برطمان خايخ في قلب لبلاد
هرّاتو الدنيا وزاد قتلو عناد لفّاد
ولبلاد ماكفاهاش همّها وبينها
كملت هزّت هموم لعباد

كل حاجة فيه كيف ما هيّ
نفس السقف الي يقطّر
وكوبة الباب الي ماتتسكرش
والزليزة الناقصة في مزاز الدار
والشعر لمهرّي
الي ماعادش يخبّي
النقب الي في وجه الباب

البرسيان باقي يطربق مالرّيح
والشقوق كيف ما هوما
والسبّالة مزالت تقطر وتصيح

الحيوط مقشّرة
مخربشة وحزينة
ولبلاد باقي واقفة
وشادّة صحيح

تغدر إلي باع وشرى
وتحن علي مزال يحب ويشتهى
وتروف علي قلبو تعبّى لا حكى لا بكى

وباقي تحب 
الي يحبها بميزيريتها
الي يعشقها حتى في غصّتها
الي يمسحلها الي سال من دمعتها
إلي مايسيبهاش وهي في غصرتها
إلي يتفكر زينها ويحيّر شهوتها
يقول مزالت حليلتها ويقتل غبينتها

باقي 
كل شي كيف ماهو
لا فادت فيها سياسة
ولا هناء يجي بالقوّة

وعقاب الشتاء
القلب برد
النفس تسد
والحيل تهد
الكيف طار وزاد فد
وحد ماعاد لاهي بحد
كلها تجري تلحق ماترد
وكل شي تنسى ماعاود تجبد
الاثنين يشبه للأحد
واقتلو يصبح حي
وشي ماستوى
وشي ماتقد
والقلب الي زعمة زعمة فاق
مع سواد الظلام رجع رقد

لا غطاء مزال يعطي شوية دفى
ولا نوّار فتّح وفاح وزيّن لخلاء
ولا نو عنقت السحاب
وشطحت للهواء
ولا مزالت نكتة تفرهد كي تتحكى
ولا عادت الروح يشيّخها لغناء

البرد الي عرفتو وعشّش وكبر فيّا
نشوفو في كل غزرة مالعينين
والوحش الي كلاني بكلمة وحرفين
والكاس لمطرشق شطرين
ولعمر والزهر
الي ماتو بالحيا في تركينة البين

والبخت ذابل
تكتب بالدم والهم
عالحيوط الخايخة
ومعادش مكتوب عالجبين
ومعادش تبهنيس
ومعادش تشيطين
والفرح الي ولّى بالح بلا لوان
ما عاد يحوك فلّي جاشو حزين

برطمان بني فرانسيس
على قد ماهدّو لعمر
نسى إلي هو عريس
في قلب إلي ماتو والحيّين

وبين البينين
التنهيدة مزالت يتيمة وهجّالة
مدام الحال مزال كيف ماهو
وما تفقعتش الدمّالة

ومدام كل حاجة قعدت كيف ماهيّ
لحكاية الي بدات
ماتستحقش كمالة

[Amine.G]

برطمان خايخ

نص : سيف الزّين  
  إلقاء : أمين ڨلّح

نسج خيال (نص سيف الزّين)

خلّيني

ومن وقتاش 
ماكنتش لقلبك صغيرو 
وهو ناسي الدقة ومضيع غيرو 
ومن وقتاش
القلب يمّن انو فات الفوت 
وقت الروح قبل ماترجع لمولاها 
لازمها تعيش لمحبة قبل ما تشوف الموت
ومن وقتاش 
لبحر معادش يواتي الحوت 
وترجع حليمة لعادتها لقديمة بشروط 

تي من قتاش الوقت لازم يستنّى وصاية 
بش يقدّم لغدوة ويخلّي حكاوي لبارح ورايا 

ومزال في غدوة ما يتحس ومايتشاف 
وغدوة خميس وليوم خميس تعاش 
ببرشة صبر وكليمات خفاف 
ومزالت الشمس والنو بش يطلوا بالخلاف 

الدنيا راهي تمشي وتدور 
والأرض قد مانشحت مالماء 
بالمحبة عمرها ماتولّي بور 

العين بش تقعد تعشق 
والقلب ديما حي 
وذراعك يا علاّف
غلبت التالي والوالي
وتبعت منامة حسّيتها في خيالي 
وسرحت لفوووووق 
وصار خيالي عالي 

وكل شي نحسو في روحي 
موش كيما الي تخيّلتو وتعدّى في بالي

وفيبالي ...
فيبالي إلّي الذهب مهما رخص ديما غالي 
وفيبالي الي حتى كي تضربك لحيوط 
لازم بش ياقفلك العالي 
وفيبالي بحالي وموّالي 
اما ديما في بالي زادة 
الي الروح راي عزيزة 
ماتتكالش بياقوت وحوالي 

ومزال في بالي 
شنوة مخبي 
وشنوة رمشي حكالي 
وشنوة وصاو التوالي والأمالي 

لبارح قدّو مقدود 
زندو يعشّق 
غرامو ماعندو حدود 

اما ليوم هو الصحيح 
وهو الي يعمل لمليح 
وهو الي يقرّينا
 ويعلمنا لكلام لفصيح 

وبش نعيش مليح ...
ونبدى نحب نوفاك 
وكي نقول صحيح وما يخفاك 
الي مزلت نكيّل النجمات 
الي تعلمت نشوفهم 
في ظلام سماك 
والنجوم بعدك ما وفاو 
والظلام دحسة نحسها 
كي شمعة شعلت بهواك 
قعدت والعة بحر مبسم ضحّاك 

حب روحك قبل روحي ...
وأعطي لقلبك وأنسى جروحي 

غزرتي بش تقعد تعقلك وتحب صفاك 
وعمرها الفرحة ماتخطاك
ولا تنجم تبسيمة بهناسة ماتنساك 

ورد بالك ، تقول عالمحبة غناء 
بالوقت يتنسى 
كل شي يتعاش ويتحس 
اما موش كل شي يتحكى 
--------------------------------------#أمين

قلت ننسى 
و شمّرت على ذراعي 
و كفّنت هل قلب 
بين أضلاعي
و الذهب مهما رخص
 باقي غالي
وقد ما وطيّت راسي
ديما عالي

ومصيري نفوت
و الماضي نكفنو في لحود
و مهما تعذّبت تي محسوب
شكون قادر يغيّر المكتوب
و حسبة ربّي
تعب التّعب من تعبي
والباين مل هم شطرو مخبّي

و لقيتني كفّنت روحي
وندا صوتي ليك
مازال في بلحوحي
و دموعي السّاكبه
 تفحّمت بسوادها 
دابغه في حروفي

ومازلت نترجّى رجاك
و نعادي ناصحي ننساك
وباقي نقول طريقي طريقك
و مصير دعوات لمّيمه تجيبك
مهما كان كنت نهار حبيبك
ومهما لمعو في سماك نجمات
غير ضي هلالي يعيبك

يا لندرى توّه وينك
ومازلت على بالك
حتى كان تحل 
عقادي في حبالك
ساولتك بالله 
كان قلبك صافى غيري
ما تقلّو أنا بنتك و إنت صغيري
وما تودّو بالسّر في ضحكاتك
و نحبّك الناطقه في سكاتك
وما تودّو بحضن يدّك
و تسلّها كي تنز بعرقك
وبكلمة معزّك و مبنّك
خلّيلي حتّى كان كل شي وفى
و خبّيت شطر إلّى تحكى
شويّه للحلمه منّك
------------------------------------- #سيف

[Amine.G] & Saief Ezzine: نص مشترك

من وقتاش ؟ (سيف الزّين & Amine.G)

كيف ما دخلت الڤلب 
تخرج منّه 
ڤربك مرار 
وفي بعادك جنّة ...

خلّي مكانك 
ڤلبي ندم 
لمّا رضاك وصانك

لون الخديعة
ساس كل ألوانك
ماعاد عندي معاك 
ما نتمنّى ...

كيف ما دخلت الڤلب 
تخرج منّه ...

كان دلالك 
أيام كنت نصدّڤك 
في أڤوالك 

لكن كذبت 
وبان ڤصر أحبالك 
ماعاد عندي معاك مانتمنّى ...

كيف ما دخلت الڤلب 
تخرج منّه ...


كيف ما دخلت الڤلب تخرج منّه (الناصر صمّود)

نفرّغ حملي
ونحكي كلام متركن يخفّفني
وآش يسكّتني ...

وبالقوّة لساني حب يكتّفني 
ويفكّرني نحب 
ونرجع نسرح ونشب
بلاش حساب 
على خاطر لحباب 
ونقعد مفطوم عالحب  
مالقماطة حتى للحود 
وتحت التراب 

الصبر لله ...
والرجوع لحبّي 
وكلام في الحب تقال 
ماقالو لا امام ولا الرِبِّي 

نحب في الغصرة 
نتبنّن مطرة 
قطرة بقطرة 
تنفّخني ...
تنعوشني ...
وترجّع فيّا الروح ...

ويا روح الروح 
ويا روح الريد 
لوين تروح 
وانا ماكمّلتش حكيتلك 
على دايا المجروح 

انا راني نحب ميمتي وعبادي 
نحب الخير لأندادي ولأولادي 
ونحب بالحب نداري وجع بلادي 

بلادي ...
الحافية ساقيها 
لمعرّية راسها 
ومتحزّمة بسفساريها  
العاشقة توشويش سكاتها وهداريها 

ونحب ...
نحب حكاوي جدّايا عليّا وعليها
ووصيّة الوليا الي ماتخلّيها 
وخرافات لولين الي ترقيها 

ونحب
ننسى ساعات 
ونحلف بخلاف المرّة مرّات
ونذوق المرّ ونزيد نحب الغصرات 
كي تتسكّر لكتب
وتتيتّم معاهم الكلمات 

نحب روحي هكّاكا
لوجه الله ...
نضحك في دفينة 
ضحكة تقتل فيّا قهرة الدموع 

ونتعلّم نعيش لغدوة 
ونتعلّم نحبو
حتّى وانا حاسسني كارهو 
هكّاكا من غير علاش

ريحة الجوع تشبّع 
الي جاع ورضا بقسمو 
وريحة لبحر تعشّق 
الي حب الموج ونسّاه اسمو 

يا بايعين الهم بالمروّة 
يا ناسين الكيّة 
ومبدلينها بكلمة حلوّة 
يا عاشقين الدنيا بخنّارها وأعوارها 
في سكاتها وحتى في عقاب الدوّة 

الدنيا راهي منّا ولينا 
فينا وفي غناوينا
نصبّحو عليها 
وهي تحيّر ليالينا 
وهي الي ديما عالحب توصّينا 

خلّينا منها شوية 
مرّة احنا ومرّة هيّ 
وخلّينا نفديوها
بشيخة ... بشطحة ...
وتكشيخة القلب ديما هي الديّة 

انا راني نحب نسرق مالوقت الصبر 
ونزيد نصبر بش نزيد نتحب 

ونحب نفارع الريح 
ونتقوّى عليها 
تهزّلي عروش كنيني 
بش نرجع شايخ من غير سبب 

تي آش جاب الّي عايش في حروفو 
للّي مكفكف جروحو 
للّي فاهمها حسبة ماتقابلش 
وعايشها كان مع روحو ...

الّي يفك متاعو ... مش سارق 
والّي يرقد فايق ... ديما يعيش عاشق :

لا يحير دليلو 
ولا يبرد قلبو 
ولا دنيا تهدّو 
ولا حلمة تشيلو 
ويعيش ديما يسبّح لحبّو 

وبش يقعد الجاش
في لمحبّة يعبّي 

والقلب لا حب يخطاني 
ولا حب يعتقني .... 

ومزلت نزيد نتبّع كلامو 
ونعاود نزيد نحكي لمتركن 
الي موش ناوي ينساني 

ونفرّغ حملي ... 
ويوفى كلامي ... وآش يسكّتني ...

[Amine.G]

آش يسكّتني

عمرو السكات مانطق حاجة ماتسواش
وعمرو الليل ماغطى تنهيدة ماحسهاش 
وعمرو البرد مايطفي روح القلب ماعشقهاش 
وعمرها الضحكة ماتغدر وتيتم الجاش 
----------------------------------------
وحدو لكلام يتحس ومايتقراش 
وعمرها المحبة ما وعدت الي ماوفاش
وعمرها الدمعة ماتروي المذبوح
و عمرها ماداوات والجاش مجروح 
و عمرو النبض ماهز غير للي سكنو الروح
و لا عمرو وقف ولا نساهم ... ولا نسى الكاس المكسور
ولا بعدهم و لاغربتهم .. و لافراشهم المهجور
--------------------------------------------------
وعمرو الظلام ماسكت شمس ماتطفاش 
وعمرو البعد ماقتل محبة حبوها ماتضناش 
وعمرو عمري ما تكتب بحروف مش ليك 
وعمرو قلبي ماحكى في منامو كان عليك 
وعمرها التنهيدة ماتدوم 
وعمرو الوجع ماكان بلا لوم 
وعمرو لبحر الي في عينيك ماطلع يعوم 
----------------------------------------
اش عليك في كلامي وسلامي وهزاني ونفضاني 
سيب عليك من تخلويضي والبسني وماتخطاني 
 لسانك وحدو الي حكاني ومانساني
----------------------------------------
لساني ساكت ..ورزين.. وخايف متكتم عالكلام
قلبي ينادي .. ويناجي.. ويفركس فيك عالاحلام
نلبسك و تلبسني
نملاك و تملاني ..وتهزني للطريق إلي هواني
تعنقني..و تسرقني.. و تلمني و ترصني في تركينة ما تسيبني
تكتبني بكلامك وكلامي.. الي تكتبو في سرنا بلا ما جهرنا
تكتبو قبلنا بلا ماحكينا ولا تلاقينا
خليني عندك ومانخطاك
ولا نسلم في الخيط الي يربطني بصرة هواك
----------------------------------------------
مانحلف كان بعينيك وحر جواجيك 
وما نفهم كان غزرتك الي تفكني منهم ونرجع نجيك 
ونحيا معاك 
تحت غيمتين من حر سماك 
وفرد منام كي نربش نلقاك 
وعمري لا نسيبك ولا نخطاك 
ومانستحقش نقلك ونحكيلك
ولا وجعي يبكي بش يشكيلك 
 ولا روحي تزهى كي تغنيلك
وكيفاش تحبو يسوى السكات وهو عليك ماحكاش 
وكيفاش تحبو الليل يسترك مني كي شفري غيرك ماراش 
وكيفاش آه وتنهيدة 
وكيفاش ماتتحرقش لكبيدة 
وكيفاش عشقة قديمة جديدة 
ماتتحكاش 
ماتطفاش 
 ماتستناش
تلب 
تحب 
تتحب 
تتاكل 
تتشرب 
تتعاش 
تعذب 
تتسب 
تشيخ 
 وترجع تتحب
صرتي مزالت مربوطة في سراك 
وقلبي حالف مايدق كان حذاك
-----------------------------------------
وعلاش تحلف وانتي عمرك ما تخلف 
وعلاش تشكي وعينيك هي إلي تحكي 
وعلاش تقول علاش 
 وأنا غارقة فانية فلي عمرو ما يتعاش
خليك بيني وبين روحي .. ساكن خطوطي 
وهايم سارح في بحر شطوطي
خليك بين الشهوة والتعنيقة
خليك ريحة عايشة فيا 
ناسية الدنيا والناس و إلي حواليا 
خلينا ساكتين .. ساكنين 
ناعسين بين حلمة وعشقة عقاب الليالي 
وشهوة على غفلة في الفجاري 
خلينا فيها
خليها نايمة
ناسية
ساهية ما تصحى 
تتكسل وترجع تهزها الثملة 
لا تفيق ولا تفرق لعشية مالصبحة
خلينا في التعنيقة
والأمارة 
ولڨمارة 
إلي جات بين بوسة الخال
وشهوة تفاحة الأدغال 
--------------------------
وخلينا في سكرة 
بلاش صحوة 
وعمارة 
ولحظة عشقة غدارة 
تتشهى تبدل لحوال 
وتقعد عشقة مشتهية 
على زنود الوقت مرمية
ماتتكالش بالمال 
 ولا بدعيوة خير حلال

هكا شقال السكات 
 وشحكمت لحوال

سكاتك وسكاتي سماوه غرام يرعش مرة في الفال 
 يلب ومايتقال
.... ومزال يسال

[Amine.G] & Myriam Bribri

سكاتنا شقال ؟ (Amine.G & مريم بريبري)

آش بش نزيد نحكيلك ونكتبلك 
نكتبلك كيف ما يكتب المكتوب
ونسبح بصرتك وزنودك 
ونصلي على جفونك 
 وشفرك القبلة ووجهك رب الربوب

نكتبلك بعرقي 
ببلومتي وبياض ورقي 
 عالمخبي والمكنون

على جاشي إلي عليك كلب 
 وقلبي لمضبع عليك كي المجنون
تكتفني بساقيك 
وتلصقني فيك 
 وتتعرى عليا وتغطسني فيك
ونرشق سري في مكنونك 
 نسيك اسمك وتكره وجعك ومحونك

نكتبلك
ونكتب عليك 
 وعلينا وعلي صاير
على ليالينا المغبرة شيخة 
 وبلاوينا مرمية عالحصاير 

على صياحك وصوتك الطاير 
 وأنت وأنا نتعاندو شكون يطلع الشيخة لراس لاخر قبل 
 زعمة نكون حبيبك ونتفطم على حليبك ؟

ولا ترميني جهامة والروح روحين 
 واحنا على بعضنا مفطومين
عيني مرشوقة فيك 
وإنت تبلع وتغص 
 وقد ماتهرب مني نرجعك في حجري تترص
: ما عادش تغزرلي بلي خلقت وسواك
  
 نتمهمش كي نراك ونحير منين بش نبداك
من صرتك إلي صورت فيها بطاحي تمرمدت فيها
ولا من رقبتك إلي تفطمت عليها 
وسكرت بيها 
 وتنفست ريحتها وعشقت سماها

وفي غصة لحلاوة والسيبة
نتغطى بيك وانت للقلب طبيبا

نتوضاو بعرقنا 
على كفوف الظلام 
 إلي من رواحنا سرقنا
ونرميك على صدري ونكتفك بقدري
وما نقدرش عليك 
 ونرقدك عندي وما نسلمش فيك

وتركبلي بين نومين 
 نرشملك إسمي على زنودك بلساني

وتشدني تكتفني 
تبوسني 
تندبلي بدني 
وتهواني 
وتنفخ تنهيدة 
 وفيها تستناني

ومش بلعاني ... نسكت
ونبعثلك مكتوبي مع سلامي
بإسمك نسبح ونبدى كلامي
ونستغفر هجرك والعشق ملامي
منين نولي وآش بش نخلي ؟
ننقض فرضي ليك 
 ونفرشك عليا ونكمل نصلي ؟

حي على سماك
على طراطش صوابعك 
كي تتخبى مني تتزعبن 
 وأنا نعفس في الوقت ونستناك
تتمشى وتتسرسبلي من تالي
وتطل عليا ونشم عليك ريحة لمالي
نرى فيك منامي الضاوي وهبالي العالي

: لا لا ماتفاهمناش هكا  
 تجيني شعرك أكحل سواد يتسبسب على زنودك 
وآش يقولوا عليا لعباد ؟
وأنا ملهوف عليك تقول مزطول
ومفطوم على مسة من يدياتك على صدري ترجع فيا الروح بعد ما هجرك رماني وخلاني ممكون معلول

جعت منك ومعاك
ايجا ندخلو للكوجينة نحرودو حويجة تقنعني بملڨاك
نركبك على اكتافي ونرجعو غشاشر نلعبو دڨازة
وتعملهم عليا وتعضني من وذني وتقرصني بعزازة

نتحلفك ونماريك
وعلى وجق الكوجينة نرميك
ونعشق ضحكتك الي تحزر على سنيك

وأنت يا بهناسة
شاهية نحملك بالسياسة

ويضربني الجوع ولعطش
وتتبسم وتفهمني عالرمش

ونخطف منك شفة عفيفة خفيفة نظيفة لعطشي نطفيه
نبعدلك خصلات شعرك على وجهك وننفخلك عليه

تغنيلي وترشق ضوافرك في شعري 
وتغزرلي مرة ومرة تسكتني بش تحكيلي
وترميلي يديا في شونك : أنا الشيطان إلي نصونك
وتتفكر بلوتي بحبك
وتستغفر ربي وربك
ونقيمو صلاتنا حاضرة في جواجيك
يلعنو هبال بلا بيك 
 ولا بنة وهي تلوج عليك

نهزك وننفضك
تشيحني ونشيحك
تڨدمني ونطيحك
تعبني ونريحك
تغنيلي وتحكيلي
وتضربني ومن روحك لروحي تشكيلي

ونعمرو الراس
وتصبلي كاس 
 : ليا وليها وليه ولجميع الجلاس 
أنا وإنت والشيخة
والشهقة كي تعزق صيحة تتنهد بلا ترتيحة

وتتكب الدبوزة علينا
على زنودنا المطبوع فيهم حيط التركينة

وتشتهاني كمية في كلامك وثملة لمنامك
نخطفك ونهرب بيك لثنايا غرامي وغرامك

تي خليني نشطح معاك ونمشي عليك
على ميزان دقات قلبك وعلى دبكة خطاويك

تغزرلي بالڨدى 
غزرة تتحكى 
 وتطشني بالماء

أما الماء يا لِلاَّ ما يطفيش لهليبتك في بدني
ريحتك على صدري إلي مازالت تسكر وتغني

شبيني مازالت لا شبعت منك ولا مليت ؟
ومزلت نتفكر بوسات الخال في تراكنك بالكعبة وباقي مانسيت

نشد جرتك ولا يزي ؟
تي لا نجمت نسكت جنوني وهبالي بيك
ولا من لهفتي عليك الشيخة تززي
.... تي يزي 
ايجا لبني واعبث بيا بلا صوت وبلا حس
ايجا ضيعني وقص عليا النفس
واسهر معايا وأقعد على فعايلي فيك نسنس وزيد عس

وقبل ما تاخذك عينك وعيني فيك 
 ايجا في حجري نحلو لبعضنا كتاب يحكيلنا علي جرالنا وإلي في عروقنا سرالنا

نحبك يلعن رب بلوتي بيك
حتى وأنا بعيد عليك : نمس فيك 
وعقاب الليل نسمع في حثلة خطاويك تهنيني عليك

[Amine.G]

نكتبلك عليك

نمّن بيك
ونمّن الي الليل بطولو
يبات يهتري ويحكيلي عليك
كيفاش في اولو تجي
وفي اخرو مشيت
وحبيت نرجعك ونجيك

نمّن الي ماتحلى تبربيشة
كان في جواجيك
وماتحلى الغزرة
كان كي تترشق في عينيك
نمّن الي حتى وانت مكش هوني
لازم نغير عليك

من شنية ؟
مانعرش

من كل شي يفكّرني فيك
من كل باب تسكّر عليّا وعليك
زمن كل صباح
كي فاق وفيّقني سألني عليك

ونمّن إلي توّة لاك عندي
ولاني ليك
وإلي البعد هزني
والوحش هدّني
ونمّن إلي ماني ناسي
الي الرّوح تفنى عليك
والي قد ماحبيت مانكتبش عليك
تشمت فيّا بلومتي
ونلقى خيالك على ورقتي
المبلولة بدموعي الي تفركس فيك
غادي ولا هوني
بين عقاب الضحك
ومرّار الدوني

ونمّن الي وحدي
بش نقعد نعاني في محوني
ونفارع في ايام بيك غرموني

نكذب ...
نكذب وعيني صحيحة
كان قتلك لكلام مش عليك
الله يهديني ويقدّرني عليك
على خاطرني مزلت نمّن بيك
ونحب ... نجيك ... ونورّيك
إلي شي ما نسّاني فيك

وباقي ندعيلك
وندعي عليك
بغزرة من شفرك
ترجّعني مرشوق في جواجيك

بوقت تعدّى وتعب
وهو يستنّى فيك
بنفس ما نجّم يتحس
ويتكلّم كان ليك
بتنهيدة بلاحت
بعد ما صاحت
متسميّة عليك

يزّي ... يزّي ... يهديك
والله مانجمت نخطاك ولا ننساك
ولا نحّي كل صنعة تفكّرني فيك

نكرهك ...
نكرهك
ونتشمّت فيك
ونوجعك
ونتوجع اكثر منّك

انا الحضن الي يلمّك
حتى وانت ماسمّك
تي حب يلمّك
واش يهمّك

وساعات ماكسحك
وساعات ماحنّك
وديما ماقواك
وديما مابنّك :
وقت تضحك ... تتبسّم
وأنا عليك نتدكّك
نلبّك ونزيد نغمّك
ومن روحك لروحي نضمّك

يزّي من الكلام الي يكتب
ويزّي مالسكات الي يعطب
يزّي من بالي
الي ياما فيك سرح
وفي كذبة عاش وفرح
ولحقيقة قلب مالجفى تذبح

تي ... يزّي ... الزّح ...

ماعادش في الصدر ليك هواء
وماعادش جهد للشقى
وماعادش عشقة بأختف تتعطى
وماعادش في القرجومة ليك دعاء

يا بلوة
يا هم
يا صفا

كل شي خذيتو
ما عاد عندي مانعطيك
ولا الدنيا نجمت تورّيك

اما والله نمّن بيك
وباقي ندعيلك وندعي عليك

[Amine.G]

نمّن بيك

أحكي نص الشهوة كلامْ
و نص الفعل تخمامْ
و نص البدر تْمَامْ
ونص الثنية صاحبْ
و دنيا في كتابْ
استكفى بلّي حضرْ
و فوتك ملّي غابْ
بالك بيك كفر ومنّك تابْ
تي محسوب كانت أياماتْ
و خسارة ساعاتْ
عشقه حسابات
آش كان عليك في نُصْ النُصْ
تنسى إلي فات وماتْ
و احلم لا سما تحدِّكْ
و سابق الربحْ 
إذا هْفتِتْ يِشدّكْ
وهات طرطوشه يدِّكْ
تهبلني كي تْنِزْ بعرقكْ
و يدّي في يدّك نُصِّينْ
و جمع النْصين محبْهْ
و عين عالعين رفّتْ
علاش كل ما تتفكّرني تِتْلَفِّتْ
انحبّك تتشعبط في سحابهْ
شاحت من ماها خَفِّتْ
أحكي للمِبْلِي المُخُبِّي
أحكي غشاشر حلماتكْ
بالنفس و حرارة كلماتكْ
بشهقة صوتك في غناياتكْ 
ٱحرق فرططّو خطواتكْ
و إيجا عنقني
إنحبّك تمرجني
ادّرجح غشيره في حضنيِ
و فرّتلي المنظم في قجري
ولّيلي صبيه زعبانهْ
وصوّرلي مكّه عريانهْ
وعاركني من غير دوانهْ
نص لعمر هبالْ
و نصّو تهرويله ورا حلمهْ
وبرّا الدنيا ما عندهاش كلمهْ 
كون انت الكلمة و انا نَصّكْ
كون انت النَّص و انا نُصِّكْ
كون ليا النُّص و انا كٌلّكْ
كون فيّا و نسكن فيكْ 
ديار معمّرة بخنّار مِنسي
و عينيك بيبان عرسي
وبرا الدنيا معندهاش كلمهْ
توعد و ماتوفيشْ 
تاخذ و ماتعطيشْ
توجع و ماتداويشْ
تضيّع و ماتلاقيشْ
انتي دنيتي و انت ليا النغمهْ
حتى كان ضيّعت الكلمهْ
بالسكات نلقاك في قلبي وشمهْ
----------------------------------------------------------
وبغزرة تنحر من شفرك تطير الحشمة 
ونكمل الشطر في عمري
ونزيد شيبة في شعري برشمة 
وخلي نمشيو 
نبدلو لخطاوي 
وننساو الوقت علاش ناوي 
خاطر انا نحب شطر عشقة 
والشطر لاخر شبعة شهاوي
أحكي وخليني نتنفس روايحك حذاك 
أحكي شطر لكلام 
وخلي شطرو يسكت بش يهواك 
ويتسمى تخلويضة عقاب الليل 
تزيليفة تسخن ومن روحي لعرق يسيل
ماتمشيش 
واقعد مرشوقة في قلبي ترص 
وخليني نعشق سكاتك 
ونخاف مالحس 
وهاني عاشق ممحون كل ما بيك نحس 
وخليها نص بنص
نص القمرة بتمامها هلال 
ونص تعنيقة عشقة حلال 
ونص غطسة في شطوط عيونك اشنع مالهبال
زيدني نص الدرجين 
وخوذ نص مكتوبي الي عالجبين 
وخوذ نص دقيقة 
وخوذ كل لحقيقة
لحقيقة الي مانجمتش نحكيلك عليها 
الي حبيتك تكون انت هي وماكش فيها
وقداش حبيتك تغزر بش تعريلي هبالي بيك 
حبيت نظفرلك شعرك ويربطني فيك
ونكملو نص الثنية جري تحت لمطر 
ونشبو من بقعة لبقعة وماتوفاش ثنية سفر
صورناها بطراطش حديثنا 
زرعناها قرنفل بطشاش توشويشنا
تقرس مالنسمة وتتخبى عندي 
في زناقي قلبي وشوارع روحي 
خاطر مانحبش شطرك ليا 
نحبك كان لروحي 
زعبانة تسرقلي حروفي 
تخليهم بالسيف عليك يحكيو 
وعلى فراقك يبكيو
كون الت الكل وانا نصك 
كون انت البلوة وانا نحبك 
كون انت لوجيعة وانا نسبك 
كون انت لحنانة وانا سر في عبك
كون انت الدنيا وانا ترابك 
كون انت الغصرة وانا كل احبابك
وكون الي توعد وماتوفيش 
الي تسلطني حتى كي ماتغنيش 
كون البلوة الي كي تغلبني ماتسيبنيش 
كون لحكاية الي نكتب عليها تعريني ماتغطينيش 
والي قد ماعملت ديما تغلبني وماتعتقنيش
وخليك تكون كعبة التوت المشتهية 
وخليك تكون صيحة بلاش سكوت منسية 
وخليك تكون حشمة زمنية 
وخليك تكون صبية مقدية
وخلينا نقسمو كل شي بالشطر 
ناخو دلالك ونخليلك الزين والسر
وبرة الدنيا منا غارت 
وايامها زادت دارت
مدام روحي روحك انت اختارت
خليني منك مانبراش 
وبعيد عليك مانترباش 
وخليها دنيا وانت مكش فيها ماتسواش 
وخليها تروح وماتتعاش
انت النَّصْ إلي تحفر على كفوف الروح ماتحكاش 
وانت النُّصْ في الكل الي مايوفاش
ويلا خلي تضيع كلمة
ونكمل نعشقك عقاب نص حلمة 
وبالسكات نفركسك ونلقاك في قلبي وشمه
---------------------------------------------
: نص مشترك  
[Amine.G] & Saief Ezzine

نُصْ الشهوة كلامْ (Amine.G & سيف الزّين)

ما كانش حبْ
سمّيه إلي إتحبْ
سمّيه جريه في الظلمهْ
سمّيه تشعبيطه في حلمهْ
يمكن عجبتني الكلمهْ
يمكن غلطه يمكن نزوهْ
يمكن زاده شهوهْ
يمكن توحشّت الدّمعهْ
انا كيف إنحب ممكن إنهد الكعبهْ
ممكن انفوت عرش الرّب بخطوهْ
ممكن نمشى عل الماءْ
ممكن في وسط النار نترمى
ممكن نرجع سنابل من قلب الرحى
ممكن في كرش الحوت نتنفس هوا
ممكن نولي خيال كي نرمي لعصا
و قدّام عشقتي نتهد و نهدّى
في الحب لا قبلي ولا بعدي
و حد الرب حدّي
ما كانش حبْ
سمّيه إلي تحب

سمّيه هبال وعجب
سمّيه تزيلفة تلب
سمّيه غصرة في الشدة تتعشق وتتحب
ولا ممكن غزول وفوارة عصب
وممكن ندوة مطرة كي تصب
ولا شيخة كاس ولفي كي عليك تكب
ممكن تخلويضة كي راس المجنون
ولا ممكن جاشي فيك مرهون
اشتهيتها ظلمة والضو طافي
حبيتها حلمة ولكنين حافي

سمّيه تعفيسة عالتراب
سمّيه شيب بعد شباب
سمّيه تخرنين شياب

جربت نتنحر
جربت غطسة في بحر
جربت السر
الي في قلبي تحفر
وحبيتك تتكلم وتقلي
حبيتك تنويلي كي تصلي
وتغسل ذنوب الحساد
وترجع الروح مالرماد
وماتحسبنيش واحد مالعباد

يمكن ترويني شربة الماء
وتزيلفني لحفة لهوى
وترتحني جغمة دوى
اما انا مزلت نلوج على غزرتك عالخوى
يمكن توحشت نحبك
ونحج لزنودك ولحجرك
ونتسمى رعشة في صدرك
ممكن توة يطلع النهار
ويفسخ شطر الي صار
يسميه تخلويض وخنار
ويمسح دمعة تزرعت في خدي
ويقهر فرحة في عيني خيالها متعدي
مانجمش نقدك
لا ندك من ندي
في دين الريد نشهد بشفرك
وهاكا حدي
ماكذبتش كي عشقتك
وما حنثت عهدي
وماكانش حب
إلي كلى على عمري وشرب
انت تعرف مايا وين يصب
وسمّيه إلي تحب

[Amine.G] & Saief Ezzine

ما كانش حبْ (Amine.G & سيف الزّين)

شبيه عينيك تقتل
وغزرتك تمهمشني
من غير لاتشاور ولا تسأل
وشبيه الليل قصير وأنا معاك
والوحش عمرو طويل كي ستنّاك

تي شبي سماك
وشبي صفاك
مبنّك ومحلاك
كي تلبس الsalopette الدجين
كي تقعد تمكيج تبطى
ونزيد نستناك درجين

تي شبيك تنجم ترضيني في لحظة
بتعنيقة ... بغزرة ... وبوسة مالرقبة

تي شبيك تبربش وماتحكيش
تعشق وتحب وماتورّيش
تفرك وتغير وماتقلّيش

وشبيني كل مانحب ننساك نحصل ؟
تي نعرف ...
مدام هاك الغزرة ماتبدلتش
وديما تقتل

تي افصل ...

شبي همّك ؟
اعتق سمايا
مش لازم نحكيلك ولا نقلك
رد بالك تمشي
واقعد حذايا

نجمة
في ظلامهم ضواية
هدرة
في سكاتهم حكاية
ساعات بدالة
وساعات نساية

اما مش مشكل
مدامني كي نتنهد في خيالي نلقاك
ومدام كل ما نتعب
نفركسك بش نرجع نهواك
وكي نتعلّم نتحشى في شونك
نزيد نشتهاك

غصرة في وقت الراحة
تعنيقة وقت لملاحة

ومش مني
ولاهو منك

من زمان هزّك
ماينجم يفهمك
ولا يفسرّلك

يا قطرة مطر
تتزعبن على نوارة
يا غزرة غش
حنينة وحزارة

يا برد الشتاء
وسهريات الصيف
يا نفس عفيف
نكتة ودم خفيف

يا كل شي من حتى شي
يا وشمة البعد بلاش كي

نسيتك ...
نكذب ... باقي كل شي 

[Amine.G]

شبيك

مغرفتك ماتهز كان قسمك
ومكتوبك ماينادي كان بإسمك
خليك طبيب روحك
وقت تتمكّن بيك جروحك
خليك الصوت المخفي في كلامك
خليك تغير وتدوان على غرامك
خليك تغزر لبعيد
وماتنساش الركزة الي قدامك
خليك دوزة لهبال الي تحلّي ايامك
وخليك لكلام لمحرّم عليك وهو حلالك

واش كان عليه
كان الي مايجيش جاء
واش كان عليه
كان غزرة تسحرك كي تترمى
واش كان عليه
كان قلبك طاير غادي
وجهامتك ملطوخة لهنى
واش كان عليه
كان سكاتك تعلم لغناء
واش كان عليه
كان تتوجع وتتكوى
واش كان عليه
تطيح
تتكب وتتقعد
وتلقى وحدك الدواء لكل داء
واش كان عليه
كان تخلق مالظلام ضو
واش كان عليه
كان تقول يزي مالصبر لازم تو
تي اش كان عليه
كان من وسط المر تذوق شوية حلو

تي ايييييه ....
لكلها أيامات تعاود في بعضها
تحب شطرها والباقي تبغضها

تي أنسى الي خان وغدر
وتفكّر الي تقوّى وقدر
وخليها للمكتوب والفرتونة والزهر
وأرمي وراء ظهرك إلي تعدّى وحصل
وتبّع صنيعة الي قال وفعل

تي بعد هذا ودونو

قدّاش الفرحة في القلب تعزّت
وقدّاش العين عالبكية تلزّت

إحسب ... وأعرف حكّر
أنسى ... وساعات تفكّر

إلّي كل واحد ومغرفتو آش شهزت

ولاباس
الروح صبيّة
والقلب عليها حزّار

مايهدناش إلّي صار
ولا يقتلنا زمان بكلو خنّار
وديما صح ستّار

[Amine.G]

صح ستّار

شنية إسمها ؟
وشنية أصلها ومنين فصلها ؟
حبّوني نورِّيها
ومن أوراقي نخرَّجها ولحضني نرميها
سألوني عليها من قديم الزمان
تمناوني في سكاتي نصيح
وبهواها نسبّح وننطق بالفم المليان
سألوني شكوني :
إلي سلبت عقلي وعملت فيَّا الدوني
إلي طيرت مخي
وهزتلي كنيني
وصنعتلي الفرحة من جرح محوني
ما لقيت ما نجاوب وما نقول
ما لقيتلها أوصاف ولا حروف ولو الدهر يطول :

في بالي ... صوَّرتها
في بالي ... عبَّرْتها
في بالي ... كبَّرْتها
في بالي ... غرَّمْتها
في بالي ... خطِّيتْها
في بالي ... ربِّيتْها
في بالي ... شْتْهِيتْها
في بالي ... كلِيتْها
في بالي ... حْكِيتْها
في بالي ... ڨمرة ضوَّاية حطِّيتْها
في بالي ... بروحي في ڨرْسِتْها غطِّيتْها
في بالي ... عرِّيتْها وسخانِةْ صِدْري لَبَّسْتْها ودارِيتْهَا
في بالي ... عشِڨْتهَا وجَافِيتْهَا
في بالي ... سلطانة لحياتي إستَفْتِيتْهَا وعلِّيتْهَا
في بالي ... وشمة لجواجيَّا تِشْويتْهَا
في بالي ... مَمُّو عيني إِلِّي لاڨِيتْهَا
في بالي ... صفحة من منامة وحلمة على رقبتها قْرِيتهَا

في بالي ... تلَحَّفْت شْعَرهَا
في بالي ... ترشَّفْت شْفَرْهَا
في بالي ... كفوفي غطَّات حِشْمتْهَا
في بالي ... تِفْطَمْتْ على حلاوة صُرُّتْهَا
في بالي ... تعلَّمْت نرضع رجوليتي في شِفِّتْهَا
في بالي ... عَرْقِي هو الدواء لوْجَعْهَا وعِلِّتْهَا
في بالي ... كْفَرتْ بالعيبْ وقت ما عْبِدتْ مَشْيِتْهَا
في بالي ... تغرِّيتْ بزنودها وتشنقت بضَفْرِتْهَا
في بالي ... تعلّمت نشْكِيلهَا بَاسِي
في بالي ... وْصُلْتْ نْسَمَّعْهَا حرارة شِيرتِي ونْحَفَّضْهَا إحْسَاسِي
في بالي ... على صدرها نفرغ شكارة أوجاعي ونْخَبِّي رَاسِي

في بالي ... خْرَافَةْ مِزْيَانَةْ
في بالي ... بْنَيَّةْ بِحْلَاوِتْهَا فَرْحَانَةْ
في بالي ... تَبْسِيمَةْ صَافْيَةْ عِرْيَانَةْ
في بالي ... زَعْبَانَةْ دَلُّولَةْ وْسَاعَاتْ خَرْنَانَةْ
في بالي ... رَعْشِةْ خُوفْ وْبَرْشَةْ حْنَانَةْ

في بالي ... مِسْكْ اللِّيلْ
في بالي ... عمبر منوّر ومشموم كْلِيلْ
في بالي ... نِسْمِةْ عْشِيَّة
في بالي ... مُرْجَانَة زِمْنِيَّة
في بالي ... عِشْڨَة عَرْبِيَّة
في بالي ... هَبْلَة رُومِيَّة
في بالي ... رِيحَانَة عَجْمِيَّة
في بالي ... خْيَالْ و مُمْكِنْ جِنِيَّة
في بالي ... رُوحِي مِبْلِيَّة
في بالي ... تْرَهْوِيجَة
في بالي ... تْمَهْمِيشَة
في بالي ... تْبَرْبِيشَة
في بالي ... تْدُولِيشَة
في بالي ... تَرْبِيجَة
في بالي ... تْخَلْوِيضَة
في بالي ... حاجة صغيرة و مُمْكِنْ حْوِيجَة

في بالي ... ومَا تْرَاوْهَاشْ
في بالي ... وما نَعْطِيهَاشْ
في بالي ... وما نْسَمِّيهَاشْ

في بالي ... إِلِّي هِيَّ
في بالي ... إلي على عِينِيكُمْ طَلِّتْهَا عْصِيَّةْ

في بالي ... خُلْقُتْ وتْرَبَّاتْ
في بالي ... ماتت بِالحْيَا ومَا مْشَاتْ
في بالي ... شَهَّدْتْ وحَبِّيتها وبْحْرَامْ كلامي تْكَفْنِتْ وتْخَبَّاتْ

في بالي ... عْشَقْتْهَا
في بالي ... وْلِدْتْهَا
وفي بالي ... هِيَّ حْلَالِي وْبِنْتْ خْيَالِي

[Amine.G]

في بالي

أحيّت منّك كي تلبس الtalon
والjupe لقصيرة مع الcollant
العين تتشهّى ... لا لا تعشق pardon
وأنا مبلي بيك de toute façon

انت إلي تتغرم وماتحكيش
كيف قلبي إلي يدق ومايورّيش
كيف روحي الي تتنفّس وتحب تعيش

شوية عليك محلاك
وانت تتبختر عاملة بلعاني
بش نقعد مبلي بيك ومانبراش
ونزيد نهزّك ونحطّك
تي إي ... مانحياش !

تي كيفاش ؟
تحبني نحيا بلا بيك
وانا النفس نسرقو من رواريك
ادبغ الكاس بحمّيرك اش عليك
واحقرني ... واعمل مافيبالكش
بالك ننساك ونرجع نجيك ...

تي انت دوزة لهبال
وكمالة غناية jacques brel

"Ne me quitte pas"
يا سخطة يا صفى
يا كمالة نفس وهوى
تي ايجا لهنا ...

نقرّيك ...
الي تكتب وماتقالش
نورّيك ...
إلي حلمت بيه وماتعاشش
نغطّيك ...
من برد Paris
تي أنطق ... vas y
بش نقعد ديما ... ravi
إلي قابلتك تلوج في taxi

وأنا إلي شيّعتك
تي أنا إلي شبّعتك
بغزرة
لاهي محبّة
ولا هي معزّة

غزرة
ماحبّتش تتربّى
كي شافتك
ويدين ترعش كي وردة حمرة مدّتلك
وعينين قبل ماتشوفك حفظتك
علاش تمشي وعلاش تجي

وعلاش عليك حكيت ومزلت نحكي
وعلاش خلّيتك تمشي
وخليت روحي تبكي

منّك ... وعليك
وكان يرجع الوقت بالتوالي
لا نسيبك لا نسلم فيك ..

C'est bon
وفات التخلويضة
ونجم نحّيلك الtalon
ومانستحقش نقلّك
تعرفني نحبّك absolument

[Amine.G]

نحبك Absolument

وينك ؟
وين مشيت ؟
وينك ؟
نخاف وحدي كي يطول الوقت
وانت لا جيت لا طلّيت

وينك ؟
تي يزّي ايجا
هيا نهبلو
نشنعو نهبلو
نصنعو طيرة وبرشة هيجة

وينك ؟
نحب نحسّك في كلمة
في همسة
في حاجة صغيرة
في حويجة
وممكن في تربيجة
تي خليها ترهويجة

وينك ؟
ايجا هنا
ايجا نكتبو بتبسيمتك شبعة حكايات
ومن ضحتك نلحنو برشة غناء

وينك ؟
راك نوارة الحياة في صحاري الفناء
راك بالشفاء بعد شربة الماء
وبين كفوفك عمري تسقى

وينك ؟
بفرططويك
بخطيفتك
ليلي بعد ظلامو ضوا

وينك ؟
بروبتك إلي تغطي شونك
ايجا نحب نشوفك
ماعندوش كلمة قلبي
بلّي حاولتو ماحب يخونك

تي وينك ؟
نحب نقولب لحمك في لحمي :
نوليو ساق وحدة
صدر واحد
نفس واحد
وذن وحدة تسمع
شفة وحدة
منها نعضّك
وتاكلني وفيها نبوسك

وينك ؟
يا منامة معلقة في السماء
يلّي عاملة بعمايلك
ومستفعلة فيا
مدوختني
ومعلقتني فيك بين هوا وفضاء

وينك ؟
يا شيخة بعد غصّة لبكاء
يا راحة بعد وجيعة تتهدى
يا سكات تسكّرو تسلطينة لغناء

وينك ؟
بش نعريلك كرشك وزنودك
ونكتبلك بعرقي فوقهم كلام
يلبّك ويرويك ومش لازم يتقرى

وينك ؟
يلّي خلقت ال"ح' وال'ب'
وسحرتهم
وبيهم سمّيت الحب
خرافة فيها عشت بين كلام أوراقي
وفي رمشة عين كاينو هب من حبار بلومتي
وجاء لهنا ونوا

تي شي ... ما بدى
وشي ... ما وفى

وينك ؟
يلّي حتّى في قبري
نكتبلك اسمك على كفني
إلي فيه مت وبيك حيا

وينك ؟
يلّي بكلمة منّي تشعل
وبالشيخة تقتلني

يلّي بنيتك في سقف جاشي ڨمره تتدلّل
ومعاها تدلّلني
وكي ما نمسّكش
حياتي تغزّلني

وينك ؟
يا هلال عيدي
يا دواء وجعي
وراحة تنهيدي

وينك يا للاّ ؟
وينك يا فلّة ؟
وينك يا روحي ؟
وينك يا ريدي ؟

وينك ؟ ووين تخبيت ؟
وينك ؟ وكيفاش جيت ؟

وكيفاش دخلت من باب دنيتي لمسلسل وتعديت ؟

وينك في صباحي ؟
راهو هجرك
ودمّار خيالك الغايب
وجفاك ذَبَّاحِي

وينك في لِيلِي ؟
في حضني
كي نسمع قلبك
يصلّي بش يدعيلي

وينك ؟
وشنيّة جنسك ؟
حتى وإنت بعيدة خطفتني
تي حسّيتك من غير ما نمسك

وينك ؟
حتى في غيابك
وسكات خطواتك
معز صوتك ومبن حسّك

تي وينك ؟
مقواك ... ومحلى زينك

[Amine.G]

وينك ؟

وقتاش القمرة تتزرع نوارة
ونقطف من خدودك ضحكة
تيبسلي دمعتي الغداره
ووقتاش يرجعلي ولفي
وتتحل ثنايا الرزق
والحوت يرجع يسرح
قدام ديار البحاره
ووقتاش يبرد جاشي
و تخطاني التنهيده
و نكرهو ضو لمدينه
ونحسبو نجوم الدشره
و كي نبردو مع رياح لفجاري
نفرشلك من كل زهره
غطاء في بالي
وكي تنعس يدي المكبشه
في يدك
و تغير من أختها السارحه
في بدنك
تسألها شوصلها لغادي واش بلها
بعرقنا

دين عشقتك
و يهلك شهاوينا
و يهلك طريق السواني
علاش فاضح خطاوينا
------------------------------------------- #سيف
تي علاش نغزرو مالشباك
وشمشنا عشقة متصدرة في ايدينا
تي وقتاش الليل يطل ؟
ويديك كي باب قلبي تتحل
انت السارية وانا لبحر
ووقتاش نعطيك بوسة مرصوصة
ونلبسك فرد مرة كي الخوصة
ويكمل هبالنا في وسط الحوسة

ووقتاش نحمّلك بالراحة
كي قطرة نو ستناوها الفلاّحة
كي غمضة نوم عاملة مرتاحة

ووقتاش نشدّك من يديك
وفي تراكن جاشي ندور بيك
ونورّيك ... ونعبث بيك
تي شبيك ؟
ماتفهمش ... ما تعرفش :

قداش سألت روحي
في الساعة مرّات
وقداش كتبتلك
حروف ماتقرات

تي وقتاش
يصفى لهوا
من دخان لمعامل
ووقتاش يرجع الصفا
وترجع لنفس لعمايل
ووقتاش
تتعدى بجنبي وماتحسبهاش
ترجع تتكى عندي وما تتغطاش
تزيدني دقة في روحي وماتحقرهاش

ونرجعو نحسبو للعشرة
ونتفكرو إلي بيناتنا عشرة
ونزيدو شوية للبرشة

تي يزي مالبعد وكل منامة حرشة
ويزي ما عملت فيها بهلولة وطرشة

الشي هذا لاهو متاعنا ولا يخرج علينا
لا ينفعنا ولا يفهم حر شهاوينا
والطريق الي ماشية فيه عمرو ما يواتينا

لازم ترجع ليالينا
ويرجع كيفك عامل مغناني
وبنة البعد تزيد تشهينا ...
وترجع تقرب خطاوينا
------------------------------------------------- #أمين
: نص مشترك 
[Amine.G] & سيف الزين

خطاوينا (Amine.G & سيف الزّين)

باريس في الليل تذكّرني فيك
برد لطراف وسخانة الروح
والضحكة الساكتة كي صوت الseine
تحكيلي عليك

وصوت l'accordion في الmétro
فيه من صوتك كي تبدى شايخة
تدندن في غناية تحبها

باريس في الليل ضاوية
وتشعل كي عينيك
كل مانجيبلك وردة في كتاب
كتاب حبيتو قبل ماتقراه
ماك انت هكاكا :
كل حاجة تحسها قبل ماتعيشها

أما تعرف
عندك حاجة باريس مافيهاش :
ريحتك ..
ريحتك كل مانعنقك تعنيقة
نحبها ماتوفاش

باريس بريحتك ممكن تولي أحلى
وممكن زادة انت باريس الي عشقتها قبل مانجيها
وممكن زادة انت تزيليفة حسيتها قبل مانحكي عليها

اه ... قبل ماننسى
باريس راهي باردة في الشتاء
أما نحسها دافية وانت غادي أما هنا
وانت في قلبي متصدرة ومتكية وغافية
كي نجمة وحدها في السماء

Tu es ma dame de Paris et ça me suffit ...

[Amine.G]

إنت و باريس

يا قاتل
يا مقتول
يا سماء ملبدة
يا شميسة تصول وتجول
يا تختار اش تحب
يا تسكت ويختارولك
يا تقول نحب روحي هكا
يا تنسى روحك وهوما يختارولك ويقولولك :

ثنية صعيبة
ولازمك تمشيها
كلمة ماتتقالش
ولروحك تحكيها

غزرة تقتل
ضحكة تبكّي
فرحة ممحونة
فكّها ...ماتسيبهاش
ومن وجعها وبرّيها

غادي
بعيد
ممكن تولّي
تي ابعد ...
واهرب لاخر الدنيا
تنجّم توصل
وتنجم تعلّي

اي ... تنجّم تحب حياتك
وتمّن بروحك من غير ماتصلّي
مدام قلبك مليان بالمحبة
الي ترد الروح وتزيد تحلّي

ربع ساعة ...
ربع ساعة فيها تنجم تحلم
خير من عمر بالح بسنينو
بكيت عليه من غير ماتفهم
الي كل نفس من رواريك جبدتو
خلّيه في وجعك ينسّيك وعمرك ماتندم

الورقة بيضة ومزال فيها سطر يتصلّح
وبعد الربع ساعة فما دهر لازم تزهالو الدنيا
تي وراسك لازم تفرح
ولازم ترجع تضحك

وفي ليلة باردة كي تراكن النسيان
لازم تشطح فيها حافي في وسط لمطر
ليلة دفّاها قلبك الي ما يموتش
قلبك الي تعلّم يفرح قبل مايبكي
وهذاكا الزين إلّي فيه وهذاكا السر

مغرفة سكّر
تعدّي طعمة المر
وعمرو ما ينشح لبحر
وبش تقعد تفركس على راحة
في تراكن الصحاري وحتى في البر

وترجع تسأل روحك :

كيفاش ما فهمتش ؟
كيفاش ضيعت وقتي في اللوم وما فطنتش ؟
كيفاش هربت من روحي وما قربتش ؟
كيفاش كنت نجّم نبدّل ومابدلتش ؟
كيفاش رخّيت
وخليتها بروحي
وكنت نجّم نعمل وماعملتش ؟

يزي من كيفاش ...
وإيجا نرجعو نعيشوها بلاش حساب
مدام الروح مزالت مامشاتش لمولاها
والقلب مزال عندو بلاصة للأحباب
بش يقسم معاهم
بكية
وشيخة دنيا
طلعت هبطت محلاها

حتى كان ضربتنا
حتى كان غرّتنا
حتى كان عايرتنا
تي حتى كان تركتنا

دنيا ... وجايعها تتعدّى
نشريو منها فرحة
حتى كان بوجيعتها باعتنا

وفلخّر :
يا قاتل ... يا مقتول
ثنية لازم نمشيها ..
ونعرف آخرتها :
قلب يعطي مايموتش ... أما ياخو طول ...

والوجع بش ينسى قد ما يتحلّف ويقول
بش يقعد ديما أبيض ومايخافش مالغول

وراس العيشة والتمهميشة
وراس الريشة والدمعة بترميشة

#ديما_لاباس
ولازم بش تحلى العيشة

[Amine.G]

يا قاتل يا مقتول

نحب نهجّي ونقرى كي الغشّير
ضحكة ولا تبسيمة على شفايفك
دبغت عقاب الحمير
ضحكة
عاشقة وردات خديك
ومنهم تفرك وتغير

نحب نسبّح بشفرك
ونكفر بنار بعدك
ونتصفح ورقات عمرك
ونكون الصدفة الي في زهرك

ونتدفى في شونك
ونتوضى بعرقك
كي تعرقني معاك وأنا فيك
وانا مدفون في كل سر خبيتو في صندوق جواجيك
ومرشوق في كل نفس طالع يحكي عليك هابط يهتري بيك

نحب نصوم عالبعد والوحش الي معاديني
نتصحّر شربة ماء من كفوفك ترويني
ونتبنن بوسة من رقبتك بريحتك في عمري تنسيني
وتفكني من روحي وبغرامك تزيد تعديني

خلينا نرجعو كيف ماكنا ملول صحاب
نعاودو نتعلمو بالومية لحساب
ونحسبو الوقت الي تعدى بصوابعنا
نغلطو ونعاودو ملول
وحد ما يسالنا وحد ما يسمعنا
ومفما كان هبالنا ينفعنا

ايجا أضحكلي
ونحملك
ونهزك
ولصدري نلزّك
وفي توشويشة نتعلمو
لغرام الي يقشعرنا
في سكاتنا بلاش كلام

نمسك
نحسك
نرصك

وبحرارة روحي نودك
وبيد قشعرها دفاك نشدّك

اغزرلي
بالك نتعلم نسكت
وانت على لساني تعس
وصبعك على شفايفي
يعلمني نعشق بغزرة وحدة تسمات غرام

لغرام الي على نهودك يتقرى
وما توالموش الدوّة ولا يواتيه الحس

طفي الضو ... وأس 

[Amine.G]

100 غرام

يا غلطة لعمر
يا ثنية تعبها بلاش سفر
يا شطر لحلاوة
وكل المر
يا شبعة
الي قام سعدو
وزهرو ما حضر

اي شبيه
كان سمعت منّي كلمتين
محصورين في قلبي توة سنين

واي شبيه
كان بتنا
ليلة من بعضنا شبعانين
وليلة بعدها عاشقين
وتزيد تكبر الرعشة
وتولّي الدقة دقتين

واي شبيه كان تدمع العين
وترجع محبة هاك السنين
وعزقة في الروح ترجعنا حيّين

واي شبيه كان حد مايشبّهلك
ولا ينجّم حد يوصلك
ولا ينجّم الزمان يصدّي شبابك
ولا ينجّم البعد ينسّيك احبابك

قد ما حاولت نحّيك من جاشي
ونمحي حروفي الي تشبّه لحكاياتهم
ونبدلك بللاّتهم ...

شي ... مانجّمتش ...

عيوني ماطاوعتني
ورجعو من غير مايشاورو
في خيالك لمتخبي مرشوقين

قد ماتبرّي بكية فراق الميتين
قد ما تزيد تشعّل نار الحيّين

تي افهم
الي قلبك وقلبي
على بعضهم مفطومين

وحتى كان يسكت مايدق
ويهفت حس جاشي
الي منك تحرق
عمرو مايرجّعلي عمري
الي من جرة بلاك تسرق

يا رعشة كنيني
الي لبّو لعرق
يا تزلزيلة لوطا
كي تمشي عليها
وانا ندعي
تبلعني كي تتشق

يا حرارة لكنين
وفزعة النّو بعد لبرق
يا نفس يرجّع الروح
بعد ما لكلام نشح وسكت
والريق شاح وزاد شرق

تي وقتاش تطّل
ويرجع يفتّح معاك
نوّار الفل

وترجع يدّي
بعرقة من يدك تتبل

يا أصل المشكل
وكل الحلّ

يا غلطة ماتصلحتش
تصورت في ورقة لعمر

مهما بردو أطرافي
كي نتوحشك
يرجع يشعل في روحي الجمر

يا دعيوة الخير في سواد الشر
يا خبابل لبحر واسرار البر
يا أحلى غلطة في جاشي تتحفر

انت هي ...غلطة لعمر

[Amine.G]

يا غلطة لعمر

مش ديمة نجم نقرى نص مش نصي 
أما النص هذا عانق الروعة وهو لصديقتي روعة العبيدي 

هذا النص إهداء لكل من يصارع مرض السرطان
نقاوم دوما لنعيش وسنعيش لننتصر

--------------------------------------------------
كتابة : روعة العبيدي 

[Amine.G] إلقاء : أمين ڨلّح

كلام لمراية صحيح (نص لروعة العبيدي)

و يضيع منّي عقلي
و إنضيع منّي فيكْ
لا نعرف نكتبك بحروفِي
لا نعرف نكتبك بالرّيقْ
إنحب نكتبك بشهاوِي
ثملة سكران حتّى يفيقْ

الجرح إنت دواهْ
و الموت هو دايا
يعقوب شفاه الصّبرْ
و الصّبر سبب عْمَايَا

و نصيح إنت روحي
كي روحي منّي تروحْ
واش همني في موتي
واش همّني في جروحْ

و نترشّفك في كاسي
و نلبسك كيف الظّلْ
و الشهوة شبعه شهاوي
و ريقك مذاق عسلْ

وكي يشيح منّي ريقي
و ريقك منّي يشيحْ
نعصرك كي الوردْ
و ننثرك كي الشّيحْ

و كي تكون إنت النّارْ
نكونلك أنا الماءْ
نغرسك في ترابْ
و نحصدك في هوَا

على صدرك نبني قمرهْ
تتحشّم كيف إطّلْ
و الموج يموج معاها
و ضيّها خطوط جمرْ

و نضيع و أنا الضّايعْ
في بدنك إذا يطاوعْ
من خدك حتّى لحدّكْ
ولا حد يشبه قدّكْ

و نعمل فيها فداوي
و نألف ألف قصّهْ
وكاسي هو الرّاوي
يفيض بشهقة غصّهْ

ونعاود نملاه بسكاتي
إذا تمكّنت بيّا السّكرهْ
و عادي تشوف دموعي
سحابه حبلت مطرهْ

حرت نكتبك بالحرف
حرت نكتبك بالشهوهْ
و إنت أصل الحرفْ
كتيبتو بالشهقهْ

#سيف
-------------------
ويضيع مني كلامي
وتحشم معاك حروفي
ونعلقك في الحلمة
ونغرسك وسط طروفي
ونسبّحك في ركوعي
يا العشقة بين دموعي

نستغفرك في كيّك
والروح هي ضيّك
نتفكرك في الشهوة
وفي الليل انت اللهوة

يا بير غارڨ سرّه
يا سر ما يتورّى
يا رعشة بين ضلوعي
تتدارى كي تتعرّى

الريد ما ننساه
والوحش ادّاني معاه
الكاس ما نخطاه
وخيالك ما نلڨاه

يا بنت العز ودلاله
يا عابثة بالجاش
ومحيره مخياله
لا عرفت نڨلعك من روحي
ولا فرزت روحك فيا
نستاذن نسمع حسّك
ونحتاس منين نمسك

نكتبلك بدمي خرافة
وننسى نذكر اسمك
ناديت للعرافة
ڨالتلي هي سمّك
تترشفّه بالرنّة
وتبع حس الجرّه
يطول لعمر بهمّه
وتنسّيك في باب الجنّه

كي نصيح يهرب صوتي
وكي نعيش فيك نقورن
وننساه حس سكوتي
ونبات في ممّو عيونك
مسبول ناسي موتي

ومحال يبرى دايا
وانت ماتكون معايا
ومحال يزهى هوايا
ومانلحنوش غناية

في كفوفك نصوّر شمسي
وعلى حجرك نكمل نصّي

يا زمان ناسي نصّه
والجرح ماعرفت نرصّه
في اللهفة انت الغصّة
شوفي المكتوب وين رصّى

نضيع فيك سوايع
ونلڨاك وباقي ضايع
نشريك وديما بايع
وهجرك حر لوايع

معاك انت شاهي نفرح
ويفرغ كاسي وينشح
على خدودك ناوي نسرح
ونتكّى عليك ونشطح

الصدر يكمي يعبّي
وبلاك مكنون مخبي ...
ندعيلك ونكره هجرك
ويغفرلي حبك ربي

يزّيك منّو كلامي
غدرتني تنهيدة وشرقة
يرزيه فيك ملامي
والحرف يبكي بحرڨة

ماهيش اخر دموعي
مزلت بكية بشهقة

#أمين
-----------------
نص مشترك : Saief Ezzine & [Amine.G]
إلقاء : أمين ڨلّح

يضيع منّي عقلي (Amine.G & سيف الزّين)

لا همّي تسأل آش بيني
ولا همّني نعرف آش بيكْ
آش همني أنا في ضياعكْ
في طريق ضيّعتو بيديكْ
في قلبي وجيعه تكفيني
و يكفيني نكذب ناسيكْ
وحدي مع وحدي معلّيني
يا حسره كنت معلّيكْ

في سكاتك كنت تناديني
ومن غزره نعرف إلي بيكْ
ومن ضحكك نفرز دمعاتكْ
و في ضعفك كنت نقوّيكْ

و الغصه إذا تلبك لحظه
تكويني إذا تكويك
و كلامي ببحورو صحرا
و حضني سكات يداويك

و نطبطب ديما على أكتافكْ
على أكتافي تتعدّى نعدّيكْ
و نفرح كي تحكي هبلاتكْ
وكي تغلط كنت نرضّيك

و نزيّن ديما حلماتكْ
من بدني نخرج ونجيكْ
و نلاغي شعرك في نعاسكْ
وكي تبرد بروحي نغطيكْ

وفي الفكره في مثيل هلالكْ
مع ناسك قمره نضوّيكْ
و نخيّط روحي على قياسكْ
مش ضعف كان همّي نُرضّيكْ

و اليوم أنسى آش بيني
و خلّيني ناسي آش بيكْ
وينو إلي عجبك في هبالكْ
كي شمّك إستخسر يسقيكْ

في بالك ترجع تلقاني
ما عادش نلقاني فيكْ
خلّيك مع الرّيح تغنّي
و جناحك ما يرد عليك
---------------------- #سيف

اش همني فلي ضاع
واش همك في عمر تباع بالصاع
واش همك فلي شرى
واش همني فلي باع

انا ديما شاريك
وقد ماقلبي حب يضياق عليك
روحي ديما ليك توساع

لاهمّي نصون خيالاتك
ولا ندحي همومي الي فيك
وفي سكاتي نسمع ضحكاتك
ونفصّل غزراتي فعينيك

يا ريتو الزمان الي صانك
عايرني وانا بلا بيك
نتلمّح الوردة في اغصانك
ونتحسّس يدّي ذبلانة
خانتها سخانة يديك

كي ظلّم ليلي في نهارك
حبيتو يرميني ليك
وصيّت الدقّة الي خطاتك
اتدلني وتهديني ليك

من حسّك كانت بسماتي
نتكّى نحس جواجيك
وفي شونك روايح مماتي
وعروش جاشي هوما اماليك

ليك انت نسبّح ونصلّي
نهبّطلك نجمة وتولّي
كي الشامة المنقوشة على حجرك
وتزيدك في حر شهاويك
توريك لمفرّت ومخبّي
على حسّك ماني متربّي
ومفطوم على نفس رواريك

في بالك تقعد تلقاني
وفي بالي سرّك كي حكاني
وكتم وماحب يعاديك
وفيت ...
وفيت ومعادش نلقاني
مصمّر عينيا فيك
خلّيه البعد يرتّحنا ويبرّي
مكتوبي ومكتوب عليك
---------------------- #أمين

نص مشترك : Saief Ezzine & [Amine.G]
إلقاء : Amine Gallah

لا همّني (Amine.G & سيف الزّين)

هكّا يا قلبي
تخلّيني نحب
وتعلّمني الي ورا كل روح صافية
فما عزقة تحكي حتّى وهي غافية

يصيح سكاتها
وماتتحكاش حكاياتها
حتى كي تتكوى وتزيد تتعطب

وهكّا ... تحبنا ننطقوا
بش نقولوا... ونقعدو نعاودوها :
ايه .... مزلنا عايشين
بش نضحكوا ونحكيوا
وحلفنا معادش بش نبكيوا
وديما شادين في بعضنا
بش نحبّنا كي نزيدو نعشقو تبسيمة حيّة
تبسيمة تفرفط في الجواجي
وتجي على غرادة
وتبهنيسة تحكي علينا
حتّى ببلادة

تي هذيكا هي صنيعتنا
كيف ماكانت ديما العادة

هكّا يا قلبي
سرّيتك على سرّي
وفضحتهم انت عينيّا
وعرّيتهم وحدك شهاويّا

خاطر وحدك الي تفيق بيّا
حتى كي نقلّك اخطاني راك بليّة

وقد ما ترعش عليّا وتسترني
نلقاك زادة تفضح فيّا

أما انا مزلت نحب نحب
ونحبّك معايا تقعد تتلب
خاطرك بدقّاتك
رشقت فيّا
العشقة واسرارها
وزرعت جاشي
بالحشمة وخنّارها
وعلّمتني الغيرة وعزارها

هكّا يا قلبي
بعد هذا الكل
تخلّيها بيّا

وقت الروح
لقات وين تتنفّس لهوا
ولقات كاس منّو
تترشّف غرام وتتروى
ولقات شكون سقاها
وشكون غطّاها
وخذا منها خزرة حشّامة
وقوّة في الشدّة عطاها

هكّا يا قلبي
وقت الي لازمك تدق دقّة
دقّيت مرتين
وفضحتني بلمعة عالشفرين :
لمعة لا تتشرى ولا تتباع
لا تتعطى لا تتفك
ولا تتكال بالغرام
ولا حتى بالصاع

تي هكّا يا قلبي
تفكني من دنيتهم
وتدّيني لدنيا احلى
وتسلطنّي بغناية تشبهلي
وماتشبهش لحكايتهم

وهكّا ماتقلّيش ؟
ماتورّينيش ؟... وماتوصّينيش ؟

قدّاش مزالت طويلة الثنية
وقدّاش منها النيّة
وقدّاش بش نقعد نتكّى عليك
ونقيّدها على منامة مشتهيّة
وموش مالعدم مكريّة

هكّا يا قلبي
كي نشدتك خلّيتني وما لبّيتني
وزدت دزّيتني
ولحضن الدنيا رميتني
وقتلي برّه فارع
فك ليك وخوذ بايك

وأقعد أسمعني وكلّمني
وعمرك ماتخلّيه ينشح حبارك

تي هكّا يا قلبي
ماتقلّيش وماتسرليش
الي العيشة فيها
ديما كيّة ووجيعة

كيف مافيها انت وانا
ستانسنا نزهاو
ولسابع سماء نطيروا
ونخليو شيختنا احلى صنيعة

وفما انا نمّن بيك
يلعن مذهبك
قبل السنّة والشيعة

هكّا يا قلبي
تغدرني
وتخبّي عليّا
وتقلي برّة جرّب وحدك

واصبر ميسالش ...
وتعلّم من غير علاش
وتفكّر ديما وماتنساش :

الي جاية الراحة بعد التعب
وحتى كي تفركس وما تلقاش
ماتسلّمش ! وارجع فركس ...
لازمك تتليّع بش تفهم وتتفهم
وانا راني مانحيركش من عدم

ولازم توة تلقى فيّا فيّة
وهذيكا هي لهديّة
وممكن هذيكا هي الديّة

هكّا يا قلبي
تزرع فيّا نوار عشيّة
وتوصّيني نبكي
كي نرخ بش نرتاح
ونحسب كسوحيتك
ديما في حضني طريّة

تي الحسبة ما تقابلش :
انت مزلت شادد صحيح
تضربني وتضرب عليّا
وتجافيني وماتحملش فيّا
وديما تقلّي ديما هذيكا هيّ

هكّا يا قلبي
ساعات تقوّيني وتعّلمني
وتقرّيني والطريق تورّيني
وساعات تعاندني وتوصّيني :

وتقلّي مزالت تستنّى فيك
ولازم بش تلقاها
الي بش تخطفك بغزرتها
وفي اسمك بش تنسّيك
وتلهّيك حتى عليّا

تو وقتها نرجع نفكّرك ونقلّك :

ايه ... هكّا يا قلبك الي دق ووصّاك :

ماتمسحش ندوة سقات عروش لحبق
وماتنساش الي ديما عندي عليك حق
حتى في كمشة حروف تفرتهم عالورق

وهكّاكا قلبك
اش بغى
وهاكي روحك كي تحب
كيفاش تتبلى
وهاكا جاشك الي اشتهى
كيفاش يتعمى
ولا تشيلو لا أرض ولا وطا

وهكّاكا ... لازمك تحب
وماتسألنيش كيفاش
يصبح شبعان وهو عالخواء

هكّاكا القلب فاش يتلهى
هكّاكا هو ...
ما يعشق كان كي نوا
ومزال ما صحى ...

وهكّا يا قلبي
قد ماتفرغ
ديما بالمعزّة تقعد معبّي
وانا في وسطك متخبّي
نشهدلك ونشهد بيك
ويشهد علينا ربّي

[Amine.G]
-------------------------------------
نص وإلقاء : أمين ڨلّح
موسيقى وعزف : Rami Ourabi

هكّا يا قلبي (نص [Amine.G] موسيقى رامي عرابي)

نحبّك
وعندي ألف سبب
كي مانشوفكش
نخرج من سينتي
وتلقاني نسب
وشطر السب عشقة
وانت السبب
يا مروّمة قلبي
وفاطمتو عالحب

تي الزب ...
ما عرفتش وين نخبيك
في عيوني
ولا تخرج فرحة
من وسط محوني
ولا نتلّف نومي
ونغطيك بجفوني

نعطيك من عمري نفس سخون
ونسرقلك من منامي
نجمة ماتتكالش بمال قارون

نجمة ...
ماتراها كان انت
مالبحر حتى للبرّ
ونرجع نخبيك فيها
ونخبيها فيك
كيف تشيطين صغري
الي قعد غبرة كلاها لقجر

تي اخطانا
وايجا البسني
ونصورلك عالبدن زنودك
وبطبيعتي على حدودك
عمري ماحبيت
نحس روحي حر

يا حلاوة غمزة
عقاب رشفة حنظل مر
يا برشة بهاوة
في دنيا غلبها الشر

تي انت وحدك وحدك
كي حرت وسألتك وين نخبيك ؟
قتلي :
في وسط حكة الماكياج
وانت تكحّل وتزين
وانا نستنى منّك في غمزة شفر
تولّي قبلتي كي كعبة الحجّاج

وانا عارف ومش عارف
وين نحطّك ووين نرميك
بين سكرة النوم
ولا بعيد حتى على أعز أماليك ؟

نعرف كيفاش بش نقرى جواجيك
في صفحة كتاب انتيكا
يصوّرلي فيك بالتركينة
كي وردة فاوحة
متصدرة في جنينة
كي نسمة متعدية
تتزعبن عليك

والله مانورّيك
نور القمرة الي تخبات
ورعشة مطرة بخنست
نفختني وانا معاك

يلعن هواك
قدّاش حليلتك
وقدّاش مبهاك
تي قلي وين نخبيك
دين سماك

ووقت يبخل عليا الوقت دقيقة
وقت تاقف الساعة
وتستنّاك اللحظة
وتتفكرلك الشقيقة والرقيقة

يا تزيليفة غرامي
يا شهوة حرامي
يا عز لهبال ولبلاوي
يا شهادة في روحي
تهزني ونتفضني تفيّقني
وترجّعني للحقيقة

راني نعرف وماعرفتش وين نخبيك
ولا عرفت شنية منّي مزلت ماخذيت

اما بيناتنا
نحب نخبّيك
بين الشفة وبوسة الخال
بين البينين
تحت الfossette
وسط زندين
بين غزرة ساكتة
وبوسة والعينين مغمضين
ترجّعلي شطر الدين

نخبيك
بين برشة دلال وشوية لوم
بين ليلتك مزيانة
وبين صباحك فل
يفيقك مالنوم

تي ايجا نقلك
ونحكيلك شوية تخلويض
وبرشة غرام
على شبعة كلام
يقلّك جاشك قدّاش روّام
وهاو بش نخربشلك ورقة
بالك يوصلهالك لحمام

ويحكيلك على لساني ويقلّك :

نحب نبداك
من حتّى شي
ومانوفاك
وانت كل شي
وفي الظلمة
انت الممّو وكل الضي

كان جاء مزال يعقل البي
راهو ركعلك
وعطاك كل شي ...
كل شي مات
وبمسّة من يدياتك
ترجّعو حي

يا ولف خيالي
يا كل لحباب وكل الأمالي
يا بنت الحي
راك الداء بلاش دواء
وماينفعش معاك حتى الكي

شاهي نشطح معاك
تبدى قدامي وفي حضني
وانا نفركس فيك نحب نلقاك

وكلامي عليك تلفو وانساه
وايجا نغنيو عليك وعليا
كي نبدى نتلعثم
في كلمة قتلتها بالحشمة
خارجة بالروح من عينيّا
يا سكرة الموت وهي حيّة

ساعات نعرف وين نخبيك
وساعات للعالم نحب نوريك

وهكّا حكم الحب
وهذاكا أوضح سبب
يا منسيتني روحي
يا مبريّة كل جروحي
ومرتحني مالتعب

انت سبب البلوة
وانت سورة مالرب
تي حي على هواك
في جاشي عامل قبب

وانا نعرف وين نخبيّك
حتى كي تدور تدور
ولمكنوني ترجع تشب

انت أول كلمة يالحب
تعبت وانا نعشق فيك
ونحب فيك حتّى بلاش سبب
وانت الي اخترت
هكا تتحب

[Amine.G]

نحب نخبّيك

نص مشترك : Saief Ezzine & [Amine.G]

(تنبيه : هذا النص غير عائلي وغير محافظ بالمرّه (-18

شهاوي مفضوحة (Amine.G & سيف الزّين)

نغير عليك 
اي والله نغير عليك 
من نسمة الليل
من تعب النهار 
من التخلويض والخنّار 
ومن تخمام يهد الحيل

نغير عليك
من ليّام ولعوام 
من الدوام الي فك منام 
مالوحش الي قعد روّام 
ملي نحبّو فيك وقالولي حرام 

ونغير عليك 
ونزيد نكتبلك 
ونكتب عليك برشة كلام 
تحسّو عقاب منام 
تحسّو كي تعنيقة بعد ملام 

ونرجعلك من شطر الثنيّة 
ونغنيلك غناية مشتهيّة
معاها غزرة تحبّك عالغفلة مرميّة 
وتوشويشة بنفس فيها وصيّة  
تي يعطك كيّة ... يا بيّة 

قدّاش نحبّك 
وقدّاش حبيتك وهويتك 
وقدّاش واتيتني وواتيتك 
وقدّاش على حيوطك قريتك 
وقدّاش نحّيت من روحي وعطيتك 
وقدّاش في بردك انا إلي غطّيتك 

تي اي نغير عليك 
ومانحملش كلمة فيك 
حتى كي ماعندكش كلمة 
حتى بعد ما ذبالت الحلمة
وهربت منّك ... وملاّ عملة 

غدوة الي حكيتلي عليه ستنّيتو 
ووجعي منّك مزلت ما نسيتو 
وهاني باقي نكتبلك بروحي 
بلاش ستيلو
وبول عليه لعمر 
إلي تعدّى وكليتو 

فمّاش ما تفيق وتفهم 
الّي جرحي منّك محبّة وهبال 
وانا باقي مكبّش 
نحب فيك ولمحبة مزالت تسال 

بلاهي سامحني عندي سؤال : 
كيفاش تحبني مانحكيش عليك ؟ 
وأنا قد ما كفرت بيك 
نقعد نرجعلك ونلحلح بيك 
بش تخلّيني نبكي عندك 
وتسيّبني نغير عيك 

ايه ... نغير عليك 
وغيرك ما يهنالي 
وغيري ما يواتيك 

وبرّه طير ڨرنك منّي
توة ترجّعلك شاهد لعقل جواجيك 

وديما نغير عليك ... 
وقد ماتطلبش ... ديما نعطيك 
ونقعد نحس في حس خطاويك 
ونقعد ديما نغير عليك ...

[Amine.G]

نغير عليك

نبداو ...
نبداو وننظمو حفنة كلام 
بالصلاة والسلام ...

تنهيدة مع كل حرف 
تحكي غرام 
وتعشيقة مالطرف للطرف
تخلّي الوقت للروح روّام 
وتخلّي لاماير في القلب وشام 
ولقوالة نفس ...
لقوالة جاش يتحس 
وموش علام
 
والحمد لله عالصحّة 
مالفم ما تتنحّى ...
ومايهمش كان نطيروا
 لسابع سما بين الاغيام 
المفيد رزانة المخ وركزة لڨدام

الوقت بطبيعتو ديما يحسب
يقيّد ، ديما لقدّام 

وليّام 
ورقة تطير ماليوميّة 
عدد يتعد 
في وسط شهور منسيّة
مشوار في الشهر مالعمر 
في العب حاجة
 من برشة حوايح مشتهيّة 
 
أسمعني ...
نحكيلك على ريشة البومة 
وعلى دمعة لبلومة 
وعالفرحة والوجيعة 
تتقسم شطّارة بين أولاد الحومة
ولقمة النكد مرجومة 
وغصّة لولد ، في العرق مكنونة 
والكلمة لحلوّة ... شهد في الڨرجومة
  
الملح في الكف كي يولّي ماء 
منفوس .... 
منفوس بالعين والعين علينا حق
والنفوس عاشقة 
والقلب الصافي دواء 

ادخل بلّيمين ...
وفحّج سبعة مرات 
وبسمل توّة يمشي الصفا

وزيد لبخور عجعاجي 
جاوي في سناجق وداد يلاجي 
وشق في كوانن ڨايدة يتحرق يراجي 

خلّي تمشي وتطيح العين 
ويتكشف مكتوب 
تطبع عالجبين 
تكتب بحرف وحرفين 

والحر ...
الحر من غمزة يفهم 
ويعشق كي يشوف غمزتين 
حرج عالرمش 
وفي عوض لڨمارة شامتين ...

تي الصلاة في المزاز 
والبركة مالوسطيّة تتحل 
ويترد الشعر بش يزوزوا لعزاز 

وندوروها فرود أزواز 
والي يمشي عالجمر الحر 
موش كيف الي عافس عالڨزاز 
موش كيف الي يضحك 
في الوجه وفي الظهر غمّاز 

ويا ستّار استر ...
ويا جبّار أحضر 
واشهد عالبال كي يڨمّر 

تزيليفة هوا
رعشة عالخوا 
وذنين تتجلّى على كلمة "نحبّك" بالحفا 

ونزيد ناكل مالدرج لحظة مالوقت 
ونشبع بدقّة زايدة مفضوحة 
حتى كان بلمعة من عيني شلّقت
وما فقت ...

مافقت بالنهار كي راح 
والليل ساكن الارواح 
والريق بلاش نفسين في نفس شاح ...

وبالعاشقين وبالصلاّح 
شهود الضحكة والأفراح 
بدينا ...

وما يخفاكش ... 
الي عز الهدرة السكات 
وهانا وفينا ... 
كيف ما بدينا بكلمة ترمات
وتعدّينا ... ورمينا .... وزدنا نسينا
وقلنا حفنة كلام 
في سكاتنا تحكات ... 

[Amine.G]

حفنة كلام

دخلة ...  
تفحيجة ...  
من باب لمزاز ... الباب اللوح 
واستفتوح ...  

استفتوح 
على غمضة الجاش 
وعلى دقة الروح 

بالصلاة عالنبي 
وبرشة سلام ...  
بلاش ملام ...  

وأرمي كلامك لمخبّي 
جوابات تتنظم تحكي غرام 
واحنا للأرواح العاشقة 
اسرار ... وخدّام 

سخّن دربوكة عالكانون 
وأرمي برشة بخور يفوح 
ينسّينا الساكت مالكلام 
ويفكّرنا الحب المحنون 
بلاش علام 

واركز ، يا راكز 
وركّز في لقوالة 
ركوز وطريزة 
متقونة تسوّات بحديث
يتكال بلاش دلالة 

في وسط تطلغيم مفروز 
بطايحي ... روح المزموم 
ترزق بنسمة وقت لحسوم 
يحسّوه بالشطر وبالنص 
حتى أحفاد الرّوم ...  

ضايع وسط طبايع 
عقاب هداري مدعثرة ، مفرّتة 
شطرها يتشّرط وربعها مفهوم

وتكلّم ...  
تكلّم ، بالصوت وصيح 
صيح، سيالة زعفاقي
قبل ما تنزر الريح

وأفهم الحكمة 
قبل مايتقال الصحيح 
إلّي الشاقي موش ديما لاقي
وإلي معّلي قدمو لازم يجيه نهار ويطيح 

ويعطي الحق للروح 
والروح لازمها الروّام 

وخوذ منّي الباقي ...  
خوذ باقي نفسين 
محرّمين علينا 
محلّلين على ولاد الزناقي
تشقشيقة ، تتسمع طرباقي 
وخوذ حتى من دم عرقي سواقي

خوذ في الدنيا ديما الحرّة 
وفي الذواقة أختار حلاوة المرّة 
وكي يهزك لبحر وتصطاد 
ماتنساش :
الي السردينة ربيبة السرّة ...  

وسرّي في سرّك 
كي غمضة في عقلك 
تخاوي لحلاوة في عبّك ...  

والمنام .. حضر 
لحظة تتفك من وسط عمر 
زناقي تتزاز
من سوق لبلاط لنهج المر 
والكاتورزا ترافل  
راهي مرّة برك في وسط الكارطة تتكر 

وخلينّا في لقديم 
خلّينا فلّي لمعنّق 
كلام نفسين 
تنفس بغزرة وحدة
غزرة الدفا يا فهيم 

وتبّع ركزة ميزان معتّق 
الدعوة الباهية ، نهار الحساب تشفع
واخزيت علي يحاول يفك ومايقنع
علي هاربة بيه فرس وموش حاب يسمع  

 والرويحة ...  
في سبرنا شيخة بترتيحة 
وفي عوض السكات 
تتنطق "رويحة" وتخلي الجاش فضيحة 

وفضيحة ...  
كان تقعد للأولين 
كان دعاوي ونصيحة 

يا نفس 
عمل الريحة
يا قلب طرس 
شاعل ناقص تمرويحة

المرّوة عالية عزيزة 
حتى مع الجمر الحامي 
تبرد كي تعفس عالزليزة 
موش الصوابع لكل خوات 
تنفع للطريزة ...  

والوقت يداوي 

الوقت يداوي ...  
 إلّي ناسي روحو 
والبخت مخاوي 
شطر النصيّن حركة
وباقي الشطرين شهاوي ...  

وما يدوم الدامي قدّامي 
عايش مفطوم على غرامي 
ساعات نسمع كلامي 
ومرات نستغفر لحلال في حرامي 

والله مالخطاوي 
الي من وسط سلامنا بدات 
تبربيشة الروح ، للروح غناوي تغنّات

وأسمع منّي نقلّك :
كي تعكس ، عاندها 
ورّقها ولا اجريها ورقة زوز 
وقبل ماتغفى بش ترتاح 
دز الباب اللوح وزوز 

اولها خرجة واخرتها دخلة 
عمرك ماتختار تعيش ملزوز 

وديما خرّج كلام قلبك 
ماتخلّيهش يتعبّى ويرقد منبوز 

لقوالة لازمها جاش ... ما لازمهاش حروز ...  

[Amine.G]

دز الباب وزوز

خوذ منّي وأعطيني 
أعطيني من غزرتك غمزة 
تفيّقني ... ترجّعني نفارع الوقت 
نفكلو درج وقت زمانو حضر
ويعطيني دقيقة ماتحرّرش مالعمر 
وزيد اعطيني منك شوية من كلّك 
الي كي تاخو منّي ماتشاورش 
وكي تعطيني ماتحسبش

تي اعطيني تبسيمة ولاضحكة 
ترد الروح 
تعطي بلا حساب 
تفكّرنا في الأحباب
وتبرّي الجروح 
فماش ماينطق سكات
ماحب يحكي ولا حب يبوح

وزيد اعطيني كلمة 
نبني عليها بقيّة كلامي 
الي نحب نكتبهولك 
كلامي الساكت الي انت فكّيتو 
تي هات ... اعطيني منّو شوية نفس 
نفكّو وناخذو وندور ندور ونرجع بش نقلك :

أعطيني منّك 
العين الي حتى كي تدمع تفرّح 
والتنهيدة إلي حتى كي تطوّل ترتّح

وزيد أعطيني من قلبك 
الروح الي في روحي تسرح
وماتشاورش 
الروح الي ماحبيتش تسمعها 
وخوذ كل شي يحلالك 
خوذ الي يواتي زينك ودلالك 
وخليلي قلبك يونّسني
ويعطيني دقة انت مانجمت اتبّعها

تي خوذ السماء بسحابها 
والأرض بترابها 
والناس بأحبابها 
والغربة بعذابها
وزيد خوذ دمعتي شيّحها
وزيد فيّا مالدنيا شوية 
والشدّة كيّة مني أطرحها 

وخليني وحدي نستنّى 
في غناية تفكّرني فيك 
وبلاصة تحكيلي عليك 
تي خوذ كل شي 
وأعطيني مالظلمة طرف ضي
وخليك انت ليا للاّ وانا ليك البي 

أعطيني برك ... حويجة من محبتك 
نشتهاها كي في منامة تجيني
وكل ما نستنهاها تطل فيسع وترجع تواتيني 

تي فلخر : 
أعطيني حتى بوسة
 تصبّرني على وحشك 
وفي غيابك تهنّيني 
يهديك ... تي هات أعطيني
يلعن بلوتك في كنيني 

#أعطيني_منك_حتى_شويّة_تززّيني 

[Amine.G]

أعطيني

و نحبّك و نغزّل عليكْ
كي تهز عينيك
و تغزر للنّجمهْ
و أنا قاتلتني بالحشمهْ
و تحرمني من لمعة عينيكْ

آش كان عليك
حكينا بالعينْ
و ضعنا في مسارب خيالْ
و خلقنا عركه
على شهوة في البالْ
و سرحنا في سابع محالْ
أنا نقلك قمره
و إنت تحلف هلالْ
و تشابط و تغطْيها بديك
و نصدق بطبيعتي
نشوف بعينيكْ

و نغزّل عليك
و برّا إنت خاطيكْ
كي عرف الياسمين
يتشعبط على قدّكْ
و الطّير يعلّي
عامل فيها من ندّكْ
و الرّيح تغافلني
و تلامس خدّكْ
و نسمة لخريف
تسري في بدنكْ
و تقلّي إدّفيت
كي تُفرك يدّكْ
الله لا يدفّيك
كي حضني آخر همّكْ
يا بلوه قدّاش نحبّك
و نغزّل عليكْ

و كي نور القمره
يدبغ على صدركْ
و يفضح مكامن سرّكْ
نتمهمش نبوسك من شعركْ
و نحير كيفاش نلهّيكْ

أكحل من فوق بياضكْ
و يفضحنى صبعي إلى غاضكْ
و أنا مل غيره قلت نغطّيكْ
تي نكذب ديما شاهيك
----------------------------------------- سيف#

وتحمصني
كي نقلك ايجا
... وما لبّيت 

نزيد نغزلك
ونقعد بسكاتي
نبربش فيك

نعرف سكاتي
قداش يواتيك
نفك من روحي فيك
لقشة ، نعرفها تزيد تواتيك

وناخو منك غزرة
متع اي منك
وموش خاطيك

ونخليك على راحتك
تزيد تغزّل وتوحل جواجيك
اما ديما فيبالك
شبيني وشفيا منك
وشعندي فيك

وقت يهزك التعب وترقد
انا الي نجي نتفقدك
وبعينيا نغطّيك
ونسرح فيك
هو برك نتفقد فيك

طير قرنك
من قلبي
كي نعشش في جواجيك
ونقعد نعمل عليك بلعاني
نحبك وعامل مغناني
من غير ما نقلك
نعرفك تحسني وتهواني

وساعات
يسبقني كلامي عليك
وحضني
ما يدفاش بلا بيك
وقلبي
مايضياق عليك

يخليلي عينيك
ودعوة والدايا ووالديك

ببوسة تعقلها
قد ماتضيع عليك
وغزرة تمسها
نوصل نرضّيك

أما
تعرفني راسي صحيح
ونخاف عليك من نفخة الريح
وميسالش
مانزيد نحكيك
نضربك ونضرب عليك
نحلمك ونحلم بيك
نستفتى شبيك وشعليك
ونزيد نغزلك
... ونغزّل عليك 
تي نكذب ديما شاهيك
--------------------------------------- أمين#

 Saief Ezzine & Amine Gallah : نص مشترك

Amine Gallah

Popular tracks