اللي زيّك
اللي زيّك مالوش لا يحب ولا يتحب
تشوف الميّة تروِي الناس وشغلانتك يا دوبك صَب
تتفرّج على الفاتارين ما تلمسهاش
وتوزّع شقاك على ناس ماتعرفهاش
ومتخيّل بإن حبيبك الغالي خلاص حَبَّك
وتقضِي ليالي مستنّي تَمَن تَعَبَك
وكل اللي اشترى منك أخد ببلاش
فتتفرج على الفاتارين ما تلمسهاش
....
تفهم ايه انت ف أصول العشق والعشاق؟
العشق حافر فرس طالق جناح في سباق
مشوار خشن ما يعديهوش غير فحل
والحلوة باصة لك بس المراد مش سهل
يا تشمّر الدراعات وتجيب حبيبتك غصب
يا تطاطي راسك وتسيبها للخلّاق
....
اللي زيك مالوش لا يحب ولا يتحب
يعيش الدنيا عدل وكب .. رزع ودب .. رفع وقلب
حتخلص مهما راح تخلص في الآخر حتطلع كلب
كل الناس حتبقى ملايكة وتشيل انت بس الذنب
اللي زيك خلصوا قبل النور ما يطلع ماتشافوش
ماتلونوش ماتجملوش
وقفوا ع السلم لا طالوا الصفحة بيضة
ولا طالوا يختاروا اللي يرسمهم وشوش
اللي زيك عاشوا ع الهامش رتوش
....
يا سمرا فستانك عبّا الهوا وكيّل
ناصب طواحيني خانّي الهوا وميّل
طب قولي ناقصك إيه وجرّبي عزمي
والله ان دراعي فلت تتبرّا مني امي
فاكرة زمان قلت لك
الصبح حابقى ملك
ومنا ما وصلت لك 
كان النهار ليّل
....
اللي زيك
 هم الكتير اللي بيشيلوا الملك في المهرجان
ما بيبانوش من كترهم وسط الزحام والهيلمان
وانت ماشي وفاكر الناس بتشاور لك 
والناس عنيها ع الملك والصولجان
اللي زيك يترمي في الملاحات
ينفجر تحت المحاجر
يتجلد ويموت ويحفر في الرمال
والخديوي ييجي ع الجاهز ويفتتح القنال
اللي زيك غششوا الناس الإجابة وهم سقطوا في الامتحان
اللي زيك هو أراجوز الموالد 
وهو أضحوكة الزمان

Hisham algakh هشام الجخ - اللي زيك

الأكونت الرسمي والتسجيلات الأصلية لقصائد وأشعار هويس الشعر العربي هشام الجخ 

Hisham algakh هشام الجخ - اللي زيك

Algakh