اشعار عبد الرحيم منصور - من فيلم الزمّار

شعر : عبد الرحيم منصور
إلقاء : نور الشريف
فيلم : الزمّار
إخراج : عاطف الطيب

قاعدة على الرحاية مكفية
صوت الحبوب
مَغنى سواقى .. أنّات خريفية
مين إنتى يا شابه .. يا محنية ؟
أنا بعت عقدى .. وعقدى طوله بلاد
كسيت بجلدى الولاد 
إيدى على الرحاية
وقلبى حب .. انا بطحنه بأيدى
لكنه ريم البحر في بياضه 
وجلابيتى سواد 
ودورى يا رحاية
وتحت توب الاحزان
دورى مع الدايرين
ولمي في الغُربَه .. وفي الخلان
وفى الشعور البكر والمطويه
والشومه .. والكرباج .. والعكاز
دورى يا رحايه

( نص الكلام ده بتاعى )
والنص مش ليا  
( أنا جبته بدراعى )
المغربيه عيون
المشربيه مغرب
فى قلبى وزنة كلام
يا ايدين يا وزّانه
ينشد فوقها الحزام
وتلعبوا الزانه
والناس عيونهم كلام
وكله كلام 

أصل الحكاية عن ولد شبهي وشبهكم تمام
في قلبه لسه بيتولد قمر الحواديت والشجن والكلام
شبهي وشبهكم تمام
وفي ليلة من ذات الليالي راح
راح والقمر مخنوق
والعتمة مالهاش عيون 
لا حد عارف مين مبحر مين ومين مشرق مين 
ومين مونس عتمته بسكين
كان له أخت وحيدة تتألم
خرسة صحيح لكن كل ما فيها كان بيتكلم 
في عينيها حزن و ريح عالم بحاله جريح
هي الوحيدة اللي عارفة ليه رحل وفين
! لكن الجبل عمره هيتكلم ؟

دوري يا رحاية - من فيلم الزمّار - اشعار عبد الرحيم منصور - القاء نور الشريف

شعر : عبد الرحيم منصور
إلقاء : نور الشريف
فيلم : الزمّار
إخراج : عاطف الطيب

بسافر بسافر
بهاجر بهاجر
إمتى ح تلقى المحطة وترسى يا حاير؟
مُر السؤال ع اللى مالوش ع السكة آخر
من مصغرى لمكبرى مسافر
باغوى مشاوير الهوى والدنيا
والقطر واخدك فين؟
القطر واخدنى بلا محطة
وآه يا ابا آه يا ابا يابا عليا
لا دار ولا مرسى ولا صبية
وادينى ماشى فى رحلة الشقا والرزق والترحال
كأنى سؤال
يا هل ترى يا مطرحى الجديد 
يد القدر بتخبى إيه من بعيد ؟
كما طفل وأنت العيد بأحن إليك 
قولى وطمّنى
حلاقى رزقى ولقمتى الهنية ولا
 نهايتى فيك ؟

بسافر بسافر - من فيلم الزمّار - اشعار عبد الرحيم منصور - القاء نور الشريف

شعر : عبد الرحيم منصور
إلقاء : نور الشريف
فيلم : الزمّار
إخراج : عاطف الطيب

طويت بوادي ومزارع 
يا قطر عمري يا ضايع
وقف الزمن جوايا
أنده.. ويرجع ندايا
الأرض بيتي و غيطي
وسماها هي غطايا
أشكي لمين بلوتي 
قوليلي يا نجمتي
يا مونسة وحدتي 
يا صحبتي في مسايا

طويت بوادي ومزارع - من فيلم الزمّار - اشعار عبد الرحيم منصور - اداء نور الشريف

شعر : عبد الرحيم منصور
إلقاء : نور الشريف
فيلم : الزمّار
إخراج : عاطف الطيب

آه .. لو فاتونى العمر اتمشى
لا أمشى فى جبالك .. خُضرتك .. دربك
وأعشى طيرك قبل ما أتعشى
آه .. لو فاتونى أدق على بابك
لا أدق وشم الحب في قلبك
وتزّهر الغنيوّه فى تيابك
يا أرضى .. يا حبيبتى
بتفتحى حضنك لحضنى مواسم
طواحينك الدايره لها مواسم
والعشق له مواسم
واللقمه فى بُقنا ليها كيف و مواسم 
ما هو برضه زى ولادك المطاريد
بتملسى عليهم بإيد .. وتسبلى عينيهم بإيد

آه لو فاتوني العمر اتمشي - من فيلم الزمّار - اشعار عبد الرحيم منصور - القاء نور الشريف

شعر : عبد الرحيم منصور
إلقاء : نور الشريف
فيلم : الزمّار
إخراج : عاطف الطيب

بتعيشى وهم كبير 
حواليكى بيغنوا فوارس فوق ضهور الخيل
ومخبيين السناكى فى جراب القلب
ومخبيين الغناوى فى جراب الليل
انا جيتلك وانا ماشى على كتفى حمل تقيل
لو كان جمل كان عض بنيابه الخزام

اشعار عبد الرحيم منصور - من فيلم الزمّار

Ahmed Sedek