she3r gamed

الفنانة مريام صالح في رثاء ولدها المخرج والمؤلف المسرحي الراحل صالح سعد في عمّان - المركز الثقافي الملكي خلال إحتفالية وزارة الثقافة بيوم المسرح العالمي

Maryam Saleh - مريام صالح في رثاء والدها

من سنه كنت بدور علي طريقه اقولك بيها بحبك متتنسيش 
النهارده بنزلك قصيده برضوا اقولك بيها بحبك بس مبقاش في مساحه اسامحك 



proud by abd Elrahman samir

Eyad Kh  كان ليه  ( prod by abd Elrahman samir)

‏فكوا شبابيك الرضا يا مبعدين 
نحتاج شمس الوصل تشرق بيننا

مزيج - بيفكرني بيكي

إحنا اتطورنا كتير بصراحة ..
من يوم ما عرفنا النار ..
وحرقنا الأشجار ..
وخلعنا عامود الخيمة ..
وبنينا عماير ..
وعملنا ستاير ع الشبابيك ..
وبقينا بنلبس شيك ..
وبنتكلم بفصاحة ..

بالليل وصّلنا النور ..
والصبح رصفنا الشارع ..
وخرجنا مشينا عليه ..
وبنينا كنيسة وجامع ..
وعرفنا إجابة " ليه! " ..

وعملنا فريق وفريق ..
ووصفنا لبعض طريق ..
ووصلنا أماكن ..
لكن ..
عمرنا ما لقينا الراحة ..

شُفنا الماضي بيتعاد .. 
وتوقعنا الأرصاد ..
ولعبنا كتير في الشكل ..
غيرنا في طعم الأكل ..
وقصاد القتل ..
جرينا ..
ماوقفناش بالمرصاد .. 

عمرنا ما وفينا بوعد ..
عايشين 
بنحارب بعض ..
بنغفِّل 
وبنصطاد .. 


بني آدمين 
بس ديابة ..
وتعالب ماتغدتش
مافيناش 
إنسان شبعان ..


إحنا صنعنا الدبابة ..
وقتلنا عيال ماخافتش 
م الطلقة 
وصوت الدان ..



خرج الإنسان م الغابة ..
بس الغابة ماخرجتش 
واتزرعت
في الإنسان ..
..

"الغابة"
سبتمبر/٢٠٢٤
-حسام إبراهيم

الغابة - حسام إبراهيم

مضناك جفاه مرقده اشعار.احمد شوقى  اسلام فهمى

شوفي يا وداد إحنا عايشين في مجتمع ضاغط اللي يتصرف فيه بإنسانيه وبساطة وتلقائيه , يفتكروه مجنون !!

وداد و زين 💙 | فيلم "هيستريا 98 "

Logy_elmansour "يا عشمان في العسل والورد"

كل الحاجات بتفيض
لما تزيد
هَمشّيلي حالة رعشة الإيد
وانا هبقى شاكر
بس مش سعيد..
والشكر فعل
والسعادة نية
والوسيلة مش بنت الغية
زي لما طحتي بشفايفك فيا
كانت سخونة لحظة
ولا كانت آذيه؟

تسعة..
الأرض ع الاتنين كانت واسعه
ثم ناس تصبح وتسعى
قبل فلتاني
وحنانك
كان لسانك
أقدم وسيلة لكشف الكدب
وأوسخ من البِشعة
انا كنت صادق معاكي
ولساني أهو طيلاه لسعة..

تمانية..
امشي بإيقاع الثانية
وألتزمي بنذور الوقت
في الكوكب ع النحية التانية
فيه ناس بتعد معانا دلوقت..

سابعه..
لو متابعة..
رشحيلي فريق
عيني بتعكس كلامي
"بتعكس" م النفي مش التصديق..
عيني مش بتصدق على كلامي
عيني مش بتصدق أي وعود
عيني مش بتصدّق بالبسمة
عيني ما بتصدق إنها هتعود..

ستة..
نص دستة باقية م البالته
أنا إبن ناس على فكره مش برمي جته
غيرش الزمن، وعوامل التعريه
والإيمان بالحق
وصدقي او لأ
فيه قلب هنا تحت الچاكيتا..

خمسة..
بداية اللمسه
ونهاية الماسكه
نص سكة.. 
اقل م الصحيح
وأكتر من الفكه
نص الفرص
والقصص
والإلتحام في العبث
والقعدة ع الدكة..

أربعه..
السجن بمعناه الدارج
وأنا بكره كل المعاني الدارجه..
ماعدا إنك حلوه وعجباني
وبيني وبين شفايفك اربع ثواني
ودي لحظة موتره وحرجة..

تلاته..
جربت أخدها ببساطه
وجربت أخدها بجد
وفشلت في الحالتين.. 

اتنين..
الشك
واليقين
الحد الأدنى لأي قصه
ولو مش فاهمه
أكيد حاسه..
كل الحاجات اللي اتخلقت لجل الوصل
في الأصل كانت للفصل
كل الحاجات اتخلقت عشان نندم
من أول الأرض
وحتى للكاندوم..

واحد
.
.
ليه بصادفك ديمًا في الزحمة
بوسة دي ولا رصاصة رحمه؟
انتي ديمًا تقتلي بشويش
سيبتي إيه فيا عشان مامشيش
جَنبي خوفك وعاطفتك
وقوليلي إيه في الدنيا دي بيعيش؟
انتي مش سعيدة
دا بس سيرتونين..
وانا مش خايف
دا بس آدرنالين..
واحنا اتلاقينا في مفترق طريقين..
منكرش اني مضايق.. 
واكدب عليكي لو قلت انا فايق
واكدب عليكي لو قلت انا سكران
انا بس كل الحاجات باظت مرة واحدة
ولسه خارج م الضمان..
عندي إستعداد دلوقت اقص
من غير ما اقص
هي ديتها ازازة على نص
وهتلاقيني بَرُص
من اول بارونتي لما حد يسألني عندك كام سنة؟
وبفكر Net ولا Gross
انا من نوع الموظفين
اللي ديمًا بتنام في الكوستر
ومباخدش بالباقي أسبرين
باخد بالباقي بلاستر
تحسبًا للتعويرات الجاية..
ضحكت جدًا مره وانا بشمر كمي
للدكتور اللي شك إني عندي ميول انتحارية
أعتقد اني عقلاني حتى في اللي بيئذيني
ولو قررت أعملها
ف مش هقطع شراييني...
الأمر فيه مجاذفة
ومش حاسم
غير اني أجبن من اللازم..
اعرف حد عملها ومنتهاش
والموضوع انتهى نهاية مأساوية
وعاش..
بيستخبى من نبش نظرات الناس في اديه..
انا نفسي مره ضايقته لما كنت بتجنب مبصش غير في عنيه
ف على ايه؟ 
هقولك حاجه فيا
وحاولي تصدقيها
انا سهل جدًا افرح
ودي جمله تقريريه
بس أنا بعنيها..

ديمًا انا معايا سجاير ومش معايا ولاعة ،يمكن لأن دا إعتراف ضمني مني اني مدخن شره ودي حقيقة انا بحاول أهرب منها، ملهاش أي معنى غير اني بحبها ومدمنها!

ولا كنت بتحنجل في الطرقة
أو مشبّك
ولا سايب مقص مفتوح
او كان فيه شبشب مقلوب
ولا قطة سودة على العتبة
ولا نخزة جتلي قبل ما أنام
كان يوم عادي جدًا زي بقيت الأيام..

اللي يعرفني 
يعرف اني اتغيرت
من ٣ سنين مكنتش كده
كنت مستريح
ومن سنة كنت كده
بس مكنتش بصرح.. 

روحي اللي كانت حاضره وبتبهت
دلوقت اهي بتبهت..
قلبي اللي كان زهرته تلفت
دلوقت زهرته تلفت..
ضحكي اللي كان عادي وبيشبه
دلوقت عادي وبيشبه..

انا غضبان.. 
مش بالشكل الكافي اللي يخلي عندي طاقة تدميرية
انا غضبان ومفيش حاجة بإديا
ومش غضبان عشان مفيش حاجة بإديا
دي مش معضلة هتلر..
انا غضبان
بس
مش أكتر..

تداعي .. حازم عمر 💙

لأى حد موجود هنا           

النوت دى استغاثة

نداء أخير

قبل الهروب

 

 بس لو مسمعتوش

حصل خير

ومانتش ملام

------------------------

"محمود درويش بيقول: "الجميلات هن القويات يأس يضيء ولا يحترق

 

بس للأسف ساعات اليأس بيتحرق من غير ضى

اليأس نفسه بييأس ويبقى عايز يهرب لمكان بعيد يتحرق فيه

 

بعيد عن أي حاجة وكل حاجة

 

"نمرة عربية أبويا" 169 س أ ى

ودايما بقراها يأس

 

--------------------------

علمنى كيف تموت الأشجار واقفة، فمثلى لا يمكنها السقوط

(أسماء حسين)

 
زمان وأنا صغيرة أول مرة أفتح فيها المعجم كنت بدور على معنى اسمى

اكتشفت إن "زينب" فى اللغة يعنى شجرة عطرة الرائحة

ومع كل يوم كنت بكتشف إن ليا نصيب من اسمى

بس انا ما أخترتش اكون شجرة ، غيرى هو اللى اختارلى اسمى وبيحاسبنى على ضعف جذورى وإزاى مش قادرةأثبت ضد الريح


غريبة؟ مش كده


وعمر طاهر بقى قال( تخيل انك شجرة، واثبت لأنك شجرة ، ضارب فى الأرض مسافة، وثابت وأنت أدرى

)

أنا فعلا شجرة

بس أنا مش أدرى

ومش عارفة مسافتى فى الأرض قد إيه

ومش قادرة أغامر وأعتمد على حاجة مش عارفاها

------------------------------------------


منير عنده أغنية بيقول فيها

الكلمةإيد .. الكلمة رجل.. الكلمة باب

الكلمة كوبرى يمر فوق بحر العباب، الجن يا أحباب ما يقدر يهدمه

فأتكلموا أتكلموا إتكلموا)

 
طول عمرى بحلم أبقى صوت وبس ،

صوت قوى يسمع لبعيد
 

برغم إني ما بتكلمش كتير، بس دايما اللى كان بيراهن على لحظة كلامى بيكسب

بس دلوقتى مش قادرة اتكلم

 

زمان كانوا اللى يعرفونى بيقولولى بطلى تنطى فى دماغنا وتقوللى اللى على لساننا قبل ما نقوله

واللى كنت بحبهم، ماكانوش بيحتاجوا يحكوا ع اللى فى قلوبهم عشان كنت بعرفه لوحدى


 

بس دلوقتى أنا بقيت خرسة

بسجد وببتهل من سكات، اللى خلقنى مش محتاج كلامى عشان يسمع انين قلبى

بس عباده مش كده



نفسى أدور على لغة من غير حروف تحكى على اللى جوايا من غير كلام

تفتكروا هقدر

وأنا أصلا ما بقاش جوايا اى قدرة؟

-------------------

خاتمة

ما بقيتش بعرف اقول غير

"وَأُفَوِّضُ أَمْرِي إِلَى اللَّهِ إِنَّ اللَّهَ بَصِيرٌ بِالْعِبَادِ

-------------------------
مونتاج وإخراج: رغدة أيمن
خواطر وأداء صوتى: زينب فرحات

استغاثة .. من سكات

قصيدة: عمرو شاهين
أداء صوتى: زينب فرحات
مونتاج وإخراج: رغدة أيمن
-----تفاصيل بسيطة

 

قولهم 

إن الغياب .. نُص المسافة للقا 

و أن اللقا

خط البداية للغياب 

قولهم 

طعم العتاب

يشبه التلج اللي ب يدوب ع اللسان 

بارد أوى وقت الدخول للفم 

و يدفّى ريقك لما داب 

فاكر مرورك من هنا 

صوت الجونله 

وهى ب تطبطب على سجاده الصلاة المفروشة زينه 

لسه ب يرن في عامود السرير

ريحه الدفا 

وطعم خوفك

سكر القهوة الزيادة وريحه الدخان 

كلهم

اقنعونى إن الفراق … 

محطة تانيه في العلاقة المستمرة 

مش ضروري إن البكا 

ينزل من عينك دموع 

مش ضروري إن الفراق 

يخطف م الشفة ابتسامه 

و لا هوش ضروري 

إن كل حضن أنا ها اخطفه 

ها أدفع قصاده

حسنه

في يوم القيامة 

ف اصرخي لما تجيلك الضحكة بجنونها 

الصرخة ضحكه قديمه مكبوتة 

أنا اللي عايش لحظه الحب وشجونها 

وأنا اللي بعمل م اللحظة دى ..حدوته 

الملايكه 

ضمة كفوفك للجاكت 

طعم الهوا بعد المرور بين خصلتك

كلها تفاصيل بسيطة 

بتخلق القصة .. وتديها الحياة 

الشمس أنتي 

والليل في ستره للمشاعر يبقى أنا 

ضدين ب يجروا عكس بعض 

لحظه لقاهم .. مشهدين ملهومش وصف 

مشهد شروق

" ..اقسم لذاتك بالوفاء

اقسم بكل تفاصيل الحياة .. على البقاء "

مشهد غروب 

" أوعدك أنى ها رجع من جديد

أوعدك .. مش ها أسيبك تحضني الأشواق كتير "

...

قولهم 

إن الزهور ..

قادرة حقيقي ع الغنا رغم الخريف 

وان الخريف ..رمز الشجن .. 

قادر يضيف على جَنَتَكَ .. لون احتضار 

و باختصار

ورق الشجر .. اصفر خريفي 

والسنابل .. اصفر حياه 

و عينيكي أنتي 

شماعات الحلم .. في دولاب الوجود 

قادرة تحافظ ع الفرح

ترتر ب يلمع

على بطن فستان الزفاف

و أنا قلبي يرويه الجفاف .. 

والبعد.. يَّمْ

يسقى تفاحة اللقا 

علشان نسيب الأرض عذرا

للكواكب والنجوم

تفاصيل بسيطة

ولحد ماتميت ست سنين
انا كنت بحب البني ادمين
وكرهت الناس من بعديها
علشان نسوني انا اصلا مين
مش فاكر امتى حقيقي بدات
انما في فتره فاكرها طشاش
كان فنجان قهوتي مبيفضاش
وكنت بكلم ربنا طول الوقت
عمري ماصدقت بنات غير ريم
ويمكن دلوقتي مصدقهاش
اخر مره شفتها فيها
كانت تقريبا بتعزل
وكان في سواق تاكسي منزل
في شنط ناس هتحل مكانها
وشوش بني ادمين معرفهاش
انا ريم يمكن كانت قدي
ايامها لكن دلوقتي اصغر
عارفه ان انا يوميا بكبر .. وبعجز
اكمني مبنساش
انا فاكر ايام بالملي
انا فاكر ايام بالتفصيل
انا فاكر يوم دفنة اختي
هتصدقي اكتر ما فاكرها
وساعات بنسى في ليله كبيرها
انا فاكر شقة قصر النيل
ومش فاكر حد من السكان
من صغري وعمري مابنسى مكان
انا اصلا فاكر بيت شادي
مع اني مزرتوش غير مره
بامارة في برواز بره
كان جواه صورته في اعدادي
كان لسه طالعله شنب
وانا حاسس اني طلعلي اتب
من تقل الشيله ومـ التفكير
معلشي انا اسف برغي كتير
وبسف فوقتك وفوقتي
انا نفسي انااام
انا عاوز اروح دلوقتي
متشكر جدا عـ الجلسه
هنكمل امتى علاج طيب
لازم هنشوف بعض قريب
انا ماشي .. سلام

تفرانيل ,, مصطفى ابراهيم

اضحك - زينب فرحات

وقت اشتعال المعركة..
مابين الحق والباطل..
والدم نازل مسفكة..
والموت بيسأل ع القاتل..
ملعون أبوه التاريخ..
لو لسه بيماطل..
ملعون أبوه الشعر..
لو قال كلام عاقل..
أنا انهارده رميت دموعي ف حجرها..
ومشيت أجرب ف البكا من غير دموع
شوفت الحقيقة بحلوها وبمرها..
يسقط خيالي ف وقتها..
من قسوة المجموع..
واسأل كأني من زمان مجهول..
والقى الحقيقة ف السؤال الفج..
ماذا إذا..
قطع حباله واتولد..
هذا الولد..
ماذا إذا..
ترك اللجام وانفك..
عن دين آباءه ف الخضوع والصبر..
رفض الثبوت ع السطر
وهان العقل والهيبة
وهان الصمت والشيبة
وهان العادي والممكن
ماذا إذا..
صرح بإنه بالمحال مؤمن
هيتم لعنه ف الكتب..
كل الكتب
ويأكدوا هذا المشايخ والأساوس..
هيتم طعنه بالكلام والكدب..
ويسيبوا دمه ع الطريق لامع..
هيناقشوا أسباب الوفاة والضرب..
ومعنى الحرب..وهو بينازع
هشوفه يتلقى السهام..
ثابت والبشر شاهدة..
والسما غية حمام..
وقفوا عليها ورفرفوا الشهدا..
والأرض فيها جنازة الإنسان..
والمقرءين حاضرين بيكملوا الصورة..
صوت الآيات سارح على العمدان..
"الدم آخر آية ف السورة"

صوت الولد خارج كأنه آدان..
بيأكد الملحمة وينادي ع الثوار..
"يا صُحبة خارجة فاتحين الصدر..
الليل ماهوش محتاج لبدر..
في طفل واقف في الصفوف الأولى..
وعيونه أصدق من طلوع الفجر"
رديت وصوتي بيرتجف مني:
انت اللي شايل ثورتك فوق الكتاف..
ومغني احلام الوطن فـ هتاف..
وعنييك صهيل الحق في زمن أخرس..
وبترفرف..طيور الحلم مع طيرك..
مين اللي مؤمن بالوطن غيرك؟
هل شقت النسوان جيوبهم م النحيب؟
هل أبكى موتك كل اطفال البلد؟
أم انهم عاشوا..كما عاشوا
وانت اللي رافض كسرهم..
وانت اللي ياما سألت..
آدي البداية بتنتهي لما اتقتلت
أرض الشوارع كلها اسفلت..
بتشرب دمك المسكوب بلا طائل..
ماهياش طين هتطرح ورد وجناين..
ولا صوتك عصا موسى بتجني خلاص..
هذا زمن..
بيقدم الثوار نفوسهم للرصاص..
برغبة تشبه لانتحار
كافرين بعهر الزمن..
وبكل اصناف البشر..
باللي اختلافهم عفن..
واللي فـ هتافهم عكر..
باللي انهيار الوطن..
حتما بيلقوه استقر..
مين اللي مؤمن بالوطن غيرك؟
هتصدق اللي احتموا م الضرب في دمك؟
واللي اعتلوا ع الحكم وناكرين اسمك؟
هتصدق الواقفين ع الطعن في جسمك؟
مين اللي مؤمن بالوطن غيرك؟
الأرض ضاقت لاتساع الحلم..
واحنا ضحايا الحرب وضحايا السلم
قول للعيال اللي عرقهم دم :
"ماتسلسلوش اسمكم..
في زحمة الأرقام
وماتفرقوش دمكم..
ف كاسات على الحكام

السما غيّة حمام | لـ أحمد عبد الحي

وهتعمل ايه يابو قلب مصبوغ بالجَدَب
مع بنت تكوينها بيشبه للشتا؟
متلوّنة بريحة يناير
روحها عاشقة الكلفتة
واكمنها..مروّية فى القلب بتعب
كان فيها منه حجات كتير
يمكن دفاها..أو جفاها
أو شرودها عن دواها
أو هواها للسهر
وبرغم سقعة جوّها
تلقاها تقدر لو تعوز..تصبح غطا
البنت سكة للسفر
وانت المسافر فيها مهما كان قلبك عجوز
..لساك فتى
كات جدتى بتحكى زمان
ان البنات..
تأويلها جوة الحلم دنيا
والحلم كان واجب نفاذه فـ خطوتين
"كام رقصة صولو من الوجع
على رتم أوتار الكمان"
وكأنه ديْن
وان الميزان..علشان يوازن كفتين
فـ البنت يلزمها تعيش كام ألف ضحكة
عشان يعادلوا حزنها
والحزن لو كان تُقل وزنه يسوى مَبْكى
بضحكة واحدة منّها.
يامفرّقين حبة دفا ع البردانين
قلب الشتا زى الرصيف
او زى شارع كان مداه ضلمة
ومخبّى وسط العتمة نور
والبنت برضه قلبها شتوى
عكس الخريف
يسكنها حبة ضىّ رغم الليل
..كل البنات
تقرب لروح البرد فى البوح والسكات
زى الحكاوى الدبلانين
حدوتة كات متشتتّة
مكتوبة لكن ما اتحكتش
مش ميتّة..لكنها
تفاصيلها لسة ماتعاشتش
وعشان كدة
كل الصبايا فطبعهم..
بيكونوا أجمل فى الشتا
كل الصبايا فطبعهم
بيكونوا أجمل..
..
فى الشتا

.

წ…℅……ঔღঔ…ੲੜ ..ҢΞяøÕ ĽòVξЯř.. ੲੜ…ঔღঔ……℅…წ

ﬗ▁▂▃▅▆▇★☀二【«..Ǿ∫ДMą..»】二☀★▇▆▅▃▂▁ﬗ

www.facebook.com/osamalovlyboy

تفرانيل ,, مصطفى ابراهيم

Amera Abd Elaziz

Recent comments

Somayaa

Menna Mohamed

Karem Mohamed 11

Noha Abu Elyossr

Related tracks