قصيدة بالعامية لـ : احمد عبد الواحد


ديسمبر - اخر ليلة - الساعة 12 بالتحديد 
لِبس العالم وش جديد 
السما الوان والكون حزنان والكل سعيد 
قلوب اوطان هتبدء عام وهتنهي سنين 
مبسوط ؟
مبسوط وحزين 
مش عارف هبدء عامي بمين 
ولا عارف هذا العام الكام 
اللي بنبدء فيه باحلام 
وننهيه بكوابيس ..
( 2016 )
لأول مرة بكتب للسنين والوقت 
دلوقت بس الزاوية اوضح 
والفعل افضح من فراق الروح 
على هذا الكوكب البائس بشر بجروح 
تعادل وزن ما في الارض من ضحكات 
وبنات متسابة او سايبة !
بنتجاهل حاجات موجودة 
ونهتم بحاجات غايبة 
لهذا الحد بنعاني ، نطِيب ونجرح نفسنا تاني 
ونوصل للمفيش بهدوء 
هذا العالم الصندوق 
مهوش محتاج لبابا نويل او سانتا كلوز
مهوش محتاج سِوا فيروز وقهوة كل يوم بليل 
وهذا النيل وكورنيشه 
مهوش محتاج يعيشنا يجوز لكن محتاج اننا نعيشه 
بحزنه و بفرحه ، بحضنه وبجرحه 
يخصامنا ونصالحه ونقبل كل ما في الرحلة 
خضرة او وحلٌة ..
يارب ارواحنا مبقتش حمل خدوش 
انا ليا قلب يارب وحيد متخذلهوش 
املاه بناس املاه 
تستاهل تكون جواه
ابويا الحنين 
وامي الوطن وحضنها مرساه 
يارب هدٌ الآاه واجعلنا من غيرها 
ليس الذي يهوىَ 
جاهل بتفاصيلها / انا سيبتها ومشيت 
لفيت لقيت طيرها 
بملامحه مالي البيت 
حبيتها ؟
اه حبيت 
وكلامي عنها وعن ...
الخوف : دبٌان رزل / اول ما بنقرب يزنٌ
اجراس كنايس نازلة رنٌ 
العام بدء ..
صدق فلان ، قال الزمان ، بيبان مفتوحة ع الماضي
هتدخلها بدون ما تحس ، هتبص ويمكن وقتها ما تشوف
هتطمن ساعات وساعات هتموت اوي م الخوف
هتتاخد اليك منك
هيزيد وينقص وقتها سنك 
وكأنك - لم تكُنٌ
غُنايا مليان بالشجن 
وبحزن هذا الكون 
بيرمُزو للحب - بالأحمر 
والدم نفس اللون 
الحرب بتموتك مرة 
الحب كام مليون .. !
عيون بتهدي تضل _ طريق مشيته وملٌ - ملقتش لسا الحل 
قُل / لو يسألوك هتبدء بأية العام ؟!
ارواح رُخام ف رخام - بفعل القلوب الخام _ ونظراً لضيق الخُلق
هدخل سريري وانام ..

ahmed abdelwahed

Popular tracks