الطحان

أحمد الطحان

مرمغت وشي ف التراب
و سبته تحت
و رفعت إيدي
_دا مش ابتهال_
دا الوضع اللي عايزينا عليه
ف عصر الاحتلال 
برفع إيديا للسما
و عينيا تحت
ياللي رسمت الملحمة
انهي الجدال
اثبت وجودك
فوق وشوش كل العيال
شيل التراب
و اعلن .. مثقال ذرة من وجود
.. مثقال
..
_حبيبتي من ضفايرها
طل الرصاص
و بين شفايفها
دم البنات
ضحكتها عهر
ف عيون الغفر
و حنانها ف الزنازين
حبس احتياط
حبيبتي بتعلمني
إني أنحني
من حبي فيها
حياتي كفر و هروب
و الحب ف الدنيادي
زاد الطغاه
لولاه مكانش الخزي عشش قلوب
يا توهة يا بلدنا .. من غير دليل
ف حبك انتي سكنا ليل ف شقوق
لو الزمن ليل .. يزورنا القتيل
نظرة عينيه تقتلنا شوق
للضلمة قلب كبير بينشع سواد
و عجز و إهانة و كفر و غليل
الموت و الاستشهاد عشانها حياد
و صمت دايم ف ضحكة التماثيل

***

أنا مش هناك 
بس إنتي بردوا مش هنا 
معنى الهزيمة بيختلف من وسطنا 
مش بلزمك
كل التجارب و الظروف و عقلي المريض .. هزموني
فلقيتني من غير قصد 
_و الله من غير قصد_
بهزمك 

***

"و أنا بلف أدور على ضحكتك ف وشوش الخلق
جعت                                                     
وقفت عند أول محل فول
و كلت
شوف يا أخي القذارة
رغم كل الحزن دا
لسا الغريزة بتنتصر ل روحها
ف ناكل
و ننام
و نقابل بنت حلوة ف نبتسم
و ننساك
رغم كل الحزن دا
بنكمل"                           
"فدا مين يا فوزي حبستك ف أوضة ضلمة
و أمك بتبكي تحن للضمة
كسيرة القلب
فدا دولة حاكمينها ولاد الكلب
فدا شعب
بيعرص بطبعه لأي حاكم مهما كانت ملته
فدا عواجيز على القهوة 
رغم إنها مش لاقية سرير ف المستشفى
بتدعي للحكومة و ل وزير الصحة
أحا
ما تنطق
قدا مين يلا
فدا ستات بيوت محيلتهمش غير الولولة
و العياط
و الفرجة على عهر لميس الحديدي و أماني الخياط
فدا دولة الظباط
فدا مستقبل ف عين عيال ف وشها الإحباط
و على ضهرها شنط المدرسة
كتب تقيلة بجهلها و كراسات
فدا مين يا فوزي
الشعب لما مش هيلاقي ياكل
هيبقى يخرج
يرموله كام لقمة .. ف يرجع        
و عمر العساكر الثكنات

***

أحمد النجّار

مين من دولا ، و مين من دولا ..
مين من دولا ، ومين من دول ..
لبِّس كل الشعب طاقية ..
لبِّس كل الناس أفارول ..
مين من دولا ، و مين من دول ..

أحمد الطحان 

ركّع كل الشعب ف قصرك 
شرّع شرّح قسّم مصرك
عكسر عصرك - عصرك عسكر
تصلب فوق بنادقها رسول
مين من دولا ، و مين من دول 

مزيج الشارع - أحمد الطحان ، أحمد النجار

الشاعر أحمد النجار و أحمد الطحان .. مونولوج.MP3

‫الشاعر احمد الطحان ـ قصيدة اللولب‬.MP3

تركيز فريق ميكروفون من خلال فكرته بيكون على المواهب الحقيقية.. التمثيل، الشعر، الغناء، الحكي، العزف، وممكن تشاركنا فكرتك أو قصة نجاح حقيقية ليك.

زمان كان دايما الناس بتحبطك وبتخوفك وبتخليك تفكر أكتر من مرة قبل ما تطلع قدام جمهور.. في ميكروفون خلينا الجمهور هم أنت.. وأصحابك... وبنشجعك ونقولك ياللا تعالى قدم نفسك.

You are not alone share your talent with Microphone

https://www.facebook.com/Micegypt
https://twitter.com/microphone_egy
Microfonegypt@gmail.com
soundcloud.com/micegypt

الطحان

Amr Ali Abd Eldaim