Amr Hassan

عارف ياعم مش عارف انساها 

🌵🍃عارف ياعم  مش عارف انساها 💔 عمرو حسن _ Amr Hassan

أنا مش كداب
وقت اما رميت الدنيا ف ضهري
وجيت عندك وقفلتي الباب
كان قصدي ساعتها نلِّم دموعنا ونتّبسًِّم
مش قصدي عتاب
انا جيتلك وانا كل ما فيا
بيشوف انك كل ما ليا
ومشيت بمافيش
وحياة الحلو اللي مابيننا
لو كان فيه شيء حلو مابيننا
ماتكدّبينيش
ده انا قلبي بكل ما فيه شايفك
تايه في الرعشة اللي شفايفك بتخبيها
متفائل بيكي وحاسس انك قولتيها
بستني إشارة تكون أي بداية لبكره
وبشوفها بشارة
الضحكة اللي انتي ضحكتيها
انا مش كداب
ولا جيّ اقدّم للسايب
وجع المتساب
انا جاي عشان بس اقولك بزيادة غياب
وان كان فاضل ليا محبه
لو فاضل حب ولو حبّه
اسمعي مني كلامي وحسّيه
انا مش طالب إلا وجودك
حنًِّني والنبي قلب جنودك
عينك ومشاعرك وردودك
وافتحي بابك اللي قفلتيه
انا عمري ماخدت فرص من حد
ودفعت الاتمان الكاملة
انا عمري ماقولت ياريت لو كان
نرجع لزمان
ولا فكرت ف ايه هيكون
من بعد ماكان
بس الموضوع المره دي
يستاهل اجرب من تاني
انا مش عاوز اقدم أسباب
انا جي أقول
انا مش كداب
ف غيابك مهما مشيت ورضيت
وعملت صحاب واغاني وبيت
هفضل مكسور مهما اتلميت
هفضل شارد مهما اتونِّست
ريحتك روحي
بمشي ف أوقات والليل واسع
والناس نايمين والخوف لاسع
بتخيل ايدك مسكاني
وبشوف قفلة عينك ف الضحك
زي ماكنت بشوفها الأول
أتمنى الحاصل ده يطوّل
تتحرك مزيكا بسيطه
شبه الفستان اللي عليكي
اقفل على ايدي بلا ايديكي
يوجعني حنيني ويخنقني
دي اول مرة وعهد الله
اطلب من حد يصدقني
لو كنت اذيتك
انا اسف
اسف على قد مايرضيكي
وان عشت حياتي بقدم أسفي ومايكّفيش
هافضل اقدمه
على قد ما ربنا يديني ف الدنيا واعيش
وان كنتي اذيتي انا مسامح
انا جايب بكره اتفاوض بيه
على حصة وجعك في امبارح
باتخطى سنين ضاعت منّا
من غير ما ادخل حسبة تفاحتك والجنه
وبشوف الصح اللي انا ممكن أعمله دلوقت
اني أوقّف ماراثون الوقت
واجي لحدك واطلب فرصه
فرصه ياست الستات تاني
ليا وليكي
ربنا له حكمه يجمّعنا
وعشان كده كل ما نبعد بلاقيكي
كل مانتخاصم نتصالح
لما توافقي
هيبيع جواهرجي ف يوم خاتم
هيجيب مأذون عشا لولاده
هيزيد مشروب وهيبقى اتنين
ونضيف للدنيا اتنين عشاق
وان موافقتيش
فيه رزق هيبقى انتهى مقطوع
وانتي مترضيش تقطعي ارزاق
بزيادة العند اللي ف طبعك
بزيادة الخوف اللي متابعك
انا مش عاوزك في رهان بايخ
ولا جي ابيع سهم ف بورصه
انا جاي أقولك استاهل
اخد فرصه
صعبه عليكي ؟
فين كرمك
فين فرط ايديكي
ده انتي كريمه وقلبِك سابقك
وانا لسه حبيبك ومصمم
ياهتقبلي حالاً بيّا
ياهعيش باقي حياتي بخانقك
وهخانق كل اللي يفكّر بس يشاغلك
انا قررت ان انتي توافقي
ولغيت كل احتمالات الرفض
انتي الست اللي انا بتمنى
تغلبني التجاعيد ف وجودها
وابقى معاها
واحمي مقامها
انتي الست اللي انا مش مكسوف
انحني
او اعيّط قدامها
وانتي الانسانه اللي انا موجود
علشان تتحقق احلامها
وعشان ألحق حبل غرامها
لو تاه
أو داب
انا جي اطلب ايدك منك
يا ذنوبي اللي القلب بيستغفر
عنّها لو تاب
والله بحبك
وهحبك
وانا مش كداب.

عمرو حسن - أنا مش كداب

م الكون الضخم المتقسم بحر وديان
للقارة السمرا المليانة اشكال و الوان
لبلدنا اللي النيل ف جبينها بيزرع بستان
لمكان وسط القاهرة مأهول زحمة وسكان
للبيت اللي ف زاويته قاعدة اجمل
 واحده باجمل فستان
وبتملي مكان ف كيان الشاب التلاتيني
بهدي ل تالت المرة النص اليها
وبسيب ف ايديها جواب
ف بدايته وحشتيني
ولو كل اللي عارفينك قالولك ان خاب املي
ولو كل الظروف حالفين تفارقيني
وحشتيني
ويوحشني اللي من ريحتك
ولو ورقة
واحب الجاي من طرفك
ولو طلقة
واغير من اي شئ لمسك
ولو شعري
واسامح اي شئ منك
ولو باعني
تودعني الحياة
ومتمناش ف يوم صورتك تودعني
يا وردايه ف جبل روحي
يا اول شمس ف الدنيا
يا شئ well done
يا only one
يا زوجتي الاولي و التانية
معايا حتي ف غيابك
ومش شغلاني اسبابك
شاغلني انك لازلتي بخير
وده معناه بان الدنيا لسه بخير
وان الزهر هيفتح علي غصانه
وان النورس الشارد هيتمتع بشطئانه
وان خيالي هيطاردك باحضانه
ويطلق في سماكي الطير
شاغلني انك لازلتي بخير
ميشغلنيش سوي انك تكوني
كيف ما اقول عنك
وتبقي زي ما ارضالك
وتديني الحياة فرصة اسدد بعض افضالك
ولو كان فاضلك الاكبر بانك يوم قابلتيني
وحشتيني 
وتفضل فيا ذكراكي نسيم عابر
يا اجمل حاجه ف الاشعار
واجمل حاجه ف الشاعر
يا ست الجهر و الاسرار
يا ناعمة و الطريق واعر
بحبك مهما طال البعد
وقلبي عند نفس الوعد
وحتي الفعل من غيرك
كان بنعمله مع بعض
لا عمر نسيت تاريخ بينا
ولا ريحة ولا ذكري
بنام بالليل وكلي طموح
باني المحك بكرة
بتمحي غيابي بوجودك
وايدك تحضن الاوكرة
بقول لو حتي فات العمر
وصرت مسن ف السبعين
تساعني نظرتين عواجيز
وتكفي ضحكتين شايبين
ونسمع حاجه من فيروز
تاخدنا ليوم ما شوفتيني
وحشتيني ولو عيروني بغرامي
وقالوا عليا عايش وهم
اكون الايد إذا كيوبيد
بيطلق ف اتجاهك سهم
ولو عيروني بغرامي
ولو قالوا يعيني حرام
عشقها الواد وتاه فيها
هتبقي غصب عن عينهم
حياتي واغلي معاليها
ولو قالوا ده سحراله
وعملاله عمل بالشوق
ولو قالوا ان انا اتجنيت
بقسوة او بصنعه وذوق
فلو ده سحر انا قابل
ولو ده جنان انا قابل
ولو حبك اثر خمرا
محبش افوق
واه انتي نقط ضعفي
واه حبك علي عيوبك
واه ضلك
واه قلبي اللي فاضلك
واه ديما بطبلك
واه باشارة محسوبك
كلامهم عني مش فارق
ومش هفقد امل ف رجوع
مفيش مواضيع اقولهالك
غير انك وحدك الموضوع
وان حياتي نقصاكي
وقلبي سابني و معاكي
وان عنيا شيفاكي
فاول كرسي ف يميني
بتدي ضحكي للدرويش
عشان يلقي وحشتيني
فلو كل اللي عارفينك 
قالولك اني منفعكيش
ولو كل اللي عارفينك
قالولك بكرة تنسيني 
وحشتيني !!

عمرو حسن - وحشتيني ٣

كان نام ليلتها وام كلثوم لم تنم «جددت حبك ليه بعد الفؤاد ما ارتاح ده الهجر وانت قريب .. قريب مني
كان فيه أمل لوصالك يوم
لكن بعادك ده عني
خلى الفؤاد منك محروم»
كان النهار واسع كأنه حضنها
لون السما يشبه لقمصان المدارس
وكنا مارس
لا الشمس حامية ولا المسا بارد
فلا الصواب محتمل ولا الخطأ وارد
كان كل شيء مختلف.
كان الشيطان معترف بكل شيء عمله
وكان صباح الخير
خرج الشيطان من بيته للشارع
وكإن جسمه بُن م الفاتح
كان الكافيه فاتح
والبشر قافلين
وهى قاعدة وهما مش قاعدين
اخر لقا بينهم قتلها وقتلته
كان حبها فى غيابها كانت نسيته
فضل سنة يشربها بإرادته
وبدون إرادته كان بينسى قهوته.
ضحك الشيطان بالتالى للجرسون
ولم ورقه من على الطاولة
وقال لنفسه :
بعدين معاك طيب ، ماخلصنا م السيرة ،
هنعيد لإمتى ياعم ، ماتخلى عندك دم
وكون شيطان محترم، هتعيش وحيد بينهم
وهما بيك زايدين !
ازاى هتقدر تعجب التانيين،
هما الملايكة الغلابة وحفنة المساكين،
وانت الشيطان الرجيم المجرم الخاين،
هما الزباين هنا وانت اللى مش باين،
سيرتك جناين بترويها النميمة عليك،
وانت اللى طيب زى قاتل تاب،
خرج الشيطان وقتها ثم رد الباب،
بدأوا الزباين نمّ تانى عليه،
ثم استعاذوا بالإله منه.
الوقت جرّاح له تاريخ مضمون
يوسف نسى لاخواته مايضمرون
رغم انهم ألقوه فى بير قاصدين
(وجاءوا أباهم عشاءً يبكون)
الوقت أكتر حرفة م التبرير
ماتقولش إنك كنت كما يوسف
يكفى انهم أنكروا يوم ما اترميت فى البير
كفاية نظرة عينيهم مكسوفين منك
بيحدفوك بالطوب ف مواسم الجمرات
وانت اللى نخلك زمان رطّب لهم تمرات
وانت البسيط المُحاط بدواير الكركبة
(إذ قال يوسف لأبيه يا أبتِ إنى رأيت أحد عشر كوكبا)
قال لك أبوك ماتقولش حلمك حكيت
وكتمت دمعك م الجميع وبقيت
شلال بكا نازل لجُوَّه شديد
لو شافوا قلبك يلمحوا التجاعيد
وان شافوا عينك يفهموا ليه بكيت
مر الشيطان بالليل والدنيا مش هي
كان قتيل قاتل
و كان وتر فى القانون ضل عن أهله
كلٌ مسيّر للى يستاهله
مر ف شوارع تشبهه جداً
شايل ف ضهره ذكريات فاتت
شايل مشاعر حبها وماتت
زى البلاستيك لما يصبح ورد
اللون مزهزه بس روحه فشنك
مر الشيطان الوحيد ثم قال بهدوء :
طوبى لكل وحيد بيصاحب الدنيا
طوبى لكل الصامتين جداً
كل اللى ضحكوا من وريد مقطوع
طوبى لكل فتاة خانها اختيار الحياة
لكل صاحب حكاية عمره ما حكاها
طوبى لنفوس فيه ذكرى جواها
وتبان بتضحك ف الصور بالكدب
طوبى لكل شيطان لم يؤذى غير نفسه
والله يسامح ملايكة ما أذوش سوى الشياطين
ازاى باحبِّك كده
وازاى رأيتك أمى ف دنيا ما اعرفهاش
حضنك سرير وانا طفل وقت النوم
ريحتك مطر على أرض صيف بايرة
الدايرة لما تضمنى إنتي
والبحر لما يردنى إنتي
وانتى الحاجات الصح ف دنيا غلطاتي
انتى الحياة اللى داخلة بْحُب فى حياتي
أنا الشيطان.. آسف
على إنى ما عرفتش.. أبقى كما شئتي
انا شخص صالح ماشى بخطيئتي
باكتب أغانى يرددوها الناس
شاعر صبح شارع
سكنوه بشر تانيين
واد ابن نكتة ومغنِّى بس قلبه حزين
وشيطان ف قلبه آمين
وف ضحكته شكراً.
مر الشيطان والليل
أوشك يكونله نهار
رايح لبيته والصحاب ناموا
رايح يواصل باقى أحلامه
ويقول ياليل بكره تكون أجمل
بكره تكون أنبل
بكره البشر تحضنك حضن بصراحة وقُرب
وبكره تمشى بدون ماتخاف وجود الغُرب
وبكره ممكن افوق ألقاكى فى نهاري
والقانى طير اتكسر وطلع له بيكى جناح
كان الشيطان بينام
وأم كلثوم لم تنم
«جددت حبك ليه بعد الفؤاد ما ارتاح»

عمرو حسن_هكذا قال الشيطان

حبيتك ليه _ عمرو حسن

قصيدة عمرو حسن بطلتي توحشيني لأول مرة

عمرو حسن بطلتي توحشيني

انا بعدك عرفت اني مليش بعدك
كبر سني - عمرو حسن
ابص من الغياب ع الباب واقول بالوقت هتحني
غيابك طال - عمرو حسن

وحشتيني 2 - عمرو حسن - غيابك طال

عمرو حسن مابتتنسيش يا معلم 

Amr Hassan مابتتنسيش يا معلم💔💔

‎⁨عمرو حسن- لما الست بتكره
اغسطس ٢٠٢٤

‎⁨عمرو حسن- لما الست بتكره

خلينا صحاب - عمرو حسن

عمرو حسن - وحشتيني

قصيدة انا مش كداب عمرو حسن ، اغنيه باتحدي العالم ملك محمد من حفل أكتوبر بـ ساقيه الصاوي 2019

ماحبِتش غيرها 
برغم السنين اللي فاتت عليا 
بيفضل حنين منّي ليها ف عنيا 
وتفضل كإن البنات بعد منها 
نسخ باهتة منها 
وكل الشموس اللي تبعت غيابها 
بتنعي انسحابها 
كإن الشوارع عجين لما مرت 
فنحتت اثرها 
وحفظت كلامها وخوفها وهزارها 
ومشيت جماعه مامشيتش مفرد 
عشان غاب معاها مِساها ونهارها
بتسألني عنها برودة ايديا 
ورعشة سلامي 
ويسألني عنها سكوتي وكلامي 
وحتى كلاب الشوارع بتسأل
وجندي الإشارة 
ويسألني قلبي وكلبي ومرايتي 
وتسألني ساعتي ف معاد الزيارة 
بتوحشني زي العيال ف المدارس لعين امهاتهم 
وتوحشني زي ارتباط الملابس بايد شماعاتهم 
وسايباني زي اللي ماتوا وفضلوا 
بيمشوا ف حياتهم
تشم القلوب كل يوم زهر فايح 
وتتبقى وردة ويفضل عبيرها

ماحبتش غيرها 
وليها مكانه مخليّه قلبي بيسلك دروبها  
خدتني لدرجة تخليني اشوف المزايا ف عيوبها 
وصوتها 
وايه زي صوتها 
نزول المطر فوق خشب بيت قديم 
نعومة نجاة وبحة حليم 
وضحكتها تشبه دخول النسيم 
على ارض طالها الخريف من زمن 
ف يوم ما اتقابلنا 
ماكنتش باشوف الحياه ليها معنى 
وحسيت كإني عارفها لزمن 
كإن النصيب كان بعَدنا وجمعنا
وسددت تمنه وقبضت التمن
بسلم عليها كإني سايبها ف غربة ورجعت 
وسكتت ف لحظتها لكن سِمعت 
وغمضت عيني عشان املى روحي
قمر غاب ف ليلكم ونوّر سطوحي
وصالحتني كل السنين اللي فاتت
مجرد ماعدّت 
وقفنا ف مكاننا وخطاوينا مدِّت 
وفجأة انفجر سيل طويل م الأغاني 
كل ده كان ليه 
ياللي بتسأل عن الحياة 
بعيد عنك 
وسيرة الحب 
كبر الغرام 
بهواك 
حيرت قلبي معاك 
وقولت هاقدر ايوم انساك
وكل ما انساها افتكرها 
ماحبتش غيرها 

ماحستش عمري باحساس مشابه تجاه أي واحدة
كإن الغرام اللي مكتوبلي كامل 
خرج غصب عني وعلى دفعه واحدة 
كِبر فيا معنى 
وصار بيننا لعنه 
بدأت معانا ف يوم ما اجتمعنا
وانا كنت اصغر سنين من كده 
ماكنتش مأمِّن ليغدر زماني  
وعايش مآمن وواقف مكاني 
وشارد ف لون الحياة البرتقاني 
وتارِك بيبان الغياب مفتوحين 
ففاجئتني ضربة على غفله مني 
وسلمت راية ف أول كمين
وفاتت سنين 
واديني كإن اللقا من ثواني
لكني بقيت للأسف حد تاني 
خانتني الظروف واتسجنت ف غيابها 
ولساني ايد ع الاكر عند بابها
وبعد اما كنا شباب ف البداية 
كبرنا سنين جوه شرح الرواية
واصبح مابيننا جبال من جليد 
بلادها بعيد 
وارضي ملاها الحداد والحديد 
وتجاعيدي مرت شقوق الغيطان جوه طمي الوريد 
وأصبحت اكبر 
وأصبحت اعدي الطريق ف الإشارة 
باتقل هدومي وبلبس كوفيّه 
واحس بجروحكوا واوجاعكوا فيّا 
وأصبحت اعقل 
واهدى وأتقل 
وهي كمان حاجه فيها انطفِت 
وعاشت ظروف متعبه واختفِت 
لكن لسه نفس الصبيه الجميله 
وصاحبة ليالي الغرام الطويلة 
ولسه عيون ممكنه مستحيله 
وست البنات كلهن ف عنيا 
ومهما ايدين ناعمه مسكت ايديا 
ومهما عيون ثبتتني ف مكاني 
هتفضل رجولتي وطفولتي عشانها 
مايملاش مكانها ف يوم حد تاني 
ولا واحدة تربط مصيري بمصيرها 
ماحبتش غيرها 

ومايأسش ابداً 
ولو حتى قالوا الحكايه ف اخرها 
ولو صوت صحابي ف وداني محاصرني 
ولو طول غيابها خانقني وعاصرني 
ولو حتى عدت سنين تانية بيننا 
هاقول انه وارد 
وجايز وممكن 
وامنّي خيالي باجمل نهاية 
وهي معايا 
وجايه تعوضني لحظة بكاها بلحظة بكايا
وراجعة بكل الورود اللي دبلت 
والاقيها قبلت تكمل معايا 
ولو ساعه واحدة 
ولو حتى نظرة 
هاحس اني مرة مشيت وانتصرت 
واني جنيت قد لما انتظرت 
فسايب مساحة ف بيتي لخيالها 
وسايب مساحة ف قلبي لعيالها
وسايب اوضتنا ترتبها هي 
وسايب مخدة زيادة وكوفيه 
ومختار اضاءة تلائم عنيها 
وعامل حسابي عليا وعليها 
واقول بكره اجمل وهاقدر وهاكسب 
رهاني ف حاجات كان خيالي خسرها 

ماحبتش وافخر بكونها ف حياتي 
واني ف حياتي ماحبتش غيرها.

لـ princeps 💛👑

محبتش غيرها _ عمرو حسن

محبتنيش
بلاش اكدب على نفسي 
ولا ابرر ولا اصوّر لروحي الوهم 
هيفرق ايه سبب موتي يكون برصاصه ولا بسهم ؟ 
مراية الحب مش عميا
مراية الحب كدابة 
وكان لازم تغيب عني ياسايبه يا اما متسابه 
وكان لازم بنفسي احس 
كان لازم بعيني اشوف
اقابل وشها البارد 
بقلبي الشارد الملهوف 
واغنيلها 
واعيش ليلها 
واقدّف مركبي ف نيلها 
واراهن بالورق كله على اخر رقم كسبان 
دخلت علاقة وانا مستور 
وخارج منها وانا عريان 
وخارج منّها شاكك 
ومش شايل لحد أمان 
ماحبتنيش 
برغم اني وكتاب الله ماقصرتش 
ويوم ماقالتلي عايزه اعرف ما أنكرتش 
ويوم ماقالتلي زعلانه 
مابررتش 
معاها كنت انا التاني وابدّيها 
بنقص من حياتي حاجات وبدّيها 
ولما تمدلي ايديها 
امد ايديا ماسحبهاش 
ماحبتنيش وحبيتها 
ودايرة تقول ماحبتهاش 
غريبة القلب وعمايله 
ده انا لو كنت بعاديني ماكنتش هامشي ناحيتها 
ولو جوايا بكرهني ماكنتش برضه حبيتها 
مافيش عندي سبب واحد يبرر نظرتي ليها 
رسمت سيناريو جوايا وصدقته 
وقولت لنفسي بتحبك وعينها عليك 
ياواد قرّب 
ياواد جرّب
دي لسه ف دنيتك داخله ولسه خيالها متغّرب 
لحد ما مرت الأيام وانا بخسر ف كل قرار
وعشت حياتي بـ اتنازل وتغلط والتمس اعذار 
وكنت حمار 
مفكّر ان لجل الحب نفرّط عادي ف كرامة  
اشوف نمرتها ف موبايلي 
احس شعور غريب جايلي 
وصوتي يتقلب اهدى واطوّل ف الكلام وارغي
وكل كلامها كان منهج مذاكره حتى بالملغي 
وشايف انها كوني وشمسي وضلتي وناسي 
وبتأسف لاكون غلطان ف حاجه عملتها وناسي 
اكلمها عن الحاضر وعن بكره 
وعن بيتنا 
وباخد رأيها دايماً ف علاقتنا 
وهي كلامها كان اخره خلاص وتمام 
صباح الخير 
مساء الخير 
ويلا سلام 
بطلّع منها الكلمة بطلوع الروح 
وكنت باقول وايه يعني في ناس بتحس مش بتبوح 
لقيت افعالها زي كلامها بالواحدة
وبمشي ليها ميت خطوة 
ماتمشيش ليا ولا واحدة 
انا زعلان على نفسي 
عشان شكّيت كده ف نَفسي
ودوست عليا بالجامد عشان واحدة 

ماحبتنيش 
انا يمكن فراغ عادي 
بديل القعده ف النادي 
رواية بس ليها ايدين 
ويمكن كنت توصيلة 
ونقطه بُعد لعلاقتين 
ويمكن كنت بالنسبالها تكفيره 
وعرفتني تسدد دين 
ويمكن أي شيء تاني اكيد عارفاه 
ماسألتشِ وهي بترتكب حبي 
وايه ذنبه اني ابقى معاه ؟
ماحستش بذنب ازاي 
وعاشت تتهم فيّا 
وترميني بتهم ظالمة 
بتطلب مني اطفي النور وتتخانق عشان ضلمه 
وطول الوقت بتشكّك 
وبتفاوض
وبتخانق 
وبتراود 
وبتعاير 
وبتندّم 
كإني باجري وانا واقف 
وفاكر نفسي هاتقدّم 
واديني جريت لحد ماشوفت وضعي ازاي 
ماحبتنيش 
وسايباني شعور ميّت  
بشوف ايه ف الحياه يتعاش 

بـ اعِّد خسايري وانا خارج 
دموعي وخوفي ومشاكلي 
وايامي اللي راحوا بلاش 

لكني باقول انا راضي 
واحط الجملة دي قصادي 
" ده ذنب وجايلي م الماضي بدعوة واحدة مابتنساش "

محبتنيش _ عمرو حسن

الحلوة قالت: 
ماله ده؟
 فارد جناحه ف الفضا وراسم خطاه 
امّا اعرفه وازرع جناينه واخطفه
 واطلب رضاه 
تسلّية برضه ومعرفة رسم وصفه 
بكره هيلحس الارصفه
 علشان اخلّي اللأه آه
والواد بسيط ولاجاش ف باله 
شادد رحاله ماكانش بيأمّن وراه 
شارد ف عينها اللي اكتشف منها البكا 
طايح ف حضن معلقُه وجارح صِباه 
أمّنتها .. ومقام نبينا المصطفى
حلّفتها .. بحق نور اللي اصطفاه
تضم قلبي اللي اتأذى
وتصون لقانا وليل صفاه
قتلتني وف ليله العزا 
قالت: وماتصلوش وراه!!

على ايه ياست!؟؟
ع ايه ولية
 هو إحنا داخلين معركه أممت طين الباشا والدك وانتي جاية تردهالي بيني وبينك دم يعني ولاطار
مش يوم ما شوفتيني ابتسمتي وايدتي نار
مش ده صباعك الي شاور
مش ده خيالك الي ناور
مش ده لسانك الي حاور لاجل خلق وناس كتار
طب ايه بقى؟
ولا انتي اكل وبحلقة
عجباكي حاجة يا تشتريها يا روّحي
عماله ليه تتطوحي
ولا انتي متربية تاخدي وتشطحي
وترمي
ودادي يجيب جديد
أنزفك شعر وقصايد واحكي للناس غنوتك
امدح بصوتي محبتك وافرد في توبك
بتحدى نوري بضلمتك واستر عيوبك
وانتي التهم متجهزة صفين طوال
خاين وضيع
وكذا وكذا وسفيه وضال
وانتي الامان والاحترام
وانتي التمام والـ ما يرام
انتي اللي صلحتي الترام
وانا اللي وقفت النضال
على ايه يا ست
مانفضها..
بفره مناهده نرولها وشكراً سلام
من غير كلام
من غير ما نهري ف مين غلط او مين تمام
دلوقتي فعلاً مستعد اني امسحك مسحه عظيمه تريحك من زكرياتي 
سكران وفوقت وخمرتي كانت وجودك يا حياتي 
يالي جيبالي الكلام والغمز واللمز السخيف
وان كان علي لحس الرصيف
اديه بقا صف مرايات
ان كان علي الحزن اللطيف
دول مش صوابعي 
دول نايات
وانا بعترفلك بالصواب في كل شيء 
انتي الاماكن والطريق
انتي الطريق الدولي والفرعي البطيء
انتي علامه النصر صوت الحب سيده الغناء العربي والوجه الرقيق 
وانا ذكي رستم هتلر موسلين تشرشل متعالي فضولي اناني مش مظبوط وبذيء
عادي..
وانتي بتقولي لصحابك اد ايه انا شخص قاسي 
وطبعي في غايه السئاله
ابقي قولي ان انا سبب البطاله سبب ف انخفاض منسوب النيل وان وقتك ضعف تخفيف دمي التقيل وان زوقي كله زوقك
واني بتمرمغ ف شوقك بس جاحد 
اشتميني تعلي مني 
زمي سيرتي هتمدحيني 
طلعي الطبع الي فيكي وفرحيني
دول كاسين منقوعهم ايه الي يجبوني ارمي عمري بين ابديكي واقول يا دوب 
خمره ايه تاخدني لواحده بتكسر قلوب 
كنت بستحمل مصايب 
مش ببين
كنت رغم الشده لين 
عشت اقول ع الغلطه ورده 
كنت اشوف الشوكه ورده 
واوصف القاسي انه هين
سُكر بَين
 هانج اوڤر
كنتي ليه ف هدومي رقعه وقلبي معمولك بلوڤر 
كنت مش بصعب عليكي وانتي وبتلمي السناريو وتنشريه
كل شيء من قلبي عامله تكدبيه
ده انتي شككتيني فيا لدرجه اني قولت كتر خيرها واخده بالها مني 
وانتي ابعد واحده عني 
الي عاش بيبوس عشان تضلي 
جاي يبوسها عشان توريه التخلي 
الي طول العمر بيقولك هينفع 
جاي يقولك مش هينفع 
السنين الي اترموا ف الارض حتي مش هتشفع 
قولي ان انتي الي سايبه 
وان انا مصاص دماء 
وانتي غلبانه بغباء 
وعبيطه خايبه 
واني جيبتك بالطريقه 
ان اغراضي دنيئه
وان خطواتي بطيئه 
والحبال ف الوصل دايبه 
الي عاوزاه يتعمل
يتعمل وتحلي عني 
عاوز ارجع للي راح ف الزحمه مني 
عاوز اكسر وحدتي واخرج براسي
عاوز اوهب مركبي لغير المراسي 
ارمي للايام شراعي 
واتركه للناس تراعي
القي منهم كلمه تفرح 
حد من الناس الي خسرانهم عشانك يجي ويحل ف مكانك يبتسملي ويملي عيني 
عاوز اسمع حد بيقول اني طيب 
واني لسه قلبي صافي 
حد يمشي في روحي حافي وهوه آمن 
واحده تحلفلي ان ممكن يجي بكره 
انتي مش غلطانه فيا 
كله غلطي
كله كان زرعي وحصادي
قلبي بعد سنين معشش
صاحي فاضي 
واتكسر كاسك ف ايدي وخمره طار
النهارده انا خدت بالي من النهار
خدت بالي من ملامحي
ثغري باسم 
لوني قمحي 
قلب عيل 
النهارده التئم جوايا جرح مكانشي هين او قليل 
فوقت بعد ما وقت فات 
بس فوقت.. 
بالسلامه..
سايبه فيا علامه عادي
 فيها ايه ما تسيب علامه
بس سابت بعد منها 
حد اطيب من سنينها 
حد مش هتشوفه عينها 
من هنا ليوم القيامه .

محبتنيش _ عمرو حسن

Ahmad Hmada

Recent comments

blue

blue

blue

Bahaa.19_95

Related tracks