تقاسيم- عم عبده داغر

إذاعة الجمهوررية  العربية المتحدة  من القاهرة  
~~~~

أول كلامي سلام
وتزققيني الكلام
أيام في حضنك أنام
يا مصر يا أمنا

وأطلع في نور الأدان
إذا دعا الوالدان
المدرسة.. والميدان
الأنسانية هنا

~~~~~~~~

من نور الخيال وصنع الأجيال نقدم هذا البرنامج عن تاريخ القاهرة

أشعار :  فؤاد حداد
ألحان وغناء : سيد مكاوي
 
يا سامعين  أبناء بلد واحده
تحت السما الواحده وجيل بعد جيل
القاهرة  قالت  وقولها  الحق
أشهد بأنك يا ابن آدم جميل
بانى البيوت  على بعضها  بتميل
فى الجو ريق الإنسانيه يسيل
شفتك  بتمشى ونظرتك على فوق
ودايرها  زغروطه وحطب وغسيل
شفتك يا سقا مالى  ماء النيل
شفتك منادى وشفت خطافك
من سوق لتانى لألف ليله يشيل
شفتك  بطبله وناى وزماره
حتى بأماره زادت الشخاليل
شفتك تقلد   ضحكة  الهتما
أيام تبيع  العطر والمناديل
شفتك يا جندى بسن رمح طويل
شفتك يا شيخ الفضل يا عبد ربه
فرحان بالاخضر والنسيم العليل
شفتك يا حاج وانت راكب جمل
زى الهلالى وحَبّه  طلت النخيل
شفتك يا فارس يا غنى يا أصيل
شفتك يا سهار النهار بالليالى
يا منحنى وماسك دولاب الفنون
بقانون تقسمنى
والبسط ترسمنى
واكبر تسمسمنى
وأتوه تجيب لى دليل
ولمّا عرب الصحارى عمروا الحاره
وأصبحوا فى الغرام ع السطح بحاره
شفتك يا شاعر تنشد المواويل

**
شفتك وانا طاله من المشربيه
تشبه فى رايحاتك وجايّاتك
إلف الحمام له غيه فى التهليل
يضرب بمنقاره على  الجؤجؤ
خفيف وتقيل
شفتك وجاتنى من العيون مراسيل
سَمّعنى سجع هديل
وتعالى قول لى إن جفنى كحيل
ولا يستحيل
من ألف عام أرجع على نياتى
من مشربياتى إذا طليت

***
طليتِ بشعور البنات الحور
يا فجر متكحل بليل مسحور
انتِ اللى حنّت لك جبال وبحور
الوعد وبياتك
فى مشربياتك
ريحة ماورد وجنّه يا قاهره
غاوى القمر  واللى غوى يشفيه
صوتِك يلاغى والغوايش فيه
طَمّنّى قلبك انى عايش فيه
وشكرت  آياتك
فى مشربياتك
ريحة ماورد وجنّه يا قاهره
شباك فى بيت مؤمن وقلبه دليل
نوّر لى بالسهريه والقنديل
أمشى القيراط اللى سقاه النيل
واسمع حكاياتك
فى مشربياتك
ريحة ماورد وجنه يا قاهره
غمضت عينى وعشت ألف ميعاد
وفتحت عينى وزاد معاى الزاد
كنت الولد وصبحت ابو الأولاد
ما دريتش وحياتك
فى  مشربياتك
ريحة ماورد وجنه يا قاهره

***
حبيتك الحب اللى عمره سنين
متّعت عينى  وما انتهيتش حنين
كل اللى عاشوا فى حضرتك حلوين
والأحلى جاياتك
فى  مشربياتك
ريحة ماورد وجنه يا قاهره

**********
يارب تشفى الصدور

يارب توفى الأمهات الندور

يارب تمنع عن ولادنا الويل

زاحفين على السواحل سلاسل نور

والبحر من دمياط يحيي السيل

واترتبت ع الخطوة رجلين الشهور

والصبر أملك من عنان الخيل

حتما على قدام وحتما ندور

والحصن فى عكة عظيم الليل

يلقى الآذان بيشق فوق السور

الحق ياولاد العرب منصور

فى كل أرض اتكلمت عربى
.
**********
الأرض بتتكلم عربى وقول الله

ان الفجر لمن صلاه

ماتطولش معاك الآه

الأرض ..الأرض .. الأرض

الأرض بتتكلم عربى
الأرض بتتكلم عربى ومن حطين

بترد على قدس فلسطين

أصللك ميه وأصلك طين

الأرض ..الأرض .. الأرض

الأرض بتتكلم عربى

الأرض بتتكلم عربى سبل وكروم

تجرى اللقمه على المحروم

ما تثبتش حصون الروم

الأرض ..الأرض .. الأرض

الأرض بتتكلم عربى

الأرض بتتكلم عربى ياخيال

بيعد سيفك أم عيال

ظهرك ياما من الأجيال

الأرض ..الأرض .. الأرض

الأرض بتتكلم عربى

الأرض بتتكلم عربى ولا ترتاح

واصل كالسيل المجتاح

فتحك ياعبد الفتاح

الأرض ..الأرض .. الأرض

الأرض بتتكلم عربى
يا سامعين أبناء بلد واحده
تحت السما الواحده عرب بيقول:
أيام تسعتاشر بتحيى الحى
و تخلى فنان البلد مسئول
يا سامعين يا اهل الزمان الجاى
ليلكم منور فى العزب والقرى
كان ياما كان من مبدأ الذاكره
الشمس طالعه وصوتى مش سامعاه
حرمت أغنى لها وانا فى الدرا
فتحت شباكى وقلبى معاه
وجبت ريح البحر للقاهره
وطلقت حنجرة الفتاه والشاب
ورفعت فنى الى مقام الشعب
الثوره ضاربه فى صميمى جدور
أغنيه أمنيه قدر مقدور
الحدادين نافخين معاى الكور
الثوره ضاربه فى صميمى جدور
أغنيه أمنيه قدر مقدور
الحدادين نافخين معاى الكور
والخبازين قايدين معاى الفرن
أخبز لكل الناس عشا وفطور
والفلاحين ماليين معاى الجرن
داقين فى قلبى السبع والعصفور
منورين المونه والمعجنه
كاتبين لى أيام الزمن والسنه
نسمه بنفسهم جايه متلحنه
وسؤال فى ودنى زى نبض النور
يا مصرى يا سيد وابوك درويش
النيل بيجرى والا ما بيجريش
النيل بيجرى والعجل بيدور
والفجر طالع بالصنايعيه
ومصر لازم تبقى مصريه
وكل كلمه تقولها أغنيه
وكل أمنيه وأمل دستور





 

من نور الخيال وصنع الأجيال في تاريخ القاهرة | سيد مكاوي وفؤاد حداد | من تسجيلات الإذاعة

على حسب وداد قلبى - تسجيل نادر من جلسة أصدقاء

دا كنالنا و بحرنا .. ودا خيرنا و عزنا .. و الى حفروه قبلنا .. أجدادنا و أهلنا .. يا كنالنا فيك الباخرات .. رافعين ع الصارى رايات .. مختلف الجنسيات .. و أحنا نقضى الواجبات .. فى كنالنا و بحرنا // من تراث السمسمية البورسعيدى 

دا كنالنا و بحرنا - من تراث السمسمية البورسعيدى

و الله يزيده حلاوة .. و الله يزيده حلاوة .. زى العسل الأبيض على البقلاوة .. يا عينى .. زى العسل الأبيض .. أمان .. أمان .. أمان // من تراث أغانى الضمة و السمسمية البورسعيدى النادرة // ملحوظة تختلف كلمات الأدوار فى التسجيل أختلاف طفيف عن كلمات الأدوار الأصلية .. أداء الأغنية لشباب رأس غارب  

و الله صابح ماشى - من التراث النادر لأغانى الضمة و السمسمية البورسعيدى

يا ليل أنّ .. 
يا ليل أنّ الحبيب وافى .. 
سهران وأرده صباحه وافى .. 
لما قالولي حبك مسافر.. 
بكت عيوني سبع ليالي..
مركب حبييي فالغرب جاية.. 
جاية وعايمة على شبر ماية.. 
فاردة قلوعها طيّة بطيّة.. 
فيها اللي أحبه يسأل عليا.. 
الاسمر عزمني جوه الجنينة.. 
ملى كاساته وسقاني ليلة.. 
ياما سهرنا عاللوز الأخضر.. 
وبقيت انا أملى والحلو يشرب.. 
صفّوا العساكر تضرب مدافع.. 
علشان حبيبي صابح مسافر.. 
يا بير زمزم  عتبك حجارة .. 
والشربة منك دوا للحيارى ..
يا بير زمزم سلبك سلالسل .. 
والشربة منك دوا للمسافر .. 
واليوم يا بدر تزل الهموم .. 
ونجتمع مثل القمر والنجوم .. 
ونحتسي سر الكؤوس كؤوس الهنا .. 
بين المُدام وفي ظلال الكُروم .. 
صحبة وكانت من قديم قديم العهود .. 
تبلى بها خُطابها والشهود .. 
فيها اصطفى آدم ونوح وموسى وهود .. 
وإبراهيم جاء لِبَى العهود .

يا ليل أن - سمسمية - السويس ٢٠٠١

هو صحيح الهوي غلاب ... الشيخ أحمد برين

دخلت مرة لسقف من حي الازهر
في ليلة و احنا صغيرين يا زمان
صوته لقاني قبل ما اقعد قصاده
زان المنصة و ف يمينه عصاته
قصاص بيروي سيرة الفرسان
و السامعين حواليه لمّه قليله
من دنيا فيما سلف أصحاب ليالي قديمه
و ما ينعسوش بالسهم .. لابسين من الجلاليب ما يشبه القفطان
على الكراسي بيشربوا الكلمة و بيستذكروا الحكمة و بيلتفتوا باستحسان
قولنا : في يمينه عصاته يا اهل النظر و اتوسطنت بميزان
إلا و قامت على بركه و عجب و ما بين صوابعه توجهت للميدان
توجهت لرحيل .. لحرب .. لحيله .. تتبادل .. تمانع .. ترمي الخديعه .. تتقي الخوان
و تلف لفات الرماح الطويله أو تنكسر كما تدبل الأغصان
أو ترتفع أبصر من السلطان على ما تراها العين ترى الإمكان
قصاص .. و ريث ألف بين مشرق و من مغرب و مدونات العجم و سجية العربان
الله يبارك سقف من حي الازهر في ليلة و احنا صغيرين يا زمان

حي الأزهر-فؤاد حداد-سيد مكاوي

سمسمية من السويس 
للفنان بكر حسن  ١٩٥٤ - ٢٠١٤
الفنان بكر حسن كما يعرف نفسه في حوار مع جريدة الوفد قبل وفاته بأيام 
 بأنه من مواليد 30 يونيو عام 1954, وانه كان يعمل ''نجاراً مسلحاً'' بجانب 
تقديمه أغاني ومواويل وتراث السمسمية فى الأفراح الشعبية والنوادى وقصور الثقافة والفضائيات والمناسبات الوطنية المختلفة, والاستعانة به لتقديم أغانى السمسمية فى فيلم ''حكايات الغريب'' مع الفنان محمد منير، وتقديمه طوال مسيرته الفنية, ''150'' أغنية وموالاً و15 شريط كاسيت من تراث السمسمية, لكبار مؤلفي وملحني اغانى السمسمية فى السويس وباقي مدن القناة وبعض محافظات مصر, وانه لم يترك زقاقاً أو حارة أو شارعاً في السويس إلا وقام بالغناء فيه, إضافة الى غنائه فى باقي مدن القناة, وقدم اغانى عن ثورة ٢٥ يناير, و 30 يونيو, وموسم الحج, ومدينة السويس, والعشرات من الأغاني الشعبية والعاطفية والوطنية, الا انه مع كبر سنه وتردى صحته وتهديده بفقد بصره ترك قبل عامين مهنته ''كنجار مسلح'' وعاش لتوفير لقمة العيش لأسرته من دخله المتواضع فى الغناء بالأفراح الشعبية.
والكلمات من عائشة التيمورية

بكر حسن ( فنان من السويس ) تعالي يا خيال بهجة جماله

علشان جريكو و عشان جريكيه .... علشان جريكو دورى يا سلام ... و دى هاجة جنان .. ورجصى يا بهيتة و يا عثمان ... علشان جريكو و عشان جريكيه / من أغانى السمسمية التى كانت يغنيها " محمد عثمان ولد النجى " باللهجة النوبية ببورسعيد    

علشان جريكو و عشان جريكيه - من التراث النادر للسمسمية البورسعيدى - فرقة الطنبورة

المحبوب ... على عينى ... فى رياض الأس .. يا ما زارنى المحبوب ... على عينى ... قلتله .. أه يا سيدى ... يا عيونى .. يا أعز الناس // من التراث النادر للسمسمية البورسعيدية // فرقة الطنبورة 

زارنى المحبوب - من تراث السمسمية البورسعيدى - فرقة الطنبورة

أنسان مصرى عربى عاشق لأغانى التراث خاصة أغنى السمسمية البورسعيدى



و الله صابح ماشى - من التراث النادر لأغانى الضمة و السمسمية البورسعيدى

Ahmed.M.Abdulrahman (3)

Related tracks