أبشرك خلصوا مابقوا عندي هواي 
كل المشتريهم رخصوا بيه 
أصافحهم واحس باطراف اديهم غيض 
كاتل منهم ومادافع الديه 
بسد بوساتهم دفنوا شكَد أنياب 
واكَول يجوز جانت عن حسّن نيه 
ويمر طاريّ ويذكرولي للشينات 
واصد لغيبه اسمي التنوكل نيه 
وانه الجنت اضل واكَف بالأستعداد 
من أسمع عزيز يفوت طاريه 
حسبالي العدد بي ثمرة من يزود 
وعن قلة الواحد تفرق المية 
بس تالي ادركت طين الكَلوب اصناف 
والعِشرة الطويلة تريد نوعية 
على كلًّ عِشت ماخذت بس طيت 
وي ليل المجازة الماشفت ضيّه 
وينه وينه اللكا بيه جاي يبيع 
وين الانه مطني من هوه الريه 
والزم جفني خاف من ارمش يزعلون 
واتناسه لحجاية البذني محجيه 
ومن لكَالي حكَـ عند مُحب ماداعيّ 
اكو حكَـ برجعته يعيب راعيه 
عرفتلها كَمت مازاعل اليرحون 
ولا ع الباب اظل متناني ليلية 
من شفت الحلم ينوخذ مو ع اللون 
بعد بطلت اظم احلام وردية 
الناس اختلفت وظهرك اتجيّ وين 
اذا ماتلّكَه حايط تكّعد ابفيه 
لهسه وماعرف عايش وياهم ليش 
ويذوب الثلج بس ينجوي شويه 
حتى جروحي من عدهم خذتهن شوكَـ 
ابد ماحسستهم بيها من نيه 
من سألوني صح كَالوا اطوّك جروح 
لا كَلت لشماته انطوني عيديه 
شايف من تجيك الطعنة من أحباب 
هيج جروحك تحس بيها روحية 
تصور تبتدي تشتاكَـ للچتال 
اذا جف التطعنك بيها حنيه 
المهم ... عاذرهم وكلّ البقن سهلات 
انا الجرف اليسامح روچ شاطيّه 
حتى مننجرح مادام همه بخير 
أنا بخير يعني وكلشي مابيه

المهم عاذرهم_أيهاب المالكي

هذا الموت 
جسر للا نهاية عليه كلنة انفوت
هذا الموت
هاجس يبتدينة بلحظة التكوين
ويرافكنة العمر من غير ضجة وصوت
على جف المناية مشرهدين انام
ونلهث على الدنية ونبني بيهة ابيوت
ونتعافة ونذم بالخلك هذا وذاك
وعلى غفلة وزرك جدامنة التابوت

حاضر واربعينك بعد ما حلت 
وروحك يل عزيز بروحنة انشدت
يل حاضر عزاك اتعزي المعزين
واتسكت الناعي العبرتة احتدت
ياعصر الفواتح يا زمان الموت
كافي من الذبح مو ناس ما ضلت
ضاكت كاعنة من اكبور فوك اكبور
فوك اكبور اهلنة اكبورنة اتعلت
كل يوم بهبية وكل صباح بويد
مثل سف الحصير الزلم تتسلت

قصيدة هذا الموت للشاعر عريان السيد خلف

وماترتاح… لأن سدَّيت اذانك من ضميرك صاح
وهي مزنه… ثجيله أو عاصفه أو حالوب
يريد لهن سكف مصبوب موش ألواح
ريح امسودنة بيهَ المعمرة أتطيح… ونته أعواد حلفه أمنيلك سباح
جان الريح شامل والغثيث أيضيع… بس من صفه الحاصل شالك المرواح
بالزرع الجثير أيشيه شوف العين… والنبته الخبيثه أتفوت عالفلاح
ما ترتاح.. من هاج البحر وابعد علينه الكَيش.....
غادرت السفينه أو خنت بالملّاح
أو حشَّمت العواصف والمطر والروج…لذكرت الربه او لاكلت بيه أرواح
صحبة عمر جانت والعمر دربين… أشو باوَّل الخطوة أو ماي وجهك طاح
بدلت الاكلوب الجانت اتهم بيك بمسامر لواكة وليل مغنه وراح
ولميت العفن والسكط والممروض وخاويت الوذر والزفر واللفاح
أو من هاجت الدنيه أوزره أوياك الحال… غطَّوا روسهم والداح منهم داح
ماترتاح ماطول الشمس كل يوم تلبس ثوب وتلاعب النسمه الرازقي الفواح
ماطول الخبز والملح بيه ناموس وارواح البشر عد البشر ترتاح
ما ترتاح… لأن ندبه أبضميرك والجبيل أبخيت والشاره التحركَك عمر ما تنزاح

Ahmed K. Naif

Popular tracks