sh3r

يا حبايبنا
فين .. وحشتونا
لسه فاكرينا
ولا نسيتونا
دا حنا فى الغربة
م الهوى دبنا
وأنتو فى الغربة
جوه قي قلوبنا 
اوعوا تفكروا
إننا تبنا
مهما فرقونا
ولا بعدونا
يا حبايبنا

أحمد فؤاد نجم

الشيخ إمام - يا حبايبنا

شيد قصورك | الشيخ إمام - أحمد فؤاد نجم

عنبـــــــــَّـــــــــر .. كله يسمع
شخشخت بالزهر مانصفنيش ولا مرة
وراهنت بالمهر والبقشيش على مرة
والسجن للحُر وان كان مر ..ولا مرة .. 
فكرتنى بالتوبة من دى النوبة .. ولا مرة !

بعد مساء الخير على حراس الليل
كنجي برنجي تشنجي كله لبط ولومنجي
بس البدلة بتفرق والعيب عالمخزنجي
الأوله للنبى .. والتانية ايوب ..
والتالته غربتى .. والرابعة المكتوب
والخامسة .. اللى افترى حتماً يبات مغلوب

الأوله يا نبى يا محرر الانسان يا بلسم اللي ابتلى يا نجدة الغلبان
كرمت صنف البشر عن طايفة الحيوان
ورفعت سيف الهدى عالى على الطغيان
وغسلت ارض العرب من بقعة الأوثان
وزعقت يا امتى .. فى سائر الازمان
الظلم يوم لو حكم .. والحق يوم لو هان
يحرم عليك المطر والفى والعمران
تسرح بحورك عطش .. فى الزرع والإنسان
ويجر فيك الحنش وتحوم الغربان ..
ترمى الخراب ع الجبل والسهل والوديان
النور يغور م السما .. وجه القمر ما يبان
والشوف يضيع فى العما والضلمة والاحزان
والخوف يطيح فى البشر من قسوة السجان
الناس تخاف بعضها .. وتخوف السلطان

والتانية ، قولت أنا آيوب وانا مثلين
آيوب ومها ابتلى .. ايوب يروح لي فين
ايوب صبر كام سنة آيوب صبرله يومين
طلعت عليه القصص واتنادى بالاسمين
عدوه من الانبيا والصالحين الاتنين
وانا اللى صبرى هنا جوة اللُمان صبرين
صبرى على خطفتى من عزوتى والبين
وصبر تانى على حكم الزمان يا عين
الندل فينا حكم .. والندل حكمة شين
حكم البقر ع البشر .. بشريعة القرنين
وحق تربة نبى طه كحيل العين
هالبت يوم يتنصب بدل الميزان اتنين..
وانظر بعين الرضا للعدل فى الميزانين

والتالته، غربتى فى عالم الاندال
الندل فيه احتمى .. والحُر فيه انطال
والواطى لما اعتلى .. اجرله كام طبال
الشحط والبلطجى واللص والمحتال
والكدية لبست شنب واتحزمت بعقال 
ومين يحب النبى .. سقفة كمان يا عيال
الرقص دار فى البلد عمال على بطال
واللحم لما اتكشف .. غطى على اللى اتقال
لا سمعنا صوت فى النغم .. ولا شعر فى الموال
خنقوا الكلام فى الغُنى .. والرنة فى الخلخال

واحد يا موحد الواحد
اتنين يا جد الحسين
تلاته يا سو الشماته
اربعة يا حبر المطبعة
خمسة يا عزمى يا حى
سته يا بكرة يا جاى
سبعة يا قلبى يا مايل
تمانية يا شوق الزمايل
تسعه يا دنيا يا واسعة
عشرة يا خاين يا حشرة
 
اعرفكم جميعاً ان السجن سور ...
واعرفكم جميعا ان الفكرة نور ...
وعمر النور مايعجز يأزح الف سور ...
وعمر الصور مايقدر يحجز بنت حور ...
واعرفكم جميعا ان الظلم شايخ ...
واعرفكم جميعا باب السجن خايخ ...
واعرفكم جميعا ان ملهش اوكرة
واعرفكم جميعا انه هايبقى ذكرى
واعرفكم جميعا ان الثورة فكرة
وابشركم جميعاً .. ان الوعدة بكرة
والنور عندنا وعندكوا .. يا حبايب ،

العنبرة - أحمد فؤاد نجم - باريس 1986

كلمات : أحمد فؤاد نجم
غناء و الحان : الشيخ امام عيسي
انتاج: 1984
ممنوع من السفر 
ممنوع من الغنا 
ممنوع من الكلام 
ممنوع من الاشتياق 
ممنوع من الاستياء 
ممنوع من الابتسام 
وكل يوم فى حبك 
تزيد الممنوعات 
وكل يوم باحبك 
اكتر من اللى فات 
حبيبتي يا سفينه 
متشوقه وسجينه 
مخبر فى كل عقده 

عسكر فى كل مينا 
يمنعني لو اغير 
عليكي او اطير 
اليكي واستجير 
بحضنك 
او انام 
فى حجرك الوسيع 
وقلبك الربيع 
اعود كما الرضيع 
بحرقه الفطام 
حبيبتي يا مدينه 
متزوقه وحزينه 
فى كل حاره حسره 
وف كل قصر زينه 
ممنوع من اني اصبح 
بعشقك .. او ابات 
ممنوع من المناقشه 
ممنوع من السكات 
وكل يوم فى حبك 
تزيد الممنوعات 
وكل يوم باحبك 
اكتر من اللى فات


الشيخ امام و احمد فؤاد نجم - ممنوع من السفر | Sheikh Emam& Foad Negm - Mamno'a mn El Safar

بقرة حاحا - الشيخ إمام / أحمد فؤاد نجم

دخلة ابريل
الشتا بيعافر في الصيف
والصيف بيعافر في الخلق
والخلق بتغرق في الزيف
والكلمة بتخنق في الحلق
وشوية تمطر على غفلة
وشوية عواصف وتراب
وشوية الحر بيتمكن
كروان بيخانق في غراب
وشوية نمل اللي قريب
وشوية نحب الأغراب
وتملي بحن
وبفتكرِك
وبروح على صورتِك
بالعافية
( الجو عيا )
على رأي أمي
باين من صوتي اني بعافية
دور برد شديد
المرادي
مانفعش معاه
مشاريب دافية
على فكرة أنا لسه عبيط جدا
وبحب أتفلسف ع البرد
ومصدق انه بيغسلنا
وبيغري الساكت بالسرد
وبيسحب من خنقة روحنا
فبتظهر خنقة على الصوت
لولا بس مضاد بينيمني
كان ممكن أقول لِك مبسوط
انشاله تكوني أحسن مني
يا شبيهة الشاي المظبوط
وحشتني عيونِك بزيادة
يا اللي انتي عيونِك كات ليا
فتشت خيوط السجادة 
 مالقتش مُسكِن غير هيَ
كان نفسي أحكيلِك كالعادة
وأوان الحكي
خلاص عَدى
أه صحيح بخصوص نتيجتي
شلت مادة
وسبت مادة



دور برد شديد

كل عين تعشق حليوة
و إنتي حلوة في كل عين
يا حبيبتي أنا قلبي عاشق
و اسمحيلي بكلمتين
كلمتين يا مصر يمكن
هما أخر كلمتين
حد ضامن يمشي آمن
أو مـآمن يمشي فين



كلمتين يا مصر يمكن هما أخر كلمتين - بصوت احمد فؤاد نجم

الليل ملاح
تايه سواح
لا يبوصل شط
ولا بيرتاح

الليل مشحون أسرار وشجون
وألم ونغم
وكاسات ونايات ودموع وآهات
وعبر وحكم
***
ومشيت في الليل
خجلان مكسوف
إكمن الليل عريان مكشوف
أفراح الناس
وجراح الناس
على صدر الليل عناقيد وصفوف
وعيون الليل والظلمة جبال
فاردين على وش السما غربال
ألماظ مبدور
في كاسات بنور
يفرش للنور ع الأرض خيال
***
ويشق سكون الكون
أرغول
ونغم فنان ثاير مخبول
وعليل على فرشه بيتقلب
ويحايل جرحه المداري
ويقول
يا طبيب قلبك طيب
إسمعني
ح أقولك أسراري
لوشلت الشكوى على لساني
ورميتها قريب
ما تكونش جراحي مألماني
أبدا يا طبيب
أنا دقت الجرح وخدت عليه
يسقيني المر
وبرضه اسقيه
من بحر الصبر اللي ف قلبي
ح تقوللي بتشكي امال من إيه؟
ولا من أوجاع
ولا شوق لمتاع
ده انا عمري إن ضاع
مش ابكي عليه
أبدا يا طبيب
يا طبيب ده انا جرحي ملوعني
وساقيني الحنضل من كاسي
والنار في ضلوعي بتلسعني
وأنا لسه صغار
والعيا قاسي
ولا عمر الليل مرة سمعني
عليت الآه على أنفاسي
أبدا يا طبيب

لكن يا طبيب أنا بابكي صحيح
وباقول الآه
زي المجاريح
ودموعي في عيني بتتألم
وبتتكلم
على قلب جريح
مسكين
كان أمله يحب سنين
ويلم الحب ف عشه اتنين
واتهنى معاه
وإن قال الآه
أنا اقول له يا روح القلب
آهين
بس أنا لا بيدي
ولا بودي
دا قدر مقسوم
قدر لحبيبي يعيش بعدي
في الهوى محروم
أهودا اللي وجعني
وخلاني
حطيت الشكوى على لساني
إنما وحياة اللي قاسيته
وحياة الأمل اللي بنيته
وحياة القلب اللي جرحته
ولا فرحت معاه
ولا هنيته
لوشلت الشكوى على لساني
ورميتها قريب
ما تكونش جراحي مألماني
أبدا يا طبيب
***
وينام الصوت
والكون حواليه
ساكن نعسان
وكأنه مات
رمي تقله عليه
سكت العيان
***
الكاس له ناس
والليل مجالات
والحان مليان والناس مزاجات
ومجال الكاس
أشكال أجناس
مليان حواديت
مليان روايات
***
ونزور في الليل دنيا الخمار
ونلاقي الكاس
ع الناس دوّار
ويموت الليل على باب الحال
حيخش ازاي والدنيا نهار
ونفوس وقلوب كده ع المكشوف
عريانه تمام
وتعالي نشوف
***
شوف دا اللي هناك
قدامه كاسين
مع إنه لوحده
ما هوش اتنين
والناس بيبصوا
ومش فاهمين الكاس دا لمين
والكاس دا لمين
أهودا اللي بنظرة عين
شبكوه
وفاتوله الكاس مليان
وفاتوه
وحكايته طويلة
وهمه تقيل
وح اقول لك إيه وأعيد لك إيه
رايح يملا عيونه بحلم جميل
بياع السهد ملا له عينه
***
وترن ف جوالحان
ألحان
نشوانه تخلي المولد هس
وغزاله بتتغزل ف حصان
بتقول له
احبك أنت وبس
ويفز هنا سيدنا المنظور
ويطب الكاس ف إديه
مكسور
ويقول غشاشه
حتلعب بيك
ويرد التاني عليه بفتور:
طب وانت مزعل نفسك ليه
حشري وسخيف
وح قولك إيه
ومانولي يقول
” موش أندك خق”
والسامر يضحك لما يطق
ويحط الحشري عنيه
في الأرض
وكأنه لحن في الدين
والفرض
ويقوم
يطوح مرة يمين
ويميل زي البخت شمال
وف جوف الليل
يغرق مسكين
لا يغير حال
ولا يشغل بال
***
الحظ حمار
من غير حمّار فقد التمييز
زي المجانين
هجر البساتين سكن الدهاليز
والحظ بطبع غباوته عنيد
ودماغه حديد
لو يعند حتى على الغزلان
ينسخطوا معيز
ونسيب دهليز
نخش في باب
ونعدي الباب ندخل سرداب
ونلاقي ضحايا الليل واقفين
والحظ بيلعب بالأعصاب
ترابيزة عليها نمر بنظام
من واحد يمكن لما لألف
والدنيا بزيّ ما هي تمام
على هيئة كورة
تدور وتلف
وشنب مفتول
يصرخ ويقول
اللقمة بتنده أكّالها
والرزق نصيب
والدنيا دايرة
ف احولها
زي المجاذيب
الصبح معاك
والظهر عليك
والحظ لو ادى
ما بينقيش
جربها
ويمكن لو تديك
من جودك برضه
ما تحرمنش
قرب قرب
جرب جرب
ودي لعبة حظ
ما فيش تبكيش
***
والكورة تدور
زي المقدور
تحرن على ناس
وتجامل ناس
والشيخ سلمون شعبان مندور
واقف على أعصابه ومحتاس
يعلب ع الستة
الخمسة تصيب
ينقل ع الخمسة
الخمسة
تخيب
وخلاص الحظ اداله قفاه
والحظ أن ولى
بيبقى عجيب
كلها ساعتين
وصريخ
سلمون لعلع مقامات
نهاوند  وسيكا  ورست وصبا
وحجاز وبيات
يا  خراب البيت
يا فلوس الناس
يا نهار مشوم
طب المسكين من طوله ورفص
يظهر مات
والناس ملهيه ف أحوالها
بيدوسوا عليه
وبتاع الكورة مشغلها
ح يبطل ليه
واللقمة بتنده أكلها
طب ودا كل إيه؟
***
الشارع نايم تحت جناح الليل همدان
وعيون النور
تعبانه بتنعس ع العمدان
والكون ملفوف
بعباية
نسجها الليل بالخوف
وف بحر الضلمة رأيت على بعد
شبح
حققت بعيني
لقتها يمامة وكاسرة الطوق
كرابيج الليل
ناقشينها جراح
من تحت لفوق
والأسى ف عينها
مصحي الشكوى تقول حواديت
حواديت
ما لهاش علاقات بالشوق
وليالي الشوق
مسيت
ورميت على الحلو سلام
قالت سلامين
أنا قلت لوحدك ليه يا حمام
ووليفك فين
مالك بالليل والويل و الرعب
خليك يا حمام
عيش للحب
شالت بجناح
حطت بجناح
ورتني جراح
تحت الجناحين
وقالت لي
زمان الحب ما راح
وبقي لنا سنين في الليل تايهين
خد مني الليل
واداني الليل
ورميت له الغالي بسعر زهيد
وسقاني الشهد ودقت الويل
وكساني حرير ولبست حديد
وعرفت الناس من الراس للديل
وآمنت بأن الكل عبيد
وقالتها وطارت في ثواني
وانا شارد وخيالي يصور
وغمزني الفجر وصحاني
ولقيت الكون بادي ينور
وصحيت من غفوة سرحاني
على صوت بيقول
الله أكبر

قصيدة الليل - أحمد فؤاد نجم

بواقى دموع على المكتب 
ومج الشاى بيتدفى 
فى حضن قصيدة مش كاملة 
ونور خافت 
فى اول درج فى المكتب 
رميت ذكرى 
ف حضنت صورة مـ الماضى 
وخبت نفسها مـ النور 
عشان لما لمسها النور فى يوم .. خافت 
مشاعرك واقفة قدامك بتترجاك 
وبتقولك : " مفيش فى الاوضة حد معاك 
وحضن الليل .. 
بدأ يهرب من الشباك 
تعالى احكيلى حدوتة ونام جنبى 
تعالى فى حضنى زى زمان 
انا وانت وحضن الليل 
بقالنا كتير بنتحايل على النسيان 
عشان ييجى يونسنا .. 
وبردوا ماجاش .. !! 
كإن الذكرى مخلوقة 
عشان تتعاش 
تسيبها واقفة تتكلم .. 
وتتكلم مع اللى فاكرها موجودة 
ورغم إنك ..
 قفلت بإيدك الشباك 
وباب الاوضة مش مفتوح 
بدأت تحس ببرودة 
لسانك لسه مش ساكت 
بتتكلم ... 
دموع عينك بتتسرسب 
عشان تهرب من الوحدة 
فتحضنها بكف إيديك 
تلاقى دموعك الهربانة بتدفيك 
كإنها طفلة زعلانة 
ويوم ما بتبقى ناوية هروب 
بتهرب ليك .. !! 
لسانك لسه مش ساكت 
بتتكلم ... مع اللى فاكرها موجودة 
مشاعرك ضعفها بيزيد 
ولسه واقفة تترجاك 
وبتقولك : " مفيش ف الاوضة حد معاك 
مفيش غيرى 
كفاية كلام مع الماضى 
فى اول درج فى المكتب 
وسيب لبصورة من إيدك 
عشان الصورة مش سامعاك 
محدش غيرى قدامك 
محدش غيرى لسه معاك 
تعالى احكيلى حدوتة ونام جنبى 
لاول مرة تسمعها وماتصدقش 
تلف بعينك المكسورة فى الاوضة 
تلاقى الليل .. 
بدأ يهرب من الشباك 
وصوت الساعة مش مسموع 
ومج الشاى على المكتب 
وجنب المج بشوية ... 
"بواقى دموع " 

هدوء مزعج - احمد الراوى

ممنوع من السفر لحن وآداء سعيد صالح كلمات  أحمد فؤاد نجم

أحمد الطحان - يوسف

احمد فؤاد نجم احمد افندى محمد حامد عبد العال - نجم

احمد فؤاد نجم - احمد افندى محمد حامد عبد العال

كلمات وإلقاء : محمد ابراهيم
عود : سعد العود
بيانو : شادي ابراهيم

اسكندرية ليه - محمد ابراهيم

نجم في تقديمه للقصيده
 "دي قصيدة ليها نوعية خاصة، القصايد اللي بكتبها ليلة مبخش السجن"

أحمد فؤاد نجم - عزة

كلمات وألحان وغناء ورؤية اخراجية وهندسة صوت وكوباية شاي وساندوتش جبنة رومي : عمرو أبوزيد

في الجو برودة
والقلب برودة
ودماغي مليانة 
 خفافيش وأسُدة


ده حنين وده شوق
ودي نار وده طوق
ودي عادي شقوق
في حيطان الأوضة


وأروى جودة مش موجودة
أروى جودة جودة مش موجودة


أوضتي دي برمودا
لا جحيم ولا روضة
ثقب أسود 
م  الإخرام السودة


الضلمة ستارة
والذكرى سيجارة
والخوف ده إشارة
وأكيد مقصودة

وأروى جودة مش موجودة
أروى جودة جودة مش موجودة

مناخيري مسدودة
أعصابي مشدودة
ركبتي متنية
وإيدي مفرودة


لا عليها ولا لِها
ولا طايلة آلهة
ومافيش حَولِها
ولا إيد ممدودة

وأروى جودة مش موجودة
أروى جودة جودة مش موجودة

فيه ليالي مشهودة
وليالي مفقودة
وليالي فلالي
نادرة ومعدودة

ودي ليلة قلقانة
لا سرور ولا هنا
هل ذنبي إن أنا
خياراتي محدودة؟

وأروى جودة مش موجودة
أروى جودة جودة مش موجودة

أكان لابد يا أروى يا جودة أن تضيئي النور؟

كان من البديهي أن تُمنع أغاني الشيخ إمام وأحمد فؤاد نجم من الإذاعة، وأن تتم محاربتهما من قبل نظام جمال عبد الناصر وأنور السّادات، إضافة إلى مشاكستهما التي طالت أيقونةً مثل أم كلثوم. في هذه الأغنية، يهاجم الثنائيّ العضويّ نظام "الضبّاط الأحرار"، الذي أتى بعبد الناصر إلى الحُكم، على هزيمة حرب سنة 1967، وأم كلثوم التي حاربتهما بعد أن سجّل أحمد فؤاد نجم قصيدة "كلب الستّ" المشهورة، بعد أن عقر كلب "سومة" طفلاً فقيراً مرّ بالصدفة من قصرها.

http://ma3azef.com/%D9%A1%D9%A0-%D8%A3%D8%BA%D8%A7%D9%86%D9%8A-%D9%85%D8%AD%D8%B1%D9%91%D9%85%D8%A9/

أنا الأديب ولا تعرفنيش
تقرالي لكن ما تشوفنيش
كلامي لا هو مدهون ورنيش
ولا المعاني عليها غبار
شقع بقع يا ديل الفار

يا شعب مصر يا خم النوم
ما تفوق بقى وتشوف لك يوم
دى الثورة قامت في الخرطوم
وانت اللي نايم بالمندار
شقع بقع يا ديل الفار

يا شعب ثور داهية تسمك
وشيل أصول أسباب غمك
عصابة بتمص في دمك
والاسم قال ظباط أحرار
شقع بقع يا ديل الفار

شيلوا القطيع النكساوى
اللى لا عايز ولا ناوى
يرحل ويتفادى بلاوى
من تحت راسه ذل وعار
شقع بقع يا ديل الفار

أخدوا اليهود غزة وسينا
وبكره يبقوا وسطينا
والراديوهات بتغدينا
خطب ونتعشى اشعار
شقع بقع يا ديل الفار

الشيخ إمام قال كلمة حق
جت الحكومة (المباحث) (سومة) قالته لأ
الشيخ إمام قال كلمة حق
جت المباحث قالت لأ
وأبو النجوم على ودنه اندق
في المعتقل والدنيا نهار
شقع بقع يا ديل الفار

معالجة صوتيّة: مصطفى مفتاح

١٠ أغاني محرمة

شُقَع بُقَع | الشيخ إمام وأحمد فؤاد نجم

على صوتك بالغنا لسة الاغانى ممكنه ♫ 

كلمتين يا مصر يمكن هما أخر كلمتين - بصوت احمد فؤاد نجم

♪ Amir Ammar ♫

Recent comments

Nour

W@zanG@

فرحة صلاح

aimant

Related tracks