بنت الناس 💔

البينولا

كما ف العشق يحكوا عنه ف الحكايات ..
انا هاحكي كلام عنك واقول روايات ..
من البدايات نطق قلبي وقال حبك ..
يعيش حبك مع قلبك ويسكني لحد اخر النهايات ..
حكايتي بكل تفاصيلها معاكي مش بتتلخص ..
ولا بينقص ف يوم حبك عن التاني يا عايشه ف قلبي وكياني ..
واقول من تاني هانساكي افكر فيكي..
 وابص لعينيك اتلخبط يتوه العقل وياكي..
 يروح مش جاي..
واقول ازاي ..
 ده انا اللي كنت ولا واحدة بتشغلني ..
وتيجي انتي تبدلي كل احوالي ..
حكيت عنك لعمي وصحبي ولخالي..
ياساكنه بعيد وف العالي ياعشق الروح ..
يا دوا ليا وشفا لجروح..
 وفين مابروح ..
بقول اسمك واكون راسمك واحكي كل يوم عنك ..
انا ف عشقك..
 كتبت الشعر والدواوين تنام العين..
 ويدعي العقل تبقي معاه يقول القلب بردو امين ..
ياحته بين الضلوع ساكنه يا عطر جاي من مكه.. يارحلة وصحبة ف السكه يا خطفه القلب بالضحكة..
انا ف حسنك ماليش ملكة..
 وسايب نفسي وياكي ومش هاسال..
 بغيرك مستحيل يبقالي ولا هاقبل ..
يا بيت وعيال ومستقبل انا بيكي بكون اجمل ..
يا احلي من بنات جيلك ياسابقه الكل بجمالك ..
بسيب الدنيا واجيلك عابر بسبيلي لخيالك ..
ورحالك..
 ف صحرا انتي بستانها ف دنيا عينيكي عنوانها.. ياداري وانتي سكانها.. 
يا عيد يملي العيون فرحة ف عز الاه واحزانها ..
وانا مش روميو لا قيس حتي ولا عنتر ..
لكن جوايا عشق الكون يزيد ف القلب وبيكبر ..
انا مشبهش يوم ليهم لكن حبي ليكي اكتر ..
يموت القلب ف غيابك يبات مغلوب وبيفكر ..
يطول وقتي مع حيرتي ماجاش النوم لدلوقتي ..
يا محتله حدود ساحتي يا حضني وضمتي وراحتي ..
تغيبي تغيب نجوم الليل وانا ليلي ف هواكي طويل ..
واقول الصبر بردو جميل عشان اخره يكون انتي ..
انا المكتوب ف يوم ليكي انا التايه وف عينيكي ..
انا الموال يدور بين ناسه عشان بس يغنيكي ..
ووقت الفجر يصلي لربه يدعيكي ..
انا المقتول وانا الدايب وانا العاشق بموت فيكي ..

كما ف العشق

ف تاريخه الساعه 2 بالليل ..
لم قصايده اللي كتبها عليها ..
والصورة اللي كانت زوم لعينيها ..
ومسك تليفونه وقال ف التسجيل ..
...................
بعد تحياتي..
وبعد سلامي كبير لسعادتك ..!!
اخبارك ايه كيف الاحوال..
معلش هانشغلك وقتك ..
مش هانطول ..
عارف انك بقي ليكي ناسك..
كنت حبيبك يوم من الايام..
سبحان من غير احساسك ..
..................
واهو ده الاثبات..
ان ماحدش ف مكانه ثابت ..
ياما ناس سابت..!!
ف قلوب بتغير يوميا ..
زي مابتغير ف هدومها..
ع ايه تلومها ...
ولا حاجه بتفضل ع حالها..
اوعاك تزعل ع من فاتك ..
...............
انا بس زهقت..!!
ف مسكت ف قلمي لقتني كتبت ..
سامحيني..!!
اصل انتي وحشتيني ..
سامحيني..!!
عشان ليكي اشتاقت ..
اصلي تعبت ..
من كتر ان انا حاضن صورك قبل اما بنام ..
ليه النسيان بقي كافر بيا .. !!
وعايش فيكي .. هونت عليكي ..
ازاي تسيبيني ..!!
مع اني انا للحظه ماقولتش..
غير بس ان انتي وحشتيني ..
طب نسيتيني..!!
معلش بطول ف كلامي يمكن تفتكري ..
انا فاكر قبل اما تسافري..
قولتيلي وبالحرف الواحد مش هانساك ..
دلوقتي ياعالم من اصله ..
اذا كنتي اما هاتسمعي صوتي تفتكريني ..
....................
تعرفي اوقاتي بتعدي ازاي..
بنفخ ف سيجارة مع كوبايه شاي ..
وبقعد حواليكي ..
حواليكي..!!
دي معناها صورك هداياكي..
لحظات كنت عايشها معاكي ..
يمكن باين قدام الناس ان انا عادي..
وان انا قلبي اصبح فاضي ..
لكن انا بالفعل حقيقتي..
انا قلبي من يوم مافارقتي..
راح وياكي خلاص مش جاي ..
..................
ادمان القهوة او ادمان سهرك للصبح ..
مش زي ماتدمن حب لشخص ..
وخصوصا لو كان بيفارق..
او سابك عايش فيك جرح ..
ف الاول بيكون وياك وعليه بتتعود ..
وشويه تلاقيه بيتحول لمرض مزمن ..
اكتر يسكن .. مش بيقل لا بيزود ..
اصبح شكلك شبه هلاك ..
قلبك متكسر جواك ..
تتغير جدا ف ملامحك ..
من تحت عينيك بقي لون اسود ..
....................
بالرغم ب انك سايباني من فتره طويله ..
لساني ولحد الليله ..
وحشاني ومش عارف انسي ..
ولا يوم بقسي ..
ولاحبك ف القلب بيهدي ..
مع ان الاوقات الحلوة بينا قليله ..
نسمه عليله .. كنت بحسها مع قولة اسمك ..
اجري اجيب الواني بسرعه ..
واكون راسمك ..
وانتي هناك ولا كان بيهمك..
عايشه حياتك ..
وانا بالرغم ده كله ف ليلي ..
بدعيلك يسعد اوقاتك ..
..........................
مش مثاليه..
ولا بحكيلك وانا مستني ترجعي ليا ..
انا عارف انك نسيتيني ..
واتاكدت.. 
ان حكايتي معاكي زمان ..
 كانت ليكي مجرد وقت ..
البنت اللي رسمت ف حبها بورتريهات ..
صبحت لوحه بهتانه بلونها وقلبها مات ..
عدي وفات ..
بالنسبالها كنت مجرد واحد عابر ف حياتها ..
اصلا خارج من حسباتها..
فعلا انتي ماحبتنيش..
يبقي ازاي علشانك اعيش..
ماتجوزيليش..
يحرم حبك تاني عليا ..
البنت اللي انا كنت عاشقها زمان ..
ماتت فيا ..
كان جوايا اتنين متخانقين ياما عليكي ..
قلبي اللي اتعلق يوم بيكي ..
وعقلي اللي زهق حتي يفكر فيكي ..
مات القلب خلاص من عشقك والعقل اهو فاق ..
كان متوقع بعد ما وجعه اتملك منه ومرك داق..
والترياء .. ان الحب من جوايا يتحول كره ..
وانك شبه .. لواحده وبس انا اللي حاببها ..
وماشوفتش حتي ف يوم عيبها ..
واهو دلوقتي خلاص انا كارهها ..
وان نهايتك هي اليوم ف تاريخه ف ليل ..
انا ببعتلك كل الوجع الساكن فيا وكل الويل ..
وان انا اخر حاجه هاقولها ف التسجيل ..
شكرا ع درس اتعلمته ف اخر حبك ..
وان الكره ف وصفك اصلا يبقي جميل ..
.
.
ف تاريخه

ف تاريخه

تسمحيلي انك تحبيني ..!؟

مساء الخير ع قلوبكم..
بخير ولا خلاص دابت من الاوجاع ..
مساء الخير ع اللي راح وقال ياجراح ..
وع اللي كان حبيبنا وباع ..
مساء الخير عشان الغير ومن سابنا ..
وعاش وحده بيفرح واحنا بعذابنا ..
مساء الخير ع البنت ..
اللي بان ف عينيها دمعتها ..
وحاسه اكنها غريبه برغم ب انها ف بيتها ..
محدش حس يوم بيها وهي تعد انفاسها ..
وترجع تشهق الشهقه بتنهيدها ..
مساء الخير ع الغايب ..
 وسابله حبيب بيشتاقله ..
ياريته حتي يبعتله ..
بكلمه تطيب الجرح اللي مالي قلبه ..
ولا ساب حتي لي عنوان يقوله انا فين ..
يا جرح منين الاقي حبيبي من تاني ..
يداوي حته وجعاني سايبني لمين ..
انا حالف ف وقت ما اشوفه يرجعلي ..
لا اكسر كل ضلع ف من الضمه ..
واحط خدي ع صدره ويسمعلي ..
واعوض كل سهر الليل ..
ويملي الفرح تاني العين ..
مساء الخير يا صاحبي ياللي ف الصورة ..
انا فاكر ليالينا وغناوينا ..
وكل.مكان انا وانت زمان روحناه ..
وف مشينا ..
ياصاحبي بقالي ياما كتير ماشوفتكشي ..
يا اخي ملعون ابو الغيبه ياعم انت بتوحشني ..
فاكرلك كل حاجه حلوة ف يوم مع بعض ..
ياصاحبي تعالي بطل بعد ..
خدك مني الجواز يعني ..
بقيت اب وليك بيتك ..
ياسيدي وماله بس اسال وعبرني ..
نسيت القعده ع القهوة وكام مشروب ..
ولما كنت يوم ارخم بكلمه عليك تقوم مقلوب ..
تروح ماشي ..
بجد الدنيا من غيرك ماتساواشي ..
لحد اليوم انا لسه هنا امبارح ..
كأن بكرة ده ماجاشي ..
ياصاحب عمري يا واحشني ..
حلف عمري ومن بعدك.ما اهو ماشي ..
...................
مساء الخير ع الواد اللي عايش لسه ع الذكري ..
وتسال عن حبيبته فين يقولوا راحت لرب كريم ..
وهو ياعيني كل يومين ..
يروح لمكان ف يوم كانوا فيه ..
ويسال عنها كل الناس ..
وهي من الاساس فاتت ..
خدت روحه منه لما خلاص راحت ماتت ..
وهو لسه ع حاله ومستنيها ترجعله ..
وبيقولوا بينده اسمها تملي و راح عقله ..
ولو حد يجيب سيره عنها قدامه ..
تلاقي دموعه تتكلم ويسكت وقتها كلامه ..
يقوم ماشي وياخد نفسه بالعافيه ..
ويتنهد ويستشهد ميتين مرة ..
ويرسم بسمه تلقائي ومن بره ..
لكن جواه وجع رافض كده يظهر ..
يطلع من جيبه صورتها ..
وياخد منها كام نظرة ..
وف عيونه تبان حسرة ..
كأنه كان خلاص بيموت ..
وعاش ع حسها بكره ..
.....................
مساء الخير لكل حبيب وكل صديق ..
ف يوم افترقوا وراح كل واحد ف طريق ..
مسير الديق هايفرج يوم وتشرق شمس ..
وتلمس حلم بكرة ده لمس ..
يا كل بنت مجروحه مابتنامشي ..
يا كل شاب ماحلفوش حظ ف حكايته ..
ف قرر يوم مايحلمشي ..
مسير اللي انت مختارتوش يكون احسن ..
ويمحي كل اوجاعك ولا تحزن ..
ومش كل اللي نختاره يكون مفرح ..
ساعات تبهرنا لحظاتنا مع البدايات ..
تيجي النهايات وفينا تجرح ..
وليك ف الدنيا رب كبير ..
كاتبلك يوم ف حد الخير ..
ماتتعبش ده كله نصيب ..
ومهما الفرح كان بيغيب ..
ده مكتوبلك ومحسوبلك ..
ولا تتعب من التفكير ..
ده ف رب عليه التدبير ..
مساء الخير ..

مساء الخير

وف نفس الوقت من العام ..
اجبرت تختفي عن الناس ف بيات شتوي ..
وكانك بتجدد قلبك وبترمي ما فات ..
وبتحرق ف مشاعرك جواك مع بعض حاجات ..
وحياتك صبحت كل شتا لسكون وسكات ..
وكأن الوقت ده ف حياتك ..
تحديدا زي عزا ف اموات ..
الناس الداخله وخارجه ف خيرك..
بقي قلبك زي معديه بيعدوا عليها..
ويباتوا ف احضان ناس غيرك ..
كنت وسيله بس لتغيير جو حياتهم..
بتطبطب ياما ع احزانهم ..
وبيمشوا لناس واجعه قلوبهم ..
ويجولك اخر الليل بدموع تمسحها بطيبتك ..
يا خسارتك ..
اه ياشايل هم كتير من الناس ..
ومافيش احساس بيساع قلبك ..
ويروحوا زي،ماجم بالظبط ..
وانت ياعيني جواك فيك خبط ..
وجع الايام وضياع احلام ..
وتنام وتقوم وتقوم وتنام ..
وتشد الخط وراه 100 خط ..
وبتسرد قصه لكل شتا ..
وتدفي عينيك بدموع وبكي ..
كان ليك صاحب سندك واهو راح ..
كان ف حبيبه ليها حضن براح ..
كان ليك اب عكازك دايما من الاوجاع ..
ولكنه خلاص اهو مات وارتاح ..
الضل الساكن تحت عينيك بسواد معتوم ..
والالم اللي معشش جواك وبياما هموم ..
واهو بكرة هايفرق ايه من اليوم ..
كل الغاليين ف حياتك .. 
ف حياتك .. كتبوا شهاده لوفاتك ..
واديك قاعد تشكي لسيجارة..
وبتاخد قهوه ف فنجانك ..
كل اللي اتقدموا للتنسيق..
واول رغباتهم كان قلبك ..
عارفين ان التنسيق كداب..
ف اساسا مابقوش علشانك ..
الشتا فاصل للذكري وبكرة وكل الجاي ..
الحي يموت جواك وكمان ..
 الميت ف بيصبح حي ..
والليل ف الشتا بيصحي الجرح ان كان خلصان ..
وزهايمرك الساكن فيك يتحول حاله من الفوقان ..
مات النسيان ع ايد البرد والمطرة وهي بتنزل ..
ازاي الشتا بيكون فينا احلي الاوقات ..
وف نفس الوقت يكون جاني لما بيقتل ..
ويفكرنا بجراح خلصت وبيتحول اصعب لحظات ..
وبيرجع كل قديم او فات وبيصحي،ما مات ..
كل الجنايات ف قلوبنا كانت شتويا ..
كل اللي افترقوا ..
 افترقوا بنفس الوقت وحرفيا ..
او تقريبا كده وجميعا ..
عايشين نفس الحاله نفسيا...
وبنفس نهايه الفيلم الهزلي ..
اصبحوا ف الوقت ده من العام   ..
يكتبوا ف الحاله بيات شتوي ..
.
.
بيات شتوي ..
.
.
احمد ناجي ..

بيات شتوي _ وجع كل شتا _ احمد ناجي

واذا كان الحب اساسه احساس ..
ف الاحساس كله بييجي ف الحضن ..
وكأنك ابن وضماك ام ..
ماهو ف التفسير وبدون تفكير ..
الحضن دفي ودراعات بتضم ..
ومهم ..!! اكيد احساسك مع نبضات القلب ..
ويدق كده ع باب قلبك ..
ويقول افتح ده اللي اسمه الحب ..
الحضن مش وصف او حتي اداه للعطف ..
الحضن طبيب لمريض وحده ..
بتروحله وعارف من مرضك انك هاتخف ..
وتجف ساعتها كل دموعك ..
اول ما تحط الراس ع الكتف ..
وتشف الاحزان الباقيه تصبح مختفيه ..
مع لف دراع حوالين ضهرك ..
الحضن مزيج بين قهوة مدمنها ف سهرك ..
وسيجارة تعفرها ف غضبك ..
نيكوتين القلب ف تاثيره  ..
مفعول السحر ف تغييره ..
الكاس اللي بتعدل بي مزاجك ..
تفقد وعيك جواه لكن بمزاجك ..
الحضن.. كالبيت شبابيك بتقفل ع جرحك ..
الفرحه اللي بتقتل همك ..
الراحه اللي تنسيك وجعك ..
وصديق حاسك فهمك سمعك ..
الحضن .. حبيبه وبتطبطب ..
الحضن .. ابويا اما يقرب ..
الحضن .. حياه ليها بنهاجر ..
او لما بنغلط لي بنهرب ..
الحضن .. ده حاله من الاستسلام ..
الحضن .. وطن الحضن سلام ..
طفل ملامحه بريئه بيضحك وقت اما ينام ..
الحضن .. الشعر اللي اتجمع موصوف ف كلام ..
الحضن .. بيشبه بلدي كتير ف جمالها برغم الاحزان ..
الحضن .. الشمس اللي بتشرق وف كل مكان ..
الحضن .. قمر بينورلك ف تحس ف عز العتمه امان..
الحضن ده احلي شعور ف الكون يلمس انسان ..
.
.
(الحضن)
.
.
احمد ناجي..

الحضن_احمد ناجي

ولسه بتحضني صورته ف عز الليل ..
ولسه تملي قدامك مالوهش بديل..
ولسه بيسكنك حبه وهو لا داري ولا همه ..
وبردو لسه عايشاله بطيبة تقولي صبر جميل ..


بتخترعي عشانه اعذار وعايشه ف نار ..
وشايفه مصمصه شفايفهم وتغميزهم ..
تقولي ده هو بيتي ودار  ولسه مكمله المشوار..
ياحته ماس ف ايد واحد كما الوسواس ..
بيمدح فيكي قدامك وساب سيرتك مشاع للناس ..
بلا احساس بلا مشاعر وبيكي حتي مش شاعر ..
قالولك ياما واد واعر وكنتي بردو تتجاهلي ..
ولما فارقك الاخر قالولك ما انتي تستاهلي ..
مش انتي رضيتي وقبلتي وقولتي عليه ده كان اهلي ..
ادي سابك واخرك (كان) وفجر جواكي بركان ..
وهان قلبك عليه عادي وسابه يعاني ف الاحزان ..
ماهوش انسان ده متجسد ف بني ادم وجواه شيطان ..
بنيتي وياه حكايه وحب ع الفاضي ..

"" واخرتها اهي خلصت بكان ياما كان ""


والناس ع حالك بقت بتتعايب ..
وقولنا ليكي كتير وانتي اللي قلبك غير ..
لا الحب بيكمل وف طرف سايب ..
ولا طير بيرجع بعد حبسه اسير ..
والحب ييجي ازاي مع واحد ..
ماكنش ف الخير ..
ولاحتي قابل قلبه للتغير ..
ليه يعيش حياته مبتسم وسعيد ..
وانتي ملامحك من التعب اتملت تجاعيد ..
انتي القريبه منه طول الوقت وهو دايما يبعدك لبعيد ..


"من طرف واحد" لقاكي حد بيحبه ف عاش ..
تزعلي لو يوم ماجاش ب استماته ماسكه ف ..
وانتي ف سؤالك عليه يهملك ورامي الطناش ..
كان بيضحك وانتي بدموعك تنامي ..
كان بيتقل و هو ايه فارق معاه ..

    "ما انتي وياه وببلاش"

كنتي بترني عليه وكان يشوف ف كان ينفض ..
وانتي من قلقك ترني رنه تانيه ف كان بيرفض ..
حد قالك حبي واحد عارفه انه الرجي منه مافيش ..
يوم ما جيه وحن عليكي بصلك من فوق لتحت..
    "وببساطه قالك انه ماحبكيش"

..
كل الاكيد الان انك ما زلتي بتسهري ليله ..
من الشوق بتبكي دموع قلبك يناديله ..
يرميكي زي اليويو ف تردي وتجيله ..
والدايرة مقفوله عليكي ولا عمره حس ..
" انتي اللي بس .. دايما تحنيله "
ماتفوقي مرة من وهمك الكداب ..
من امتي ف احباب بيسيبوا مطرحهم ..
لو مهما كان ف قدر بيجرحهم ..
حافظين لوعد اتقال وكان ف يوم بينهم ..
بيدوسوا ع الاحوال لو مهما عاكستهم ..
قلبك ده ايه بالظبط ماتعبش جرح وخبط ..
اللي يهون دمعك عليه ازاي هاييجي وقت الفراق يتخض ..


قصي شريط نهايته مبتسمه ..
واعتبري ان وجوده كان نزوة ..
هو رياح هاتفوت وانتي كما النسمه ..
ولا بد حبه يموت وتعدي من الازمه ..
الحب عزوة وسند الحب ضهر ومدد ..
وده كان كماله عدد ولا حتي يتسمي ..
وانتي اللي زيك عايزله رجل وتد ..
انتي اللي زيك يتحب اصلا للابد ..
ف ماتسيبيش نفسك لزعلك ..
كل اللي فاتك يوم لوحدك ..
هو اللي خسرك انتي ماخسرتيش ..
ياما ناس بتخرج من حياتنا كأنها مابتجيش ..
والوقت بيبين معادن ولاد الاصول دايما ..
 وهو بعده من البدايه فعلا ده كان احسن ..
 اوقات بنفهم الحقايق ف اخر المشهد ..
    ف حاجات كانت واجب نموتها ..

      "علشان قلوبنا تعيش"




#احمدناجي

من طرف واحد _الشاعر احمد ناجي _اهداء لكل بنت حبت من طرف واحد

والله بحلفلك ب اني تمام ..
بالفعل فعلا مش ب اي كلام ..
والله دلوقتي بقيت احسن ..
واقله يعني مابقتش يوم احزن ..
ناقص بروح سكنتني دون داعي ..
دخلت ف قلبي و ماكنتش انا واعي ..
ونظرا لان الحب زي الموت ..
ف انا قلبي مات ..!!
 لكن بموته مبسوط ..؟!
من غيرك الدنيا بقت وردي ..
قلبي اللي خاني معاكي كان عندي ..
والعند زي ماقالوا ورث الكفر ..
ف كفرت بيكي والسبب انتي..


"مبروك عليكي اليوم لقب كنتي"


ايه يعني وحدي والوحده قتلت مين ..
كل اللي حن ف يوم لناس سايبين ..
كان اخر القصه من الضايعين ..
خايفين ف بيت مهجور بناس فاتت ..
مفتحين عينهم بنص ونص ..
هما اهم عايشين ولا ف بالهم ..
وانت اللي ف صورهم تملي تبص ..


وحق من قالي ان الفراق يوجع ..
وخد ب ايدي وكان يواسيني ..
قالي اللي كان ف فراقه بيدمع ..
هو اللي اصلا كان "بيأذيني" ..
ونسيني عادي كأني يعني ماكنت ..
ومشي وسابني وعليه كمان انا هونت ..
انا عمري مرة ما خونت ..
وف الاخير بتخان ..
الكل  ف نهايه المشاهد "للاسف بيبان" ..
وان كان ف حاجه بتنتهي فعلا ..
ف ده هو قلبي اللي اتملي احزان ..


وانا دلوقتي مستكفي من الجراح ومشيت ..
ومش جديده يعني انا قلبي متعود ..
حبيت وصونت ولكني ما اتحبيت ..
والبعد عمره ما كان ف الاصل بيموت ..

اديني زي الفل بخير وبعيش ..
ومصاحب الدنيا وكله تمام ..
والسيره عنك حتي مابتجيش ..
بشويش بقيت بنسي مع الايام ..

وكلامي لا اهانه ولا  هو رد لجرح ..
انا لسه عامل حساب للحب والعشرة ..
والارض لو بارت ازاي هاتجني بطرح ..
انا كنت شايفك دهب لكن طلع قشره ..


حبيني ف غيابي ما انا ياما حبيتك ..
وابكيلي ع بابي زي ما انا جيتك ..
واحتاجت تبقيلي حضن وقلب يساع ..
فاجاه رميتي قلبي وضحكتي وانا بتباع ..
     ~ف اوجاع بقي ب اوجاع~
 
            " ايوة انا نسيتك"

ورميتك الليله زي ما هونت زمان ..
ادي المشاهد لما تتبدل وتتعدل ..
واليوم انا بودعك هنا ف نفس المكان ..
وده مش انتقام مني ..
 ده لان ربك قال  "كما تدين تدان"..


العدل اصل الملك والملك بقي لله ..
والدنيا اهي لفت دورك بقي ف الاه ..
كل الالم فيكي وانا المي جاله دواه ..
فاكره اما قولتيلي كام يوم هاتنساني ..
اتعكست الادوار واديكي ف مكاني ..
    "عرفتي مين جاني ؟! .."
فهمتي ليه دلوقت اترجيتك تبقي ..
والحق ع قلبي عشان سابك جواه ..
واديني بتعافي واهي عادي يعني حياه ..
عشتك كمستقبل واديني اهو بقبل ..
البعد ليا اجمل من حالة المواساه ..
  بدات حكايتك فيا زي الحلم ..

" واليوم نهايتك اصبحت مآساه "




(كما تدين تدان)


#احمدناجي

كما تدين تدان_شعر احمد ناجي

بكل الحب ..
ببعتلك ف هذا الوقت ..
كئيب جدا لابعد حد ..
حبيبتي ثم اما بعد ..
انا اشتقت ..
في ساعه نحس ف حياتي ..
بكل الود وسلامي الكبير ليكي ..
انا مش عارف الماضي من الاتي ..
وواقف عمري بعديكي ..
ف يوم الحب كالعاده اديني وحيد ..
بقالي سنين ماجاش العيد ..
ولا رساله اخرها قلب وايموشن من المكسوف ..
بقول دي ظروف وبتعاند ..
لكن والله انا ملهوف وربي ع الكلام شاهد ..
انا باهت ومن غيرك مليني الخوف ..
لعل الحال هايصبح غير ..
لعل يكون غيابك خير ..
سفر مثلا .. او امتحانات ..
ولاهياكي الحياه اوقات ..
زهقت اسال بدون اجابات ..
وابررلك بدون اعذار ..
انا ف اسوء حالاتي اليوم ..
وبفتكرك وبكتبلك وحشتيني ..
وقلب احمر ف اخر السطر ..
بحبك ف ختام الحرف ..
وبفتح قوس عشان تمليه ..
ماجاش العيد عشان مش فيه ..
ويائس من الحياه بدونك ..
واحشني النظره لعيونك ..
ف يوم الحب ببعتلك حنين وانين ..
وقلبي من الغياب موجوع اديله سنين ..
واي اتنين ف هذا اليوم ..
بشوف فيهم انا وانتي ..
ووقت لقانا مع حيرتي ..
قوليلي ازاي كده بعدتي..
انا والله ..
وقد العشق جوايا وقد الكل ما حبوا ..
وقد عيوني ما اتعبوا دموع ف غياب ..
وقد الست ما اتغنت ..
"بعيد عنك حياتي عذاب" ..
وحشتيني ..!!؟
وقد ماكان كلامي سكات ..
وقد الفرحه ف البدايات  ..
وقد الحزن جوه نايات ..
وحشتيني ..!!؟
ودخاني ونيكوتيني ..
وسريانك ف شراييني ..
وقد البعد يا وتيني ..
انا وديني وحشتيني ..!!؟
عزيزي المدعي اسمه بعيد الحب ..
انا سنجل وحيد القلب ..
وواخد جنب ف غيابها ..
بلاش الخبط علي بابها ..
تعبت كلام كتير عنها ..
ليه بتفكرني تاني بيها ..؟!
وبتفتح ف قلبي الاام ..
ياريت تاخد اجازة مني ف هذا العام ..
وسيبني لمرة اعيش ف سلام ..
وختام لكلام كتير عنك ف هذا اليوم ..
انا بدونك عايش محروم ..
بصوم ع الحب يوم عيده ..
ياساكنه القلب ووريده ..
جروحي ما زالوا بيزيدوا ..
وجوايا كتير واجعه ..
لو انتي بجد مش راجعه ..
قوليلي طريقه بيها انسي ..
والاقي لبري يوم مرسي ..
حقيقي بجد لو حاسه ..
انا لسه ع حالي ..
ماشيلتك لحظه من بالي ..
بعيش خالي وقلبي يتيم ..
ماعدش فيا جزء سليم ..
ف نفس اليوم ده بالتحديد ..
اديني لسه بفتكرك وقلبي وحيد ..
ومهما يقولوا عنه ده عيد ..
انا كان عيدي بس انتي ..
يجوز تكمل بينا المواعيد ..
ويبقي الاحتمال تاكيد ..
واشوفك تاني ياحبيبتي ..



#ف_يوم_الحب
#احمد_ناجي

احمد ناجي_قصيدة_ف يوم الحب

كبرتي خلاص وبان ع وشك التجاعيد ..
وشعرك شاب ..
وبيقولوا العيال تيته وعكازك بقي سندك ..
مافيش عندك سنان وقعت وضهرك مال ..
لكن قلبك لا زال عيل بيشبه طفله ف الثانوي ..
ضفايرك نازله ع كتفك تغازل خدك الوردي ..
وطبع الحسن زي الختم ع دقنك ..
ولسه بشوف كمان فيكي حنان امي ..
وطيش بنتي وقلبك لسه بيساعني ..
ولسه بحس لمس ايديكي علي وشي ..
برغم الرعشه ولف الدنيا وسنينها ..
وخط الكسره ف جبينها ..
ولسه عيونها بنيه بلون فنجال من القهوه ..
ولسه حضنها مدينه بيحويني وفيه مائوي ..
برغم الحزن بردو انا بيكي بستقوي ..
انا لسه كما عرفتك ف اول يوم ..
لا شايف فيكي سن اليآس ..
ولا السكر هادد حيلك ..
ولا بسمع كلام من ناس ..
بتتصعب ع حالك وتدعيلك ..
وبشبط فيكي كما عيل ماسك ديلك ..
انا بكبر لكني لسه بتمشي ..
علي عمري و بحبيلك ..
واغنيلك يا ست الكل يا عود الفل ..
يا حته من الفرح فيا يا ساكنه الضلع والنيه ..
ومين غيرك يكون ليا برغم السن والشيبه ..
برغم الحزن والتوهه لكنك مليانه بطيبه ..
انا هافضل اشوف حزنك محليكي ..
واشوف بكره كمان فيكي ..
وتجاعيدك وعكازك طريق للفرح ف عينيكي ..
انا عمري ماشوفتك شكل ..
انا دايما بشوفك اهل ..
تملي العشق شئ مش سهل ..
ظلمتك لما قولت بجهل حبيتك ..
انا بيتك وتنهيدك وشكل الدم ف وريدك..
يابنت القلب والله ماغيرني الزمن ابدا ..
وكل ماتكبري ف سنك يزيد الحب فيكي جدا ..
لا بيغيرني تقل الرجل ف الماشيه ..
ولا ضعف النظر والهم ..
يا طفله ف شكل روح الام ..
يا صاحبة عمري وسنيني ..
يا من كمل ف يوم ديني ..
يعدي ومهما بردو يفوت ..
هاتفضلي زي ما قبلتك ..
مكانك ف القليب موجود ..
لوقت ماييجي ملك الموت ..
و تسكن روحي جوه تابوت ..
انا هافضل اقول اني ..
بحبك موت ..


#بنتي_العجوز
#احمد_ناجي

Ahmed Nagy Ahmed Emam

Popular tracks