برومو ديوان "ليلة من جوا الحقيقة" | سوزان عماد

ما لم يقله المهرج... ل أحمد عبد الرحمن

ظَبَطتني بَتجسّس على عنيها..
فدارت وشها بدون ابتسامه
فابتسمت 
لإنها
ظبطتني بتجسس على عنيها !

وكان القطر ابطأ من سحابه بتجري على خد القمر

والبياعين.. نادوا
ولموا المنتجات..
والكمسري ما طَرَفِتش عينه وهوَّ بيشوف التذاكر..
كل شيء عادي..
وأبرد من حجر!

زي النقاب.. كانت كمامتِك:
حاجْبه حُسن الوش..
كاشفه عيون
كما نجوم الليالي لشخص عاشق للسهر...

...نسرح في ليل القاهرة
وبرد الشوارع - لما إيدي تكون ف إيدك -
يبقى أدفى من دموع الشمس على كتف الشجر..
ماشيين
ومش خايفين عيون الناس
بنحسب عمرنا على كل خطوات رجلنا
بنبص في الڤتارين..
وبنعدي الطريق زي البجع
من غير ما نِدّي لأي عربيه وكلاكساتها اهتمام..
وتضيع ريحتنا ف الزحام
ف السينما
ف المترو
ف ورق المكتبات..
أخطف من العالم بجُرأه.. بوسه هاديه من شفايفك
أنتصر
أخسر
وما احسبهاش..
واقول لعنيكي: يا كل اللي ماتوا ف عينها.. أنا بس اللي منكم عاش..
نتوه في موالد الصالحين
نزور القلعة
وتعاتبيني ع "الغيره" امّا تمدحي في صلاح الدين..
وَ ارُدّ بكل عصبيه: أنا.. أشجع!!        (بعَفَويّه)
تفضّي ضحك عمرك كله في دقيقتين
ونحلم
زي أي اتنين
نكمل حبنا شمس ومطر
... من غير ضجر

نتمشى على نور المحلات اللي فاتحه..
ونجري فجأه.
كإننا
عايزين ندوّخ ضلنا!
عايزين بكل ما فينا من طيش الشباب
نحفر ف أسفلت الشوارع 
كل خطوه 
وكل وقفه
وكل شمس شافتنا
كل حواجز الدولة اللي وقفت ضدنا..
أسمع كلامك عن مصير الأُنثى ف بلدنا.. وأطنّش
تسمعيني باعِدّ أحلامي بغرور
فا تقولي: مغرور
نختلف... على كل حاجه
ونتفق على حبنا..

والقاهره بلون الرماد والفجر..
بتفَتّح.. كَورده "جوريّه" ف مواسم ربيعنا..
بتبتسم.. للأغبيا..والحالِمين
وتبُص عماراتها الطويله بطرف عينها
على اللي ماشيين ف الشوارع
من رصيف
لـ رصيف
وإشارات المرور (الصفرا طول الوقت)
وسؤال الغريب لـ غريب: أروح ازاي....
...وكنا بنفتح الباب اللي قافلاه الحكومه
بكل ترابيسها
...وكنا بننشُر العِلم اللي مانعاه الحكومه
ف كل مدارسها
وكنا القاهرة: ناسها.. وأحلامها.. وكوابيسها
وفرشه بكام كتاب ومجله على شارع شريف...
نسرَح ف ليلها - وهيَّ نص جمالها ف الضلمه -
نسِبّ لكل صوره وكل يافطه
وإيدي غصبٍ عني تخرج عن شعورها 
ف وش "واحد"
- أبتسم من رد فعلِك -
بس إيدي غصب عنها وعن شوارع مصر تخرج 
مره تانيه وتالته.... مليون
عن شعورها
ف وش "واحد" !
*حلوه مصر؟...
مش هارد ب آه و لأ
هاقول: مانيش عارف.. لَكِنّي بحبّها
علشانها شبهِك..
*خدت إيه من مصر؟..
إسمي...
كفايه إسمي
وأرض ما زرعهاش أبويا
بناها بالطوب..
والقمر على سطح جامع
وانتي طبعاً...

(كنت بكدِب)...
كنت عايز اقول: ماخدتش مِنْها غيرِك
بس فلسِفت الإجابه
عشان أبان " راسي و تقيل"....

ظبطتني باتجسّس على عنيها..
فدارِت وشّها
وسابتني أحلم
حلم عدّي قصاد خيالي بسرعه 
لكن..
كان جميل.
.

**تصوير : نرمين الطنطاوي

لون الرماد والفجر - خالد سليم

شعر وإلقاء / منى رؤوف 
موسيقى / سأحاول الرقص وحدي 
نفسي ألعن المسافات واسرّها في منديل 
أعبُر بعيني البحر الأحمر ع الخريطة
القاني بعد الرَمْشة عندك في الرياض 
طَلْق الحنين جوايا أصعب م المخاض 
الواد  بيسأل كل لحظة عليك 
مش مقتنع بمكالمة الڨيديو 
بتقول له "هات بوسة" 
يقول "ازاي"؟! 
يصرخ بقهر الدنيا "فين بابا"
تنزل دموعك تلجة مصهورة 
وتبوش عيونك تقفل الشاشة

الغربة "مش عايزاك تخاف" ـ منى رؤوف

شعر وإلقاء: بسنت عبداللاه

صبر جميل | بسنت عبداللاه

مشهد غريب | سوزان عماد

شعر وإلقاء | منى رؤوف 
شهرين يا حب
الشمس تدخل بيتي ما تدفيش
والضي يكسر عيني يعميني
ألقاني واقفة وحيدة وسط الريح
تقلع جذوري الشهقة ترميني
تدميني حاجتي لـ لمسة من إيده
مطرودة روحي من إطار جسمي
هايمة ف براح الشقة والملكوت
معطوبة قشرة قلبي بالوحدة 
تشبه لقشر اليوسفي لما يبوظ 
كف الرضيع لو لمسه بس هيتعصر 
تعصرني كلمة "إنتي وحشاني"
تتلِف ضلوعي الرغبة لما تثور 
تخلع عيوني الدمعة لما تفور
تكويني بالصهد اللي يفضحني 
وتفرفت الكلمات على لساني

منى رؤوف _ الغربة (بوح شفايف ميتة)

حيث وانا وحدي 
زعلانه من غير ما اقول زعلانه
ولا آمن ابين عياطي غير لكفوفي 
ولا بهدا من كتر العياط غير في
الضلمة الشديدة وف حضن المخده
شاشة تلفوني بتعرف بتلهيني 
وبتاخد عيني من فوق البتر 
شايفه العصفورة؟ 
حيث وانا وحدي 
مافيش عصافير 
حتى العش اللي كان ف الشيش 
عصافيره هجرت الشباك وطارت
وحشتني تنقّر باسم صباح الخير
وتلاغي حيطان الأوضه بصوتها
وتصحيني 
حيث وانا وحدي
..
مابين الخطوة والخطوة 
حقول ألغام 
سلوك شايكه 
يفط  جوايا بتحذّر
مابتخوفش
يفط شفافة 
وانا جلدي كمان شفاف
والأحزان بتكون متشافة
حيث وانا وحدي
عينيا مزغلله 
عارف 
شايفاك بوضوح  مع انك مش جنبي 
والدنيا  عينيهاا  مزغلله زيي
ماشافتش الحزن اللي مغرق جسمي لجوه
ومغرقني بلون شفاف 
خلاويص؟
لسه..
طب أفضل اعد لغاية كام وتجيني 
خلاويص..؟
..
ماحدش رد 
طب قول لسه 
مش هزهق من قول خلاويص
ولا طول العد 
من حيث وانا وحدي



قول خلاويص. شعر وإلقاء/ صفاء أبو صبيحة

دخلة ابريل
الشتا بيعافر في الصيف
والصيف بيعافر في الخلق
والخلق بتغرق في الزيف
والكلمة بتخنق في الحلق
وشوية تمطر على غفلة
وشوية عواصف وتراب
وشوية الحر بيتمكن
كروان بيخانق في غراب
وشوية نمل اللي قريب
وشوية نحب الأغراب
وتملي بحن
وبفتكرِك
وبروح على صورتِك
بالعافية
( الجو عيا )
على رأي أمي
باين من صوتي اني بعافية
دور برد شديد
المرادي
مانفعش معاه
مشاريب دافية
على فكرة أنا لسه عبيط جدا
وبحب أتفلسف ع البرد
ومصدق انه بيغسلنا
وبيغري الساكت بالسرد
وبيسحب من خنقة روحنا
فبتظهر خنقة على الصوت
لولا بس مضاد بينيمني
كان ممكن أقول لِك مبسوط
انشاله تكوني أحسن مني
يا شبيهة الشاي المظبوط
وحشتني عيونِك بزيادة
يا اللي انتي عيونِك كات ليا
فتشت خيوط السجادة 
 مالقتش مُسكِن غير هيَ
كان نفسي أحكيلِك كالعادة
وأوان الحكي
خلاص عَدى
أه صحيح بخصوص نتيجتي
شلت مادة
وسبت مادة



دور برد شديد

زي النسيم البارد 
وقت الخراب والزحمة
يوبيل الرحمة.. 
بين مطب المحيا 
ومطب الممات..
زي الكوميديا السودة 
في الدنيا..
وفي الآخرة
وفي الإعلانات..
بنمُر، ونتصنف...

عملوا إيه بالبساطة بياعين الفل؟
وعملنا إيه من غير بساطة احنا؟
واقعين بين المحاولة والمحاولة..

على حِس الكلام السهل بنزوّق قلوبنا..
وبنزوّق جيوبنا، على حس الطريق الصعب..
ملناش حياة في الفلسفة
ملناش حياة في الحرب

طايلانا إيد المجتمع، من قلبنا لجوفنا..
ومكلبشانا ع الصراط، الذكريات
هنمر زي البرق مش م الطيبة، من خوفنا 
يوم الحساب هنصدّق العلامات..
ونبرر الغاية..
هنعدّي فوق السنين 
مساكين ومن غير روس..
ياكل قلوبنا الحنين 
ياكل رجولنا السوس..
بتجرّنا الموازين 
تضحك علينا الشموس
تطلع لنا من بين طُرُقنا النهاية..
آية.. في سبيل المصلحة العامة
وحكاية في لسان اللي مالهوش حكاية 
بنترسم جوّا التاريخ، مش زي ما احنا
بنتشاف أو لأ، على كيف الظروف 
سيمانا على روحنا من المحنة
ومن أثر الوقوف..

نجري ف طابور والدنيّا زي ما هيَّ
والانتظار ملهوش تاريخ صلاحية
وكإن تفاصيل الحَدَث كانت جديدة
وكإنها المرة الأخيرة، والأكيدة..

بنطُل على آخر الطريق العيرة
إيه الحقيقة الفاضلة بعد الزيف؟ 
فين النهاية في آخر السيرة
فاز الحكيم، ولّا اللي قلبُه خفيف
بننتهي، وبتفضل الحيرة
واقفة بين القتل، والقتل الشريف.

#هاله_ربيع

المحاولة - هاله ربيع

رسالة من العزل_محمد مرعي/بصوت أحمد خالد حسني

قل إنني الدرب الحرامُ ومَن مشاه ومن هَدَتْهُ مشاعِلُه
قل إنني من يحفظُ القَسَماتِ حتى لو تقّنَّعَ قاتِلُهْ.
قل إنني ساعي البريد من الشهيد إلى الشهيد لكي تُصانَ رسائِلُه

ما لم يقله المهرج... ل أحمد عبد الرحمن

Ahmed abd el rahman

Related tracks