دايرة الحياة

الجيش و العيش
صحيت م النوم و أنا قلقان
مانا أصلي النهارده 
خلاص
راجع علي الوحده
راجع إلي الوحده
خلصت أجازة العيد
و الله ما لِحِقت
أم العيال و العيال
و لا يشبعوا منّي
و لا يفهموا إني و غيري و زيّي كتير
سايبين حبايبنا
فيهم عجوز و صغير
في رعاية الرحمن
و كام جنية باقيين
من قبض جمعية
كان دورنا......... رابع إيد
خدناها قبل العيد
جاب الوله صندل و البت جلابيه
راجع علي الوحده
لمّيت شوية حاجات... أهمها الراديو
عاوزني أصحّي العيال؟
مش ناموا متأخّر؟ خلاص بلاش يصحو أنا أصلي متأخّر
و نزلت متوتّر
راجع علي الوحده
عالوحده
واقف أنا الليله نبطجيه
و الراديو ...... هات يا كلام، مستني أغنية
شكل الجبل من بعيد فكرني بالواد عيد نايم علي ضهرة
و عيونة نعسانة
و مبحلقين في السما
في الراديو...... لسه كلام
قلت امّا ادندن أنا
غنيت يا ليلة العيد
آنستينا
الراديو 
جابلي فريد
"أحبابنا يا عين ماهم معانا"
طلعت لقمة عيش
مخبوز في قلب الجيش
و أكلتها بشويش
و عدّت الليلة

و رجعت عالوحده....



الجيش و العيش

تشرب قصب؟
يـا خمرة العطشان يا عصير القصب 
يا تسالي كل حبيب 
علي الكورنيش 
يـــــــا ترمس
يا شادر الرحمن ف شارعنا اتنصب
يا منفضة و فضفضة 
يا وشوشة بتهمس

يا بو جبّة يـا كشري بِرشّة ورد
 يا كمالة
يا مهلبية و بليلة سخنة
 يا عاشورة
يا خناق في عيلة 
و بعده قعدوا رجّاله
هيقوم عريسك يبوس راسك يا أمّورة

يا طعمة يا طعمية ياخضر يا بصل
يـــــــــــا خس بلدي
 يا قوطة مجننة الجرجير
يا شاي تاجيل (تقيل)
و خَرَط 
يا خرط ملوخية
يا رز يا مفلفل و يا بدنجان
 يا شعريّة
حب العزيز ... يا عزيز
يا كاكا يا حرنكش
يا غُريّبة بتدوب و جنبك كحك عجميّة

يا دوم تماللي نافعنا نَحت أو كورة
يا عرقسوس 
 البطاطا بتنادينا هناك
يا طبق بصارة قبل البصرة بالفورة
يا قّلتين سقعانين في الحر عالشباك

يا بلوزة متزوقة ترتر و خرج النجف
يا كلّ من شاف كبيره هلّ.. قام له وقف
يا طحينة يا عايمة علي وشّ العسل لاسود
يا حلاوة طيحينية سادة... ربع أو خرطة
يا قرش يابيض نفعنا ف يوم ما كانش اسود
يا خط رمسيس يا محيرّنا بالَشَرطة
يا جبنة تركي قديمة نقشها فلفل
و يا قرن شطة مزوّق جبنة براميلي
يا حاتي سهران يهاتي.. و عمره ما بيقفل
يا سعيد يا لبّان يا معشّي شباب جيلي

 يا لحمة الراس
يا ست الناس
 يا كوارع
يا طَرب نايم علي سرير فرش بقدونس
يا ماتش كورة كاوتش خسرته في الشارع
يا رشة الملح عالممبار... بتاع يونس

يا اسكندراني يا كبده 
و يـــا محشي فريك يا حمام
فلّاحي يا زبده 
و  يا بيض العيون يا هُمام

يا شَوي ردّة حبيبك... يا سمك بلطي 
يا غولة ياللي زمان رعبتني ف طفولتي
يا فتّه لحمة هُبر يا كرنب يا محشي
ياللي حبيبك عازمك عنده ...و لا راحشي
يا بقسماط يا سميط يا لوكس يا قراقيش
سأسأ في شاي بالحليب و الاصطباحة تعيش


يا شوربة الديك عشان ما تربعن النّفَسَه
يا طاولة العيش 
يا سيد الكل يا فايش
يا كل عيّل غلط و إتقالّه "جاك وكسه"
يا حلاقة في الدكان
و يا كردان
و يا غوايش

يا خُضرة القلقاس يا كزبرة يا سَلق 
يا مدان أبو العباس شبرا يا باب الخَلق
يا بط متزغّط و كان من حبّه بيبلبط 
يا حنّة يا بخور 
يا دفعة
يا أربعين يا طهور
يا لحم الاكتاف
 يا ركعة ف زاوية الأوقاف
يا سجق بقّالي
و يــــا سدّ الحنك
 يا خشاف
يا قشدة صابحة 
و يا مشلتت من الأرياف
يا فاكهة الغلبان يا عمّ الفول يا حراتي
يا عديلي يا سلفي 
و يا البكريّة
 يا حماتي
يا نسيبي
 يابني 
يا قولة :"نشتري راجل" 
يا شوق غلبني
و يا استغراب ب "يا راجل؟"
يـــا أبله
 يـــــا ستّي 
و يا ندامتي و يا عيب الشوم 
يا قراية الفاتحة للبنّوتة...
و المرحوم
يا درج كومودينو و يا سرّاحه بالأويما
يا صالون يا مُدهب
يا مش ماضيين علي القايمة

يا حلبة يا ملانة و يـــا شمّ النسيم يا فسيخ
يا كفتة يا مصبّعه و متاكلة من عالسيخ 
يا عويس يا مانجة و يا نمساوي يا بطيخ

يا لفت يا مخلل علي بنجر  فيدّي اللون
يا خيار يا قثّة 
و يا مخبر و يا كراكون
يا بِلي عِتّه يـــــا مدفون مع الشتوي
يـــــا حمص الشام
و غيران م الذرة المشوي
يا سوداني اسواني 
يا مقزقز ف لب أسمر
يا برتقان سكّري و بدمّه يا مسكّر
يا سيّده يا الدسوقي
 قناوي 
يا موالد
يا بوس إيدين إحترام للعمّ و الوالد
ما ترجّعَولي البلد دي إلّ أنا اتمرمغت في خيرها
علشان أنا مش سايبها و مش هشوف غيرها...


تشرب قصب؟

محتاج هُدنه
و اسمح للحلم انه ياخدنا
لبعيد لبعيد لبعيد جدا
محتاج افرح
للحد اللي بتنزل له دموع
محتاج احزن
للحد اللي بيعصُر موجوع
محتاج موضوع
اتشتت عن كل الدنيا اما افكر فيه
محتاج مشروع
و الضحك العالي ابو لمعة قلب يكون مشروع
محتاج اتسربع
و اتدلع
و اكسّر ساعتي
و اطفّي موبايلي
و انام م المغرب و اصحي الفجر
و اروح للشمس 
و ابوسها و هي بتغسل نومها 
ما تلسعنيش
و تخبّى خجلها ورا سحابه
فأحسّ بنشوه و ابدأ اعيش 

محتاج كبايه قهوه لا تسخن و لا تبرد
لكن تشربني لاخر نقطه
افوق م السُكر
مانا اصلي نسيت...
في مجال السرد و غَزَل الشمس ان انا حتماً...
محتاج اسكر
من نقطه مياه بقالها ليالي بتتعتق
منتظره خريف
محتاج اني اخرّف تخريف
آخر تخريف
و ماخافش ان انا اعلن ذلك
و ماخافش ان انا اتوضالك
اول ما معادك ييجي عليا
و انا مكسّل
و مخافش اللعن علي جنوني
و مخافش لو الناس حبّوني
او فتنوني
او كرهوني
و مخافش المعني المتأوّل
و مخافش اني أبدا م الأوّل
و مخافش النور
و مخافش كمان إني ف ليله
 احتاج ضلمه
اتونّس فيها بمزيكا
عمرها ما اتعزفت غير ليا
"سيرة الأراجوز" علي عود لفريد
"مرسال لحبيبتي" بصوت ثومه
و تعيد لي الآهه المكتومه
من غير ماطلب

محتاج تجديد
ف هدومي و نومي و شقا يومي
و ابيع و اشتري...
بمجرّد بسمه و فردة إيد
بتقول شكرا
و ابطّل احسّ بذنب عشان بؤس العالم
او اقول آسف
ان انا مش نبي 
و لا ليّا مزار
محتاج اقلبها شويه هزار
و ابطل تدوير ع الأعذار
و ابطل تفكير ايه معني
و جدوي وجودنا...
محتاج هدنه

محتاج هدنة

ارقصيني
زي كل الكائنات ما بتنتشي ف رقصة أمل
ارقصيني 
زي ما يكون الخيال اتمد و الكون اكتمل

ارقصيني 
زي ما بترقص فراشة للوداع
و في النهاية بتتحرق
زي يوم معدود في عمر 
و ساعة منّه بتتسرق
او زي طفل بفطرته بيرقص 
و فاكر جايّ يوم
فيه الحياة هتكون لطيفة و منصفة 
ارقصيني في نص ليل و ف عز نور و ف وسط بوسة ف الخفا

و ارقصيني
زي مسجون بكرة خارج للحياة
زي مجنون عمره ما فرقت معاه
زي ساحر اقنع الجمهور بإن الشوف حقيقة

زي ما بيرقص لهب جوه الحريقة
و ارقصيني بخطوة ثابتة و خطوة صادقة و مش بريئة 

ارقصيني ب ١٠٠ طريقة

و ارقصيني 
و ارقصي لي
و ارقصي
لجل ما يبات الجميع نشوان حزين

#ارقصيني
#احمد_شبكة 

ارقصيني بصوتي.m4a

في ساعات الملل
افتكر انّك.....
عدّت ايام و ايام منّك
و ما شفتش فيهم ريحة الضيّ
و ما دقتش فيهم طعم لزاد

كانوا الاولاد
يتلمّوا و يعملوا دوشِتهُم
و انت اكمنّك
مانتاش موجود غير جسم و بس
ما سمعتش من دوشتهم حس
روحك سرحانه ف لحن قديم
و عينيك متعلّقه في النَجَفه
و خيالك ناطط زمن الآن
و بصوت قلقان... من عدم الفَهم
بتردّ بِكلمات مفهومه
و مالهاش معني
بتفتّش ف اكوام المجهول
عن شيء مقبول
و تحطّ علي الموجود مأمول
و تِشتّ بعيد
و تردّ وحيد

رغم الدوشة
مسكون بسكون

في ساعات الملل افتكر انّك
كان ممكن تقلب جرحك شِعر
و تخلّي لدمعة عينك سِعر
و تدور ع الناس و اللي وَجَعهُم
و تدوس بالشعر.. علي الأحزان
لكن فضّلت انك تِقلب
جرحك... لغيطان
يشوفوه الناس يلاقوه أخضر
و تخلّي كلامك كلّه خيطان
تغزلها ستاير دانتيلّا
تسمح بمرور الهوا و النور
و تداري عن الناس العِلّه

في ساعات الملل افتكر انك
كان سنّك اكبر من سنّك
دلوقتي بقيت... قدّك باليوم

ساعات الملل شعر و أداء / أحمد شبكة

الرفاعي...

عَزِّم علي قلبي....
خرّج أفاعي الذكريات قبليه
حَيّات بتتلوي 
و عشان ما يبرأ قلبي و يطيب ليه 
سقاني ترياق الهنا 
من شفّتين مَلمَسهُم الياقوت 
صَبَح الهوا و القوت 
و دُرت في حَضرتُه مولد ورا مولد 
عشمان ف قلبُه حجاب 
حلمان خيالُه يفوت
و الصبر كان كدّاب
فالندر كان 
لو كان... نكون احباب 
................................
قال لي يا واد 
غيرك رفع لي مقام 
و بات يِقَبّل عَتَبي بالأيام 
و لا نالشِ غير نظرة عتب لوّاد
...................................
انا قلت مالي باللي قبلي زار 
و مالي بالاعتاب؟
مالي ف هواك أعذار 
حصّني انت و بس بعيونك 
و ارقيني قبل غياب 
انا شوقي حارقُه بخور 
و الخوف قوايا تخور
خلّيت كفوفك دفوف و ايديك كوادي الزّار 
فاجعل لروحي مزار
رد الغريب الحبيب: 
سيب الأتر... و انتَظَر 
و انا لسه في الانتظار!!	


الرفاعى/ شعر و أداء أحمد شبكة

محتاج شيش دو
لو بس الزهر يحنّ عليا المره دي
ما هو مش معقول....
و لا حاجة بتيجي علي هوايا في الدنيا دي
محتاج شيش دوه
و اقفل له جهار
فكرني الموقف ده ... كان يوم ما طلع له نهار
كانت الترقية .... خلاص جايّه
مرسومة بتفاصيلها عليا
و اطلع م الاوضة الخانقة دي علي وش الدنيا
مانا محتاجها و ربّك ستّار
لكن لبّخت... و قالولي البخت
مع انه ماكنش البخت... ده كان يعني ابن اخته
متخرّج طازة و عيّنتوه
بعد ما دوختوا
و اتظبّت ورقه في يوم
و جابوه

محتاج شيش دو
و امسك في السيه 
و أشمّ شياط
و ادي دقني و لا بالطبل البلدي افك قشاط
ما انا اصلي لو امسك في الحاجة... 
لأ و لا حاجة
بامسك و باسيب
ما نا طول عمري في الدنيا دي عايش دور لعّيب
و مانيش لعّيب
ده انا باين مره سرحت و حلّيت مسكة يَكّ
و خسرتها مرس
لكن فكرك مثلا... إني اتعلمت الدرس؟
أو بُقّي اتسكّ
برضو لعنت الطاولة و زهرها ع اللي اخترعوه

محتاج شيش دو
ده قشاط عريان
شيش دوه يا جبان
دي خلاص العَشرة يا سيدي... يا عم ابوس ايدك
و هاقول للواد محمود ... قوم ياض قول أنا سيدك
و اتعلم تلعب قبل ما تنطق و تقول طا... (طاوله)
و هارّوح بيتنا الليله تمام
و هابوس لولاد قبل اما يناموا 
و أشوف لو بقي م الضهر برام
و اشغل فيلم
أو اقرا كتاب
مانا قاعد فيها ليلاتي من المغرب للفجر
و نسيت الحلم
و نسيت لاحباب
و تعدّي ايام و ايام و حساب القهوة يتوه
ف طلب مشاريب
علشان لعّيب
محتاج شيش دوه.. 


شيش دو

بعدت ولادتي في الزمن تلاتين سنه
صَبَحِت تاريخ زي السيوف و السقايين
زي الشراكسه و الشموع و السلطنه
زي الخيول ضاعت سنيني ف السنين

القاهرة و الألف مدنه شمعدان
آدم عريس ف بولاق و حوا في الحريم
القاهرة و الناس في كهف الليل ديدان
آدم و حوا بيقروا توفيق الحكيم

غنّالها "بَشْرَفْ كُرد "غنّت له " عَجَم " 
ردّيت أنا من فوق بجواب الجواب 
و خرجت كالعنقود من كرم العدم 
قطرة حياه محلوبه من ضرع السحاب 

أدم و حوا شقّطونى فى الهوا 
زى المخده الريش و لعبوا فى السرير 
صرخت ضموا الصرخه بالحضنين سوا 
و نعست نمت سعيد فى المهد الحرير 

جدّى رفع يدّى بطرطوفة البنان 
ضحكت شواربه و كرمشت أركان عينيه 
مولود ذكر ينشال على كفوف الحنان 
محروس من الله و الملايكة حواليه 

يا هلترى الطفل اللى نايم يبتسم 
من خلف جدران فى العدد تلاتين سنه 
هو الحزين ... هو البدين الملتحم 
هو أنا يا رب ؟ و لا مش أنا؟؟

صلاح جاهين ميلاد

 قادر تشيل... ماتشيل
 خايف تميل.. ماتميل
 عاوز تقول
 ماتقول 
و انا كنت صالب طول 
هبّ الهوى 
مال بي 
و شقّني بالطول 
جَعَلَك دوا قلبي 
سال بي علي مَنبَتَك 
يا شَعر كالنسمات 
سبحانه من انبَتَك 
قادر علي سلبي 
كل الحِكِم و الشّجن 
ف رحابه لسّاني 
و ف دهشه ملو الزمن 
معقود لها لساني 
مفتوح لها جوز جفون 
تسكُن و تِتحَنّي 
ولا عدت قادر اطير 
و لا قادر اتأنّي 
أَنّه بِشوق مَركِبَه 
رابطة علي المينا 
لِبَحرَها و الصِّبا 
ترميك و ترمينا 
و تردّ آهة غَزَل 
م الصّبر تِحمينا 
و العشق توبه اتغزل 
مَحبوك علي قدّي 
حَبّوك كتير انّما 
مين عاش معاك قدّي 
مِنطال يا بدر السّما 
مين طال هواك إلّاي 
حُضن الحبيب قَلّاي 
و انا فيه كما سَمكه 
بِتفُطّ من لسعِتُه 
و تردّ للنشوه 
نظرة عينيك مُهلِكه 
لمسة ايديك رشوه 
و انا رشرشوا مُهجتي 
طَرَحِت غيطان خضرا 
واِتمنّي لو بالنظر 
تلقي العيون حاضره 
تِرقيك بِوِرد جَميل 
و لا ليك عليّا جِميل 
و لا ليّا في الحِلفان 
لياليّا بيك حاليه 
سِهِر الفؤاد تَلفان 
لحظة هناه حاليه 
حلّت قيود الخوف
م الرسغ و الكاحل
و من ساعتها باطوف
فوق رمشك الكاحل
كُحلِة عيونك ليل 
و انا ليل هواك طال بي 
و صَلبت طولي لاميل
 هبّ الهوى
 مال بي


هب الهوى

حفنة كلام

الشعر ونّاس عشانُه الناس قاصداني
حفنه كلام لولاها الوجد صدّاني
و الدنيا بلا شعر كارهها و صدّاني
ازرع لها خيري
يطرح خيري ليل أخضر
القاها قبلن شروق الشمس حصداني
.
.
.
كل امّا شاعر يتولد بافرح
كل امّا بيت له بيتبني باطرب
كل امّا الاقي صورة ضاويه اسرح
كل امّا الاقي سلسبيل باشرب
.
.
.
كل امّا اصادف كسر اقول يُجبر
كل أما يحدف بسمه اقول يُشكر
كل اما تيجي السيره باتوضا
و اغسل ذنوبي في البحور و ارضى
.
.
.
يا شعر مين فض لك 
مفاتيحي و حروفي
يا شعر مين خط لك
دواخيلي و طروفي
يا شعر مين عرّفك
سكة هوا الاحباب
يا شعر مين شرَفك
لمّا وصفت اهداب
مفروشة سجاده
يا بهجة عوّاده
ترسم لي من لون الفرح جناحات مَلَك
يا شعر جسّم لي الحبيب
ما أجملك


حفنة كلام - شعر و اداء احمد شبكة

كِبِر الولد
و بقى له لازمه و عوز
لجل البلد
ترخص عيوني الجوز
مع انه بيني و بين نفسي
و بين بيني
اغلى كتير يا الولد م الروح و من عيني
حضنتُه حُضن خفيف
من غير ما تبّت قوي
يا شاب لما نزل... ترك لي قلبي عجوز

كِبِر الولد
و انفَرَد
طولُه و طال السما
عدت سنين الطفوله و عنها شب و نما
انا كنت نايم؟ و باحلم؟
و لا باجري اجيب
من بكره قوت البيوت
و التوت عشان يعصر
يشرب و يعصر و يشرب
و الليالي تفوت
و انا المحاسب و حاسب كل ليله انما
كبر الولد

و استوى
و طلع له تفاحه
و الصوت بقى له شنب بس العيون واحه
و زمانه واقف مزنهر عرقُه بالل ريق
كل اللي شايفه
و شايفه للسلامه طريق
جندي مجند و صالب طول
و شبه البدر
يا شمس لو ناويه تقسى
اقسى بالراحه
كبر الولد

ع الدلع
و الطبطبه مانكرش
و لو تلوموا
لوموه علشان ابوه.... ماكبرش
علي قد ما كبر الولد

جندي مجنّد/ شعر لأحمد شبكه

في غيابك...
طعم السكر مرّ و في غيابك
الخبر الحلو ماعادش يسرّ و في غيابك
اللولي الحرّ ماهوّاش حر و في غيابك
تحقيق الحلم ماكانش يغرّ و في غيابك
قلبي الملهوف بيشد الشوف و في غيابك
الشوق الناحل بقي مكشوف و في غيابك
النظره تلف تردّ كسوف و في غيابك
الثانية الواحده تمر ألوف و في غيابك
تذكرة الوِحده ما لقيت عوده و في غيابك
السكة العدلة بتقلب حوده و في غيابك
 الذكري بتملا كفوفي و جيبي و في غيابك
الشعر بيبقي همومي و عيبي و في غيابك

الفجر بيرفض انه يشقشق في غيابك
الروح بتروح علي عندك تعشق في غيابك
ارجوكي بلاش.... تبعدي و تطّولي
في غيابك

في غيابك

جالنا العيد / أحمد حمدي رؤوف

زبون أمل

Mawlay enni bebabeka

Rouhi (live)

Sakani el gharam

Besharis

أحمد شبكة
مهندس و شاعر عامية
صدر له ديوان "عصير قصب" عام 2014
و ديوان "شيش دو" عام 2015
و ديوان "كلام بالوقّه" 2016 
و ديوان "قمر فضة" 2022

Ahmed Shabaka

Popular tracks