نننن

بعد ١٢ كل حاجة بتسكت إلا دماغي 
بتفكرني بحاجات مالهاش داعي
وإن قلت أقاوم بتكسر في عضمي
وبتلوي دراعي 
كان نفسي المكان إللي جنبك  يبقي بتاعي
كنت أحق بي
بس مش دايما الحق بيفوز
كل شيء سقط 
قصاد النفوذ
كنت أستاهل حُسن معاملة أو إحترام لمساحتي..
او في مره محسش بالرفض 
او في مره محسش إني لوحدي ..
مطلوب منك السماح
وانت لسه بتتعالج منهم
مطلوب منك النجاح 
علشان تسك بؤهم
في ناس كتير مش عايزينك تنهي حياتك مش علشانك دا
 علشان شكلهم
امتي العالم هيشوفنا؟ 
او في مره ممكن
احساسنا ينصفنا 
او نرجع انا وانتي لورا
ونغفل الساعات 
فجوات بينا فجوات
بتنهي يومك بإبتسامات
بنهي يومي بجلد ذات
والذكري سوس بينخر ف كل قديم 
وانا قاتلني شعور اني يتيم
ف إديني سبب أريح بي راسي
 أو عيار..
كل تكتشف كل متقاسي
ومفيش أسوء م الإنكار..
مفيش أسوء من إنك تتعب ف تعمل معاصي  
وتترمي زي القتيل جوا البار..
خرجنا كل طاقتنا في إللي فات
ماعدش في مساحة للإنبهار ..
قولتيلي زمان إيه أكتر حاجة بتهد البني أدم 
كنت أقولك الإنتظار ..
ع اساسي هتخافي عليا من الهد
كنت فاكر كل الناس زيي بتخاف تأذي حد
ياسيجاره كلميني .. وقت ماسكت 
ويزيد الصمت..
إللي حكيتلة مره من ضغفي
عايرني بإني أتهزمت.. 
ودا شيء غريب
الاغرب
 إني أبتسمت..!
ف انا هحكي ليكي إنتي 
عن خوفي وضعفي وهزيمتي
لأنك زيي قاتلك شعور 
إنك يتيمة ..
 ولأنك شاهدة 
ع كل جريمة ..
ولأنك لما بتخلصي مالكيش دور
ولأني لما بتخلصي 
بحس إن ماليش قيمه...
 انا وضتي حزينه جدا 
تقريبا الشيء الوحيد اللي بيتعاطف معايا 
تزعل لزعلي 
وتبكي لبكايا 
وزيها زيي برضو
بتحلم بالخلاص 
وبتحلم بالنهايه
 انا حاسس اني ضيف 
مش ف وطني وبس
 حتي ف بيتي
كنتي جميلة
جميلة حتي لما بكيتي
ازاي نسيتي ازاي نسيتي
مش قصدي الومك
قصدي عرفيني الطريقة 
انا ماتوهتش من الكدبة
لكن توهت لما عرفت الحقيقة 
 ببص ع مستقبلي واضحكله 
واقوله مع السلامه 
كنت عايزك احسن ياحبيبي 
كنت عايزك احسن
كل شيء مش عايزني اشوفك
كل شيء عايزني احزن
 والعمر بيجري اسرع منك وانت بتجري من كلب شارعنا 
وانا عجبني المشهد 
ف واقف بتفرج عليك وعليا
والزمن بيبعنا
 هبطل أحزن لما يموت الإحتمال
هبطل احزن لما يبقي عندي اجابات ع كل سؤال
ولما عيني الزايغة تطبل تحفظ المشاهد بالتفصيل
وشي مرهق ف كل المرايات 
الا مراية عينك جميل 
الدنيا مش هتشوفك مهما فعلت
مهما شاورت بكفوفك، مهما أفتعلت
هتمشي طريقك بمادئ
وترجع ملط
انت ياض ياللي كنت صادق
قولي
ارتاحت لما سألت؟
وعرفت ماشية أزاي التقسيمة!
انا من الناس اللي ليها اب وام 
بس برضة من الناس اليتيمه
وبدور جوا الهزيمة 
ع شيء مشرف 
وصعب اقول لحد محتاجلك
دايما بقول هتصرف
ياللي جوا الزنزانه 
هل اهانتك تستاهل
ياللي تعباك التفاصيل
هتبطل امتي تتجاهل
أوتسكت
أو تمشي ويا القطيع..
هنا العُهر مقدس
ع ابوابه هتشوف تكدس
ولو قلت انا ويا الحق
تتضيع..
هنا الخضوع مبدأ رسمي
بنحقن بي كل رضيع
منكرش خايف 
خايف العمر يجري وأنا لسة في مطرحي
خايف علشان
 تكرار الفشل مر..
خايف الوقت ميساعنيش
 أو أفضل سنين اداري خيبتي بقولة: أنا حر..
خايف أفضل كل دوري إني أبارك
نفسي أكسب معركة 
معركة واحيدة بس مش مهم كل المعارك
واقف بترجى الزمن 
والفرصة الأخيرة
الأصعب مش إنك تحس بحزن
الأصعب إنك تحس بحيره
الأصعب مش إنك تحارب 
الأصعب إنك تحارب من غير زخيره
الأصعب مش إن حياتك واقفة
الأصعب إن حياتك واقفة
ع التأشيرة 
وكل متاخد عهد تنساها 
تمضي ع العقد بالتبشيره 
بقيت اربط الاحداث
وافهم افكار الناس
زي مثلاً
مايحسش ببياعين الفُل 
قد إللي بيشرب كُحل 
يمكن علشان أخوه في التهميش
أو يمكن علشان
 كل واحد فيهم كان نفسة يعيش..
واحد بيترجّي الماشيّن يرمولوا جنية
واحد بيترجّي العايشين يبصوا علية 
والعالم ماشي في سكتة لابيلتفت لحد ولا بيبص
وأنت مهزوم لدرجة إنك مش قادر ترفع للعالم صباعك إللي في النص
ولا قادر تنادي علية بعنفوان
وبأهدا حس 
في ناس بتحلم سيبك منهم هيموتوا 
في ناس بتفكر سيبك منهم دول ماتوا
لكن في ناس محتاجة تتشاف في الزحمه
وناس محتاجة تدوق اللحمه 
وانا إحتياجي وإحتياح اللي زيي معروف 
وهو..
رصاصة رحمه

محمود طه - رصاصة رحمة

لا يجوز التصريح بأن مفيش دوافع ..لايجوز التصريح بإنك حاولت ومش نافع

ذكرى ميلادك _ محمود طه

لأ محصلش خير ..والشدة مش بتزول
والسعى تحطه ف.. إيدك
علشان مفيش حتمية لأي وصول 
والفعل مش بيحدد المصير 
والأمل مش مفتاح .. وإنك تحقق نجاح 
لايعني إنك صاحب فكر ،
 ممكن عادي جداً تبقا حقير
مطلعتش غلابة الكُترة..
ولاالحزن عليكي فترة
م لسة بتحزن أهو والحزن لسة كتير
وياعم فؤاد حمل الليالي مش عاوزله أتنين 
حمل الليالي عاوز اسبابه لكن غريبة المقادير
وماتقولش مبحاولش ، بحاول رغم إنها مبتتغيرش
ورغم رجلي اللي بتنزف من كتر اللف ف مشاوير.

Lucas King

محصلش خير / محمود طه

أنجح وندم إللي باعك أنه باعك 
بس دي جملة مش منصفة 
أزاي هتقدر تنجح
لو روحك مستنذفة

نننن

abdulrahman Ramadan.