,,,,,,,,,,,1,,,,,,,,,,,,,,,
انا جاهز للموت دلوقتى
ومجهز كفنى والتربه
دايق مـ المر و مـ الغربه
وشبعان اوجاع
,,,,,,,,,2,,,,,,,,,,
انا جاهز اتغسل حالا
بعصارة احلام امبارح
واتوضى بأيامى الحلوه
وبدمع امل لما بكتنى
,,,,,,,,,,,3,,,,,,,,,,,
انا جاهز اتكفن فورا 
والناس من حواليا
واقفين عادى ومابيبكوش
والواد صاحبى ابو وش بشوش
ماهنش عليه يتعطل يوم
يمكن مش قادر على تقلى
رغم انى طول عمرى خفيف
والبنت حبيبتى الى انا لسه ماعرفهاش
ماستنتهاش
او يمكن مالحقتش اشوفها
,,,,,,,,,,,,,,,,4,,,,,,,,,,,,,,
انا جاهز يتصلى عليا
صفين فى يمينى يكفونى
مش شرط يكون جامع مليان
انا نفسى فى دعوه تكون ببلاش
,,,,,,,,,,,,,,,5,,,,,,,,,,,,,,,,
انا جاهز للتربه وللدفنه
مش فاضل غير عملى يونسنى
عارف مين ربى ورسولى
حافظ كام ايه يساندونى
ومتفائل خير
,,,,,,,,,,,,,,,6,,,,,,,,,,,,,,
انا عشت سنين بس ما عشتش
وصاحبت ساعات قلبى الشايب
وشفت كتير بس ما شوفتش
وكنت الموجود الغايب
,,,,,,,,,,,,,,7,,,,,,,,,,,,,,,
انا حاسس بدموعك على خدى
واديا البارده حاضنه اديكى ومرخيه
من تانى بتبكى على فراقى؟
انا عشت عشان ادى وبس
وما خدتش حاجه ماهيش ليا
,,,,,,,,,,,,,,8,,,,,,,,,,,,,,,,
خلصت كلامى لكن لسه
جوايا كتير قوى مااتقلش
فسامحنى عشان طولت عليك
وإذا كنت يا جدى بغيب ياما
فتملى انا بقرا لك الفاتحه
فأمانه تسلم على سيدنا
وأمانه تسلملى عليا

فلسفه شعريه شديدة الارتباط بالواقع ولا علاقة لها به

تفتكر احمد عرابى
كان ابوه بيقولو ايه؟
امشى جنب الحيط يا ولدى
من خاف سلم
احنا مش قد الكبار
ولا كان بيقوله ديما
اياك تخاف يوم من بشر
وان الكرامه فى الوطن
زى الرغيف
على كترها نادره
جربت نومة الرصيف؟
حسيت بإيه؟
فى حاجه جواك ضلمت..
جربت عينك تتكسر؟
جربت معنى الخوف قوى
منغير خطر؟
جربت ظهرك ينحنى
فى عز الشباب؟
حسيت بقلبك لما شاب؟
تفتكر احمد عرابى امتى شاب؟
ولا عاش طول عمره طفل
جربتى قعدة الانتظار
لجل العريس؟
جربتى نظرة المرايه
وانتى ورده بتدبلى؟
اشتقتى جدا للدفا؟
ولحضن حد يطمنك
جربتى اصلا ان حد يحضنك؟
جربت امك تلفظك؟
جربت كف حارسها على خدك؟
عجزت بدرى بوحدتك؟
احب اقولك فى النهايه
مبروك عليك جنسيتك
،؛،؛،؛،؛،؛،؛،؛،؛،؛،؛،؛،؛،
كلمات واداء الكاتب :)
https://www.facebook.com/abdo.sayedmansour

،؛ عُرابى ؛،

ضاقت بيك
 
وعنيك بدأت تتألم
 
البر مهدد بالغرقان
 
زعلان من بكره
 
وامبارح كنت الندمان
 
حسيت بالوحدة الملعونة
 
والعرى الدامى فى احشائك
 
ضلمت الشاشة
 
وبدأت تهد فى احلامك
 
مرتاح دلوقت ؟
 
 
 
طب جرب تستغفر ربك
 
قوم واحضن روحك فى السجدة
 
اسرح فى الشمس وألوانها
 
طير جوا حمامة وصورها
 
ارسم يومك فرشة فنان
 
هيج فى ربيعك فراشاتك
 
وانثر احلامك واتخلى عن كل ميزان
 
دور فى عيون الناس بسمة
 
اضحك افرح خليك نسمة
 
الكل يحسك بالالوان
 
مبسوط دلوقت؟
،؛،؛،؛،؛،؛،؛،؛،؛،؛،
كلمات: بانسيه مصطفى
القاء: عبدالرحمن منصور

ضاقت بيك .. بانسيه مصطفى

- اسـتـرســال -
،؛،؛،؛،؛،؛،؛،؛،؛،؛،؛،؛،؛،؛،؛،
1- ( فى سِعت الاحساس بالذنب )
هو انا ليه مش بكتب عنك ؟
خايف ولا انا قلقان
يمكن الاتنين
بس الاربع هيكون افضل
وافضل اتعلم ضبط النفس
نفس الاحساس باليأس
الدايب فى كتاب الملاكين
*************
2- ( فى سِعت الحضن )
- احساسكَ ايه وانتَ بتحضن ايدها البرده ؟
- رديت .. ندمان
- طب ليه خايف تتعلق بيك؟
- انا خايف تتعلق بسراب
خايف اربطها بشرايينى
لتتعاص بالهم
***************
3- ( فى سِعت الحضن مكرر )
- احساسِك ايه وهو بيحضن ايدك البرده ؟
- نشوة تفاعيل
وقصائد ياما تبل الريق
بتزغزغ قلبى العطشان
بحديث معسول ومفيهش كلام
- استرسلى اكثر فى القول
- اول ما لمسنى بشرايينه
حسيت بالطعن
وكأنه شفط روحى فى روحه
واتسرسب جوايا دفاه
****************
4- ( فى سِعت زمان قوى )
- من امتى الحاله دى بتجيلكَ ؟
- من كام قصه
انا فاكر ايه ونظراتنا
وفشلى فى انى اكلمها
انا فاكر مروه وغيرتها
وزعلها عشان مبكلمهاش
انا فاكر يوم ما باركتلها
عـ الفستان الابيض والزفه
وبتول انا عمرى ما هنساها
فتحتلى عنيا على الدنيا
****************
5- ( فى سِعت النشوه )
- من امتى الحاله دى بتجيلكِ ؟
- كانت اول مره اطير مع حد
اجرلى كناريا تغنيلى
وسقانى من الاشواق بالكوم
اكلنى جيلاتى بطعم سحابة احلامنا
غطانى بحضنه من السقعه
وحكالى حكاية قبل النوم
****************
6 – ( فى سِعت لما بعٍدّت )
- فى حاجه تحب تضيفها كمان؟
- اخر قصه عاشت فيا
كات اول حب اصادفه بجد
اول ماسكة ايد بتطمن
اول راس ترتاح عـ الكتف
اول امل اتعلق بيها
عاشت فيا ومت انا فيها
*******************
7- ( فى سِعت دلوقتى )
- دلوقتى ازى الاحوال؟
- دلوقتى انا احسن بكتير
حبيت نفسى
وخرجت معاها وشفت الدنيا بألونها
وسقيتها من الاشواق بالكوم
جيبتلها جلاتى بطعم سحابة احلامنا
قولتلها حكاية قبل النوم
&&&&&&&&&&&&&&&
كلمات: عبدالرحمن منصور
موسيقى: NOSTALGIA - PIANO AND RAIN
هندسه صوتيه: عبدالرحمن منصور
:) :) :)

،؛ استــرســال ؛،

هاتى اخرك
وامسحى الحلم الى ضايع
والى راسمه
دوقيه طعم السجون
اسحليه بطول الشوارع
شوهيه جوا العيون
بررى قمع التظاهر
بررى فقع العيون
برئى امرأة العزيز
حطى يوسف فى السجون
,؛,؛,؛,؛,؛,؛,؛,؛,؛,؛,؛,؛,؛,
بررى ظلم الغلابه
برئى كل الديابه
اقسى على قلبى الحنون
برضو هفضلك فدا
برضو هفضلك غلام
برضو هبنيلك فى قلبى
الف بيت فى كل عام
برضو هغزلك ربيع
مهما كان قاسى الصقيع
بكره شمس الحق تغلب
بكره هنعادى الخصام
بكره نور الصبح يطلع
من طواغيت الظلام
ومن النهارده مش هعيط
مش هصوط مش هعيد
مالشهاده عشان ترابك
مش شئ جديد
قلبى الى كان بيخاف عليكى
بقى اقسى من الحديد
قولى فاضل كام شهيد
تعملى قلوبهم سلالم
توصلى لبر الامان
قولى واحنا هندفع مبسوطين
قولى ما احنا بندفع من زمان
انطقى وبلاش سكوت
اخلقى للحق صوت
اجلدى قلوب العساكر
واحرقى قلب الى فاكر
انك ثورة الخايبين
،؛،؛،؛،؛،؛،؛،؛،؛،؛،؛،؛،
يا احلى ضحكه
فى الزمن الحزين
يا احلى زنزانه
بتتحرق فيها السنين
معقول نسيتى انا مين
مين الى ضحى بعينه 
عشان عنيكى ينورو
ولا الوقوف فى وش الموت
مين الى كان يتصورو
مين الى كاتب فيكى شعر
مين الى خلى ليكى سعر
مين الى لحن ف الهتاف
مين الى شاف
ان الى حطوكى فـ عنيهم
لا يمكن يوم يتغيرو
،؛،؛؛،؛،؛،؛،؛،؛،؛،؛،؛،
المسينى
ارحمينى من الالم
اجلدينى الف ليله
وارسمينى عـ العلم
اكتبينى فى البطاقه
عاشق .. ولجلك بتظلم
احلمينى ف كل ليله
اذكرى تضحيتى ليكى
حتى لو كانت قليله
كل المصائب لو تهل
بتكون عشانك هينه
ايدى رغم الشقوق
قادره تكون حنينه
تعمرلك وتبنيلك
وتزرعلك فى طين نيلك
بذور العدل يا حره
وتكتبلك ولا بتخاف
وتهتفلك باحلى هتاف
يا فرحه من غير ابتسامه
على مين الملامه
مين الى ياما شبعك
من غير ما يشبع
مين الى ليكى كان بطل
رافض فى يوم يخضع
يا شمس مدفونه
امتى النهار يطلع
 &&&&&&&&&&&

كلمات: عبدالرحمن منصور
موسيقى: John Williams - Schindler's List Theme
هندسه صوتيه: عبدالرحمن منصور
:) :) :)

هاتى اخرك .. عبدالرحمن منصور

شاعرٌ ومُلَحِّنٌ وعازف أورغ (كيبورد) مصري. وُلِدَ (ضياء الكيلاني) لأبٍ من علماء الأزهر هو الراحل الشيخ/سيد الكيلاني، إمام مسجد الإمام الشافعي. وتأثر (ضياء) بتمكُّنِهِ من علوم اللغة وفنونها فبدأ يكتب الشِّعرَ في سِنِي مُراهقتِهِ الأولى. 
شارك (ضياء الكيلاني) في كثيرٍ من الفعاليات الثقافية الشعرية في القاهرة وخارجها، كما تأهَّلَ لنهائيات مسابقة (أمير الشعراء) لشعر الفصحى بأبي ظبي أعوام 2007 و 2010 و 2013و2015.
حصل (ضياء الكيلاني) على لقب (شاعر الحرية) في المسابقة التي نظَّمَتها قناة الجزيرة عام 2011 بمناسبة الربيع العربي، وشاركه اللقبَ كلٌّ من الشاعر (هِزَبر محمود) من العراق، والشاعر (ياسرالأطرش) من سوريّا.
يكتب (ضياء) الشعرَ الفصيحَ والعامّيَّ والأغنية، كما أنه لحَّن عددًا كبيرًا من المسرحيات للثقافة الجماهيرية بمصر ولفريق كلية التجارة المسرحي بجامعة القاهرة التي تخرَّجَ فيها
https://www.goodreads.com/author/show/5410096._

أُغنٍياتُ مَوقُتهْ .. ضياء الكيلانى

قصيدة :- ياما فى الهوى مساكين
كلمات :- محمود ابراهيم
القاء :- عبدالرحمن منصور
،؛،؛،؛،؛،؛،؛،؛،؛،؛،؛،؛،؛،؛،؛،؛،؛،؛،
الضحكة دى
موطنها القمر
وانتى احن من الوطن
خايف اقول
ايه الجمال ده يابنت
فتقولى عينى بتزوغ على البنات
وانا حبى ليكى مش بس لجمالك
انا قلبى دق
يوم ماشاف الطيبة فى عينكى
عشقك ،، شعاع
داخل لقلبى بدون حواجز
يالى انتى روحك من ازاز
ازاى ملاك من نور
يعشق بشر من طين
خايف اكون
مصدر الحزن الوحيد
فيارب بحق خلقك البشر
وبحق دعوة يونس فى بطن الحوت
بحق روح العذرا ورحمة الصِدّيق
ارحمنى من صنف العذاب فى بُعدها
ياما فى الهوا مساكين
قلها العشاق
كنا نضحك
اتارى الوجع
سايب فى الكون ستار
وحالف ليرجع بالشوك
ويطهر الضحك فى قلوبنا
وانا قلبى ثابت على الوجع
تكفير ذنوب
ولو ليا حق فى انا السؤال
انا امتى ميت

ياما فى الهوى .. مساكين

عشرين خمستاشر
للشاعر .. احمد بدر
مونتاج .. عبدالرحمن منصور

عشرين خمستاشر .. بدر الجميل

كأن ربنا سامع دعايا
اهو كل البشر بتضحك
وانت الوحيد غرقان دموع
دايما اطل من شباك الاوضة
والمح كل الطيور
واسأل سبحان الاله
ليه البشر مش زى الطيور
ملهاش جناح
يمكن ساعات
تاخدنى سكك الحزن
واسئل عيون الصبايا
هو انا ليه دايما
جواية صوت الحنين
بكتب الاخلاص سطور
واعزى روحى بالونس
بخرج وحيد من دنيا ضلمة
تلمح عنيا بنية فى وسط الطريقا
تشد ايدى وتطبطب عليا
اخاف اقرب منها
املها شوك
وارجع تملى للذكريات
ابكى وحيد
يمكن عيون الشعر
اصدق كتير الليلة دى
بس اللى باقى مش كتير
والدنيا زيف 
محتاج لكل الدنيا تحضن دموعى
محتاج اوى
اقرب كتير من ربنا
والمح دُعايا فى السما

دعاء .. محمود ابراهيم

كوباية الشاى البردانه بين كفوفك
مش هتدفى القلب المتكفن حزن
والذكريات سكاكين
عماله تطعن فيك وجع
و البنت مرضتش تتخبى فى جناحك
و كفرت بيك
وانت الجدع
انت الى قدمتلها قلبك بِكر
واحتويتها من الوجع
انت الى سميت النجوم على اسمها
وطفيت القمر
علشان مبتحبش تنام فى النور
يالى انت حضنك سور
بيديها الامان
ازاى قدرت
تكسّر مقاديف الحلم بإديك
تقطع شرايين الوصل بينكم
وتسيب نزيف جوابتها
عطشان لللُقى
،؛،؛،؛،؛،؛،؛،؛،؛،؛،؛،؛،؛،؛،؛،؛،
#عبدالرحمن_منصور

كوباية الشاى

كان قلبى فين ,, لما التقاكى .. محمود ابراهيم

سعات الكتابه بتوصل حجات كتير
لكن الكلام بيوصل حجات اكتر
هنا محطة قطار لحجات كتير بنحس بيها وعايشه جوانا
يا رب كل واحد يلاقى كرسيه

Abdelrhman Mansour ♪

Popular tracks