لفات الارض السريعة
حوالين مسار معروف
والاحداثيات الدقيقة
بإن الدقيقة
ليها مكان مكشوف
سايبة أثر ملوش ألوان
المسافة بين الدقيقة والدقيقة
ممكن تكون خطوة
وممكن تكون اكوان
ولو الحظ حالفنا
ولفينا لفة كمان
زي حد خاطفنا .. هنشوف
نقطة جديدة في الكون
و خطوة جديدة في الخوف
المعرفة مكلفة
بإن الزمن صاحب قرار
و يقدم دليل اثبات
والحقيقة المؤسفة
مش هتعرف اللي جاي
غير ما تبص عاللي فات
هكذا يدور الكون
وهكذا تدور الذكريات
بنخطي في ظلام مجهول
عشان نحافظ ع الثبات
...........
خطوات الارض السريعة
في مسار مجهول
بتثبت إن الزمن بيقول
وينصب نفسه مسؤول
عن المسافة بين الظلام والنور

الدقيقة

هو انت مسامح لإنك غفور ؟ .. 
ولا ذنوبى مالية السطور ؟ ..
ولا حسابى لسه تقيل ؟ ..
ولا عذابى فى حوش القبور ؟ ..
اكمل فى توبتى كعبد ذليل ؟ ..
ولا ذنوبى ليوم النشور ؟ .. 
سامحنى انى بسأل ..
او إنى ملول ..
ذنوبى بتتقل ..
وكل اما اقول ..
مسك الختام  ..
يصيبنى النفور ..
برجع وبغلط وعارفك تمام ..
هتفضل تسامح لإنك غفور .. 


لإنك غفور

يا قلة وكام نفر ع الايد
يا دايرة من الرجال .. احرار
يا دم فى قلب كل شهيد
بنفس فصيلة الثوار 
يا جرعة من الامل زايدة
بتطلع فجر كل نهار
يقابل حلمها الاسوار
يا زنازينا
يا حابسينا .. بدون اقفال
يا شايفينا شباب اندال
سيبولنا الدفة .. ومافيها
مفيش غيرنا يكفيها
بحق الدم والجنازات
ومين وفّى بالهتافات
سلموا جيلنا
بدون اقفاص
بدون حديد
ومين غيرنا ؟ هينشلنا ؟
ومين اللى هيقتلنا
تحت فضيلة التفويض
يا كل من آمن
بديانة حلمكوا
متدلدقوش دمكوا
ع الخونة والجرابيع
مش للى خان منكوا
ولا للى باع ارضكوا
عشان احنا مش هنبيع


فصيلة الثوار

.. مفيش ولا حاجة بقيالى 
.. عشان أرجع .. ومرجعتش 
.. كل الحاجات بصّالى 
.. فى عينى .. بس مفهمتش
.. ارجع لمين ؟
.. نفسي القديمة ؟  .. مبقتش تساع
.. مسبتش فيها شئ .. غير ما اتباع
.. م التقل والاوجاع
.. والسكة اللى مشيناها
.. يقبلنى بيها ازاى ؟
.. وانا لسه جواها ؟
.. ياللى سبقتونا
.. فى السكة دلونا
.. مين فيكوا اتقبل ؟
.. ومين الولى فينا ؟
.. ومين نفسه هتسبقه ؟
.. مفيش ولا صوت فى عقلى
... يقولى ارجع .. فاصدقه 
.. كل الطرق فانية
.. تحتار فى بدايتهم
.. ويلغبطوا 
.. بتبدأ خطوة فى التانية
... لكن سككهم
.. فى الآخر يبهتوا
.. معرفش مين نجا
.. ولا مين قدروا يثبتوا
.. ولا مين بمين ضحى
.. ولا مين راحواها .. جماعة
.. ولا مين نالوها .. شفاعة
.. ولا حتى مين شافها
.. كل اللى اعرفه .. انت 
.. فارجع لنفسي ازاى ؟
.. وانا جاى ليك انت 
.. واشترى ايه بايه ؟
.. يغنينى عنك ايه ؟
.. فى التوهة ف-تسيبنى
.. خدنى جنبك
.. مفيش ولا حاجة بتزيدنى
.. هلقاها نقصانى عندك
.. سهّل علامتك
.. واهدينى بثباتك
.. وطبطب على قلب
.. العبد اللى جالك
. عشان حبّك  

عشان أرجع

زى بكرة .. وزى امبارح
زى شعاع الشمس اللى سارح
ويمكن لون المياة او وريحة الهوا
زي شكل الامل 
واقتراب وصوله المحتمل
وميلاده من عدمه
والتمسك بيه من عدم معرفته
وقدرته على حسم الجدل ..
وانهاء اكتئاب مبتذل .. 
والتوجه نحو طقس نفسي
منعزل ، معتدل ..
يفتقر للتفكير والحزن ..
منفصل  ..
عن خط الزمن ...
كل الحاجات متفككة
واللى فات ملوش تمن ..
ولا ندم ..
ولا مربوط باسئلة ...
زى سقف طموحاتك .. ورغباتك
بين انك مش شايفهم وبين يقعوا عليك
وبين انك تغرق .. او تمد رجليك ..
والامل اللى صرفته عليك
والفرق بين معدلات ذكائك
ودرجاتك واحباطك .. وفلسفتك الساذجة الناتجة
عن اقترانك .. بالامل ...
زى الظروف 
اللى مهما حاولنا نشوف .. نفسنا فيها
بنشوف غيرنا
ونقارن مصيرهم .. ومصيرنا..
ونحكم ردور افعالنا
وكان احتمالات الكون مكتملة
وكان ابعاد العالم
سكيل من ابعاد اوضتى
وكان العالم الاكبر نسخة من طفولتى ..
المنطق الثابت ..
الغير مفسر ، مهزوز
مسيره يركب ميكروباص  .. ويخش فى نقاش
ويبوظ
اكيد بدون شك
صواميل المنطق اللى اتفك
لا يمكن هترجع تانى
ولا يمكن تفوز ...
زى وجهة نظرى فى وجهة نظرى
والحكم ع الرؤية من خلال بصري
او غيرى من مكاني ...
زى مواسم تدينك السابقة
والفجر فى الجامع
ويعنى ايه صوفية ؟
وكتاب صحيح الجامع
والالبانى والامام الغزالى
والنوافل .. وقفل كل المداخل
وقرارات انك تبطل شتيمة 
ونواتجها الاليمة
لاتفه الاسباب ..
زى انك تسب الدين فى المترو لعيل عشان الباب ...
الرقص ع السلالم 
فى غياب الوعى الداعم
للاختيار
كان نتيجته انتظار
لشئ اسمه الامل
واحيانا اسمه الوقت ....
هو الخيال جزء م الواقع
ولا الواقع محاولة فاشلة للخيال
هى الاحلام ليها دوافع
ولا الدوافع مسببات الاحلام
ولا الامل ؟
فكرة انتظار مجهول
فيها احتمال بيقول
احسن من هنا
واختيار الواقع مش فرض من ربنا
زى انحناءات الكون
فى مدارات الزمن
بتثبت ان الوقت ليه تمن
زى الامل

شكل الأمل

مين قال إننا تايهين ؟ 
مين اثبت عدم إدراكك للموقف توهان ؟
وضرب بيه عرض البيبان ؟
جايز عشوائية الانسان 
ليها حيطان وسقف
أبعد بُعد فى الانتهاء
بين الوجود والخفاء
شبه المستحيل
ترتيب ع المدى الطويل
تباديل ، .. لاحتمالات غير مُدركة
في دايرة شبه المعركة
فيها التلقائية ،.. والحرية
عشوائية لأبعد مدى
ركب الرياح
حبّات المطر
النازلة ع الشجر
والنازلة ع الرمل
جايز فى أول الامر
نقطة عشوائية واحدة
تراكيب .. على مدى بعيد
من مليون احتمال
فيه المنطق اتشال
والتفكير اتسلسل بحبال
م القدر ..
وتلاشى وجهات نظر
وان احنا تروس ، في مكن قديم
ودورانك عكس منطق سين
بيضمن مجال جاذبية
فيه ثبات العشوائية
ووجود سقف الحرية
بعيد عن متناول عينيك
مش كل القرارات بين ايديك
ولا كل نقاش مطروح عليك
ولا الترتيب من ناحيتك
ولا التوهان .

زاوية الرؤية

مش قادر أكون جبان 
أكتر من كده 
ولا قادر اكون صاحب فكرة 
ولا اسكت ، ولا ابطل اتكلم عن بكرة
ولا أُصنف فى الشعب الغلبان
ولا أُذكر من مصر فى الناجية التانية
ولا يسعى ورائي حقوق الإنسان
ومليش صور فى أى ميدان
ومليش فيديو والنار ماسكة فيا
ولا فيديو وانا بحرق العلم
قدام السفارة الأمريكية
الدرجة اللى قبل قبل النهائية
مبتكسبش تعاطف حد
ولا تسقيفة الفصل
وعيبها انك حلقة الوصل
بين دموع الغلابة .. ودموع المسلسلات
وإنك خطوة لازم يعدى عليها بالذات
وإنك صوتة .. وف رقبتك حق موته
وبصماتك ع القضيب .. وغريب
وصوت خطوتك .. يشبه جزمة السجان
وجبان .. ومتلون فى طريقة الكلام
ومش شبه اللى فى الشارع
ولا شبه اللى فى القصور
وإنك أخطر من عدوه .. ومغرور
ومحل شك
إمتي قلبتك ؟
وإمتى هنيجي فى سكتك ؟
وايه اخرة فلسفتك ورؤيتك؟
وانتشارك بين ال"يلا" و "حضرتك" .. بالنسباله انت الخلاص
ومع اول طلقة رصاص 
هتيجى في بدلتك .. هتتنسي
عشان محدش يعرفك

عشان محدش يعرفك

سامحني يا رب ان كنت عيل 
أو نفسي مش طويل 
وان كل توبة مني 
بعدها نفسي تميل
وانى حلفت باسمك كدب
واني اخترت السهل وسبت
كل خيط للممكن
بقي مستحيل
سامحني ان كنت بتمرد
سامحني ان كنت بتهرب
انا نفسي ادوق واجرب 
كل شئ ممنوع
انا نفسي اكون مؤمن
وانا نفسي اكون جربوع
انا نفسي اسهر فى الشوارع
واصحي فى الجوامع
واسجد ليك وادمع
واخد نفس ساقع
واخرج اتمرقع
والف فى سجاير
واعيش الزمن حاير
مش قصدي اتفلسف 
ولا نفسي اتكابر
انا نفسي اكون مؤمن
وانا نفسي اكون فاجر
سامحني ان كنت بتمادى
سامحني ان كنت مش فاكر
وان الذنب بقي عادي
وبطلت اجي فى معادي
ورفضت اقابلك خمس مرات فى اليوم
وان الحسنة هتكفر
والصدقة فى المترو بتصبر
كل يوم
وان العشم خدني
واني ع الاقل بصوم

ممنوع

ألا أونا 
فتحنا المزاد
نصبنا الطابونة
نبيع في البلاد
ما هي جيب ابونا
وقسّم يا واد .. وفرق يا ابونا
زمن حكم عاد ، عاد
فانجدونا.
_______________________________________________

ألا دوي
أرضي بدمي ترتوي 
ولا مايّة غريب
قُدسي تساع وتحتوي
مليون حبيب
أقطع دراعي الملتوي
ولا أمِد إيد
ولا أمضي علي ذُلي بهوان
ولا ألِف ضهري للأمريكان 
ولا أكون جبان
في عيون شهيد
_______________________________________________

ألا تري
كل اللي قالوا عليه ، مفيش
وإن قال فيه بكرة 
متلاقيش
وإن خفت 
لا يمكن تعيش.
_______________________________________________

ألا أونا ، ألا دوي ، ألا تري
الدم نسله مينتهيش
والعرق واصل للجذور 
والأرض لا يمكن تعيش
طول ما فيها حتة بور
قُدسي خضرة و أرضي نور
ماضي ثفقة مع القبور
دمي راح يبني ضريح
جايلكم بشباب تصيح
هي دي الثفقة بصحيح
هو ده جيش المسيح.

جيش المسيح

خايف معرفش أتخيلِك ..
تعرف ايه عن الزمن ؟
تعرف ايه عن الوقت ؟
تعرف انه كان تمن ،
للّي انت فيه دلوقت ؟
وانه غابر ، وانه غادر
وانه الوحيد القادر
علي نقمة النسيان
وانه بدون كوادر
قادر يهد بيبان ،
ويفُك اقفال الحزن
ويمحي الصورة من بالك ،
ومهما هتلعن في خيالك ،
يستعصي عليك ريم الصورة
مع إنها كانت محفورة ،
ومتتنسيش ..
تعرف ايه عن الليل ؟
غير إنه شم نسيم
مع ان صمته جحيم
لابس عباية طيبة
حامل حقيقة مرعبة
إنك وحيد ويتيم
الليل والزمن .. دفّعوني التمن
الليل يفكرني ، والزمن ينسيني
حدّفوني لبعض ، يحييك ويحييني
مين فيهم ينتصر ؟
رغم إني بعرف اختصر
والكلمة لعبتي
مش عارف أوصف حضرتي
مصلحتي فين ..
الزمن ينصب دراعاته
والليل يكتب كلماته
مع و ضد
لأ و آه
حب و كره
موت وحياة
وانا زي ما بعرف أوصفك
خايف معرفش أتخيلك.

نقمة النسيان

الوقت مش لاحق ،
انك تسابق ،
كل البشر دول ،
وتعمل زيهم ،
وتصحي قبلهم ،
وتكون عضو مشارك وفعال ،
وبتجري ع الاشغال ،
وبتجري ع اللقمة ،
وبتنكر التهمة ..
بانك جبان.
_______________________________________________
الوقت مش سايع برودك ،
والناس بيجروا علشان يلحقوا ، ويسبقوا ،
وينسمجوا مع البشر المنسمجة ..
بطعم الحياة السمجة ،
ويعيشوا بلون مزاج واحد ،
اتفقوا عليه ...
من غير ما تسال ليه ،
نفس الحماس بيتوجد ،
ونفس الطموحات الجريئة ،
بالبعد عن الحارة البطيئة ،
والحياة العادية المملة الرتيبة ،
قانون الساقية المتهالك ..
للبقر المتشابك ..
لركوب نفس القطر ..
بنفس السرعة ..
وحجم الجرعة ..
من نفس الحياة ،
من نفس الصبر ،
ونزول نفس القبر .
_______________________________________________
الوقت مش سايع ..
حزنك و احلامك و تفكيرك ،
وما حققه غيرك ،
وفلسفة تأخيرك ،
واكتشافك للواقع ،
وخلق الدوافع .. لوجودك ،
وصمودك ..
قصاد يوم عادي جديد ..
مفيهوش تعقيد ،
ولا قصة تحكيها ،
ولا هيكون ...
قطر الحياة يا زبون ..
خليته يركبك .
قطر الحياة المجنون ..
كان لازم يسبقك.

سابق و لاحق / البقر المتشابك

وبرغم الايام الصعبة،
وسنين العمر المرة،
والإنعدام التام في الرغبة،
في ترك مشاعرك حرة ..
في انك تكون انسان ..
بيميز الالوان .. 
وبيعرف النسيان .. 
ولسه عنده حماس .. 
في انه يعرف الناس .
لما بتيجي علي عيوني ،
بنسي المنطق السابق ذكرة ،
ومش بفتكره ، بفتكرك .. 
واكتشف ان شعري شعرِك،
وبطلع عيل قدامي،
وبرجع في كلامي،
وبكتشف حقيقة الكون،
وان قلبي مش كرتون،
وإنه كان بيتعايش،
وإنه لحم ودم، 
وإنه بيتلغبط ..
وانه لما يحب ..
هيكون عايش.

شِعرِك

فيلم الدنيا المُحَنّك ،
له بداية و حبكة و قفلة ،
واتذاع في ميت حفلة ،
ولسه البشر بيحضروا بالالاف كل يوم .. 
ولسة بيقدروا .. يعبروا عن مدي المفاجئة .. 
بمحض الإرادة الممكنة ،
بيخوضوا الدنيا المؤلمة ،
بكل شغف واستمتاع ، 
بشكل شجاع ،
شجاعة غير مبررة ،
ومكررة في ميت شريط ،
يا انسان يا عبيط .. 
دورت في كل الشرايط ،
واتوجدت في كل الخرايط ،
وادعيت انك فهمت الدنيا ،
وانتهيت زي اللي قبلك بالزبط ، وكأنه حلم ،
حجم ما ادركته يكاد يكون بالمرة ،
مثقال ذرة من الفهم ،
ادهشني ثباتك ولا مبالاتك ،
وتصميمك ع الحضور ،
واتقانك للدور ،
ولسه طابور الدنيا مليان بشر ،
محملين باليقين ،
بانهم مختلفين ،
وان الحياة بعد ملايين السنين هتختلف ،
والحقيقة هتنكشف ،
والفيلم داير ع العباد ،
بس الحقيقة انه كان متعاد ،
حتي اللي بتسمعه .. 
وتقراه .. 
وتكتبه .. 
جزء من الفيلم .. 
او الحقيقة او الحلم.

مثقال ذرة

كبداية اي يوم ،
مفيش فرق بين ليله ونهاره
مجرد ساعات ودقايق
تمثل دوران الكوكب حوالين مساره
ودوران الانسان حوالين قراره
حتي انتهائه او استقراره

كل الاحداث تدعو للبرود
ارقام الناس اللي بتموت كل يوم
اخبار الناس اللي بتموت م الجوع
والناس اللي بتموت م الشبع
والناس اللي بتموت م الوجع
احداث التضخم والكساد
والركود العالمي والفساد
والشعور الدائم بالضغط
وانهيار اسعار النفط
احداث سريعة وارقام مهولة
عقلك مش قادر يجمع ، 
ولا يستوعب الحمولة
حجم المشاعر المهدرة
علي احداث غير مبررة
خلاني اواجه مشاكلي بدون الم
خلاني بايع القضية
مواجهة العولمة بابتسامه تعتبر نرجسية
انا قلبي اصغر من كدة
متابعة شاشات الاجهزة
بتخلي حواسك متحفزة
ومشاعرك مستنزفة
وبقيت نسخة مزيفة
شخصية مؤلفة
من خضم المشاعر
العالم بيجبرني اضحك وابكي
ويؤسفني بكوني متلقي
ان ردود فعلي غير مستهدفة
وان الفرح والاسي
هيفضل يتعرض
وان الفلسفة اصبخت رفاهية
وتحمل صاحبها مسؤوليه
بدون داعي
وان رفضك للتفاعل
تصرف غير واعي
يشفطك في مركز الدوران
حتي انتهائه، او استقراره

Ahmed Deraz.

Popular tracks