6 April

#رمز_المقاومة #6_ابريل
من أول ما اتولدنا ... لاقينا الظلم والفساد 
مبارك كان خاربها .. وظلمه عشش فى البلاد
سلاحهم امن دولة .. وسلاحنا مقاومة وافكار
اعلامهم كان بيكدب ... و يبرر حبس الأحرار
كانوا عايزين يورثوها ... و بالتزوير لأبنه جمال 
تطبيل ونفاق كتير .. ومصالح لرجال أعمال 
و ف يوم 6 ابريل .. قمنا كسرنا المستحيل 
اضراب ضد الحكومة .. ضد مبارك العميل

حراميها دا كان حاميها... وكان ناهبها مع اللي معاه 
والمصري ملوش كرامة ... ف القسم بياخد فوق قفاه 
و لما لاقينا فرصة... هتفنا يسقط النظام 
هتفنا من قلوبنا ... وسرحنا ويّا الأحلام 
وفى يوم خمسة وعشرين.. ثورنا طالبنا بالتغيير 
الشعب بدمه حرّر .. كل ميادين التحرير 
الإيد كانت ف الإيد ... هتفنا بأن الشعب يُريد 
العيش ويا الكرامة والحرية شيء أكيد

واتفرقت صفوفنا.. لما دخل ما بينا شيطان
لما تفرق هتسود.. و تقدر تملك الميدان
كِدِب بعد التحية .. حقوق الشعب انسى مفيش 
دبح شباب الحرية .. والحكم خلاص يبقى للجيش 
يا شاويش ياللي قريت , علينا بيان تسعة وستين 
6 ابريل مش خونة ... لكن دي معني الضمير 
ما تسيبكم م السياسة... دانتوا مكانكم أعلى بكتير 
تركيزكم فى السياسة ... عل الأمن القومى خطير 

وعينا الناس فى حملة .. حافظوا عل الجيش ظباط جنود 
الجيش وظيفته يحمي .. مش يقتل شعبة بالبارود 
مش ينهب م الموازنة .. ويبنى شالية فى طابا ومارينا 
التحرير مش عدوك .. دا عدوك عل الحدود فى سينا 
تخوينكم لينا مدح .. عكس طريقكم همشي صحيح 
اعلامكم كله ردح ... والثورة دة طير جريح 
والقتل ملوش تبرير ... جاية الثورة فى يوم موعود 
راجعين تانى عل التحرير .. احنا شباب قرّر صمود

بداتوها عميل وخاين .. ارهابي كمان وجاسوس 
وشهيدنا عليكوا هاين .. والحي مصاب او محبوس 
تلفيق فى أمن دولة ... وقالوا عليكم تسجيلات 
طب فين هيّة الأدلّة... ولا مفيش غير اعتقالات 
أصدرتوا قانون مريض .. قيدتوا حق مظاهرات 
والقمع مش جديد ... و لا تقييد الحريات
ثورتنا دي بدأناها .. وهنكمل المشوار 
وحياتنا تروح فداها .. هوا ده عهد الثوار 

كلّه بينهب فى الثورة .. وانكشفت كل الوشوش 
خونة وباعوا الأمانة ... لنظام الكفتة المغشوش 
أبريل رمز المقاومة .. والقبضة تهد فى العروش 
وانت نظامك بيقتل .. وتبيع للناس الفنكوش 
نظامكم مش هيبنى .. خلاص عجّز كِبِر وشاخ 
حبسنى قبل منك .. العادلى حبستة وداخ 
وفروا تمن الرصاص.. عشان الناس و عشان القوت 
ماهو مين دا اللي هيكتم .. فى شباب مصر علو الصوت 

هنرددهالكو دايما .. هنرددهالكو دايما .. هنرددهالكو دايما الحرية لحد الموت 
هنرددهالكوا دايما أحنا الصوت لما تحبوا سكوت


6 April

ابوعمو