يويا

"عمرو حسن | وحشتيني ٣"🥀

م الكون الضخم المتقسم بحر وديان
للقارة السمرا المليانة اشكال و الوان
لبلدنا اللي النيل ف جبينها بيزرع بستان
لمكان وسط القاهرة مأهول زحمة وسكان
للبيت اللي ف زاويته قاعدة اجمل
 واحده باجمل فستان
وبتملي مكان ف كيان الشاب التلاتيني
بهدي ل تالت المرة النص اليها
وبسيب ف ايديها جواب
ف بدايته وحشتيني
ولو كل اللي عارفينك قالولك ان خاب املي
ولو كل الظروف حالفين تفارقيني
وحشتيني
ويوحشني اللي من ريحتك
ولو ورقة
واحب الجاي من طرفك
ولو طلقة
واغير من اي شئ لمسك
ولو شعري
واسامح اي شئ منك
ولو باعني
تودعني الحياة
ومتمناش ف يوم صورتك تودعني
يا وردايه ف جبل روحي
يا اول شمس ف الدنيا
يا شئ well done
يا only one
يا زوجتي الاولي و التانية
معايا حتي ف غيابك
ومش شغلاني اسبابك
شاغلني انك لازلتي بخير
وده معناه بان الدنيا لسه بخير
وان الزهر هيفتح علي غصانه
وان النورس الشارد هيتمتع بشطئانه
وان خيالي هيطاردك باحضانه
ويطلق في سماكي الطير
شاغلني انك لازلتي بخير
ميشغلنيش سوي انك تكوني
كيف ما اقول عنك
وتبقي زي ما ارضالك
وتديني الحياة فرصة اسدد بعض افضالك
ولو كان فاضلك الاكبر بانك يوم قابلتيني
وحشتيني 
وتفضل فيا ذكراكي نسيم عابر
يا اجمل حاجه ف الاشعار
واجمل حاجه ف الشاعر
يا ست الجهر و الاسرار
يا ناعمة و الطريق واعر
بحبك مهما طال البعد
وقلبي عند نفس الوعد
وحتي الفعل من غيرك
كان بنعمله مع بعض
لا عمر نسيت تاريخ بينا
ولا ريحة ولا ذكري
بنام بالليل وكلي طموح
باني المحك بكرة
بتمحي غيابي بوجودك
وايدك تحضن الاوكرة
بقول لو حتي فات العمر
وصرت مسن ف السبعين
تساعني نظرتين عواجيز
وتكفي ضحكتين شايبين
ونسمع حاجه من فيروز
تاخدنا ليوم ما شوفتيني
وحشتيني ولو عيروني بغرامي
وقالوا عليا عايش وهم
اكون الايد إذا كيوبيد
بيطلق ف اتجاهك سهم
ولو عيروني بغرامي
ولو قالوا يعيني حرام
عشقها الواد وتاه فيها
هتبقي غصب عن عينهم
حياتي واغلي معاليها
ولو قالوا ده سحراله
وعملاله عمل بالشوق
ولو قالوا ان انا اتجنيت
بقسوة او بصنعه وذوق
فلو ده سحر انا قابل
ولو ده جنان انا قابل
ولو حبك اثر خمرا
محبش افوق
واه انتي نقط ضعفي
واه حبك علي عيوبك
واه ضلك
واه قلبي اللي فاضلك
واه ديما بطبلك
واه باشارة محسوبك
كلامهم عني مش فارق
ومش هفقد امل ف رجوع
مفيش مواضيع اقولهالك
غير انك وحدك الموضوع
وان حياتي نقصاكي
وقلبي سابني و معاكي
وان عنيا شيفاكي
فاول كرسي ف يميني
بتدي ضحكي للدرويش
عشان يلقي وحشتيني
فلو كل اللي عارفينك 
قالولك اني منفعكيش
ولو كل اللي عارفينك
قالولك بكرة تنسيني 
وحشتيني !!

عمرو حسن - وحشتيني ٣

قصيدة عمرو حسن بطلتي توحشيني لأول مرة

عمرو حسن بطلتي توحشيني

بطلتي توحشيني - عمرو حسن

خلينا صحاب 2 عمرو حسن حفلة مكتبة الإسكندرية 26 أغسطس 2022



عمرو حسن | للمرة الأولى (خلينا صحاب الجزء الثاني) 

حظها الاغبر
خلاها تسيب كل المخاليق وتفكر فيه
كان يوم منحوس
مش طلعالو في الصبح شموس
لو جه صحابها يوم سألوها ليه بتحبيه
عايشه متبعاه
وكأن الدنيا بتبدأ عنده وتخلص بيه
ويقولو يا بنتى دا مش شبهك فتقول حباه
ويقولو يا ستي دا مش عاوزك فتقول عاوزاه
علاقه من طرف بائس يا حول الله
قصادها الدنيا وما فيها
وناس عاشقين وناس شاريين وناس دايبين
لكن هي آه هتقنع مين
مفيش في عينيها خلق سواه
مفيش غيره في وزن يطب
وادي القصة وادي المعاناه
وادي الجيباه مراية الحب
بتبعتله وتستناه
وتدعيله وتترجاه
وتنتظره وتتمناه
وهو دا حب بالذمه
دا إسمه عقاب
لحد ما خدها مرة حماس
ودلدق منها الإحساس
فجالها الرد خلينا بجد اصحاب
بنرجع خطوتين للخلف
وبنشوفها بتصدم حد وتقوله الكلام ذاته
بترمي حد بحجاته لعطف الناس
وبنشوفها في نفس المشهد الثابت
بتشرب برضو نفس الكأس
يادي الدنيا اللي عجنانة
وعاملة مشكلة معانا
وسَيبانا لدواير كل يوم تتعاد
مفيش لحظة علينا تمر
بدون ما تجيب ضحايا جداد
صاحبنا زي ما في بالكم
ولا في باله
بيرمي بياضه على البنت اللي في خياله
وهي لا واخده بال منه
ولا بولا حاجة حساله
يحب القط خناقه
يحب الشخص قتّاله
يعدي اليوم وراه اليوم
يعدي الشهر والتاني وصحبتنا بتستناه
أملها كله على لحظه يفوق فيها
يخل توازنه في الدنيا ويشعر وقتها بيها
تخيل واحدة بتقرر تضيع عمرها في سراب
لواحد مهما تعمله حاططها في خانة الاصحاب
والله احنا نستاهل وتستاهل
عشان قفلت عينيها بايدها على أوهام
ورضيت تبقى آخر واحدة كاتبها في ليستة الأحلام
وقبلت يجي يحكيلها غرامه لواحدة مش قبلاه
دا ملعون الهوا
لو كان يذل الشخص قدام اللي عاوزه معاه
تصحى تقرأ بوستاته
تتابع صوره وكلامه مع الناس اللي في حياته
وتكتب اسمه على القلب الحزين بالجاف
إذا شافت في يوم اسمه على التليفون
دا يوم العيد وما أدراك
ترد كأنها في ثانوي وجابت طب
يا عيني حل مش طايله وعايزه تحب
شوف الحكمة
شوف يجيلها مرة شاعر شاب
تقوله يا ريت نكون أصحاب
وبعد سنين تحب فلان ويصدمها
ويجري لواحدة مش شبهه
ويكلمها تكون بتحب شاعر شاب
بيكتب شعر دلوقتي ومهملها
تكون الدايرة دايرة ازاي
بدون اشخاص تكملها
وتبقى الدنيا دنيا ازاي
بدون حرقه هوا واعصاب
عشان في المشهد الكامل نعيش أغراب
واللي زمان قالك اصحاب خلينا
دلوقتي بيتقالو في وشه
خلينا اصحاب خلينا اصحاب

عمرو حسن - خلينا صحاب الجزء الثاني | Amr Hassan 2022 - Friend Zone 2

‎⁨عمرو حسن- لما الست بتكره
اغسطس ٢٠٢٤

‎⁨عمرو حسن- لما الست بتكره

بلاش تمثيل عشان صياعتى و فشلى من غيرهم مكنش يجوز تحبينى

عمرو حسن وحشتيني

عمرو حسن - وحشتيني

هشوفك صدفة معرفكيش - ابراهيم فرج

باعتبار اني بكره هموت - ابراهيم فرج

عمرو حسن  خلينا صحاب

قصيدة انا مش كداب عمرو حسن ، اغنيه باتحدي العالم ملك محمد من حفل أكتوبر بـ ساقيه الصاوي 2019

محبتنيش
بلاش اكدب على نفسي 
ولا ابرر ولا اصوّر لروحي الوهم 
هيفرق ايه سبب موتي يكون برصاصه ولا بسهم ؟ 
مراية الحب مش عميا
مراية الحب كدابة 
وكان لازم تغيب عني ياسايبه يا اما متسابه 
وكان لازم بنفسي احس 
كان لازم بعيني اشوف
اقابل وشها البارد 
بقلبي الشارد الملهوف 
واغنيلها 
واعيش ليلها 
واقدّف مركبي ف نيلها 
واراهن بالورق كله على اخر رقم كسبان 
دخلت علاقة وانا مستور 
وخارج منها وانا عريان 
وخارج منّها شاكك 
ومش شايل لحد أمان 
ماحبتنيش 
برغم اني وكتاب الله ماقصرتش 
ويوم ماقالتلي عايزه اعرف ما أنكرتش 
ويوم ماقالتلي زعلانه 
مابررتش 
معاها كنت انا التاني وابدّيها 
بنقص من حياتي حاجات وبدّيها 
ولما تمدلي ايديها 
امد ايديا ماسحبهاش 
ماحبتنيش وحبيتها 
ودايرة تقول ماحبتهاش 
غريبة القلب وعمايله 
ده انا لو كنت بعاديني ماكنتش هامشي ناحيتها 
ولو جوايا بكرهني ماكنتش برضه حبيتها 
مافيش عندي سبب واحد يبرر نظرتي ليها 
رسمت سيناريو جوايا وصدقته 
وقولت لنفسي بتحبك وعينها عليك 
ياواد قرّب 
ياواد جرّب
دي لسه ف دنيتك داخله ولسه خيالها متغّرب 
لحد ما مرت الأيام وانا بخسر ف كل قرار
وعشت حياتي بـ اتنازل وتغلط والتمس اعذار 
وكنت حمار 
مفكّر ان لجل الحب نفرّط عادي ف كرامة  
اشوف نمرتها ف موبايلي 
احس شعور غريب جايلي 
وصوتي يتقلب اهدى واطوّل ف الكلام وارغي
وكل كلامها كان منهج مذاكره حتى بالملغي 
وشايف انها كوني وشمسي وضلتي وناسي 
وبتأسف لاكون غلطان ف حاجه عملتها وناسي 
اكلمها عن الحاضر وعن بكره 
وعن بيتنا 
وباخد رأيها دايماً ف علاقتنا 
وهي كلامها كان اخره خلاص وتمام 
صباح الخير 
مساء الخير 
ويلا سلام 
بطلّع منها الكلمة بطلوع الروح 
وكنت باقول وايه يعني في ناس بتحس مش بتبوح 
لقيت افعالها زي كلامها بالواحدة
وبمشي ليها ميت خطوة 
ماتمشيش ليا ولا واحدة 
انا زعلان على نفسي 
عشان شكّيت كده ف نَفسي
ودوست عليا بالجامد عشان واحدة 

ماحبتنيش 
انا يمكن فراغ عادي 
بديل القعده ف النادي 
رواية بس ليها ايدين 
ويمكن كنت توصيلة 
ونقطه بُعد لعلاقتين 
ويمكن كنت بالنسبالها تكفيره 
وعرفتني تسدد دين 
ويمكن أي شيء تاني اكيد عارفاه 
ماسألتشِ وهي بترتكب حبي 
وايه ذنبه اني ابقى معاه ؟
ماحستش بذنب ازاي 
وعاشت تتهم فيّا 
وترميني بتهم ظالمة 
بتطلب مني اطفي النور وتتخانق عشان ضلمه 
وطول الوقت بتشكّك 
وبتفاوض
وبتخانق 
وبتراود 
وبتعاير 
وبتندّم 
كإني باجري وانا واقف 
وفاكر نفسي هاتقدّم 
واديني جريت لحد ماشوفت وضعي ازاي 
ماحبتنيش 
وسايباني شعور ميّت  
بشوف ايه ف الحياه يتعاش 

بـ اعِّد خسايري وانا خارج 
دموعي وخوفي ومشاكلي 
وايامي اللي راحوا بلاش 

لكني باقول انا راضي 
واحط الجملة دي قصادي 
" ده ذنب وجايلي م الماضي بدعوة واحدة مابتنساش "

محبتنيش _ عمرو حسن

الحلوة قالت: 
ماله ده؟
 فارد جناحه ف الفضا وراسم خطاه 
امّا اعرفه وازرع جناينه واخطفه
 واطلب رضاه 
تسلّية برضه ومعرفة رسم وصفه 
بكره هيلحس الارصفه
 علشان اخلّي اللأه آه
والواد بسيط ولاجاش ف باله 
شادد رحاله ماكانش بيأمّن وراه 
شارد ف عينها اللي اكتشف منها البكا 
طايح ف حضن معلقُه وجارح صِباه 
أمّنتها .. ومقام نبينا المصطفى
حلّفتها .. بحق نور اللي اصطفاه
تضم قلبي اللي اتأذى
وتصون لقانا وليل صفاه
قتلتني وف ليله العزا 
قالت: وماتصلوش وراه!!

على ايه ياست!؟؟
ع ايه ولية
 هو إحنا داخلين معركه أممت طين الباشا والدك وانتي جاية تردهالي بيني وبينك دم يعني ولاطار
مش يوم ما شوفتيني ابتسمتي وايدتي نار
مش ده صباعك الي شاور
مش ده خيالك الي ناور
مش ده لسانك الي حاور لاجل خلق وناس كتار
طب ايه بقى؟
ولا انتي اكل وبحلقة
عجباكي حاجة يا تشتريها يا روّحي
عماله ليه تتطوحي
ولا انتي متربية تاخدي وتشطحي
وترمي
ودادي يجيب جديد
أنزفك شعر وقصايد واحكي للناس غنوتك
امدح بصوتي محبتك وافرد في توبك
بتحدى نوري بضلمتك واستر عيوبك
وانتي التهم متجهزة صفين طوال
خاين وضيع
وكذا وكذا وسفيه وضال
وانتي الامان والاحترام
وانتي التمام والـ ما يرام
انتي اللي صلحتي الترام
وانا اللي وقفت النضال
على ايه يا ست
مانفضها..
بفره مناهده نرولها وشكراً سلام
من غير كلام
من غير ما نهري ف مين غلط او مين تمام
دلوقتي فعلاً مستعد اني امسحك مسحه عظيمه تريحك من زكرياتي 
سكران وفوقت وخمرتي كانت وجودك يا حياتي 
يالي جيبالي الكلام والغمز واللمز السخيف
وان كان علي لحس الرصيف
اديه بقا صف مرايات
ان كان علي الحزن اللطيف
دول مش صوابعي 
دول نايات
وانا بعترفلك بالصواب في كل شيء 
انتي الاماكن والطريق
انتي الطريق الدولي والفرعي البطيء
انتي علامه النصر صوت الحب سيده الغناء العربي والوجه الرقيق 
وانا ذكي رستم هتلر موسلين تشرشل متعالي فضولي اناني مش مظبوط وبذيء
عادي..
وانتي بتقولي لصحابك اد ايه انا شخص قاسي 
وطبعي في غايه السئاله
ابقي قولي ان انا سبب البطاله سبب ف انخفاض منسوب النيل وان وقتك ضعف تخفيف دمي التقيل وان زوقي كله زوقك
واني بتمرمغ ف شوقك بس جاحد 
اشتميني تعلي مني 
زمي سيرتي هتمدحيني 
طلعي الطبع الي فيكي وفرحيني
دول كاسين منقوعهم ايه الي يجبوني ارمي عمري بين ابديكي واقول يا دوب 
خمره ايه تاخدني لواحده بتكسر قلوب 
كنت بستحمل مصايب 
مش ببين
كنت رغم الشده لين 
عشت اقول ع الغلطه ورده 
كنت اشوف الشوكه ورده 
واوصف القاسي انه هين
سُكر بَين
 هانج اوڤر
كنتي ليه ف هدومي رقعه وقلبي معمولك بلوڤر 
كنت مش بصعب عليكي وانتي وبتلمي السناريو وتنشريه
كل شيء من قلبي عامله تكدبيه
ده انتي شككتيني فيا لدرجه اني قولت كتر خيرها واخده بالها مني 
وانتي ابعد واحده عني 
الي عاش بيبوس عشان تضلي 
جاي يبوسها عشان توريه التخلي 
الي طول العمر بيقولك هينفع 
جاي يقولك مش هينفع 
السنين الي اترموا ف الارض حتي مش هتشفع 
قولي ان انتي الي سايبه 
وان انا مصاص دماء 
وانتي غلبانه بغباء 
وعبيطه خايبه 
واني جيبتك بالطريقه 
ان اغراضي دنيئه
وان خطواتي بطيئه 
والحبال ف الوصل دايبه 
الي عاوزاه يتعمل
يتعمل وتحلي عني 
عاوز ارجع للي راح ف الزحمه مني 
عاوز اكسر وحدتي واخرج براسي
عاوز اوهب مركبي لغير المراسي 
ارمي للايام شراعي 
واتركه للناس تراعي
القي منهم كلمه تفرح 
حد من الناس الي خسرانهم عشانك يجي ويحل ف مكانك يبتسملي ويملي عيني 
عاوز اسمع حد بيقول اني طيب 
واني لسه قلبي صافي 
حد يمشي في روحي حافي وهوه آمن 
واحده تحلفلي ان ممكن يجي بكره 
انتي مش غلطانه فيا 
كله غلطي
كله كان زرعي وحصادي
قلبي بعد سنين معشش
صاحي فاضي 
واتكسر كاسك ف ايدي وخمره طار
النهارده انا خدت بالي من النهار
خدت بالي من ملامحي
ثغري باسم 
لوني قمحي 
قلب عيل 
النهارده التئم جوايا جرح مكانشي هين او قليل 
فوقت بعد ما وقت فات 
بس فوقت.. 
بالسلامه..
سايبه فيا علامه عادي
 فيها ايه ما تسيب علامه
بس سابت بعد منها 
حد اطيب من سنينها 
حد مش هتشوفه عينها 
من هنا ليوم القيامه .

عمرو حسن - بعد السكران ما يفوق

متتخضيش .. 
لو جيتي بكره تسالي عني .. 
لقيتيني طول الوقت مبردش ..
متتخضيش لان دي حاجه متخضش  

عارفه اللي يوجع واللي ميداويهوش زمن ..
انك غلطتي وانا عيشت بدفع ف التمن .. 
 متقلب الود مش ممكن يؤتمن .. 

متتخضيش اذا شوفتيني ف الشارع .. 
وشفتك بس عادي مشيت مسلمتش .. 
فيه حاجات كده عدت و خلصت بس مندمتش .. 

وحشتيني .. 
ودي بتتقال ف اي كلام .. 
ف ساعة صفر بين اتنين .. 
وحشتيني .. 
اذا كانت وحشتيني تقولها العين .. 

انا امبارح .. 
وقفت ف شارع البورصه .. 
كاني غريب وماعرفهوش .. 
دخلت محطة الرمل وانا خايف قوي .. 
ريحة فراقنا بتحوم ف المكان والناس مبتحسش بحاجه .. 
محدش افتكر اللي دار وانك مشيتي وان انا ممشتش .. 
الناس بتنسي بس انا منستش .. 

انا كنت محتاجلك قوي .. 
طلعت نتيجتي وكنت شيلت السنه .. 
حبيتي كل الناس الا انا ..
سيباني من غير اتهام .. 
عارفه السهام .. ريهام ..

يمكن مشيتي عشان انا عيلتي علي قدها .. 
ولا اللي زيي ميستاهلش يحب .. 
انا كنت طفل ببصلك وبشب ..
شايفك من الباب الخشب ..
وانتي شيفاني م الباب الحديد .. 
انا ليه محستش غير بالوحده ف فراقنا ..
مع اني كنت ف وجودك وحيد .. 

ال ١١٢ رساله كلهم بالغلط .. 
كل اللي قالوا ارجعيله كان بيساعده ..
كل الساعات اللي ضاعت ف انتظارك نسيتها .. 
وكسبت نفسي لما اشتريتها .. 
يعني بالبلدي انتهينا وطوبتك رميتها .. 

تعالي وقوليلي مشيتي عشان ..
محدش ف عيلتك موافق عليا 
مفيش وقت ليا ف حياتك نهائي 
وعندك مشاغل وعندك دراستك .. 
قريب مسافره وجايز تغيبي .. 
وخايفه عليا اتعلق ف حبلك .. 
جايلك مهندس وجاهز ولازم 
توافقي بنصيبك وباللي اتكتبلك .. 
اقسم بربي عياطي ف غيابك ..
دموع ماتبكتش لكل اللي قبلك 


سنين م اللي عادوا .. 
بدور ف فاضي ..
وشايف هزايمي بتكبر قصادي .. 
موثق خسايري وباصم وماضي 
وعمر اما عيشته بفكر ف ماضي 
كاني ف محاكم وقلبك ده قاضي 
بيحكم عليا اموت بالرصاصه 
واشوف الحياه قبل لونها الرمادي .. 

حصلي الشرف .. 
لكن حصلك قده الفين او تلاته 
شهور كامله ببعت واقول اكيد قافله داتا .. 
غريب التعلق بناس بيسيبونا .. 
عياطنا مكانش عليهم عزيز .. 
انا كنت يوسف بحبك وبس .. 
وكنتي معايا امرأة العزيز .. 

ابوس ايدك .. 
متتخضيش 
لو جيتي بكره تسالي عني .. 
لقيتيني غيرت المكان .. 
علي قد كدبك تبقي مش انسان .. 
وقت الشدد بنبان .. 
وقت المشاعر كلنا واحد .. 
وقت المقابله المظاهر بتخدع 
وقت الفراق اللي يلحق بيمشي 
محدش بيوعد ويوفي بوعوده .. 
طريق اخره ضلمه مفيش فيه نهايه 
وهفضل غريب ..
وهفضل لوحدي .. 
واقيس الشوارع ب طول انتظارها 
وفاكر كلام كان قتلني ف هزارها .. 
وفاكر دموعي اللي نزلت عشانها 
وفاكر رقمها اللي اخره اتننات .. 
بدور عليها ف كل البنات .. 
بقرب وببعد 
واخون لما بوعد 
وارد الحنين بالبرود والخيانه .. 
وبهرب بكدبي وبجرح فلانه .. 
بقيت قاسي زيك .. واديني كتبتك 
بنفس انفصامك وحزني وكأبتك 
بقيت حد تاني غريب معرفوش 
وذنب اللي بعدك وذنبي ف رقبتك 

كده تبقي خلصت بكل اللي فيها 
سنين فيا عدوا وكسروا التروس .. 
حياة كامله شايل ف قلبي .. 
وبغلط وعمري ما خدت الدروس 
ليالي انتظرتك وعمرك ما جيتي .. 
وقد احتياجي لقيتك قسيتي .. 
انا لسه فاكر لكنك نسيتي .. 
كلامنا اللي ياما عليه اتفقنا ..
وداع م اللي هو مالوش معني تاني 
غير اني هبطل وهنسي الاغاني .. 
وهبعد نهائي واغير مكاني 
واحاول لوحدي اكمل واعيش .. 
وان جيتي بكره تسالي عني 
جايز ماردش .. متتخضيش ..

شِعر - متتخضيش | ابراهيم فرج

لَو مَالَ قَلبِى عَن هَوَاكَ نَزَعتُه
وَشَرَيتُ قَلبًا فِى هَوَاكَ يَذُوبُ
لكِنَّ لِى قَلبًا تَملَّكَّهُ الهَوَى 
مَن قَالَ أَنِّى عَن هَوَاكَ أَتُوبُ♡

محبتنيش _ عمرو حسن

Ahmad Hmada

Recent comments

Bahaa.19_95

R

Amr Tito

Mohamed Shetos

Related tracks