Name: معملش حاجة تستحق الذِكر - مصطفى إبراهيم by Ahmed_Hamdy_
Duration: 1 min 30 s
Description: قصيدة معملش حاجة تستحق الذِكر من ديوان الزمن بصوت الشاعر مصطفى ابراهيم

مصطفى إبراهيم - البنكنوت

زياد سحاب ... إنتميت للبرد .. كلمات عمرو أبو زيد

"مُر يا خال ع بيت الحبايب.. والنبي تمر"- هستيريا

Manafesto

HD المُتأكِدين - مصطفى ابراهيم

قصيدة معملش حاجة تستحق الذِكر من ديوان الزمن بصوت الشاعر مصطفى ابراهيم

معملش حاجة تستحق الذِكر  - مصطفى إبراهيم

إهداء للموت السهل

أنا 
مش بتاع التجربة
والشكوى لليل الطويل
والصمت
وماليش نصيب فـ الأغنيات
والرقص على طرف الرصيف ابتهالاً للمسافات والسفر
لكن
وانتي بعيد
أنا والقصيدة اتنين يتامى اتقابلوا فـ الغربة
مسح العَجَل دمع الطريق وغُناه
والموت بعيد لسَّاه
لسَّاه ولسَّاكي
وانا جيبي حاضن بالوجع
منديلك الباكي
بيعيَّط المنديل في جيبي ويشتكي
آخر نفَس منِّك
زي ما تكون ابتسامتك وقتها
كت قاصدة تدفن دمعها فـ جيب الجاكت
أنا؟
أنا كويس
أو أكاد
أو بحاول اكون
مُهتم بالتسعيرة
وبالجمعيَّة والنشرة وتوفير الإيجار
علشان ما اباتش جعان
أو ابات نزيل أو ضيف
وانتي 
لسه زي ما انتي
تبعدي تغيبي
وتزوريني فـ طيف
يووووه
هو انتي جيتي ولا انا اللي سكرت
فاصل طويل
عشرين سيجارة بتحرق التفاصيل
والشتا
لسه الشتا 
بيعالج الأحداث
وبينحني بالرعشة على كتفي
يتشدّ شالك تمتلكني الخضَّة والضلمة
و فـ حين ما كنتي بتحتمي
بعينيَّا من زيف الحقيقة
سبتيني واقف زي أعمى 
قلبه خاف م البرد فاستنَّى القميص
هيهات
يا حبيبتي
الخوف هنا أقرب لي من غضب الشوارع
ودعوة امّي
وانكسار البحر 
تحت رجلين زائريه
أهل التراب والمترو والأسفلت
والخوف
-هنا-
مش سهلْ
حتى انتظار الموت هنا
ماعادش الحلْ

٢٠١٦

تم التسجيل والمعالجة باستديو Dosky / ٢٩ مارس ٢٠٢٠

علبة دخان

الزمان..
أيام ما كان لسه فى ناس ممكن تموت..
مش لاجل لقمة و لأجل قوت
يعنى الزمان كان من زمان
المكان..
جوه العراق..
صحرا على مد البصر ..
رمله بدون نقطة مطر
و الكوفة على رمية حجر من كربلاء

السيين يبدأ..
صوت نفس ..
مزيكا توحى بالقلق
دقات قلب بينتفض
منظر لحبات العرق ..على جبهة من الشمس استوت
الكاميرا تعمل زووم أوت
السيين بدأ..
أصوات حوافر ع الطريق..
الصوت بيعلى ويقترب
فى نقطة ع الشوف من بعيد
الزووم يزيد ..
يظهر بتاع خمسين فرس..
من لبسهم واضح بأن دول حرس..
من جيش "يزيد"
يغمس حصانه فينطلق زى الهوا
تلمح عينيهم م العفارة جريته
تلمع عينيهم..كله يجرى ناحيته
مشهد مطاردة بدون أمل ..
خلفيته.. صوت طبل افريقى اشتغل
و مفيش دقيقة ..بعدها كان سهم لحقه و إتقتل ..
ف يسيب حصانه و يتهبد..
يمسك السهم بإيديه..
و يشوف شريط الفيلم كله قصاد عينيه

الشاشة تبهت لون ضباب
علشان تجيبه بيفتكر
والذكريات دايماً بتصحى..
لما نيجى نحتضر

كنا قصاد قصر الخليفة ..باالآلاف
من كل شارع ف المدينة ..حتلاقينا
شئ مهول و مهما أحكى أو أقول ..
اللى سمع طبعاً مش زى اللى ..شاف
كان هوه جوّا بيرتعش و زى منه حاشيته
طوفانّا عمّال يقترب .. والكل جاى ف سكته
و الكاميرا جايه ع الرؤوس مع صوت ..هتاف
الصورة تعمل فيد أوت..
كل الملامح تختفى..
الصورة ترجع..الإضاءة نور قمر
و المشاعل اللى باقية نورها قرّب ينطفى
و اللى فاضلين م الآلاف يتعدوا يمكن ع الإيدين
معرفش لسة الغلطة فين ..
بس الحسين لازم خبرنا يوصله قبل ما يفوت الأوان
خوفنا خلّانا عبيد مالناش أمان
إحنا مش قد اللى عاوز يعمله
و صوتنا النهاردة جمب صوته
وموتنا موته ..
و بكرة قدام الخليفة إحنا اللى ممكن نقتله ..
صمت تام ..بعده يبدأ صوت يبان
صوت لعزف حزاينى جداً ع الكمان ..
سيين المظاهرة خلاص خِلِص ..
و سيين العقاب واضح إنه فى أوله ..
الكاميرا فجأة تلتفت ..
جايبة شكل القصر كله من بعيد ..
زووم ع الفراندة اللى طلّة ع الجنينة
من وسط ظباط حاشيته يظهر "يزيد"
زى اللى دبت روحه جواه من جديد..
يكشف سنانه و يبتسم ..
و بسيفه يشاور علينا
من غير ما ينطق كلمة واحدة ..
فى ظرف لحظة إفترقنا
كل واحد ودّع الباقيين بنظره
و هو بيلف بحصانه .. وانطلق
كل واحد فى إتجاه
كل واحد منا يجرى .. وألف كلب صيد وراه
معرفش مين فينا اتصلب
مين انضرب ..
مين فينا بالمدنة احتمى .. مين اللى من فوقها اترمى
أو حتى مين قتله العطش بعد اما تاه ..
كل الشوارع مصيدة وكل البيوت ..
الكوفة نايمة حتى من قبل العِشا..
حَطَّت صُباعها ف ودنها ..
وسابتنا بره الباب نموت ..
الليل يفوت..
و الحظ يلعب لعبته و يسيبنى أعيش .

الكاميرا قدام الحصان
الحركة ماشة بالبطئ ..
الكاميرا تعلى لفوق اوى ..الصحرا تملا الكادر كله
و الشمس ف نهاية الطريق..
ع الضُهر حسيت بالتعب ..
بطّلت جرى..الشمس حامية وصدرى من كتر العطش
عمّال يضيق ..
ريقى بحاول أبلعه مش لاقى ريق..
حسيت ساعتها إن النهاية بتقترب
ف نزلت من فوق الحصان ..
طبطبت على كتفه وسندت ..
و بنظرة بصيت للسما زى الغريق

الصورة تتثبت بتاع أربع ثوانى ..
الصورة فجأة تجرى بس بسرعة جداً..
مع صوت كأن حد بيسف الشريط ..
الصورة تثبت مرة تانى
جثة فوق الرملة نايمة ..
سهم راشق نفسه فيها ..
زى شاهد من فوقيها
الكاميرا تبعد حبة حبة ..
والإضاءة تنطفى..أصوات نايات ملو السمع
و الكادر بيلّم الوجع .. وبعدين يقرر يختفى
صورة سودا للسما من غير نجوم..
مع صوت هوا عمّال يزووم فوق الرمال..
قدام بعيد ..أشباح جِمال..أصوات خفيفة للخيول
ينزل كبيرهم من على جناح الفَرَس .. و يلف كفه ع اللجام
بعدين يقول ..
الليلادى نبات هنا ..دقّوا الخيام
ساعتين وكان الكل نام ..
يصحى فى نص الليل لوحده من القلق ..
ابنه الصغير يسأله ..مالك؟
مفيش..
هو إحنا مش ع الحق برضه ؟
يبقى تفرق إيه نعيش..
تلمع عيونه بدمعتين ..
يحضن دراع "الحسين"
و الحضن دايماً يختصر نص الكلام
يا رب مغلوب ف أنتَصِر
الظلم عمره فى يوم ما دام ..
و تفوت ساعات الليل قوام
الفجر يبدأ..يوم جديد
و ينكتب ع الشاشة بالفونت العريض ..
يوم كربـــلاء
آخر ساعات قبل المصير
و الكاميرا تتسحّب ع السيين الأخير..قبل الختام
الكاميرا جايبة صقر طاير فوق بعيد ..عمّال يلف
ويرسم دايرة مقفولة ..
كأنه حاسس ب اللى هينقتل تحته..
و إن الحسين على وش مدبحته..
و إن الرمال تحتيه بالدم راح تشبع ..
و إن الهوا حواليه حبة و حيبقى تراب ..
و حيبقى هوّه وصُحبته أغراب
و إن المدد مش جاى مش هوّه ده عَلَمهُم
إللى قالولك تيجى ..رجعوا ف كلامهم
يا حسين هتيجى تموت لمين ؟
إرجع..
كل إللى جاى عشانهم تِفدى وتناضل ..
راضيين يعيشوا عبيد ..
و المشهد الفاضل هتموت ف آخره وحيد ..

الشاشة تتفتَّح بالراحة ع المشهد ..
الصورة سودا و تاريخ بينكتب بأبيض ..
الزمان ..20 ديسيمبر
شهر و نكمل سنة ع الثورة تقريباً
الوقت..قبل الفجر
المكان.. أسفل إشارة عمر مكرم
جمب الصينية تحديداً..
و يخش آخر كادر فى القصة على غفلة ..
فيد إن ..على الكريشيندو والقفلة .
أصوات هتاف ..
و بتقطعوا أصوات بعيدة لسراين الإسعاف ..
و ساعات قريبة لضرب نار ..
الكاميرا بتزووم ع الهدوم الكاكى ..
الكادر فجأة فيه بشر ظهروا ..
صفين عساكر جيش مترصصين بالعرض ..
و بلاط رصيف الحى مخلوع و متكسر ..
و الراوى يبدأ حكايته .. وصوته متأثر

أمسِك"محمد مصطفى" ع الأرض ..
و أبكى و أنا بقلبه من كتفه على ضهره ..
و نشيله جرى فأشيله من باطه
و صوابعى حاسة بقلبه بيدقدق ..
مع كل نبضة تخف نبضاته ..
كان قلبه مش بينقّط ..
قلبه بيدلدق..
قالوا الدكاترة بعدها ..
اللى اتقطع شريان مهم..
المهم .. لفّينا وِسطه بشال
و عقبال ما جرينا للشارع ..
و لقينا عربية ..
و لحد مستشفى الهلال ..
و لحد ما استلموه طقم النبطشية..
كان هوّه متبرع بنص دمه للطريق ..
و عرفنا بعديها بيومين ..
إنه إتبرع بروحه للقضية ..
و إنه ساب لإصحابه ف هدومه وصية ..
الكاميرا جايبة شاب بيغرّق إيديه بالدم ..
و جايبه صاحبه معدى جمبه بيدمّع ..
بيقول كلام و يعيد كأنه بيسمّع ..
شيّع صحابك من معركة بِالليل..
و الصبح فرَّج دمهم للخلق
و لأتوبيسات الناس الرايحة للأشغال..
زعّق بصوت رايح.. و بحشرجة فى الحلق
و اسكت عشان مبقاش فاضل كلام يتقال

الكاميرا ماشية بالبطئ جمب الصينية ..
الكاميرا ماشية بالبطئ فوق الطريق الأحمر
يتودّع الواقفين فى الكادر و بتطلع ..
و أصحاب محمد لسة بيحاوطوا الأمل بالطوب..
زى ما يحاوطوا قَدَر الشهيد المحتمل ع الأرض..
أفتح وصيته وأقرا إيه مكتوب
الكاميرا طايرة ع الميدان من فوق ..
و الصوت يرن لوحده فى سما المنظر ..

إنى رأيت اليوم...الصورة من برة
و قلت الحسين لسة ....حيموت كمان مرة
إنى رأيت اليوم ....فيما يرى الثائر
ان الحسين ملموم ...فوق جثته عساكر
بيدغدغوه بالشوم
كل أما ييجى يقوم
و ان البشر واقفة
تبكى بدال ما تحوش
و ان العلم مصفاه
م السونكى و الخرطوش
و ان الطريق مفروش...بالدم للآخر...
إنى رأيت اليوم...
الدم ع الآيش....
و إن الحسين إحنا....
و مهما اتقتل عايش



قصيدة إني رأيت اليوم - مصطفى ابراهيم

- م -
 
ماسبيرو أخطر م الرصاص والقصر
 ملّى عنيك بالدم.. قبل الطلوع قدام
 ما تسيبش جيشك تِقسمه الأعلام
 مش كل مين جنبك.. جواه بيهتف مصر
 
- ا -
 
الوقفة جنب النار.. بتقلل الدخان
 إهتف هتاف إبن المكان والظرف
 إضرب بعزمك.. أو ما تضربشي
 إرجع بضهرك.. أو ما تهربشي
 إمسك عصاية ثورتك م الطرف
 التاريخ ضمن الغنايم.. وبيكتبه الكسبان
 
ـ ن ـ
 
نقى دايماً طوب صغير حدفتك توصل بعيد
 نفترق ساعة المطاردات.. أربعات
 نشّن الباراشوت ناحية الصف العريض
 نجرى فجأة.. نردّ فجأة.. نص قوتنا المفاجأة
 ندّم اللى يعورك.. وإقطعله إيد
 
ـ ي ـ
 
يؤتَى الحِذر من مكمنُه
 يأتي الغبي باللص ثم يحلّفه
 يؤتَى الهتاف.. رَّجاً بمن يَهتِفه
 يؤتَى الجدع.. قلبا بما إتجَدعنُه
 
ـ ف ـ
 
فّرق ما بين الجرأة والقلب الحديد... والرمي جوا التهلكة
 فتش بإيد ع المستفيد.. وبإيد عن الصاحب الجدع
 فتّح إذا الناس غمضت.. غمّض إذا نظرك خدع
 فرّغ عياطك ع الصحاب.. دم وخميرة.. مش بكا
 
ـ س ـ
 
سمّي الحاجات دى باسمها.. الكدب.. والخوف... والخيانة
 سجادة المسامير.. تتحط ع الناصية.. غطّيها بالدخان.. ولّع قصادها كاوتش
 سدّ الطريق لورا علشان ما تترددش
 سيب باب لجيشهم يهربوا منه
 سلّم رايات الحلم لحد من سِنُّه
 سلّم قراركو لأكتر كفّ عرقانة
 
ـ ت ـ
 
تبّت يدا من ساب رفاق المعركة بطولهم
 تمن القضية اللي اندفع مبقاش يجوز يرجع
 تتعب تبص ف عين.. اصحابك الطايرة.. شوف مين من الآخر دفع.. لو زيهم.. إدفع
 تلت الرصاص نحو العدو.. تلتينه للخاين.. الطعنة جاية من هنا مش من هناك
 تعب النهار دة غير تعب بكرة.. الوقت مش دايما معاك
 تحتك فيه ناس عاوزة الأمل.. مش عاوزه؟.. سيبهولهم
 
ـ و ـ
 
وسّع الجبهة لو انتوا كتير.. وضّيقها لو إنتوا أقل
 ولع شماريخ وسطكوا أول ما تلقى الرتم قل
 وقّع لمض كل العواميد اللي كاشفة ناحيتك
 وّدي الإعاشة قبل ما تدوق لقمتك
 وجّب مع السكان وأهل المنطقة..
 حتى لو فاهمين غلط.. فيه ناس كتير متلخبطة..
 إكسب عدد.. وإكسب غطا
 وزع عيونك فوق وتحت.. وخاف من اللي يصوّرك
 وطّى وعينك باصّة فوق ع الطوب وإلا يعوّرك
 وقّف إذا سحبوك على شارع طويل
 وفّر بديل
 وافق على الهدنة إذا سحبوا الكلاب
 لو سابوا خليك انتا آخر حد ساب
 واحد بيفرق ف العدد جدا
 وعشان كده..
 أول ما تلقى إن الصفوف ناقصاك..
 وسّع مكانك... للي جاى وراك
 


المانيفستو - مصطفى ابراهيم

رسائل البحر- مزيكا

الليل مش على قد كتافى.. والصبح بعيد
اجعلنى سعيد !!

نعناعة فى كوباية شاى

كلمات الشاعر الكبير بهاء جاهين
الحان وغناء شادي مؤنس

(كل ما تيجي تروح ( سهرة خاصة

ابق حيثُ الغِناء فالأشرار لا يغنّون.


معملش حاجة تستحق الذِكر - مصطفى إبراهيم

Ahmed_Hamdy_

Related tracks