لِيه بتدّاري البُعاد فِي نَصيب ؟

نسيت ابص يمين ..
و ارمي السلام ليهم ..
و نسيت ابص شمال ..
و ارميهم الجزمه.
-
في ناس كتير جداً ..
موجوده ملهاش لازمه.
__
خفّيت و كلو تمام ..
لكني قبل ما انام بتعب ساعات تاني ..
معرفش هل علشان فكرت في الوحده ،
ولا الوجع جالي اكمني وحداني.
__
هكتم لساني وهقطعه نصين كمان.
بعد اما شوفت اللي حصل ، 
قلبي انفصل ..
ما بقيتش عارف بكره من أيام زمان.
__
جنبك ايدين متشعلقين في ايديك ..
عندك قلوب بتحب فيك - اراضيك ..
اسقيهم الميّه و ازرع أراضيهم ..
علشان يا عم الحج ، لما تكون زعلان ..
تلقي البعيد يراضيك.
__
حمّل نصيبك خطوته المتأنبه من سكتك ..
وبلاش تكون عشمان أوي ، 
لاحسن نصيبك يكسفك. بمجايبه ليك. 
لو فيك حليوة انا قلبي حلو وفيه أنا. 
بمشي لوحدي ولو لقيتك هبقي اسلملك عليك 
__
خبّي السعاده و حطها في مكان محدش يوصله إلا الهَوا ..
و إدعي يا رب اشفي المريض و متجعلوش 
اوردر فاشوش محتار مبين كشف الأطبه و الدوا.
بص فـ عيون المحتاجين حب و وعود.
هتلاقي دايماً خدّهم ، نبّت ورود - متقطفين ..
ممكن توزع كل ورده علي اللي لسه طيبين. 
__
عّمّر أراضي الحلم قد ما تنتصر ..
و أياك تعمّر مرّه واحده فِي السلاح أبو طلقه صوت. 
في شيخ كبير ساكن هناك. ,, 
لو طلقه طلعت من معاك ممكن يموت.
__
غّمّي عينيك من كل حاجه بتفصلك و ترجعك ..
صاحبي اللي مات من كام سنه زعلان عليه ..
متفكّروش باللي انت فيه لاحسن يقول ..
زعلان عليا يا صاحبي ليه؟! 
__ 
فّتح عينيك علي وسعها و عد النجوم .. 
الكوكب المنحوس بقا لي كابوس .. 
كل اما ببعد عنّه يعمل زوم. 
_
قلّب فِـ صورتك شوف ملامحك صابها إيه؟! 
العمر عدّي ولا لسّه زي ما انت؟!
قرّرت حتّي ولا لأه يا ضحيّه؟!
اللي فاضل راح لحاله .. 
و اللي سابك شوف بداله - وصوّره. 
هتلاقي صورتك هيّا هيّا!
_
صَابك نصيبَك ياللي قولت أنا صابني نحس ..
الملتقي اخره فراق .. 
فمتشتكيش يا عمّنا - و تقوّل لِنا \ انا حالي ضاق .. 
لو ليك نصيب تفرح هتفرح ..
لو ليك نصيب تحزن هتحزن .. 
لو ليك حبيب سابك في يوم ..
متكلموش \ سيبه أحسن!
__
ضِلْ الطريق وارجع لبكره و كمّله .. 
لو ليك صديق إسأل عليه أو كلمه ..
لو ليك حبيب متكلموش خليْك تقيّل. 
الحب ليل للمشتاقين من أوّله

الحُب ليل للمُشتاقين مِن أوّله.

-

مَا نيش رَحّال في أرض الله مَعاه قُوتُه .. 
و مَا كانش نِفسِي يكُون مَعايا بِيت كِبير .. 
أو فِلوس .. 
أو وَاحده كُل ما تِنتِهي بيّا الطُرق ، تِفتَح طَريق ، 
أو كُل مَا اتعَب مِن المُعافره تُزقِني زقّه صَديق ! 
أو تُبوس .. 
مَا لِيش فِي الدُنيا وَلا حَاجَه وِ مِش عَايز 
لَا انا خَسران ، وَلا فَايِز 
وَلا حَيران فِي أمرٍ مَا .. يزيد الحِمل في الشِيلهَ! 
مَا نِيش عَيل ، وَلا رَاجِل 
وَلا مِحتاج ، وَلا قَادِر 
مَا لِيش خطّه أنفذها عَشان أقدر ، أكمّل عُمرِي للسِتين 
هَموت بَدرِي ؟ 
و إيه يَعنِي ؟ 
دَه حَتّي المُوت سَاعات بِيكُون 
دَواء لَحاجات بِتوجَعنِي ! 
بِتقَطع فِيّا بالسِكيّن ! 
هَعيش مِسكِين و امُوت مِسكِين ..
و تِفضَل زَي مَا انتَ سَجين ! 
مَحاوطَك سُور بأفكَارَك مَلوش أوّل .. 
( يَا تِفضَل زَي مَانت رَزين ) 
( يَا إمّا يقُولو مُتحوّل ) 
سَاعِتها هَتِلقَي 100 حَاجه بِتعمل لِيك حَواجِز طُوب 
وِ مِش هتخلّي نُور الشِمس حتّي يخُش لَك سِجنَك 
و مِش هَتشُوف صُحاب المَعمَعه و الضَرب 
عَشان الضَرب هَيعلم..
 بكَام كُرباك ..
عَلي جِسمَك ! 
..
يَا طِيني يَاللي مِن آدم كِفايَه ذنُوب .. 
هَتفضَل كُل يُوم عَاجِز و بتفَكر 
هِتقدّر إمتَي تِكسَر طُوب؟ 
يَا طِيني ياللي مِن آدَم كِفايَه ذنُوب .. 
هَيفضَل كُل يُوم حَالك .. 
بِينزلِ تَحت لِلأسوَء ، لَحد مَا تِعتِدل و تتُوب ! 
يَا طِيني يَاللي مِن آدَم كِفايه ذنُوب ! 
-
هُموم النّاس .. 
و أشغَالهُم .. 
و مَلامِحهُم .. 
بِيتَعدّو ! 
لَكِن الثَورَه مَا تعدِّتش عَلي عدُّه 
وَلا اتحسبت من الصُورَه ! 
وَلا كُل اللي مَات عَارِف 
بإن الثَورة مَنصُوره ! 
هُموم النّاس ..
و أشغالهُم ..
و ملامِحهُم بِيتعدّو ! 
لَكنّ الحِسبَه مَكسوره! 
-
تِجيبها يمين ..
تِجيبها شمَال .. 
مَفيش يا برنس أي سَبيل .. 
تعدّل غيرها أو تِتشال .. 
هَتفضَل وَاقِع الأوهام و أرض الألف أُمنيه .. 
يَا شَايلِين البَلد لِينَا 
مَحدش ساب حاجات ليّا ا ؟ 
-
يَا سَايِب بِيتَك المَهجور 
و واخد عَهد عَلي نَفسَك ، هَترجعلُه فِـ يُوم تانِي ! 
أراضِي القُدس مُحتَله .. 
بِدُون أسبَاب وَلا عِلّه .. 
و مِش سَايبِين نَفر يِمشي ، برغم مَا هُوّا بيعانِي ! 

يَا سايِب بيتَك المَهجُور عَليك ديّه .. 
أراضي القُدس مِش لِيهُم ، وَلا ليّا .. 
أراضِي القُدس لِلاُمّه .. 
و لِلأديان .. 
و لِلسَموات .. 
و لـ اللي فَداها ضَحّي ومات ! 
وِ للي عِيلتها مَنسيّه .. 
يَا سَايِب بِيتَك المَهجُور – عَليك ديّه .. 
و أنا عّاذرَك .. 
أكيد يَعني انت مِش جِبريِل .. 
هَترفع بيهُم القريه عَلي جنَاحَك و تِخسفها .. 
وَلا حتّي مَعاك يُوسِف 
يُقول لمِرات رَئيس المنطقه المُحتله ، لأه ، و بردُه يكسفها ! 
وَلا حتّي مَعاك مُوسَي ،
يشُق البَحر بعصايَته إلي نصيّن .. 
وَلا حتّي مَعاك سليمان ..
يقُولك بَعد مَا يسأل آلاف النمل ، 
راحُم فِين !  
أكيد يعني إنتَ مِش عِيسَي .. 
هَتحيي المَوتي و تصحّي قُلوب المَقتلُوين فِي الحَرب ، بالنيّه و أمر الله! 
مَفيش لِسّه مُحمّد جَاي عَشان يُنصر سَلام الأرض 
ولَو كَان فِيه ، 
سَاعتها أنا هبقي جَي مَعاه!

ساعتها انا هبقي جي معاه..

الجميله أجمل الحلوين.. 
و انتي طيف - يا مسافرة دُليني ..
كل ما انساكي يزيد ليلي .. 
و اما بفتكرك بلاقي جواب!
.. 
سيبتي ليه ع الباب ، 
دموع شارده 
ذكري واحده مش هَتكفيني..
كُل ورده هتبتدي تفتّح! 
لما هتشوفك يا نور عيني! 
..
كنتي مدّي مدّه في السكه..
و الطرق أصلاً -طُرق واحده! 
ما تشيليش الهم يا مسافره.. 
كل حاجه هتبقي منسيّه! 
..
اللي كان ليكي ما هوش ليّا 
و رزقي مش رزقك اكيد لكن
كل كلمه بقولها محسوبه.. 
بالقلم و الورقه و الطوبه! 
كل بكره هييجي من بُكره 
و كل ساعه هتيجي من ساعه! 
و انتي لسّه معاكي ولّاعه ..
بس بتولّع سجاير فرط! 
..
ياللي سيبتي الأرض و الكوكب..
الدموع محتاره تنزِلّك.. 
زيما زلّوكي زلّوني.. 
و اشترولي البعد عن سنّك!
..
ياللي بكره تشوفي و تطوفي..
في السما الواسعه مع العصافير !
كل حاجه هتغلي فالتالي 
سعرها محتاج بشر بيطير ..
..
يمسك السلعه بإيد وحده! 
و ف ايديه التانيه جوز جناحات..
يرفوعوه لو فجأه طب و مات! 
و يكونوله ناس بتدعيله..
..
ياللي جيبتي الديبه من ديلها..
برده جيبت الديب معاه ديله!
يستحق يموت مع الاوباش..
اعدموه لو حد راح و مجاش! 
و اجعلوه عبره في كل مكان..
بلده أول من غريبٍ كان..
..
ناس كتير مش فاكره إيه اللحمه..
ياللي كنتي معايا في الزحمه..
كنت برده معاكي والله..
كنت بزعل لما تتمايلي..
و كنت بفرح لما تتباهي! 
..
كُنت ابنك في الميدان يمّا ..
و انتي كنتي تايهه يا هدايه ! 
قال بلف عليكي و بدور ..
و انتي اصلاً تايهه جوايا ..
..
لما تبقي بعيد بكون قاسي ..
و اما تبقي قريبْه برتاح..
الرصاصه الطايره جات فيّا ..
و انتي فيكي القفل و المفتاح! 
..
افتحيلي و غسّلي الجثه ..
و ارحميني كفايا موت و كفاح ..
ألف شاب اتقتلو في الثورة ..
كل طفل امامه لسه براح..
..
رفيفي بجناحك المكسور ..
و ارفعيني و عدي بيا السور ..
و احضنيني حضنك الدافي ! 
لو عليا انا كنت حبيتك ..
بس هما كسّرو اكتافي ! 
..
أوعديني بأي شيء ممكن..
لو بضحكه يا ستي مكسوره..
كنت نازل كلي شوق و حنان ..
بس هما قطعو الصوره !
.. 
قَال عَشان عَايزين يِعاندُوكِي ..
خَلّي بالِك بَس يِإذوكي..
و اطلُبيني تَانِي هَنزِل لِك.. 
المَسافَه قُريبه بِينّا! 
فـ أجعليني يَا قَلبي زَي إبنِك.. 
هَتإذي زيّك و هَستّحمِل..
و أتضِرب بَالكلمه، و الفتنه.. 
اليهود و ريحتهم النِتنه! 
بُكره تِولَع بيهم الدُنيا.. 
أو تفرّق بينّا و ما بينهُم..
إحنا دِينّا بَراءَه من دينهُم! 
#AhmadUsamh
__
Facebook : Ahmad Usamh

- " إحنا دِينّا بَراءه مِن دِينهُم " .

قُل للمسافِرُ أنني..
لا أشتهي مَعني الغِياب!
لَا أستطيعُ تَكلُفاً..
بـ الإمر إن عَزم العتاب!
عَينايَ تَرجُو وَردهً..
حَان ألأونُ لقِطفها..
و يداي فَارغهً لَأنّي..
لَم أذُق طَعم العَذاب!
-
قُل لُلمُسافِر أنني..
لَازِلتُ مُتكئاً هُناك..
و شقوقَ قَلبي لَم تَزل
تَنزِف دُموعاً كَي تَراك!
-
قُل للمسافِر هَكذا..
قَد طَال لَيلٌ لَا يُضيء..
و إليك عنّي مرّهً..
سأكونُ فِي وَسطِ الطَريق..
سألملِمُ الأحلام و الآلام و الإتيان..
سأكونُ فِي مرسَي الحَياهِ سَفينَهً..
لَمن يخَافُ من الغَريق!
-
قُل للمُسافِر هَا هُنا..
نَبضاتُ أنفاسٍ تَعيشُ وتنتَشي..
نفحاتُ أفئده تَئِن لِما مَضي..
شُريانُ هَذا القَلبِ خَالي مِن الدماء..
و دُموعَ هذا الطِفل،
يسلُبها البُكاء..
كـ فراشِهٍ إندمع الحَنينُ مُرورَها..
لتكُون مَنبع ذِكرياتٍ للذين
تفرّقو نَحو السماء!
-
قُل للمسافِر..
يَا مُسافِر هَيت لَك..
أشواق هّذا الحُبِ مَالكهٌ لقلبِي..
و أنينُ صَوتِ النَايِ مَالِيه الرَنين..
و قُلوبُ تِلك البَلده الصمَاءُ ينقُصها الحَنين..
مَاضيِيِ..
أصغَي للذين تكَلمو..
و تألمو..
و تَعلمو العِصيان عن فِهم الأمُور..
يَا ليت مَن لَم يَنتهُو مِنّا..
يَعودو من القُبور!

قُل للمُسافِر أنني..

لقيتك تايهه جوايه.. 
فلملمتك!
 .. و رتبت الأمور فيكي
و عرفتك هتمشي ازاي، 
لحد أما الحق السِكه اللي خلّت نَفسي فـ عنيكي! 
و خلّت ظُلمِي فِي عنيا..
لقيت لِك ذِكرايات فَاضِت و ضِحكت بَاللُقا عليا..
وَحشتِي زمَان وحُوشتِيني..
و سِيبتِي حَياتِي وسِنينِي..
تُكون لِك مَاضِي مَالُه رجُوع! 
أنا والله لسّه بجُوع..
و بشتَاقلِك حنان و هَيام..
و لَو ع الوَقت يَاحبيبتي هَكون لِك حاجِز الأيام..
فَتنِسي و تُحضِني لِي طَريق.. 
و تبكِي دمَعِتين ع القَد فِيهُم شُوق و خُوف و بَريق! 
و أقول لِك إن أنا أصلاً..
بحبّك حُب ما يكفّيش لبُكره الصُبح..
و إنّكّ رِحله فِي مَرمَي الطَريق للشُوق.. 
برغم دُموعك الغرقانه في السِكه.. 
بَحاول أنط و اطلع فُوق! 
بَحاوِل أحب مـ الأوِل و أعيش دَرويش..
و أزوّد زُهدِي فيكي قِراط، عشان الحاله مش سامحَه..
أكيد عارفه إن أنا ماعييش ! 
هَحاول ألتِزم بَالصَمت في حَرم الجَمال يَا جَمال..
هَشُور عَلي نَفسِي كَام شُوره تِزيد حبل الوِصال بينّا..
يا دوب لو نُص مِتر كمان.. 
هَجيب لِك قَلب مَاتحبّش ولا اتحول في يُوم لـ تُراب..
ولا إتداس لُه علي جبينُه و وبَان سِرُّه عَلي الاغراب..
هجيبلك قَلب لسّه جديد..
تشكِل دَمعتِك عِينُه..
و تُبصُم ضِحكتِك حُبّه..
و تُلضُم بَسمتِك شَكلُه اللي مِتقطّع فُتات ع الأرض..
مانيش كدّاب فـ قُول إني عَافِرت لحد مَا اتحُول شَبابِي لـ شِيّب! 
ما عادش فاضِل لي غير ضِلي اللي مَال مِنّي و شِيلتُه أوام..
أنا والله غصبٍ عنّي بتحسر علي الأيام..
و بتحسر علي المَاضِي..
و بتأثر بكُل دقيقه بتعدِي، 
في حاجه تافهه ع الفاضي! 
و غصبٍ عَنّي بشكِيلك يَا ستّي فـ سِر..
حَاولِت و شُوفت 100 سِكه، 
و بَقابِل دَمعتي بضحكه..
لَكِن الضِحكه كدابه!
بَحايِل رُوحي تستَني.. 
بتهرَب منّي في الغابه.. 
يَا رَب يا ستّي ألحقها..
لو إنتي حَبتِيني يُومين..
هصَدقنِي، و أصدقها..

هَصدقنِي و أصدقها ..

خايف أقول كلمة بحبك.

وِساعات بيمحِي الوَجع أثرُه بوَجع غِيره..
وساعات بيفَضل فَتره مَا بيمشيش.. 
-
وِ ساعات بِتاخُد ع الوَجع فَتعيش!

Ahmad

Popular tracks