انا مش انسان 
انا حبة احزان مرمية 
فى دايرة نسيان 
انا مش انسان 
والدايرة تضيق تخنق فيا 
من غير ولا موجة ولا مية 
ببقى انا غرقان 
بس انا بتنفس انا عايش 
نفسى جوايا بيزعجنى 
وكانه تمام عيل طايش 
فاشل فى الرسم وفى الاحلام 
ماسك الوانه وبيشخبط
من غير ابداع 
انا مش انسان ؟
امال انا مين 
انا قشرة موز  كسرت رجلين حلمى فوقيها
لما اتزحلقت
انا ضهر اتنحى واتهرى واتفنى 
من كتر النومة على الاسفلت 
او يمكن اكون تجربة صعبة 
عدت فى سنين منها اتعلمت 
او ما اتعلمتش 
انا تايه 
من خوفى ويأسى انا اتلخبطت 
تفتكروا انا مين ؟
انا نور شمعاية فى عز الضهر 
دابت واتحرقت فى ماكنها
 من كتر القهر 
ولا انا قصة حب غبية 
بين اى اتنين 
نسيوها فى شهر 
ولا انا م الاصل ماليش تفسير 
وحياتى الجاية والماضى 
شئ تافه ما يأثرش كتير 
ع الحال دا تلاقى جميع الناس 
محتارة فى نفسها طول الوقت 
وتلاقى احساس يغلب احساس 
تكدب روحك وتقول صدقت ؟
على اى اساس اللى بيحصل 
انا احسن حل انام على طول 
نومة من غير تفسير ولا علل 
من غير ما اكون انا فيها مشغول
تفتكروا دا صح ؟ 
انا مش عارف 
انا مش انسان ولا انا انسان 
تفتكروا انا مين ؟؟؟؟ 


مريض نفسى - الشاعر احمد اسماعيل.MP3

فى حاجات بتمر عليك فى ثوانى
وقلوبنا عليها عايشة وبتحس
وحاجات بتعدى ببطئ شديد
وبتبقى مجرد ذكرى وبس
وحاجات تفضل محفورة جواك
ومفيش ليها من جواك تأثير
ودى عكس حاجات يصعب تلاقيها
وفراقها بيعمل فرق كبير
والدينا دى ايه غير حاجة كبيرة
جواها حاجات مخفية كتير
فى منها حاجات تفرح للقاها
وحاجات تتمنى الموت منها
وتلاقى حاجات على اد قساها
مش ممكن يوم تبعد عنها
وحاجات علشان توصل ليها
بتعدى حاجات وبتنسى حاجات
وتقابل صدفة ومش مقصودة
حاجة واحدة تنسيك اى حاجات
انما واضح من كل كلامى
على اد ما فى فى حاجات فرحة
على اد ما فى احزان فى حاجات
لكن ولا نقدر نستغنى
عن اى حاجات من اى حاجات


قصيده حاجات - الشاعر احمد اسماعيل .MP3

تسمحيلى يا اميرتى
انسى حزنى بابتسامتك
تسمحيلى يا اميرتى
اخطفك من وسط همك
تسمحيلى اكون ماضيكى
اسبق الحاضر واشدك
للفرح والحب يلا
نفسى ايوا يبقى ردك
ابقى ليكى موج فى بحرك
يجرى ملهوف يم شطك
يحضن الرمل اللى لسه
فى اثار من رسم خطك
نادى لطيورك يا مينا
ترتوى من عطر يدك
تسمحيلى يا غرامى
تسمحيلى اكون مرايتك ؟
تسمحيلي ياللي نفسي
ابقي ليكي زي ضلك
زي ضلك مش كفاية
تسمحيلي ابقي زيك
ياللي نادر ف الوجود
اني الاقي ليكي زي
ابتسامتك نور وضي
والجراح لو تلمسيها
تنطوي من قلبي طي

عارفة يا عشق السنين
انتي بالنسبة لي مين
عارفة اني كل ليلة
بتقتل لهفة وحنين
ايوا ندمان بعترف
غصب عني وبرضايا
ندمي علي ايام قضيتها
وانتي حضنك مش معايا
مش هكتر ف الحكاوي
اصل حبك مش حكاية
حبك الساكن وريدي
بالكلام مش هاوصفوا
حبك الاتي وطريقي
بالفرح راح يرصفوا
في النهاية تسمحيلي
او ما تسمحليش
بحبك
بالمزاج او بالرضا
غصب عنك اه بحبك
تسمحيلي يا غرامي
تسمحيلي اكون مرايتك


الشاعر احمد اسماعيل - قصيده تسمحيلى

وردة فى جنينة فرح  طرحت هنا ليا
كل الحبايب كوم سالونى مين ديا 
احلى من الحلوين من زى حسنك مين
لما شافتها العين زاد الغرام فيا
زى السما صافية بنجومها وقمرها 
ليالى شتا دافية تشتاق لسهرها
حب ودلع وجمال والله عال العال
حبيتها من قلبى سحرتنى اوصافها
اجمل ما فيها عينيها تسحر قلوب ملايين
اعذرنى يا ابو دياب دايب بقالى سنين
عليها خفة دم نسيتنى والله الهم
لا والجمال ربانى قرروا بقا يا غايرين
زى الملاك هى تدى ولا تحاسب
استحملتنى كتير ولا يوم تقول حاسب
فرحى مع غيرها واجنى ثمار خيرها
ولا يوم شكت للناس ولا هى بتعاتب
حبيت انا اوصفها كلامى ما كفا
قارنتها بالبنات قلبت متين كفة
براءة مالهاش حد وهزار وحب وجد
شبهتها بالشهد الشهد قال اصفى
سالونى عنها كتير  مين ياترى هيا 
ميت الف ليه وازاى واشمعنى بقا ديا
تشعر علاشانها وتقول عظيم شانها
رديت يا اصحابى هيا  الحياة ليا

الشاعر احمد اسماعيل - مين هى ؟؟.MP3

العُزله الحل - الشاعر أحمد اسماعيل

قصيده عن احداث الهجره الشرعيه والغير شرعيه وعن احداث غرق مركب رشيد
ودى كلمات القصيده 
#مركب_رشيد

البدايه ... 
صاحبي سافر. .... غربه مالهاش ف الرجوع 
غربه مافيهاش سد خانه
غربه علشان سد جوع .... 
سابنى وحدانى وبعانى
زوق الهم بدموع ... 
غاب كتير ... لكن تملى .. 
بينا اكتر من جدال 
ميت سؤال ... 
وابتديت انى اصدق ...
واعرف العله وافرق ..
عقلي برّق ... وابتدى الحلم الجميل 
يترسم ف خيالى  فجأه ...
توهه سابقه الاحتمال 
 وابتديت احلم بلهفه .. والبدايه كانت سؤال
..... العود يعلى ... لمده عشر ثوانى 
احكيلي عن الباسبور مره
ورقه ولونه ..... سحره جنونه 
النسر عليه واضح ....  موجود
ولا هج وطار .... 
طب سيبك م الباسبور احسن
واحكيلي ازاى بنعدى مطار 
بوابة الرحلة الفلانية 
من مصر ... لاى مكان ف الكون 
شباك الحجز .... تذكرة او بون 
وبلاد بره تجنن بصحيح 
الوضع هناك آمن ومريح 
كلمنى عن الغربة المرة 
كلمنى عن الاحلام مره
رد عليا ف اخر لحظة
قالى الغربة يا صاحبي احلوت 
مش احسن ما نافوخك فوت 
وانت ف بلدك ... 
والاحلام سهلة بتتحقق 
ودماغك صافية وبتروق 
والقاشية بغاشا وقمر الدين 
ما انا عايش فيها بقالى سنين 
ليه ما رجعتش ... علشان مرتاح
بتقول مرتاح .. والحلم مباح ..
ومفيش ازمه ولا وضع مهين !!!!!!
سامعين يا سنين ... سامعين يا شوارع مصر الطين سامعة يا قطورات ..... سامع يابا 
الغربة الصادقة الكدابة 
بقا ليها لزوم
سامع يا بتاع الفول انت 
الفول بكرة راح يبقي كباب 
حرية بدون قاضي واتعاب 
وبنات وفلوس .... 
والعيش بغموس 
مش لقمة وحاف 
القلم الجاف شطب منى 
وانا بملى ف اوراق الباسبور 
النسر اهو طار ... سابنى لغلبى 
منحوس بهواكى وبتعايق .... 
واليأس ملكنى ومدايق 
حبك لو ذنب ... انا عايز اتوب 
بس النوبه مش راضيه تتوب 
والذنب لمين ... ماهو مش ذنبي 
.................... عووود 
والنسر اهو طار .. طارت وياه كل الاحلام 
نفسى اسافر ... وادوس قدام ... 
جاتنى الفكره وهنفذها ... البحر طريق مفهوش اشارات 
ولا فيزا وباسبور واشتغالات 
مركب بتودى بعيد جدا 
راح اعيش متهنى واسيب الفقر ... وهيحلى العمر 
وركبت المركب ولقيتها زى المصباح 
بدعكه يطلعلى الجنى قوام 
اطلب واتمنى وعلى كيفك 
ملعون اليأس المتدارى
وحلمت كتير ...
ورسمت الاحلام ع السارى 
مذهول م الفرحه ومش دارى 
باللى هيحصل بعد الفرحه 
ونسيت المثل اللى تملى 
كنت بقولوا وانا متهنى 
اللهم اجعل ضحكتى فيها خير 
واتارى الموت مستنينى
والاصعب منه انى استناه 
المركب ماشيه بتتطوح . 
اظاهر مش مكتوبلى افرح 
والناس تسأل ... ايه اللى بيجري 
حد يجاوب ... مش لاقي جواب 
والخوف ناشع من كل عيون 
والصوت يعلى مع علو الموج 
حد يغيثنا .... النحس باينه هيورثنا 
 والبحر بيبكى ومش فرحان 
الموت بيقرب ... انا شايفه ...
هيئته فضاحه ... ما انا عارفه 
دا بيضحك بيقولى يا خيبان 
هربان منى ...هتروح على فين 
انا بر وبحر وجو كمان 
فجأة اتحسبت كل الانفاس 
قلت اتشاهد ... صوتى مش طالع 
ولقيت نفسى ف حضن الامواج 
قلت اصارع .... وغلبنى البحر 
وغلبنى الذل ... وغلبنى الموت 
سامحونى جميعا انا اسف 
كان نفسى بجد اعمل حاجه ... 
كان نفسى بجد اكون حاجه 
ما عرفتش اعملها ف بلدى 
قلت اتغرب ... مره اجرب 
انما على مين ... 
اصل المنحوس على طول منحوس 
ف الأول الحبر اهو شطب 
وانا بكتب اوراق الباسبور 
والتانيه وكالعاده تملى 
العجز شبح كاره للنور 
والتالته الموت ... 
سيبته ف بلادى عشان موضه 
وانا ف مدرج بهتف بالصوت 
ف القطر الاقى الموت مبسوط 
واخيرا على مركب هجره 
شمتان بيقول هتموت .. هتموت 
واخيرا بيكمل غيظه 
ويقولى انا ليك اشرف بكتير 
لو ترجع بلدك تتحاكم 
والتهمه انك عاوز تغيير 
كان عندك حق بجد يا موت ..
والله بجد مش فاارقه كتير

البدايه والنهايه عن احداث مركب رشيد .WAV

م الاخر كدا 
الاكاونت دا اكونت متنوع 
هتلاقى فيه كل حاجة 
شعر واغانى كلاسيك وتهييس وقلش ع الاغانى 
اى حاجة بتيجى ف دماغى بنزلها هنا 
#تحياتى

ahmed ismaeel

Popular tracks