مزاجي

يا كاتب التاريخ المنشد قدور

كلمات وأداء : محمد البرّي

https://www.facebook.com/mohamed.b.elbery

الشاعر خلّص إلقاء .. والناس بتسقّف وعيونها مليانه دموع
صوت التسقيف يفضل يِعلى وفي أخر القاعة صوت واحد بيقول " الله "
البنت دي لسه بتتمشى بعيدان الفُل في كُل مكان وتقول " لله "
اتنين ماشيين عكس الأشارات .. واحد بيونّس غُربة أخوه بمُكالمة بتِختصر المسافات
بنوتة جميلة بتتمشى بتسابق في سحابة وبتشوف مين فيهم يشتي دموع أكتر
شاب الأحلام سرقت عُمره ورمته على ناصية بار يِسكر
مومس بتبيع الهوى بفلوس
كزا صورة في أيدي المُعتصمين .. وعساكر جيش وبوليس مرصوص
وهِتاف بيزلزل أي ميدان وماحدش حدِّد كام ريختر
والشاب العاشق كتب إسمه مع إسم حبيبتُه على الدفتر
إقرا الأخبار ..
إكتشفوا علاج للبني آدمين بيعالج كونهم بني آدمين
وفضيحة عضو المجلس " ميم " مقفوش مع مُزة يُقال في كمين
ومازال الصمت دا حوت بالع في حقوق الناس
والدم السايل في مدينتي بقى خمرة بنشربها في كاس
وندوّر للأيام ساقية ونعيش تاني فـ نفس الأحداث  .. ونحوّل كُل حياتنا روتين
ونتيجة كُل سنين الصبر مكتوب في ورقها " الناس مساكين "



مشهد عبثي خارج عن النص ـ محمد البرّي

تأليف : مصطفى سعيد
https://www.facebook.com/Never.Try.Never.Fail

أداء : منّة كُردى
https://www.facebook.com/Kawkabmashy?fref=photo&ref=tn_tnmn

موسيقى : فيلم الحفيد 

هابتدي الحكاية زي ما ابتديت وابتدينا كلنا حياتنا واعلننا عن وجودنا بـــ وااااااااااااااء كبيره .. 
ولحد النهارده مش مقتنعه بالتفسير الرومانسي
بتاع اننا
 بنبكي عشان خرجنا من بطون امهاتنا المريحه لعذاب الدنيا والكلام اللي بيثبتونا بيه.
وبرغم ان كلامنا عن الحب الا ان اول شعور حسيت بيه لما جيت الدنيا كان كره .. كرهت الراجل اللي مخبي
 نص وشه وضربني على خوانه 
ماهو لو كان مش خايف مني مكنش خبى وشه واتحجج انه تعقيم 
.. رحمته مني الكمامه
 وكونه دكتور ومتعلم ومعاه شهادات ده مايديهوش الحق انه يضرب بنات الناس .. يلا المسامح كريم.
وعشان انا مش زي اي حد
 انا واحده من القليلين اللي ماكملوش الـ 9 شهور حمل 
مش من العصبيين بتوع الـ 7 شهور 
انا قعدت 8 شهور بس ..
 وطبعا لزم يدخلوني حضانه 
وهناك
 كانت اول قصة حب .
لما دخلت الحضانه ابتديت احاول اعرف انا فين ومين بيسيطر على المكان ..
 لحد ماوصلت حضانتي وعملوا معايا الواجب 
وفتحولي قزازة لبن مشبره 
وكانوا ناس زوق زوق بصراحه ... 
ريحت اتعودت ع المكان وابتدينا نتعرف .
الجميل اني كنت نازله عارفه اسمي 
لانهم اختاروا لي اسم منة من وانا لسه مشروع بني أدمه 
وعرفت بعد كده من جوابات
 ماما وبابا وهما مخطوبين انهم كانوا بينادوا بعض بأبو منة وأم منة ...
وحمدت ربنا لما لقيت اطفال كتير معايا مش عارفين
 هما مين ..
وشفت اتنين تؤم ماسكين في خناق بعض 
ده يقوله انت كنت بترفص 
وده يقوله وانت كنت بتشفط الاكل كله لوحدك 
ودوشه 
وزيطه
وفجأه سمعت احلى واااااااااء في حياتي 
وااااء كلها حنيه ورجولة في نفس الوقت.
وشدني ليه اكتر اني لقيته عمال يضرب الممرضه ويرفص 
عشان بتغيرله الكافوله قدامنا 
حسيت ناحيته باعجاب من الكافوله 
الاولى 
وأول ما الممرضه خلعت ابتديت اتعرف عليه ..
 كان لسه معرفش اسمه برضه 
بس قلت مش مهم الأسم 
المهم الحشو 
اللي هو الجوهر يعني 
وعرفت انه مش من هنا 
وانه جي من مستشفى تانية عشان معندهمش حضانات كفايه وقاللي ده من حسن حظي 
وابتدى يريل عشان يلفت انتباهي 
لحد ماحصل وريلت انا كمان 
وفهمت انه معجب بيا زي ما انا معجبه بيهه 
وقررت اني اعترف له واصارحه
 بأني حبيته وأنه 
الأنسان - بأعتبار ماسيكون - اللي هابقى سعيده انه يشاركني رضعتي وغياراتي 
ولسه بقول واااااااااااا...
 جت ماما عشان تشوفني هي وصاحباتها.
ودي كانت اول فصله في حياتي 
وقتها جاتلي فكره اعمل نفسي نايمه 
كان نفسي اصحي وبالمره فرصه اعرف ماما عليه بس 
قلت بلاش تسرع 
وبالمره لما انام هارحم نفسي من التفعيص ومن اني اشوف التعبيرات الغريبه اللي بيعملها الكبار 
كفاية 
الشويه اللي شفتهم قبل ما انام ...
ونمت وروحت في النوم لانى كنت واصله الفجر حوالي الساعه اربعه ده اللي عرفته
 لما كبرت 
واكتشفت كمان ان دي المره الوحيده اللي بابا ما زعقليش فيها عشان هتأخر.
صحيت متأخر ولقيته اختفى واخدت اول صدمه في حياتي ...
بس ما طولتش فيها لان وقتها قابلت رجل احلامي ... 
بابا ♥

الحضّانة _ منّة كُردى _ مُصطفى سعيد

كلمات : عمرو أبو زيد 
https://www.facebook.com/amr.a.zeed

من ديوان : نوفمبر شهر ملائم للموت

أداء : منّة كُردى
https://www.facebook.com/Kawkabmashy?ref=tn_tnmn

موسيقى : أنين الناى جلال الدين رومى 

الكلمات : 
يقول واحد من المرضى
لا مش هرضى
ومش ميت
سيبوني لبعد رمضان
أقلّه أموت وأنا مِعيَد
و يخبَط دمعه في الشمبر
مسبب دوشة في العنبر
فيصرخ فيه مريض تاني
بصوت ناصح لكن مكتوم
مافيش ملجأ من المحتوم
صراخك ده مالوش داعي
مادام كشف السفر مختوم
واسمك وقته متقيد
فموت راجل
ده أكرملك
عشان حتى التاريخ يكتب
ده عاش مذلول
ومات سيد
وبعدين هي دي عيشة؟
بذمة أهلك الموتى..
هتخسر ايه؟
هتخسرنا؟
ياعم بلاش تحسرنا
وحق سريرك الدايب
ماهتشوف دنيا غير بالموت
لولاش بس النظام خايب
وأجِل دوري للأخر
ماكنت فضلت فيها حي
ياريت كان دوري هو الجيّ
عشان ياكل شقايا الدود
ياريت الكشف يلمحني
فيمنحني أمل منشود
قوم افرد ضهرك المحني
عشان ماتمُتش غير مشدود
ولو خايف جحيم مثلا
ماهيش فارقة
دي نار ودي نار
وفجأة النُصح صوته يضيع
في صوت عاصف لدق الزار
وييجي اتنين تمارجية
ينادوا الميت المُختار
يجروه لعزرائيل بره
وقبل ما يخرجوا يشاوروا
بإيدتينهم على الناصح
يقولوا تعالى بالمرة
زحامكم أصله مش جيد
فيصرخ لأ ده مش دوري
ومش ميت
طب ألحق حتى رمضان
أقلّه أموت وأنا مِعيّد



أكذوبة الموت والراحة_ منة كُردى_عمرو أبو زيد

في ناس بتلعب كورة في الشارع
وناس بتمشي تغني 
تاخد صورة في الشارع
في ناس بتشتم بعض 
تضرب بعض
تقتل بعض
في الشارع
فيه ناس تنام ع الأرض في الشارع
وناس تبيع العرض في الشارع
وفي الشارع أخطاء كتير صبحت صحيحة 
لكن صحيح هنكون فضيحة
لو يوم نسينا وبوسنا بعض في الشارع


افتتاحيَّة فيلم "الحريف" للمخرج محمد خان ،
بقصيدة أمينة جاهين ،
وصوت أحمد زكي





I don't own the copyrights of the song or the music

في الشارع - أحمد زكي

 -------------(م)-------------- 
ماسبيرو أخطر م الرصاص و القصر
ملّى عنيك بالدم...قبل الطلوع قدام
ما تسيبش جيشك تِقسمه الأعلام
مش كل مين جنبك....جواه بيهتف مصر
 
--------------(ا)---------------
الوقفة جنب النار ..بتقلل الدخان
- إهتف هتاف إبن المكان و الظرف
- إضرب بعزمك ... أو ما تضربشى
إرجع بضهرك ... أو ما تهربشى
إمسك عصاية ثورتك م الطرف
التاريخ ضمن الغنايم ..و بيكتبه الكسبان
 
 
 
--------------(ن)--------------
نقى دايما طوب صغير حدفتك توصل بعيد
نفترق ساعة المطاردات ..أربعات
نشّن الباراشوت ناحية الصف العريض
نجرى فجأة.. نردّ فجأة.. نص قوتنا المفاجأة
ندّم اللى يعورك........و إقطعله إيد
 
--------------(ي)--------------
يؤتَى الحِذر من مكمنُه
يأتِى الغبى باللص ثم يحلّفه
يؤتَى الهتاف... رَّجاً بممن يَهتِفه
- يؤتَى الجدع... قلبا بمما إتجَدعنُه
 
--------------(ف)--------------
فّرق ما بين....الجرأة و القلب الحديد... و الرمى جوا التهلكة
فتش بإيد ع المستفيد ..و بإيد عن الصاحب الجدع
فتح اذا الناس غمضت....غمض إذا نظرك خدع
فرّغ عياطك ع الصحاب... دم و خميرة... مش بكا
 
--------------(س)--------------
 
سمى الحاجات دى بإسمها...الكدب... و الخوف... و الخيانة
سجادة المسامير... تتحط ع الناصية ...غطّيها بالدخان ..ولّع قصادها كاوتش
سد الطريق لورا علشان ما تترددش
سيب باب لجيشهم يهربوا منه
سلّم رايات الحلم لحد من سِنُّه
سلّم قراركوا لأكتر كفّ عرقانة
 
--------------(ت)--------------
تبّت يدا من ساب رفاق المعركة بطولهم
تمن القضية اللى اندفع مبقاش يجوز يرجع
تتعب تبص ف عين.. إصحابك الطايرة....شوف مين من الآخر دفع....لو زيهم... إدفع
تلت الرصاص نحو العدو... .تلتينه للخاين..الطعنة جاية من هنا مش من هناك
تعب النهاردة غير تعب بكرة....الوقت مش دايما معاك.
تحتك فيه ناس عاوزة الأمل...مش عاوزه؟... سيبهولهم
 
--------------( و )--------------
وسّع الجبهة لو إنتوا كتير... و .ضّيقها لو إنتوا أقل
ولع شماريخ وسطكوا اول ما تلقى الرتم قل
وقّع لمض كل العواميد اللى كاشفة ناحيتك
وّدى الإعاشة قبل ما تدوق لقمتك
وجّب مع السكان و أهل المنطقة...حتى لو فاهمين غلط...فيه ناس كتير متلخبطة ...إكسب عدد ....و إكسب غطا
وزع عيونك فوق و تحت....و خاف من اللى يصورك
وطّى و عينك باصّة فوق ع الطوب و إلا يعوّرك
وقّف إذا سحبوك على شارع طويل
وفّر بديل
وافق على الهدنة إذا سحبوا الكلاب...لو سابوا خليك انتا آخر حد ساب
واحد بيفرق ف العدد جدا
- و عشان كده.... أول ما تلقى إن الصفوف ناقصاك -
 وسع مكانك... للى جاى وراك


https://www.facebook.com/Mostfa.Ibrahim


موسيقى و هندسة صوتية : رفيق عدلى
تم التسجيل بأستوديو بداية 
شكر خاص لأحمد العايدى 



المانيفستو - مصطفى إبراهيم

في الدور الأول أصحابي

وجيراني قاعدين في التاني

وأبويا وأمي في الرابع

وأنا ساكن في الدور العاشق

أنا ساكن في الماضي الغامق

أنا سافل بحب الدنيا

هربان من حكم بتأبيدة

في الدور الأول سألوني

عن اسمي وعن سر جنوني

عن شجرة تحت الشباك

عن جردل علي سور البير

ع الخطة الخمسية الجاية

عن بنت بتلمع في عينيا

عن وردة وشادية وفيروز

عن لحظة باتحول فيها

من ميكانيكي إلي أراجوز

عن قهوة سكر مضبوط

عن شلة رايحين الحفلة

وماحدش راجع مبسوط

عن جرحي اللي مابفتحوش

عن صاحب رمّة ومغشوش

نزلني ف ماطلعتوش

عن نمرة تليفون البيت

في الدور التاني سألوني

عن واحدة بتجيلي الشقة

عن أزمة حنية مفاجئة

ف شباك صالة المفتوح

عن ضحكة ما بتقولش كتير

وقميص اتعلق مجروح

وسلام متوتر مكسوف

وقالوا لي إحنا عارفينك

قلت لهم طب ما أنا معروف

في الدور الرابع ربّوني 

بالخمسة علي وشي ادوني

في الشقة لوحدي وسابوني

وقالوا لي ما تفتحش الباب

في الدور الرابع بعتوني

أتعلم وأرجع بشهادة

ما رجعتش بس اتعلمت

اتعلمت لأني آمنت

وبادفع تمن اللي اتعلمته

وغيابهم عني اتحملته

وغيابي عنهم بقي عادة

أمي قالت لي بطّل قهوة

وقهوة أبويا دايماً سادة

وأنا راجع للدور التاني

في الدور التاني يا جيراني

أنا بكرة ماشي ومش راجع

يا معادي ليلك بقي ساقع

بقي أسقع من الوحدة ونارها

أنا صاحي في ليلها ونهارها

فكرني حلوها بمرارها

وباصرخ بس ماحدش سامع

وأنا راجع للدور الأول

في الدور الأول أرشيفي

رجالة مقاسمها رغيفي

مقاسمها تنويحة خريفة

مقاسمها ورقة بعشرين

عدوية ووردة وجاهين

في الدور الأول أصحابي

وأقربهم ليا الخاينين

وأنا ساكن في الدور العاشق

أنا ساكن في الماضي الغامق

أنا سافل بيحب الدنيا

هربان من حكم بتأبيدة

وباواجه ربنا بإيماني

وباواجه نفسي بقصيدة.


عمر طاهر | عمارة3 و| Omar Taher | Emara 3W

قم يا صلاح الدين - أحمد مطر


Follow on Social Networks:

http://www.twitter.com/amrsobhy
http://google.com/+amrsobhy
http://www.facebook.com/amr.sobhy

 عن الخطط المؤجلة، والأحلام الباهتة. عن البعيد الذي لا يقترب، وعن القريب الغريب. عن الدفء الذي لا نجده سوى في كوب قهوة في ليلة شتوية حزينة، والقرب الذي لا يجاوز احتضان وسادة مشبعة بالاكتئاب. عن العالم الذي لا ينتهي، وعن الخواء الداخلي المتنكر في صباحٍ ملئ بالطقوس المكررة. عن التنهيدات المسائية، وعن الصحبة المزيّفة. عن الخذلان. عن البُهتان. عن الرضا بالقليل الكثير. عن الغربة في الوطن، والاغتراب في النفس. عن الهمس، وعن الأشخاص الذين لا يتكلمون، مهما أردنا ذلك. عن الحبيب المفقود، وعن الجميل الذي لا يأتي. عن الحضن الذي يتسع للكون وعن البكاءِ على صدر امرأة. عن الخريف، والاكتئاب الشتوي. عن لعن الصيف والتوق للربيع. عن الجميع. عن القلوب الصدئة، والأرواح المهترئة. عن المشاهد المكرّرة والمشاعر المعبئة. عن الأرق الذي يستوحش وعن المساء السرمدي


مزاجي

Ammar&Khan