وسط البلد / عمرو اللايح

ازاى / عمرو اللايح

غنيلى 2 / عمرو اللايح

لوّن الكراريس 
ارسم الأحمر على شكل بِركة دم 
ارسم الأبيض على شكل كفن الموت 
ارسم الأسود و عليه رصاص بالكُوم 
اقلع هدومك كلها 
هتعدى مكسى هموم 
البس هدومك و ارضى بالنِعمه 
امشى الطريق بشويش 
من جنب حيط البيت 
انسى القضيه كلها 
و قد ايه ضحيت 
مخنوق ! 
احسن ..
اهو كلها كام يوم 
و تموت من الخنقه 
فرحان !
افرح ، والله مش فارقه ..
اضحك على نفسك 
و اضحك على العالم 
و اضحك على كل الى قال لأه 
لسه البعيد متزقش الزقه 
لساه مخادش القفا 
اخده ؟ 
بالشفا .. 
يلا نكرر الليله 
امشى الطريق بشويش 
من جنب حيط البيت 
انسى القضيه كلها 
و قد ايه ضحيت 
مخنوق ! 
احسن .. 
اهو كلها كام يوم 
و تموت من الخنقه .

#عمرو_اللايح

بشويش / عمرو اللايح

معدش فيها ما يخص الناس 
كل الى فيها جى من ابليس 
بعتوا المبادئ و الجزر و الخلق 
سيبتوا الوجع و المرض 
و الحشيش 
لا داعى للتشويش 
الكفة نِزلت من دماء الشعب
و الكفة عليِت من فلوس الجيش 
استر يا رب 
الناس بقت صايمة السياسة 
استر يا رب 
الناس بقت حابة النجاسة 
اهدينا موتة و راحه من عندك 
و اكفينا شر الفرجة ع الشاشة
و المشى خلف الصح من وجهة نظرهم 
و المشى خلف الغلط من وجهة نظرنا 
و اهديا عين بتشوف مصلحتنا وبس 
استر يارب 
كل الشباب الحره جوة الحبس 
كل الكلاب ساكتين على الدولة 
الشرطة سابقة الشعب ف سباق 
و الجيش بطبعةُ بيكسب الجولة 
ها من منافس ؟ 
لا ! 
كل الى يتكلم على جِوه هو و أهلهُ
متزقهوش 
سيبوه هيدخل جوه على مهله 
هو الى قرر يبقى اذكى الناس 
هيشوف بعينة الدنيا خمره و كاس 
يلبس نصيبة و هو يستاهلهُ .. 
يا موردين الطاقه ، فين طاقتى ؟ 
يا موزعين الحلم ، فين حلمى ؟ 
انا حلمى شوفتة بيعلى مع سنى 
و نا سنى خايف يجرى بيا لفوق 
بشرب و بسكر حفظ و امتحانات 
و ارمى السياسيه عشان أبطل افوق 
استر يا رب  
معدش فيا ما يخص الناس 
كل الى فيا جىّ من ابليس 
بعت المبادئ و الجزر و الخلق 
صاحب وجع مش لاقى لقمة عيش
لا داعى للتشويش 
هرمى الحجارة و انحنى للجيش 
مبقاش يهم هموت فدا الواقع 
كل المهم 
ان الحكومة تعيش .. 
#استر_يارب 
#عمرو_اللايح

استر يارب / عمرو اللايح

(1)
يا أهالى الحتة
انا همشى 
و سايب ليكوا درع متين 
يحمى الشوراع 
يفصل الميادين
هيشيلكوا جوه العين 
و يشيل بقايا الهم 
سيبوا الساحات احتقان للدم 
إنسوا الى فات 
كل الى جىّ أهم 
عارف هتمشوا 
بس مش ناسيين .. 
(2)
يا أهالى الحتة 
الدرع داب 
و سيوفه مكسورة 
الدرع مات 
و كلابة مسعورة 
مين الى ينهش لحمكُم غير 
واحد ، و شايف 
كامل الصوره 
وقت أمّ قرر 
صَفى الهتاف 
الجى م الكورة ..
(3)
يا أهالى الحتة 
الدرع ماشى 
و سايب ليكوا راجل دين 
مبهج و شكلة خدوم 
ل الأوليا الصالحين
العيبة مش فيهم
العيبه ف البنزين 
مين الى شايل من عليكوا النور 
الا ال شايف 
إنهم خاينين ؟ .. 
(4)
يا أهالى الحتة 
الخوّنة مشيوا 
الدرع راجع 
قوموا و ابتِسموا 
هيشيلكوا جوه العين
و يشيل بقايا الهم 
طوفوا ف ساحاتة 
و فوضوه بالدم 
إنسوا الى فات 
كل الى جى أهم 
عارف هتمشوا 
المره دى 
ناسيين .. !!
(5)
يا ملوك الحتة 
الحقيقة صعب نثبتها 
و الخيانه زايدة نسبتها 
و العقول بتَؤل 
الى جزمة 
البطل 
معرفش يتهنى 
و الفقيد 
مورِدش على جنة
و الى عاشوا 
أصبحوا أزمة 
يا أهالى الحتة 
مفيش فينا واحد 
بيعرف يقول 
غير ال فاهم 
لغات العقول 
و غير الى يعرف 
ما بين النقط
مفيش فينا واحد 
دماغة سليمة
بيعرف يفرق 
ما بين الحقيقة 
و بين الغلط .. 

#عمرو_اللايح

Amr

Popular tracks