الانتمااااااااء!!! أخ ياقلبي 

قلة مندسة -ياسر المناوهلي

واهي رجعت ريما بعد التغيير 
بحكاية قديمة شفناها كتير 
 
واهي رجعت ريما بعد التغيير 
بحكاية قديمة شفناها كتير 
 
كرباح مرفوع وكلام ممنوع 
والناس بتموت برصاص وبجوع 
واهى رحعت ريما طب رجعت ليه 
 
اصل المنحوس كان عنده فانوس 
وعيال جدعان سابهم للسوس 
 
اصل المنحوس كان عنده فانوس 
وعيال جدعان سابهم للسوس 
 
معرفش يسوق من غير ما يدوس 
خيش في خازوق معمول مخصوص
شافته ريما و اتقلبت بيه
واهي رجعت ريما  تسأل فرعون اتفرعن ليه 
 
واهي رجعت ريما بعد التغيير 
بحكاية قديمة شفناها كتير 
اصل المنحوس كان عنده فانوس 
 
واهي رجعت ريما بكلام متعاد 
وشجيع السيما اهو جه يا ولاد 
ميرى ومضمون ورغم انه حنون
بيكون شمشمون ويهد جبال 
 
مع كام طبال على كام راس مال 
وفتاوي حلال وبتوع سيما 
رجعت ريما
 
واهي رجعت ريما لابسالنا وشوش 
بتداري جريمة بالحلق حوش
ميخيلش علينا لعبك يا لئيمة 
ياما عدا علينا وطلع مغشوش
طز في ريما

ريما | ياسر المناوهلي | يناير 2014

الليل ملاح
تايه سواح
لا يبوصل شط
ولا بيرتاح

الليل مشحون أسرار وشجون
وألم ونغم
وكاسات ونايات ودموع وآهات
وعبر وحكم
***
ومشيت في الليل
خجلان مكسوف
إكمن الليل عريان مكشوف
أفراح الناس
وجراح الناس
على صدر الليل عناقيد وصفوف
وعيون الليل والظلمة جبال
فاردين على وش السما غربال
ألماظ مبدور
في كاسات بنور
يفرش للنور ع الأرض خيال
***
ويشق سكون الكون
أرغول
ونغم فنان ثاير مخبول
وعليل على فرشه بيتقلب
ويحايل جرحه المداري
ويقول
يا طبيب قلبك طيب
إسمعني
ح أقولك أسراري
لوشلت الشكوى على لساني
ورميتها قريب
ما تكونش جراحي مألماني
أبدا يا طبيب
أنا دقت الجرح وخدت عليه
يسقيني المر
وبرضه اسقيه
من بحر الصبر اللي ف قلبي
ح تقوللي بتشكي امال من إيه؟
ولا من أوجاع
ولا شوق لمتاع
ده انا عمري إن ضاع
مش ابكي عليه
أبدا يا طبيب
يا طبيب ده انا جرحي ملوعني
وساقيني الحنضل من كاسي
والنار في ضلوعي بتلسعني
وأنا لسه صغار
والعيا قاسي
ولا عمر الليل مرة سمعني
عليت الآه على أنفاسي
أبدا يا طبيب

لكن يا طبيب أنا بابكي صحيح
وباقول الآه
زي المجاريح
ودموعي في عيني بتتألم
وبتتكلم
على قلب جريح
مسكين
كان أمله يحب سنين
ويلم الحب ف عشه اتنين
واتهنى معاه
وإن قال الآه
أنا اقول له يا روح القلب
آهين
بس أنا لا بيدي
ولا بودي
دا قدر مقسوم
قدر لحبيبي يعيش بعدي
في الهوى محروم
أهودا اللي وجعني
وخلاني
حطيت الشكوى على لساني
إنما وحياة اللي قاسيته
وحياة الأمل اللي بنيته
وحياة القلب اللي جرحته
ولا فرحت معاه
ولا هنيته
لوشلت الشكوى على لساني
ورميتها قريب
ما تكونش جراحي مألماني
أبدا يا طبيب
***
وينام الصوت
والكون حواليه
ساكن نعسان
وكأنه مات
رمي تقله عليه
سكت العيان
***
الكاس له ناس
والليل مجالات
والحان مليان والناس مزاجات
ومجال الكاس
أشكال أجناس
مليان حواديت
مليان روايات
***
ونزور في الليل دنيا الخمار
ونلاقي الكاس
ع الناس دوّار
ويموت الليل على باب الحال
حيخش ازاي والدنيا نهار
ونفوس وقلوب كده ع المكشوف
عريانه تمام
وتعالي نشوف
***
شوف دا اللي هناك
قدامه كاسين
مع إنه لوحده
ما هوش اتنين
والناس بيبصوا
ومش فاهمين الكاس دا لمين
والكاس دا لمين
أهودا اللي بنظرة عين
شبكوه
وفاتوله الكاس مليان
وفاتوه
وحكايته طويلة
وهمه تقيل
وح اقول لك إيه وأعيد لك إيه
رايح يملا عيونه بحلم جميل
بياع السهد ملا له عينه
***
وترن ف جوالحان
ألحان
نشوانه تخلي المولد هس
وغزاله بتتغزل ف حصان
بتقول له
احبك أنت وبس
ويفز هنا سيدنا المنظور
ويطب الكاس ف إديه
مكسور
ويقول غشاشه
حتلعب بيك
ويرد التاني عليه بفتور:
طب وانت مزعل نفسك ليه
حشري وسخيف
وح قولك إيه
ومانولي يقول
” موش أندك خق”
والسامر يضحك لما يطق
ويحط الحشري عنيه
في الأرض
وكأنه لحن في الدين
والفرض
ويقوم
يطوح مرة يمين
ويميل زي البخت شمال
وف جوف الليل
يغرق مسكين
لا يغير حال
ولا يشغل بال
***
الحظ حمار
من غير حمّار فقد التمييز
زي المجانين
هجر البساتين سكن الدهاليز
والحظ بطبع غباوته عنيد
ودماغه حديد
لو يعند حتى على الغزلان
ينسخطوا معيز
ونسيب دهليز
نخش في باب
ونعدي الباب ندخل سرداب
ونلاقي ضحايا الليل واقفين
والحظ بيلعب بالأعصاب
ترابيزة عليها نمر بنظام
من واحد يمكن لما لألف
والدنيا بزيّ ما هي تمام
على هيئة كورة
تدور وتلف
وشنب مفتول
يصرخ ويقول
اللقمة بتنده أكّالها
والرزق نصيب
والدنيا دايرة
ف احولها
زي المجاذيب
الصبح معاك
والظهر عليك
والحظ لو ادى
ما بينقيش
جربها
ويمكن لو تديك
من جودك برضه
ما تحرمنش
قرب قرب
جرب جرب
ودي لعبة حظ
ما فيش تبكيش
***
والكورة تدور
زي المقدور
تحرن على ناس
وتجامل ناس
والشيخ سلمون شعبان مندور
واقف على أعصابه ومحتاس
يعلب ع الستة
الخمسة تصيب
ينقل ع الخمسة
الخمسة
تخيب
وخلاص الحظ اداله قفاه
والحظ أن ولى
بيبقى عجيب
كلها ساعتين
وصريخ
سلمون لعلع مقامات
نهاوند  وسيكا  ورست وصبا
وحجاز وبيات
يا  خراب البيت
يا فلوس الناس
يا نهار مشوم
طب المسكين من طوله ورفص
يظهر مات
والناس ملهيه ف أحوالها
بيدوسوا عليه
وبتاع الكورة مشغلها
ح يبطل ليه
واللقمة بتنده أكلها
طب ودا كل إيه؟
***
الشارع نايم تحت جناح الليل همدان
وعيون النور
تعبانه بتنعس ع العمدان
والكون ملفوف
بعباية
نسجها الليل بالخوف
وف بحر الضلمة رأيت على بعد
شبح
حققت بعيني
لقتها يمامة وكاسرة الطوق
كرابيج الليل
ناقشينها جراح
من تحت لفوق
والأسى ف عينها
مصحي الشكوى تقول حواديت
حواديت
ما لهاش علاقات بالشوق
وليالي الشوق
مسيت
ورميت على الحلو سلام
قالت سلامين
أنا قلت لوحدك ليه يا حمام
ووليفك فين
مالك بالليل والويل و الرعب
خليك يا حمام
عيش للحب
شالت بجناح
حطت بجناح
ورتني جراح
تحت الجناحين
وقالت لي
زمان الحب ما راح
وبقي لنا سنين في الليل تايهين
خد مني الليل
واداني الليل
ورميت له الغالي بسعر زهيد
وسقاني الشهد ودقت الويل
وكساني حرير ولبست حديد
وعرفت الناس من الراس للديل
وآمنت بأن الكل عبيد
وقالتها وطارت في ثواني
وانا شارد وخيالي يصور
وغمزني الفجر وصحاني
ولقيت الكون بادي ينور
وصحيت من غفوة سرحاني
على صوت بيقول
الله أكبر

قصيدة الليل - أحمد فؤاد نجم

قصدت باب الرجا

 طلعت قُفَه | جديد ياسر المناوهلي


طلعت قُفَه | ياسر المناوهلي

يا عمي تحيا ازاي وأنا أموت ؛كلمات وغناء- ياسر المناوهلي

زي العيال - صباحية العيد الصغير
متبعترين زي الندى
ومعلقين الفرحة في البلالين
وميقصدوش رش الغنا في الجو 
ولا دبروش للضحكة
كل اللي واخدهم.. حنين للضي

زي العيال دي
 انا كنت عيل مبتدي بالنور
كاشف ضباب الزحمة.. والمرايات 
ومظبّط العالم على قدي 
ومبحبحه حبة
.. علشان يساعيهم

ريحة تراب الفرن مالية لي نخاشيشي 
فملكت حقي في لحظة التخليق 
ومابنكسرش.. لأني مش ممسوك 
ومابتمسكش.. لأني مش محدود
واسع يا حوش المدرسة.. يا وسط دارنا
مطلوقه مُهر الخُضرة قدامي 
ملها لجام.. غير النسيم.. والعين 

ماسك مدار الشمس بصباعي الصغير
لافف خيوط البدر ع التاني
طبّقتش ايدي؟.. لسه مفرودة
لسه الغنا عارف يناغشني
قادر ألمّ الليل في سيالتي
 وأقزقزه حبة ورا حبة

وولاد حارتنا مسهرين الليل
 ومفتحين جفني على الآخر
نقدرش نصبر ع القمر مخنوق
صوت الصفايح تاخر العتمة
وصراخنا جاب بنت النبي.. فاطمة 
لعبت معانا لحد ما شبعنا

وأمي ابتدت تتهجّى في عيوني
 إن البكا مش ضعف.. ده استغفار
وإن المسافة ما بيني وبينهم.. الدهشة
وإنّي ابتديت بالحلم م البيضة 
مابقولشي عارفه.. بس حاسة بشئ
يمكن متفهمهوشي دلوقتي

والشمس حامية.. بس مبتقتلش
والنخل عالي.. بس طوبة تجيب

محفظتش الخطبة.. عشان وحشة
درس الحساب بايخ.. علشان بيحسب حسبته بالظبط
والشيخ مخوّفني من الآخرة
ما بقيتش أروح الجامع إلا عشان: 
أقدر أشوف الغيط من المادنة
وأضحك على اللي بغلته سفّة

بنت أختي قارعة.. والمطر بيرخّ
والسقف يِنْقَع.. عفشنا يِكمَش
والبرد حاسس بينا.. ومقدّر
مش زي برد القاهرة الماسخ.. حسسني إنّي غريب

وقعدت أدور ع الونيس.. ولقيت
لكن أخدني البنك من نفسي
ما أقبلش أكِل.. وقلت: ح القاني
ولقيتني تايه في النيون
مركون لحد الناس ما تتوضى 
ويرتلوني في لحظة ويعدوا
ما بيلحقوش ولا حتتين سكر
ولا داقوا ملمس ضحقتين بُكَّر

قلبي اللي كان قلبي صبح خُردة
صعبة الملامح ع اللي ما بيشوفش
مقدرش أجِيلك كل يوم مهدود
 شايل جفون الخلق وذنوبهم..

يا لون حبيبتي اللي ملوهش مثيل
اوعي النيُون يبهَت عليك
كسر براويزك وطلعني
دور المسيح.. ما عادش ينفعني
رجعني عيل
 او منيش لاعب.. 


كلمات الفنان والمؤلف والمخرج المسرحي: صبري فواز
وموسيقى فيلم الكبار لخالد حماد.

صبري فواز - حنين للضي / Sabry Fawwaz - Hanin L Elday

يا مصر قومى وشدى الحيل
كل اللى تتمنيه عندى

لا القهر يطوينى ولا الليل
آمان آمان بيرم أفندى

رافعين جباه حرة شريفة
باسطين أيادى تأدي الفرض

ناقصين مؤذن وخليفة
ونور ما بين السما والأرض

يا مصر عودى زى زمان 
ندهة من الجامعة وحلوان 

يا مصر عودى زى زمان تعصى العدوين وتعاندى
آمان آمان بيرم أفندى


يا مصر قومى وشدى الحيل
كل اللى تتمنيه عندى

لا القهر يطوينى ولا الليل
آمان آمان بيرم أفندى



الدم يجرى فى ماء النيل
والنيل بيفتح على سجنى

والسجن يطرح غلة وتيل
نجوع ونتعرى ونبنى

يا مصر لسه عددنا كتير لا تجزعى من بأس الغير
يا مصر ملو قلوبنا الخير وحلمنا ورد مندى
أمان بيرم أفندى


يا مصر قومى وشدى الحيل
كل اللى تتمنيه عندى

لا القهر يطوينى ولا الليل
آمان آمان بيرم أفندى



يسعد صباحك يا جنينة
يسعد صباح اللى رواكى

يا خضرا من زرع إدينا
شربت من بحر هواكي

شربت من كاس محبوبى وعشقت نيل أسمر نوبى
وغسلت فيه بدنى وتوبى وكتبت إسمه على زندي
آمان آمان بيرم أفندى

يا مصر قومى وشدى الحيل
كل اللى تتمنيه عندى

لا القهر يطوينى ولا الليل
آمان آمان بيرم أفندى

يامصر قومى .. الشيخ أمام

قصدت باب الرجا والناس قد رقدوا
وبت أشكوا إلى مولاي ما أجد

وقلت يا أملي في كل نائبة
يا من إليه لكشف الضر اعتمد

اشكوا إليك أمورا أنت تعلمها
مالي على حملها صبراً ولاجلد

وقد مددت يدي بالذل مفتقرا
إليك يا خير من مدت إليه يد

فلا تردنها يارب خائبة
فـ بحر جودك يروي كل من يَرِدُ

كلمات أبو بكر الشيرازي .

إبتهال قصدت باب الرجا



أنا لزق اتشال خمسين مرة
من فوق خمسين نوتة وكشكول
وإتساب في الهوا عريان برة
ف نشف .. مبقاش يلزق على طول
- هو انت تطول ؟
قاللي الدرويش
مش عايز أطول .. أنا عايز أعيش
-إنتا اللي فهمت الزهد بلاء
إزاي هزهد في حاجات معييش ؟
-ياحمار دي فضيلة الاستغناء
وانا كنت استغنيت بمزاجي ؟
أنا اسمي يئست ومستغنتش
إيه الزهد ف إني أمّا آجي
أشتري مابَجبيبش عشان ملقتش ؟
فيه فرق مابين صبر العاجز
علشان مبقاش حاجة في إيده
وبين واحد أصلاً مش عايز
غير زي ما بس يعوز سيده
صدّقني أنا زاهد بالصدفة .. أو من غير قصد
أنا طاير آه .. لكن علشان مش لاقي الأرض
صدقني أنا كان نفسي أتعلّق .. في حاجات ياما
وأعيش إحساس إن أنا فعلاً من غيرها هموت
أنا عارف اعيش
من غير ما احتاج إني أقرا الوقت
من غير ولا واحد .. م اللي أنا أعرفهم دلوقت
أنا أعرف اعيش من غير اسمي
أو سنتوف برّة حدود جسمي
ومن غير السلسلة والمفاتيح
ومن غير ولا واحد من أهلي
ومن غير سارة
ومن غير البنت اللي أنا نفسي أجيب منها ولاد
ومن غير فيزا البنك الأهلي
وهشوف من غير النضّارة
عايز هَوا بس .. وميّة .. وزاد
كل يومين .. بَكْبَر وارمي حاجات
واكتشف إن أنا كان ممكن أعيش
من غيرهم أصلاً م الأول
معرفش بقى اليأس اتحوّل
وقلب على زُهد ..
ولا ده جين صوفي من الأول مش محتاج جهد ؟

علّيت صوتي وقلتله ماترد
الدرويش أصلاً مش موجود
الجامع فاضي ومِتغيّر
فيه عيل شبهي ونا صغير
شايل بلطة وبيهد عمود
مش عارف احرّك رجليّا
ةمش عارف أصرّخله يبطل
صوت دف بيعلى وبيقرب
دقات ورا بعض
وعمود الجامع بيشقق
وبيعمل أصوات زي الرعد
العيل بيسرّع أكتر
زي المسعور
أكتر أكتر أكتر أكتر
في نور ضارب في عنيّا
وألوان بتدور
كل اللي أعرفهم حواليّا
السقف خلاص كله بيتهد
فجأة مفيش في الجامع ولا حد
وبحسس على وشي كويس
وبشوف الدم
وببص لفوق
السما باينة منورة جداً
ومفيش عصافير
فيه ناس واقفين
شايلين في حاجات
ناس غيرهم شايلين بني آدمين
فيه ناس منهم شبه العِيلة
ومفيش غيري من غير شيلة
ف محدش عارف غيري يطير
أنا عمّال أترقّى وأطلع
السبورة عمالة تضيع
على مد الشوف .. أنا شايف بيت
و بتمتم بكلام مش واضح
فيه صوت بيقول (على فين رايح ؟)
ف بشاور .. ف يقوللي (لوحدك ؟)
ف أضحك وأشاور حواليّا
لولا إني لوحدي ..
ماكنتش جيت


المولوية | مصطفى إبراهيم



Imam Mohammad Ahmad Eissa or Sheikh Imam (Arabic: إمام محمد أحمد عيسى‎) (July 2, 1918 – June 7, 1995) was a famous Egyptian composer and singer. For most of his life, he formed a duo with the famous Egyptian colloquial poet Ahmed Fouad Negm. Together, they were known for their political songs in favor of the poor and the working classes.

Sheikh Emam Complete Works
A Part Of GramaFoon Project
www.gramafoon.com
Visit Our Other Accounts
@www.soundcloud.com/OumKolthoum

Stay Tuned For More


يا عمي تحيا ازاي وأنا أموت ؛كلمات وغناء- ياسر المناوهلي

Ahmed Yahya

Recent comments

jijialtheeb

Ahmed.Saleh.87

Ahmed Magdy

Related tracks