ثم خاينه عنيكى ليه 

كلمات احمد ابوالمجد 
غناء والحان احمد الفولى  

لما انتى بايعانى بسهولة
 ابتديتى القصه ليه
 عيّشتى قلبى دور بطوله
 وفى النهاية غدرتى بيه
 مش مصدق ان قلبى عاش سنين مضحوك عليه
 طب هكذب دمع عينك ولا غدرك ليا بيه 
طب هكذب قلب عاشق شوفت صورتى فى نور عنيه 
انهارده راح هيكتب
(( ثم خاينه عنيكى ليه ؟؟ ))
 فاكره لما عرفت حبك كنا لسه عيال صغار جوا حوش المدرسة
 فاكره اقصى خلاف ما بينا
( انك عايزة (طب بشرى ) وانى عايز ( هندسه 
 انهارده وصلتى حلمك وحلمى هو الى اتنسى 
مهما تقسى يازهره شايفك لسه طفله فى مدرسه
 
يالا بينا يازهره نمحى 
كل ذكرى عشنا فيها
 كل نظره كل همسه كل كلمه  فرحنا بيها 
كل حلم ربطته بيكى 
كل دمعه من عنيكى 
كل طقم قولت ليكى انه مش لايق عليكى
 كل خوف فى صوت جنابك 
لما اكون نازل مظاهره 
كل حرف كتبته ليكى كل جمله فيها ( زهره )
 قلبى هيكمل حياته وهو مش شايف عنيه 
بس كل يوم هبكتب "ثم خاينه عنيكى ليه"

https://www.facebook.com/aboelmag

ثم خاينه عنيكى ليه

كلمات : أحمد أبوالمجد
زى السما 
م الضلمه دايماً تتخنق
 ممزوجه بضياء القمر
 من ضلع ادم تتخلق
 ومنها يُخرج بشر 
يا حوّا  يا الى  هاديتى الدنيا 
جناحات أمل وحنان 
وصيغتى من الامان روايات 
فكنتى الاسم والعنوان 
يا دمعه عشق فى عنيكى 
يا جنه تحت رجليكى 
يا أرحم  صوره للأنسان 
وطبع الدنيا دى غريبه 
فروحك عايشه تركيبه
 أم واخت وحبيبه 
أمرنا الله بيكى الاحسان
 يا رحمه الرب ليكى اصطفى 
مليتى الدنيا بالتنوير
 وبالبهجه وبالعمران 
يا عيشه زوجه المصطفى
 وهاجر ام اسماعيل 
ومريم بنت عمران

زى السما

كلمات وألقاء : أحمد أبوالمجد

بدال الكون أكيد موجود 
مافيش موجود بدون واجد 
خلقت يارب لينا حدود 
فغصبن عنا نتواكل 
ونسأل ضى من نورك 
لنتطمن 
ومهما الفتره هتطول 
قانون الدنيا متقول 
مافيش مجموع بدون " ذاكر " 
يارب يا اللى خلقت الدنيا خداعه 
بتخدع عينا بالأنوار فتعمينا 
نفخت فى روحنا من روحك فتحمينا 
خلقت النفس تختارك فتتطمن 
خلقنا النفس غداره 
وسبنا النفس تتجول 
هنا تاره وهنا تاره 
خلقت صلاه بتخشع فيها ارواحنا 
خلقنا صلاه بتحريك بس فى الجسمان 
خلقت صيام بأفقرنا يفكرنا وينصحنا 
خلقنا صيام ينقص بس فى الأوزان 
يارب الكون ما تحكمنا بأفعالنا 
خلقت الضعف فخدناه حجه للأنسان 
يارب انا بشتكيك نفسى وغربه 
وأرض رفضانى
وحكام سرقوا اوطانى 
وقلب بيحبى للطاعه 
يدوب يمشى 
و يرجع تانى يعصانى 
بوصيك على عندك فوق 
خصوصاً أب ربانى 
وأخوات ماتوا رغبه وشوق 
وأخوات ماتوا ربانى 
وأخوات ماتوا فى الميادين 
عشان حلموا بفجر جديد 
وأخوات ماتوا فى الزنازين 
عشان رفضوا يكونوا عبيد 
وأخوات ماتوا من جوه 
فعايشين بس برانى 
يارب الكون 
انا أنسان 
أكيد هيصبنى يوم نسيان 
ف من فضلك ما تنسانى


يارب الكون

كلمات وإلقاء 
أحمد أبوالمجد 
الزمالك مش بس نادى بنعشقه 
من زمان 
الزمالك عندنا زى الكمان 
موسيقته أغلب الاوقات حزينة
عاملة زى وردة بلدى وسط زينة 
كل الناس شايفين فى اللىّ حواليها بهجة
وأنت بس اللىّ شايف أنها الوردة الأصيلة
موسيقته حاجة بتشبهك جداً 
زى بق ماية بتلحقه قبل ما الفجر يدن 
مش بتكون عطشان ساعتها ولا حتى محتاج تشربه
بس هى المتعة انك 
لاحقه فى اللحظة الأخيرة 
زى هاند فرى فى ودنك وأغنية عالية تحبها 
ترقص معاه 
وتعيد غناه 
واللى واقف برا منك 
شايفك اهبل وقتها 
وانت طاير م الفرح 
الحب جواك انطرح 
وبقيت فى عالم تانى خالص
كل كلمة تعيش مداها 
كل أرض تخلق سماها 
وتبقى حاسس ان صوتك 
زى صوت تمام غناها 
مش بس حاسس ان هو بس بيشبهك 
كل اللى حبوا فى يوم زمالك يشبهوك
تحس انه مغناطيس جاذب خواتك ليك
تنام بليل لاعن ابوه
وتانى يوم تلاقيه مراضيك
عشقه زىه زى وصفه 
شىء غريب مابتفهموش 
واللىّ وصف حبه مرة 
يبقى لسه ماعرفوش 
اشرف وابوزيد وخضر 
كنا ممكن نكون صحاب بالزمالة 
بس انى اكون صديق عثمان وزيمو بدون زمالك أستحاله 
فرق السنين بيقول كده
باسم وجية 
كنت يعنى هشوفه فين الشكل دا 
واقاسمه احلام السفر للغلابة 
واقاسمه اوضه سريرها متحاصر ديابة 
يدوب اقوم فى الليل دقيقة 
ارجع الاقى مكانى غابة 
مروان تخين بكاب 
وتى شيرت اسود 
مكتوب عليه الاسياد 
كنت شايفه غريب ويقلق
بس جوا القلب طيبة 
حتى بعد ما شفته برفع 
وبقى بيجيب قمصان غريبة 
لسه جوا القلب طيبة 
خلاصته يعنى يا زمالك 
ان هذا الشعر صادق 
وانى ماهتمتش حتى اوزن القافية فى كلامى 
او حتى اقول كلام أغانى 
وهى كلمة اخيرة يعنى 
انى طول الوقت حابك 
حتى لو هاعيش بعانى

الزمالك


الخوف زي التنفس ..
اكبر دليل علي انك لسه حي.. 
بتعيش مابين سورين اسير... 
الخوف م اللي راح ..
الخوف م اللي جاي ..
في ناس تخاف ...
الحلم يعدي ويفوتها..
وناس تخاف مايكفيهاش قوتها ...
وناس تخاف ضوافر عشقها تخربش ..
وناس تخاف تحب وما تتحبش ..
وناس من خوفها مش شايفة ...
وناس تخاف تكون خايفة...
ناس تخاف من شيطان خناس ..
وناس تخاف من كلام الناس ...
وناس خايفة يُقام عليها الحد .....
وناس خايفة علي ابنها اللي ماجاش...
وناس خايفة من الرصاص والجلد...
وناس خايفة تتجلد ببلاش...
فاعذريني ..
لو كنت مش عارف ابين خوفي قدامك...
مش زهد من الحياة والخوف ...
انا بس خايف ...
تيجى عينى فى عيونك ..
الخوف فى عينى يبان 
والحب تعريفه المجرد.. 
ان فى عز خوفى..
أحسسك ..
بأمان

كلمات وإلقاء: أحمد أبوالمجد 
https://www.facebook.com/aboelmagd07

الخوف

يطوف الصبح كل مكان 
ينادى العدل في الثورة 
مابحسبش الخطاوي عشان 
كل السكك ضلمة 
بخاف الليل وصوت الهمس 
واخاف الفجر م الزنازين 
واخاف الضهر حر الشمس 
وأخاف العصر يجى حزين
واخاف اليوم يعدى يفوت 
وانا واقف محلك سر
خلقت من الخيال ملكوت 
قفشت الكون في وضع مخل 
فصحوني عشان النوم 
كتيره للوطن بيضر
حبيبى الحلم مش مسموح 
عشان في الحلم حرية 
ومرة في حلم تبقى طموح
وتطلب في الشهيد دية 
فترضى يا ولدى لأوطاننا 
تواجه أزمة مالية؟

كلمات وإلقاء : أحمد أبوالمجد

أزمة مالية_ أحمد أبوالمجد

لحن وغناء : أمل كنانة
كلمات : أحمد أبوالمجد

Ahmed Aboelmagd 4

Popular tracks