نُشرت في عدد اغسطس من مجلة كلمتنا
اداء صوتي وكتابة : احمد شعرانى

هذة اللحظة التي تتحدث فيها الى نفسك بكلمات سمعتها من قبل في "زعيق أبوك أو كلمة بايخة مِن مُديرك أو خناقة مع حد كنت فاكرة صاحب" كلام بيرن جواك ويقولك "يافاشل, مش هتنجح, مش مكانك, مش قدراتك, هتموت لو عملتها"

تِحلم تكون مُمثل كبير وتشوفَك واقف علي المَسرح والناس بتسقف لك, وتِحضر كُل البروقات وفي يوم العَرض تقرر مَتروحش وتطَلع مليون حِجه وحِجه تقولهم للناس بس جواك مش مصدقها وعارف إنك كداب, لما تخاف تِركب قطر الموت في دريم بارك ويفوتك لحظة مَجنونه مش هتعيشها كتير, 

لما تسيب تَمرين السِباحة عشان بتتكسف من وزنك الزايد وتفضل زي ما أنت "تخين"
عَزموني في مَرة علي أختتام موديل في الجامعه الألمانية أنا فاكر أني مفهمتش حاجة من اللي اتقال لأني ماليش في اللغه طلعت وقفت خارج القاعه ورا أزاز, أشوفهم منه ومسمعهمش

عارف لما تحب الضَلمه أكتر من النور, ياما سألت وأنا صُغير ليه لما النور يقطع بَحس عنيا بتوسع ولما كبرت فهمت إني بشوف اكتر في الضَلمة

لما تكون مؤمن بالثورة بس خايف تِنزل لتموت وتِنزل أكتر مِن مره وتقف في محمد محمود وتتمسك بالصف الأول بس مِن الأخر علشان تِجري ساعه الضَرب مِن الخوف

عارف لما تخاف

شد الحزام علي وسطك

عزيزي المُستقبل

هو الحب حرام ؟

كتابة واداء : شعرانى


سيب عينك تبص لها
صدق كلام قلبك
لما يقولك بتعشقها
كداب لو في يوم حاول يثبت
انك تعيش بعيد عنها
أنك بلاش تحن لها
أنك مفيش أمل عن قُرب
أنك سعيد نسيت الحِلم
مهماً تلف تفضل تدور
ترجع حقيقة 

السعادة هي بينها
السعادة نور عيونها
السعادة قلب دافي
يحتضن قلبك بقوة
السعادة هي غنوة
تطلع بدون ترتيب
السعادة انك تعيش مبسوط
السعادة تكمل بالأمل
والأمل لو مش عشانها
يبقى طظ في الحياه
عينها ليا طوق نجاه
بيشدني من بحر هائج
بــــحر كان سماه مُنير 
بحر الحياه


بحر كان سماه منير

كتابة وأداء : العبد لله :D

أول قاعدة في الجِنان إنك تِسيب نَفسك
تِخطف حَبيبَك بُوسة عَلي غَقلة مَيلمحهّاش
تِفتَح لةُ حُضنَك يتدَاري جُواة مِن الكُسوف

إعمِل عَبيط سَاعه ما الدُنيا تديك ضَهرها
أِستَغِل الأَفراح واِهريِ وِسطَك رَقص
مَيشغِلَكشِ الشَكل ولا أمكانياتك فيه
وَجِب مَعَ العَريس متِتكِسِفشّ مِنُة
وِفي يوم فَرحَك شيِل مَع خَالتك اِبرة وخيط

لَما تحِس فيِ يوم بّخوُف كَلم فيِ النَّاس
اِركَب مُواصلة طَريقها بعيِد واِرجَع مَع السواق
نام فيِ جنِينَة عَامة وروح فيِ النوم
روح ع القهوة أُطلُب فَيروز وبأتنين جِنية سُوداني
صُب في الكُباية حَبة حَبة كأنك زَهقان وبتِسكر

أشتِم في صَاحبك كُل أمَا يبدأ كلام
اِعدِل القَافية مَع أخِر كِلمَة لُه
اِسهَر لِوش الصُبح وأِنزِل فيٍ يوم اَشغَال
اِمشي فيِ وِسط الخَلق ورَكِز فيِ التفَاصيل
اِطلَع بِحِكمة مِن الوشوُش النَايمةَ والعِيون المنفَخة
اِطلَع بِحكمة مِن كرمَشِة هدوم المِستعجِل
وحِكمة لمَعَان جَزمِة أنيِق

اِفهَم عَشان تِقدر تِعيِش
النَّاس ديِ بتِجري عَشَان رِغيِف عيِش
الصُبح دَايماً مش للي زَيك
مَع اِنك فيِ يوم هَتكون داَ الحَال
بَس الأكَيد يوُمهاَ راح تكون مَبسوط
النَّاس هِنا مَسرح والمَسرَحية جمَاد
تَسقط الجَزمة بكعبَها 
والبَنطَلون أبوُ كَسرة, يَسقُط اِلحَلاق

يبقَى اخِر دَرس فيِ القِصة
اَصل الجِنَان أِنك تكون راَضى
أَصل الرِضىَ يجي مِن جوُا قَلبَك
فأملي قَلبَك تَملي مَاتسيِبوش فاَضى
والقَاعدة دايماً تقول, اَكيد فيِ يوم هَتِرتَاح
فـَ خُد كُل حَاجة فيِ حَياتك "عَاديِ"

أصل الجنان

حلقة في اذاعه الشباب والرياضة
 استضافني استاذي الاذاعي حسام كامل

الأمل في حياة الشباب _ احمد شعراني

كتابة وتقديم : احمد شعرانى

دليل العبد لله الفقير لكل واحد عندة "مشوار" بدري وشرط ان يكون المشوار جوا القاهرة, تمام ؟ هذا الدليل مريح للأعصاب يجعلك تتفادي كرمشة القميص وريحة العرق وبهدلة الشعر وتلميعه الجزمة ويجعلك تحافظ علي الدش الى خدته قبل ما تنزل من الأخر بيخليك كما ولدتك "مراية الحمام" .

في اعدادي في مدرسة الاورمان في أول يوم كانت المدرسة بتفضل قافلة الباب لحد وقت معين فبيتجمع كل التلاميذ الى عددهم بيفوق المئات وفجأة يفتحوا الباب ويجري الطلبة بدون نظام كالفراش المبثوث بس في اتجاة المدرسة, الى بيكون واقف في اول الصف بيجري ويدخل بسلام والى بيكون في اخر الصف بيزق ويدخل بسلام لكن عارف الى كان في النص بيحصلهم ايه "بلاش"

"في القاهرة علشان تكون مرتاح البال أنزل قبل الناس" : من سته ونص لحد سبعه منبهات بيوت القاهرة بتبدأ ترن كلها سبعه ونص ثمانية بيكونوا في الشارع  ودي حاجة تقدر تقيسها عن طريق مدي تناكة سواق الميكروباص عليك قبل سبعه الصبح وبعدها, صدقني نص ساعه هتفرق فى الموضوع

بناء علي المعلومة السابقة نقدر نبني حجات كتير, تعالى ناخدها قاعدة للكلام الى هيتقال بعد كدا ونسميها قاعدة ( قبل 7 ) لازم تعرف أن قبل سبعه شوارع القاهرة في عِز الصيف بتبقى "مِندية" وأنت باصص من شباك العربية بتحس انك بتتفرج علي فيلم قديم للقاهرة أيام ما كانت فاضية, الناس لسة بتصطبح

 لـو طريقك دائري انزل من بيتك بدري بحيث تكون علي الدائري 6 ونص سبعه الى ربع بالكتير, لازم تفهم أن الداري جايب من القليوبية والاسماعيلية والشرقية وشبرا وموصل لـحد الهرم الرماية وفيصل والجيزة أو أكتوبر وأسكندرية صحراوي ومليون سِلم بينزل فية "صنيعية وعمال" عارف يعني ايه كل دول بيخشوا القاهرة عن طريق الدارئري, والى نقولة علي الدائري ينطبق علي "المحور" .

لو طريقك كوبري اكتوبر وكوبري 15 مايو أنزل قبل سبعه لأن نزلة التحرير وشارع ماسبيرو بيكون متبرشم زي علب التونة صعبه الفتح بولاق ابو العِلا لحد الاسعاف أجارك الله, فكر شوية أن الكباري دي جايبة من بولاق الدكرور وشارع السودان والمهندسين ومية عقبة وأمبابة والكيت كات والوراق والعجوزة ومتنساش أن كتير من زوار الدائري بيصبوا في المحور وبردو متنساش أن المحور ذات نفسة بيصب في مايو الى هما كلهم بيصبوا في وسط البلد .

وأخيراً الى الأذكية أصحاب الهوات الذكية لا داعي للفزلكة وأستخدام الـ جي بي اس لأن فعلياً عن تجربة هذا التطبيق لا يصلح مع شوارع القاهرة 
ولكن هناك بديل أخر وهو (أ- م- د) ألف مين يدلك .

كلكسات الصباح

من قعدة بيت دون يوم 26/3/2014 
كلمات والقاء : عمرو حسن 
كمانجا : اندرو موريس
-------------------------------

واتقلب الشعر على الشاعر
واتقلب السيرك على الأراجوز
شاعر مش حاسس بمشاعر
ميّت من عشقه الـ أوفر دووز
الشاعر من حقه يعيّط
من حقه يدوّر على واحد يكتب عنه
الشاعر من حقه يبطل يكتب للناس
مسكين الشاعر والله
مسكين ياولاد
بيعيش مجذوب جوه العالم ويلف بلاد
وان يوم يتصاب بالحساسية
يطلعله ف جسمه " فؤاد حداد "
مجنون الشاعر ياولاد
اقسم بالله مجنون

اسأله مثلاً كان نفسك تطلع ايه
هيقولك : كاميرا
الشاعر كاميرا وعينه فلاش
بيحب الكلمة اللي ماقالهاش
ويموت ف البنت اللي ماشفهاش
كان ضغطه بيعلي اما حبيبته بتشرب قهوة
ويجيله هبوط لو صاحبه بياكل حلويات
بتكلم ع المجانين جمعاً
وبخص الشاعر بالذات
ولذلك
كل اللي الشاعر يقابلهم يبقوا بيانو
كل اللي الشاعر يفارقهم يبقوا كمنجات 

Sh3rany

Popular tracks