جبار رشيد - خذني يمك

الوحدة : سلوك يلازمك من تفتهم حجم الخسارات
من تفقد احساس الطعم بآخر بدايات
لأنك فاقده بأولى النهايات

الوحدة : حذر من موقف يّذكرك
هروبك من تفاصيل الوداعات الاخيرة
شرود عيونك من عيون ما مستوعب تكسرك

الوحدة : وطن، تستوطنه من تطيح.

الوحدة : دليلك، بالضبابيات
خلاصك من صدى الواقع
ورق لافكارك الماتنعرف يا لون

الوحدة : امتلاكك للچنت تنطيه
سِما بلا رغبة للتأثيث
حقيقة كل حرف ينكسر من ينگال
آخر شمّة الك من قبل لا تنشال

الوحدة : مُحيطك، ما عداك انتَ

برّه المشهد تغيّر
بعد ماتنتمي لأي شي
غرفتك أأمن من الچان يتأمن

غرفتك فارغة من الصوت
ويمكن .. فارغة .. من الموت

يمتى آخر وكت فات الضوه ومات اعله صورتها؟
يمتى آخر فجر فات؟
يمتى آخر هروب من الحچي ويّه الجمادات؟

برّه .. الجو حبيب لكل شخص مخدوع
برّه .. الجو حقير لكل شخص مثلك

برّه المشهد تكرر

مساحة من الأنا والناس
كمية صداع من الحچي المألوف
شوارع ماتدلّيك اعله روحتها
وهوا بظهرك.

الوحدة : غرفتك، ما عداك انتَ.

هنا جوّه .. المدينة الممكن تحبها
هنا جوّه .. المدينة الممكن تحبّك

خلّي الباب .. لا تِثبِت
محد شاغله غيابك

لا تِثبَت
هدوءك زاعج الغرفة
هدوء بنص زخم الافكار شيفيدك؟

لا تِثبَت ولا ترفض
رخي عظامك لأي زاوية تريدك.

إشاراتك، لغة، إلمن؟ للحيطان؟
لِمّ آخر أصابيعك
توتر سطحي للماضي انكسر بيدك

هنا جوّه .. مزاد لكلشي ماينباع.

الوحدة : الفجوة التنفتح بالروح
الفجوة : مقاس لوجه فارگته

وجه ما ينسأل عنه
وجه ما ينلگي منه
وجه ماضل مطار وشارع ومقهى
وجه حتى الجرايد ما حچت عنه
وجه حتى برحيله ما أكو منه
ملامح شاردة من العين

الوحدة : نزيفك، ما عداك انتَ.

الظلمة ضوه لليحچن جروحه
والحيرة سچچ للخوف للما يندل بروحه
والوحدة مدينة انعافت من الناس

ظلمة ونزفك يضوّي
لا تستخدم عيونك
نزفك بردة للشبّاچ
يا شباچ ما ضل شارع يفهمك

گوم تأكد من الباب
گوم تحاضن ويه الباب
ظلّك نِزَف جوّه الباب
وأحقر سالفة من يوجعك ظلّك

الوحدة : حضنها ما عداك انتَ.

الوحدة | Based on true scars

جبار رشيد || مزج

زعلان بس يا زعل ! | كاظم اسماعيل الكاطع

مزج | الروح الخالد 'علي مهدي' 1998-2022

عراب القلب | زيد الهاجري

يا گبل روحي وبعدها | زيد الهاجري

الشاعر زيد الهاجري

شعر شعبي عراقي

11:11 pm | زيد الهاجري

‎⁨زيد الهاجري | phobia⁩

*واحدة من أجمل قصائد الشاعر عريان السيد خلف
النص:

«كاسَرت عُمري إِعْلَه عُمرك
گطّعِت ليش؟
وحرِگتك
چويه مني وچويه منّك
وإنتِشيت أستاهلك شَهگة عَوافي! 
وخيّبت ظني وصِدَگ ويّاي ظنك
ماگِلت عنك عرگ چفّك بچفّي
ولا گِلت جاسك زَعل
وإشتعل دمي إِبّنار دمّك! 
أصْعر وتِستسهل إتشاغل خَيالي
وياخذك غيّك خَرَز خِلْخال تِتطّشر وألمّك
ومدري ليش أتمايزك وردة إگرُنفل
إِتّيه روحي إبْريحتك! 
وأحتار من يا صفحة أشمّك! 
من جِمعني وياك؟ 
من شَدني ويه طولك؟ 
طَعّمك بيّه
وصِرت حلوّك ومرّك
لَنها ما بالغُبشه غُبشه بغير عينك
خاف أترّز بيك حد گطع إلنفس! 
وأزهگ وأضرك
خاف تِتطشّر ولك 
وشلون ألِمّك؟ 
گالو إيحبك! 
گِلت من شاف گلبه؟ 
وچبّست دَمْعي
وسِكن نَبض الگلُب عن لا يذمّك
تَرِسْ چفّي إِسوالفك وحده إعْلَه وحده
وعرگ جيدك زَمّزمي
وخجلان تتعذّر
وأگِلك لايهمّك
من تجِسني إشْفايفك
تاخذني غيبة!
ومن تِرِشْني إِبمزنِتَك ولهان أفَز
لَنْ روحي يمّك
أختلي إبحسنك وأفج گلبي وأطلعك تِلعب إبْعمري! 
وخاف الغير يندلّك وأضمّك
إِشچان ضرّك؟ 
تختصر بعدك عليّه
وكُلّي شكران وحَمَد
للمِخْتِصر حُسنك إِبْخصرك! 
تِشرب معافى حناني ولَهْفتي
وتسكر إبدمي
وتِنتشي إبغيّ الشذى
وتتعزّل إعزال إِمْن أجرّك
ومن گبُل
كُل شوگ عمري إمن الطِوارف
حَسبِت مِثل الوداد إِلراح وِدَك
هسّه الورع كَحل إجْفوني
وچنت أَظن
وگت إلتِهد بي روحي أهِدَك
لنّي كِلما فززن صبري الليالي وفات وگْتي! 
أتوسلك هَدوه وَگِت خليّني عِنْدك
آنه عاذِرك لو هِدل عودك
من گِدر يحْمل حِسن مثلك وگدّك
عاذِرك تِغْتاض
بَس من غير شاره وشارتك هالبينت
ودخيل جدك
عاذرك عن لايهم گلبك إِبْهمي
وتِنترس عينك دَمع
وتسيل كِحلتها إعْلَه خدك!»

الوحدة | Based on true scars

Zaid Alhajry

Recent comments

shahad.

HELA .?

HELA .?

HELA .?

Related tracks