وطول عمري .. 
أشوف فيكي الجمال رباني يتكلم .. 
أشوف فيكي الرموش السود .. 
أشوفك تحضني ولادك وحجّاجك.. 
وكل الدنيا بتشوفك .. وتتعلم .. 
..
يا زينة الحارة .. يا بهية .. 
عيونك كلها عزّة .. وحنية ..
عيونك حَبها ملايين .. 
ومهرك لونه أحمر صابغ الميادين ..
ولاجلك احط روحي في جيدك المزيون .. دلاية 
ولا اتندم ..
..
يا زينة الحارة .. يا عفية ..
قولي لي امتى تستكفي ..
وامتى ترضي و تقولي اهو ده المهر ده يكفّي ..
وعايزة كام من القرابين ؟ ..
و كام صرخة من الزنازين ؟ .. 
و كام غربة .. و كام حُرقة .. و كام قهرة و كام دمعة ؟ ..
وكام سجدة في جوف الليل .. 
قوليلي ايه يكَفّيكي .. 
قولي لي عايزة ايه تاني ؟ و انا اديكي ..
و امتى ترضي .. و تحني ..
و امتى ييجي دور الحلم ..
يتكلم..
..
أنا اللي خدمت يوم عرسك ..
و انا اللي هتفت في الكوشة .. 
و انا كنت الفرح و الفرقة و المعازيم .. 
أنا خالد و أنا أسماء ..
أنا عمار و أنا حبيبة ..
و انا اللي عملت زفة نور .. 
و انا اللي عملت لك هيبة ..
وسبتي الزفة .. وجريتي..
ورحتي ماخور!
..
قولي لي عايزة ايه مني ؟ 
و ليه راح ترفسي الخيّال .. 
و تِحني رقبتك الحلوة ..
و يستلم اللجام محتال !
و تصبح كل غنوة سكوت ..
و يصبح كل شارع موت .. 
قولي لي ازاي .. 
"سليمان" لما جاله "خاطر" اتخوّن 
ورحتي في حضن "عبد العال" !
..
#تيران_وصنافير_مصرية
أحمد أسامة 
١٣ يونيو ٢٠١٧

Ahmed Ossama 14