دخلة ابريل
الشتا بيعافر في الصيف
والصيف بيعافر في الخلق
والخلق بتغرق في الزيف
والكلمة بتخنق في الحلق
وشوية تمطر على غفلة
وشوية عواصف وتراب
وشوية الحر بيتمكن
كروان بيخانق في غراب
وشوية نمل اللي قريب
وشوية نحب الأغراب
وتملي بحن
وبفتكرِك
وبروح على صورتِك
بالعافية
( الجو عيا )
على رأي أمي
باين من صوتي اني بعافية
دور برد شديد
المرادي
مانفعش معاه
مشاريب دافية
على فكرة أنا لسه عبيط جدا
وبحب أتفلسف ع البرد
ومصدق انه بيغسلنا
وبيغري الساكت بالسرد
وبيسحب من خنقة روحنا
فبتظهر خنقة على الصوت
لولا بس مضاد بينيمني
كان ممكن أقول لِك مبسوط
انشاله تكوني أحسن مني
يا شبيهة الشاي المظبوط
وحشتني عيونِك بزيادة
يا اللي انتي عيونِك كات ليا
فتشت خيوط السجادة 
 مالقتش مُسكِن غير هيَ
كان نفسي أحكيلِك كالعادة
وأوان الحكي
خلاص عَدى
أه صحيح بخصوص نتيجتي
شلت مادة
وسبت مادة



دور برد شديد

ألحان وغناء : زياد سحاب 

كلمات : عمرو أبوزيد

زياد سحاب ... انتميت للبرد

كلمات : عمرو أبوزيد
ألحان : زياد سحاب









موال لروحِك... أه يا روحي
علشان تحني وما ترُوحي
مضطر أزود من بوحي
وانتي أكيد مش مضطرة
واهو برضه أغازلِك بالمَرة

يا أم الخدود التِفاحي
مجنونة لما بتجتاحي
كان نفسي أطيرلِك بجناحي
بس الهوا فيه تراب بره
ما تزوري أرضي ولو مَرة

إجواز حمامِك ل إجوازي
صورتك جميلة في بروازي
فيه بخار مِعَلم في إزازي
يا اللي انتي أنفاسك حارَّة
عيدي الكلام ده كمان مَرة





موال لروحِك ... زياد سحاب

كلمات وألحان وغناء ورؤية اخراجية وهندسة صوت وكوباية شاي وساندوتش جبنة رومي : عمرو أبوزيد

في الجو برودة
والقلب برودة
ودماغي مليانة 
 خفافيش وأسُدة


ده حنين وده شوق
ودي نار وده طوق
ودي عادي شقوق
في حيطان الأوضة


وأروى جودة مش موجودة
أروى جودة جودة مش موجودة


أوضتي دي برمودا
لا جحيم ولا روضة
ثقب أسود 
م  الإخرام السودة


الضلمة ستارة
والذكرى سيجارة
والخوف ده إشارة
وأكيد مقصودة

وأروى جودة مش موجودة
أروى جودة جودة مش موجودة

مناخيري مسدودة
أعصابي مشدودة
ركبتي متنية
وإيدي مفرودة


لا عليها ولا لِها
ولا طايلة آلهة
ومافيش حَولِها
ولا إيد ممدودة

وأروى جودة مش موجودة
أروى جودة جودة مش موجودة

فيه ليالي مشهودة
وليالي مفقودة
وليالي فلالي
نادرة ومعدودة

ودي ليلة قلقانة
لا سرور ولا هنا
هل ذنبي إن أنا
خياراتي محدودة؟

وأروى جودة مش موجودة
أروى جودة جودة مش موجودة

أكان لابد يا أروى يا جودة أن تضيئي النور؟

ربنا موجود.. وأنا حتى الآن
ربنا موجود.. لكن أنا قلقان
ربنا موجود.. وده شئ بيبان
في حاجات جوايا وجواكي

يا جميلة ما تبكيش أرجوكي
أرجوكي أنا مش حمل بكاكي
لو فعلا جرحاكي شكوكي
فدي شوكة بسيطة في أشواكي

الليل عصفور.. بس سجنا
السور بيدور.. وإحنا مكانا
هل لينا قصور؟.. سوا في الجنة
ولا أنا مش هدخل وياكي؟

يا جميلة ما تبكيش أرجوكي
أرجوكي أنا مش حمل بكاكي
لو فعلا جرحاكي شكوكي
فدي شوكة بسيطة في أشواكي

ماقصدش ألوم.. قصدي أشوش
مين قال ده هجوم؟.. كنت بهوش
كلها كام يوم.. وأبدأ أحوش
وهرتب سفرية معاكي.

يا جميلة ما تبكيش أرجوكي
أرجوكي أنا مش حمل بكاكي
لو فعلا جرحاكي شكوكي
فدي شوكة بسيطة في أشواكي

فيه حكمة صحيح؟.. ولا تحدي؟
الوضع قبيح؟.. ولا يعدي؟
شايفاني جريح .. بوسي على خدي
وأنا أكمل غُنا على ليلاكي

يا جميلة ما تبكيش أرجوكي
أرجوكي أنا مش حمل بكاكي
لو فعلا جرحاكي شكوكي
فدي شوكة بسيطة في أشواكي

Amr Abo Zeed

Popular tracks