شيلنى واشيلك-تسجيل نادر

ياللي جيت من شط تاني 
حبتين ورجعت تاني 
جيت منين .. ورحت فين .. 
حاجة يابا محيراني 
رحت فين يابا وفين راحوا اللي قبلك 
بدي أقول لك كلمتين بدي أقابلك 
واسألك عن سر يابا.. سر حير ناس كتير 
الصغير والكبير.. والغني قبل الفقير 
انت يوم ما جدي جابك من هناك جيت منين؟ 
واما سبت الناس ودنيا الناس وراك رحت فين؟ 
واحنا جينا ازاي وليه؟ 
حكمة المشوار ده ايه؟ 
عم عباس الغفير 
وسليمان ساعي المدير 
والمحافظ والوزير 
كل دول ماشيين طابور والقدر داير يدور 
بالكاسات بين المواكب ع اللي ماشي واللي راكب 
واللي يجي الدور عليه يلقى كاسه بين إيديه 
واللي يشرب كاسه يطلع م الطابور 
واللي يطلع بيتاويه جوف القبور 
والقبور سعرانه لم قالت كفاية 
والقدر .. والقدر يسقي القلم دم الدواية 
والقلم .. والقلم يكتب ويشطب 
واللي يشطب اسمه يشرب .. سخن بارد كله وارد 
مستحيل .. مخلوق حيهرب 
رحت فين يا با وفين راحوا اللي قبلك 
بعد مشوار العذاب إيه إنكتبلك 
اللي راح قبلك ماجاش من يوم ما راح 
والليالى هيا هيا تروح و ترجع
واللي جه بعدك بينده ع اللي راح 
بس فين هوه اللي راح يشوف ويسمع 
اللي راح مجبش سيره 
واللي جاي غرقان في حيرة 
والطابور ماشي وجاهل ايه حكايته 
القدر هو اللي شايف ايه بدايته 
والقدر هو اللي عارف فين نهايته 
وإحنا ماشيين في المواكب 
زي قلعان المراكب 
قد ما يميل الهوا بنميل معاه 
لا قلنا لأه يا هوا ولا قلنا أه 
واللي يقدر بالعمل يترك أثر في الطابور 
يبقى اسمه في الخلود رغم القدر والقدور 
هي دي من غير كلام 
حكمة المشوار تمام 
واسأل الناس الكتير 
الصغير والكبير والغني زي الفقير

1988

الشيخ إمام | عم نجم - حكمة المشوار

عنبـــــــــَّـــــــــر .. كله يسمع
شخشخت بالزهر مانصفنيش ولا مرة
وراهنت بالمهر والبقشيش على مرة
والسجن للحُر وان كان مر ..ولا مرة .. 
فكرتنى بالتوبة من دى النوبة .. ولا مرة !

بعد مساء الخير على حراس الليل
كنجي برنجي تشنجي كله لبط ولومنجي
بس البدلة بتفرق والعيب عالمخزنجي
الأوله للنبى .. والتانية ايوب ..
والتالته غربتى .. والرابعة المكتوب
والخامسة .. اللى افترى حتماً يبات مغلوب

الأوله يا نبى يا محرر الانسان يا بلسم اللي ابتلى يا نجدة الغلبان
كرمت صنف البشر عن طايفة الحيوان
ورفعت سيف الهدى عالى على الطغيان
وغسلت ارض العرب من بقعة الأوثان
وزعقت يا امتى .. فى سائر الازمان
الظلم يوم لو حكم .. والحق يوم لو هان
يحرم عليك المطر والفى والعمران
تسرح بحورك عطش .. فى الزرع والإنسان
ويجر فيك الحنش وتحوم الغربان ..
ترمى الخراب ع الجبل والسهل والوديان
النور يغور م السما .. وجه القمر ما يبان
والشوف يضيع فى العما والضلمة والاحزان
والخوف يطيح فى البشر من قسوة السجان
الناس تخاف بعضها .. وتخوف السلطان

والتانية ، قولت أنا آيوب وانا مثلين
آيوب ومها ابتلى .. ايوب يروح لي فين
ايوب صبر كام سنة آيوب صبرله يومين
طلعت عليه القصص واتنادى بالاسمين
عدوه من الانبيا والصالحين الاتنين
وانا اللى صبرى هنا جوة اللُمان صبرين
صبرى على خطفتى من عزوتى والبين
وصبر تانى على حكم الزمان يا عين
الندل فينا حكم .. والندل حكمة شين
حكم البقر ع البشر .. بشريعة القرنين
وحق تربة نبى طه كحيل العين
هالبت يوم يتنصب بدل الميزان اتنين..
وانظر بعين الرضا للعدل فى الميزانين

والتالته، غربتى فى عالم الاندال
الندل فيه احتمى .. والحُر فيه انطال
والواطى لما اعتلى .. اجرله كام طبال
الشحط والبلطجى واللص والمحتال
والكدية لبست شنب واتحزمت بعقال 
ومين يحب النبى .. سقفة كمان يا عيال
الرقص دار فى البلد عمال على بطال
واللحم لما اتكشف .. غطى على اللى اتقال
لا سمعنا صوت فى النغم .. ولا شعر فى الموال
خنقوا الكلام فى الغُنى .. والرنة فى الخلخال

واحد يا موحد الواحد
اتنين يا جد الحسين
تلاته يا سو الشماته
اربعة يا حبر المطبعة
خمسة يا عزمى يا حى
سته يا بكرة يا جاى
سبعة يا قلبى يا مايل
تمانية يا شوق الزمايل
تسعه يا دنيا يا واسعة
عشرة يا خاين يا حشرة
 
اعرفكم جميعاً ان السجن سور ...
واعرفكم جميعا ان الفكرة نور ...
وعمر النور مايعجز يأزح الف سور ...
وعمر الصور مايقدر يحجز بنت حور ...
واعرفكم جميعا ان الظلم شايخ ...
واعرفكم جميعا باب السجن خايخ ...
واعرفكم جميعا ان ملهش اوكرة
واعرفكم جميعا انه هايبقى ذكرى
واعرفكم جميعا ان الثورة فكرة
وابشركم جميعاً .. ان الوعدة بكرة
والنور عندنا وعندكوا .. يا حبايب ،

العنبرة - أحمد فؤاد نجم - باريس 1986

زروني كل سنة مرّة - الشيخ امام باريس 1989

مسافر - كلمات: أحمد فؤاد نجم

خرج الشتا وهلِّت روايح الصيف*

والسجن دلوقتى يرد الكيف

مانتيش غريبة يا بلدي ومانيش ضيف

لو كان بتفهمي الأصول

لتوقفى سير الشموس..

وتعطلي الفصول.

وتنشفي النيل في الضفاف السود

وتدودى العنقود

وتطرشي الرغيف

ما عدتي متمتعة وانتى في ناب الغول

بتندغي الذلة وتجتري الخمول

وتئني تحت الحمول

وتزيفي في القول

وبأي صورة ماعادش شكلك ظريف

***

دوس يا دواس

ما عليك من باس

واكتم كل الأنفاس.

الضهر مليئ بالناس

إللى حبيتهم دون ما يبادلوني

الإحساس.

وأنا عارف إني ما باملكهمش

لأني ما مضيتهمشي في الكراس

الناس اللي دمغها الباطل دمغ

اللي بتنضح كدب وتطفح صمغ

اللى بتحشش

وما بتحسس

واللي بتضحك كل ما تنداس

***

الجامعة طالعة رايتها ضلتها

هدارة

جبارة

صادقة في نيتها..

بتتجه..

يم الوطن والموت.

و"شبرا" زاحفة تأكد التهديد

وتجمع التبديد

وصلت ميدان الفجر..

في المواعيد…

النهر.. والضفة.

نبت هلال العيد

ومالت الكفة

وصحيت الرجفة.

مصر اللي لا لحظة ولا صدفة.

ثورة ف ضمير النور.. بتتكون.

رايات.

بدم البسطا..تتلون..

سدوا الطريق..

كيف المؤامرة تموت؟

"فلتسقط الخيانة

والقيادات الجبانة

ندّاغة الإهانة

كريهة الريحة

كريهة الصوت"

***

الغضب..

بيوالي إنشاد البيان

والوجوه الصامدة في وش الزمان.

والرحابة..

في الصدور..وفي الليمان..

غابت الأسر الصغيرة في الوطن

. استوى ع الأرض وعي.

صحيت الأمة ف هدير السعي.

الوطن.. مفهوم

وحلو

ويتحضن..

***

التفت صاحبى يقوللي:

"لسه نايم..؟

مش مظاهرات..

دي حاجات يفهمها شعبك.

إقفل العقل القديم..

وافهم بقلبك.

رقصة الزار القديمة..

الفرعونية

ع الخصيبة السندسية..

لما يجتاحها الألم.

لما تغمرها الإهانة..

والقدم..

تسحق الإنسان..

وتدهس القيم"

ابتسمت..

رقصة الزار القديمة

الحميمة

العظيمة.. لحد فكرناها ثورة

فرق بين رقصة.. وثورة.

لا هيَّ جاية فوق حصان

ولا في لحظة زمان

حتهب نابتة في الغيطان

ولا رقصة

برجل حافية

ف مهرجان.

دكهه هادية.

تيجي هادية.. وصوتها دامي

تعزل الكداب..

وتقبض ع الحرامى.

تعرف الناس..مش كتل

تعرف الناس..

بالوجوه..وبالأسامى.

تيجى..فاتحة القبر

نادغة الصبر

قابضة الجمر

تنصب محاكم الشعوب في كل قصر

تغير العصر..

إلى آخر الصفحات في سفر الثورة.

ابتسم صاحبي وقاللي:

"حاذر م الارتفاع

سيبك م الاندفاع

حفر حكومتك وساع"

ابتسمت

جفت الرقصة الحبيسة

عادت الأمة التعيسة

اختفى كل اللى كان

اختفى كل البشر

واختفى كل المكان

تحت سنوات الهوان.

***

تتعسني فكرة إني هموت

قبل ما اشوف- لو حتى دقيقة-

رجوع الدم لكل حقيقة..

وموت الموت..

قبل ما تصحى..

كل الكتب اللى قريت

والمدن اللي ف أحلامى رأيت

والأحلام اللي بنيت

والشهدا اللي هويت

والجيل اللي هدانى

والجيل اللي هديت..

قبل ما أملس ع الآتي

وادفن كل بشاعة الماضي

في بيت.

***

حاقولها بالمكشوف:

خايف أموت من غير ما اشوف

تغير الظروف.

تغير الوشوش..

وتغير الصنوف.

والمحدوفين ورا

متبسمين في أول الصفوف.

خايف أموت وتموت معايا الفكرة

لا ينتصر كل اللي حبيته..

ولا يتهزم كل اللى كنت أكره..

اتخيلوا الحسرة. 

عبدالرحمن الأبنودي - رسالة إلى القيادات الجبانه

نجم في تقديمه للقصيده
 "دي قصيدة ليها نوعية خاصة، القصايد اللي بكتبها ليلة مبخش السجن"

أحمد فؤاد نجم - عزة

الشيخ إمام - أنا في انتظارك

إذا مش نازلين للناس فـ بلاش

والزم بيتك.. بيتك.. بيتك..

وابلع صوتك..

وافتكر اليوم ده.. لإنّه تاريخ موتى وموتك..

 ...

إذا مش نازلين للناس فَـ بلاش..

مادام الدايرة ماكاملاش

والحاجة ماتامّاش.. وأصحاب الحاجة ماعارفاش..

إيه المعني وأى بطولة فـِ إنّ حياتنا وأحلى سنينَّا..  يروحوا بلاش؟

حاجة ماراكباش!!

...

الله يخرب بيت الفكر.. وبيت اليوم الّى ورّانا الفكر..

لإن الفكر كتاب..

و "عويضة" حياته هباب وتراب..

عايش زمنه الكداب -زىّ العادة- مُرتاب..



 كنكة على دِمْس .. ونفَس مقطوع فى الغاب

ماشبعناش عنه بُعد.. وهوّه ماشبعش غياب..

"عويضة" هناك فى الأرض..

في المدن الأُوَض الّى نايمة على بعض..

...

وأقولّك إيه اللى قطع الدايرة يا أمير؟

وخلّى مابين النبي والخلْق  الغربة وتقطيع المشاوير؟

إن أنا وانت بنلعب طول العمر دورين: طليعة وجماهير..

و"عويضة" بينفخ موت الدِّمس والعالم.. نِمْس..



العالم.. سرقة وقلْع ولبس

و"عويضة" بقلبه الجبس.. الّى معلِّمُه إمتى مايحسش وامتى يحسّ..


بيعدِّى في الأيام جمل المراحيل..

زى ما عدَّاها من أول ما اتخرط الكون

من أول ما طلع للدنيا ووجد قبلُه.. فرعون..

 نفس الأيام نفس النسخة مطبوعة على كل الأعوام..

ماسمعشي بينا.. ماسمعناش.. ماقابلناش.. ما اتكلّمناش.

...

ولإن حمول الأيام مش مرفوعة.. إذا يد "عويضة" ماترفعهاش..

والقولة الحقَّة.. مش حقّة.. إذا صدر "عويضة" ماطلَّعهاش..

والخطوة حتفضل مشلولة.. إذا قُدّامنا "عويضة" ماخطَّاش..

ولإن دى حاجة "عويضة" لسّه مايدركهاش..


ولايدركناش.. ولا يعرفناش..


ولإننا لما دبحنا بعض مناقشة على القهوة لاجل البشرية..

"عويضة" ماسمعناش..

تبقى الدايرة مادايراش..

واما ييجى المخبر يسحبنا عَ الزنازين..



لازم نبقى عارفين..

إن السَّحبة ببلاش..

وان الحدوتة مالافَّاش.. فـَ الدايرة ماتامَّاش.. والدنيا ماحِلْواش..

وانّ "عويضة" لمّا قِبل الظُلم.. ماماتْش..

إحنا مُتنا.. وهوّه.. عاش..

...

الحاجز أكبر من كل الأحلام..

واسْمَك.. من جهلى وجهلك.. واسمي واسمك!!

...

مش حتعلمنى أكتر ما اتعلمت..

روح علِّم أبو الواد والبت..

الّي حيرميهم فى فرن الثورة يطيبوا بُكرة..

والّي لحد الوقت مايعرفشي إزّاي يكتب وازّاي يقرا...

وازّاي يعشق.. وازّاي يكره.. 

ولا عنده فكرة عنّك.. أو عن بكرة..


ولا ليك ذكرى..


لانا.. ولا إنت.. نجحنا ف تغيير الفكرة..

...

الفاس يردم بذرة..

المنجل يحصد سبلة..

الشغل يجيب أجرة..

وانت بعيـد..  بحكاية مامفهوماش..

بينَّنا وبينُه شعْرة وأرقّ من الشعرة..


دة الّي مفروض ناسج علم الثورة وصانع بكرة..


واحنا شهدا.. مع إنّنا.. ماحاولناش..

حاجة ماراكْباش!

الدايرة المقطوعة - عبد الرحمن الأبنودي

قد ايه برتاح أنا لحظة ما أقابل بسمتك 


الشيخ امام - قد إيه برتاح أنا لحظة ما أقابل بسمتك

احدى كس اميات نجيب سرور "غلبت اقطع تذاكر"

و غلبت أقطع تذاكر و شبعت يا رب غربة
*****
والأولة مصر يا بيرم وحالها حال .. ومهزومة
والثانية حسرة يا حسرة يا جيشنا ع الابطال .. و مكتومة
والثالثة آه و الى عايز اقوله ما ينقال ..و مفهومة

يا دفعة راحت كام دفعة .. يا خوفى على الدفعة الجاية
يا دمعة نازلة من الشمعة .. ورا دمعة بالنار مكوية
*****
النار خيانة فى عز الظُهر  ..  آه من الخيانة و الخاينين
لو ينغرس خنجر فى الظَهر .. الصدر يبقى صدر ياسين
و بهية تبكى ولا تخبر .. مين القتيل و القاتل مين؟!
وعرض حال و إكتبى محضر .. وكله ضد المجهولين
*****

كلام يا دفعة مش مفهوم ..إدينى عقلك و إسمعنى
قاتل و يصبح ليه مجهول؟.. الشارى كتفنى و باعنى!
يا دفعة يا ابو زيد يا ابو مدفع .. متغاظ منشن على سينا
يا هلالى فى الغيط والمصنع .. والجبهة...ليه قالوا جرينا!؟
***** 
يا دفعة هيكل بيحارب .. بالبنط الاحمر و الإعلام
وبيقلب المغلوب غالب .. و الكدب تقراه مالعنوان
ودية الفانتوم خطبة .. موجه من ارض لجو
والحرب جد ماهيش لعبة ..ديتها فرقة تقول: هو هو
*****
و أساتذة ياما فى فن الحرب .. خلو الجمل فات مالإبرة
وإحنا يا دفعة في آخر كرب .. بكرة خياطة ورا البكرة
خليك كدا على خط النار .. مصلوب يا كبدى فى الصحرا
وآدى الشعار ينطح فى شعار .. سكاكين بتدبح فى البقرة
حارب بشرط ماتهجمش
ولو هجمت ماتضربش
ولما تضرب ماتصيبش
هوش يا دفعة و قول محشى
*****
ويضربونا نروج نحتج .. ونقول يا هيئة ضربونا
وكل يوم للهيئة نحج .. ملعون ابوها لابونا
*****
تعالى شوف شارع سيلمان .. دكاكاين تبحلق للدكاكين
وفيها خير اشكال الوان .. ونص بلدك شحاتين
والجرسونيرة فوق جرسونيرة .. والفرش مفروش باللحمة
والسيرة فايحة في الجيرة .. والشرطة واقفة في الخدمة
*****
متاريس نضال عند جروبي .. والامرييكين ووراها شباب
يا خالق الخلق يا ربي .. نسوان وليها ازاي شناب
واقفين يا دفعة ورا ضهرك .. وكل خنفس ولا خنجر
صياد وجاي جايب قدرك .. يهودي يعني متنكر
وزير سيادته وإقطاعي .. بقى إشتراكي بغمضة عين
ياكل دراعك ودراعي .. ويسرق الكحل من العين
*****
والرأسمالي رئيس مصنع .. والاسم مصنع متأمم
ومين هيقرا ومين يسمع .. والغيظ يا حسرة متلجم
*****
وحضرته شايل دبابير .. بالطورة تنهش فى كتافنا
والحرب عنده زعيق ونفير .. يا هل ترى مين حيخافنا؟؟!
و مجلس الشعب الميمون .. وفلاحينه افندية
والاسطى فيه لابس بيبيون .. و شعاره تحيا الملوخية
يا دفعة راحت كام دفعة .. يا خوفى ع الدفعة الجاية
يا دمعة نازلة م الشمعة .. ورا دمعة من نار مكوية
يا نيك يا نيك يا ليل .. يا نيك يا نيك يا عين

وغلبت أقطع تذاكر - نجيب سرور

Aly Ahmed Cubi

Recent comments

Hany bk

Ahmed Gamel

حديد الباشا

Mostafa El Shiekh

Related tracks