحمن مصطفى
Fb.com/Abdoulrahman95
الكلمات :

لو بس ترضي
كل شئ فـ الدنيا يتحوَل لـ وردي
قلبي مثلاً .. يبقى جنة
روحي مثلاً .. تبقى انتي
أمشي جواكي بـ سفينتي
حتى لو من غير نهار ...
لو بس ترضي
ننسى معنى الانهيار
والانتحار
والانتظار فـ الليل لـ رد يكون مهين
لو بس ترضي
ممكن اعرف نفسي يومها وابقى مين
ابقى واحد كل همه
انك انتي تبقي بيته
تبقي دايماً واخدة قلبه من محيطه
تبقي جوا الناس معاه
تبقي كل الناس معاه
تبقي اهله وتبقي جاه
تبقي واحدة .. لو شافوه ناجح يقولوا
في عظيمة كات وراه
لو بس ترضي
قلبي يخرج عن مداه
يخطفك لسنين مجتش
تبقى جنبي فـ كل ماتش
عايزة مني " حاجات غريبة "
نجري مثلاً فـ الزمالك
ويشوفونا يقولوا عيبة
تقومي ضاحكة
شعرك الملموم فـ كحكة
يبقى سايل ع الخدود
احكي ليكي عن جمالك
وإن عودك أحلى عود
تقولي بطل كدب يابني
اقولك ابنك ! ابنك ايه !
دانتي لولا العمر كنتي هتناديني باسمي بيه
تضحكي من تاني فاضحك
ضحكتك فـ الهم ضي
امشي واكتب ف الشوارع
كل حارة وكل حي
اسمنا على كل حيطة
تضحكي من تاني فاضحك
ضحكتك اجمل عبيطة
طفلة لسه لم ترى في الدنيا سوء
نن عينك شمس جايبة بعد طول الليل شروق
شعرك السايح بيمشي بين ملامحك وبهدوء
بيناديني وبيغازلني
ابقى منك , تبقي مني
واحضنك حضن اعتزال
تستخبي فيا فاعرف , كيف بيبقى الاكتمال
اشربك فـ اليأس كاس جوا بار مغمور قديم
تدخلي فيا تلاقيني حد عمره ما كان سليم
حد صايع , أو فلاتي
شوفت اد ماشوفت لكن يوم ماشوفتك
ابتدت عندك حياتي
" وابتديت دلوقتي بس , احب عمري
ابتديت دلوقتي اخاف , اخاف للعمر يجري "
صوتك الغجري بيعزف لحن غربي
من شفايف فيلم عربي ستيناتي
وابتدت عندك حياتي
خوفت فجأة , توهت فجأة ,
في حاجات ف الدنيا عاشقة للمفاجأة
قلبي يومها كان طفولي
كنتي لابسة كعب لجل ما تبقي طولي
مَشْينا عالارض يومها ملوش اثر
كنا يبدو اتنين بشر , بس مش زي البشر
كنت اول مرة اؤمن بالصدف
والمشاعر , والرومانسية اللي ساكنة ف القلوب
كنت غافل , او يجوز عارف وناسي
حد عاصي وشاف فـ حُبك توبة من كل الذنوب
اغفريلي الذنب مرة , اغفريلي 1000 مرة
حتى لو من برة يبدو إن فيا مفيش أمل
أو بلاش ,
قصدي يعني لو هيصعُب تغفريلي ..
بس قولي ايه العمل !
حتى لو هيكون مُحال
دانتي في فـ عنيكي مية مليون طريق للاعتدال
إمسكي فـ ايديا يمكن ابقى عال
ان مشيتي ، هبقى وحدي
لو بس ترضي
في حاجات نقصاني , بيكي هتبقى عندي

Abdelrhman Mostafa

Popular tracks