لو كنتى استنيتى شويه

حبيبتي
ويعلم ربنا حبك في قلبي ازاي
ويعلم عندي مقدارك يا غالية ياللي شايلاني
وجودك زي نعناعه لولاها ماكان له طعم الشاي
"قابلت البحر في عيونك شربت عطشت من تاني"*
مكانك عندي غير الناس ياست الناس وتاج راسهم 
تعيشي وتفضلي غالية وعالية وحابسه انفاسههم
باشوف الخلق تاه مني 
على قلبي اللي تاه مني 
وقلبك لو اتاه مني 
وجع وملامه هاحبسهم 
مافيش بعدك م؛كان ولا ناس ولا ليلة ف بعدك اعيش
ولسه زي ماقابلتك على وضعك وماكبرتيش
وفيكي حته طفولية بتخطف روحي وتجيبني
يا ورد لو اقطفه ليا عين الورد تعاتبني 
عيونك ف الوداع امي 
وحضنك ف اللقا ابني 
وحسك بس ف الدنيا ونس وصحاب وتحويشه 
يا سر اني لازلت سعيد وصابر لسه ع العيشه 
سعيد يومك يامولاتي 
ياصبح وطل ف حياتي 
شجر زهران 
امل ممدود 
هوا عابر 
ندى ف ورود
دلال وجمال 
هدوء  وشرود 
وكله ف الخيال موجود 
وكله ف اللقا وارد 
بحبك ياغزال شارد 
يا متربيه عفه وذوق 
تبصي لفوق وايه يعني
ما حقك تبقى باصه لفوق 
مادمتي معاكي خدي راحتك 
وطيري واجري ف مساحتك 
فصوص الماس تراب تحتك 
وقلب الناس رصيد مسروق

مابعد سنين من التوهة
ومن قلة أمل خدني
يشاء ربك يعوضني
وتيجي حياتي تمليها امل وحنان
ياأجمل خطوة بابدأها
ياقصة مش مصدقها لحد الآن
بقى انتي يانجمة يا نقيه
يا عاليه ياصعبه ياعصية
بقا انتي تفكري فيا؟
بقى انتي تطيبي خاطري
وتيجي طريقي وتخاطري
وقلمك يمشي على سطري ويكتب أيوه قلبي معاك؟
تخيل حد مكتوبُه
يقابل واحده مش توبه
تشوف احزانه وعيوبه
وبرضه تقوله انا قابلاك؟
ياحسن الحظ
يا جماله
يا واحد ربنا اداله
عوض رب السما ع الأرض
شايفه ولامسه وقصادي  
جمال الحلم بعد كابوس
دخول الدهشة في العادي
مساء الخير يا كل الخير
يا أمسى وشمسي وبلادي
يا أصفاهم
وأبدعهم
يا أحلاهم
وأجدعهم
يا مفردهم
يا أجمعهم
يا ميت واحدة ف روح واحدة
ما اقولش (معاها) أقول (معهم)
اتاري الدنيا فيها جميل
وحلوه عكس ما اتقاللي
وحظي الحلو مش ضايع
وكان جواكي متشاللي
وجيتلك بعد ما الأيام خدت مني وما ادتنيش
وكنت بعيش عشان كان لازم اني أعيش
وجايلك مستوي م الناس وم الأيام وعمايلها
لكن جوايا نقطة نور حايشها القلب وشايلها
وقطعه من البازل ناقصه عشان ايدك تكملها
واديني قصاد جمال قلبك
لا مال ولا قوة ولا حاشيه
باداوي جرحي بحنانك
يارحمة ربنا الماشيه
وأملي وكل طلباتي
ايديكي تمر ف جراحي
انا تعبان
انا هلكان
انا قلقان بقالي زمان
وليا كام سنه صاحي
أرق وصداع ، قلق وصراع
وناس فاتت وناس عافرت
وناس ماتت وناس سافرت
ف جسمي بنات وعزف نايات
وجع ف ضلوعي مش متقال
ودمع ف عيني حنفيات
انا موجوع يابنت الناس
واكبر حلم دلوقتي اغمض عيني مش قلقان
يجمعنّي بعنيكي مكان
واعيط مره مش مكسوف
بحبك قبل ما الدنيا تجمعنا انا وانتي
وفتّحتي ف حياتي بيبان عاشت عمر مقفولة
برقة وردة خدتي القلب وروحتي وجيتي وسكنتي
وبالعشرة وبالأيام بقيتي السيدة الأولى

Music Hesham Amer 

السيدة الأولى

وحشتيني 
ولو كل اللي عارفينك قالولك اني مانفعكيش 
ولو كل اللي عارفينني قالولي بكره تنسيني 
وحشتيني 
ولو كل البشر قالوا ان انا عاصي 
واني غلطت ف حياتي غلط ياما 
ده واد تلفان وكل يومين معاه واحدة 
وحتى فلان زعل وياه عشان واحدة 
انا أصلا مانيش يوسف 
ولو زوجة العزيز همت 
وقالت هيت لك ياجميل 
يجوز راح اميل 
وممكن اضمها جهراً
يسيل من ضحكها نهراً 
تدوب الاغنيات ف النيل 
لكن مهما هاشوف وهاطوف ومهما قابلت ناس وظروف 
هتبقي لوحدك القشة اللي جيت علشان تنجيني 
وحشتيني
مافيش انسان مالوش ماضي 
مافيش راجل مالوش أخطاء 
لكن دايماً ف نقطة ضعف 
ونقطة ضعفي هي انتي 
وطول الوقت كنت باقول 
انا مابقتش عاوز شيء سواكي انتي 
باحس معاكي اني مسيح 
براءتك عاملة زي الريح 
بتكنس ف الغلط بهدوء
وبابقي ف ضحكتك سكران 
ومش عاوز لا انام ولا افوق 
وكان فيه حل والله 
وكان ممكن اكون بالوقت زوج صالح 
ماليش ف المسئولية ساعات 
ساعات طايش 
لكن بالوقت كان ممكن اكون احسن 
تسامحيني ف غلط فالت
وهاحلفلك بإني هاصلح العدلة التي مالت 
بلاش تمثيل عشان أصلاً 
صياعتي وفشلي من غيرهم
ماكانش يجوز تحبيني 
وحشتيني
ف كل مكان ف ذكرى معاكي متسابة 
ايديا ف ايدك الطفلة باعدي معاك ف الشارع 
ملامحك وانتي بتسمعي فيروز 
نهارك وانتي بتواجهيه بشاي بحليب 
وحكاياتك على صحابك 
فلانة بتكرهك جداً 
فلانة قالتلي ماتشوفيهوش 
كلام قولتيه وكان لازم 
ف وقت الجرح ماتقوليهوش 
اكيد دلوقتي بتقولي 
زمانه مولع الدنيا 
بيغلط كل يوم عادي 
خلاص فاكك بقا ومرتاح 
وانا والله ف قيودك 
كطير من كتر ما اتقيد 
طلعله جناح 
انا ف البعد متحاوط بطيف ريحتك 
ولسه لحد هذا الوقت فاكر شكل تسريحتك 
وتنهيدك 
وشكل الساعة علي ايدك 
طريقتك وانت بتغني 
بعيد عنك حياتي عذاب 
حياتك ايه بعيد عني 
يا دنيا عرفتها فجأة 
وارض لمستها بشويش 
يا أطهر من رقم فلكي 
ف عداد اسمه أكل العيش 
بتحكمي ليه على غيابي 
وف حضوري بتنسيني 
رفضتي ان انتي تتسابي 
وفجأة انتي اللي سيبتيني 
وحشتيني

وحشتيني


زي مج كاكاو قديم على رف بارد م الرخام 
زي سرب من الحمام فقد الديار 
زي المطر ف ازاز فيميه 
أو زي سهم بينطلق ناحية هدف 
ماعرِفْش هو اللي اتحدف 
ولا بإرادته اختار مابين أحلام بديلة 
زي باندا ،،،
أو أقل قليلا
ابدأ نهاري بضحكتي لله 
واحشد مشاعري كلها للفرح 
أمسك واتبّت ف اللي لسه معاه
واعمل كإني قد شُفيت م الجرح
أختار مابين لبسي اللي يناسبني 
واحط سهواً ف الجيوب ذكرى 
أمي بتغسل كل شيء جوه الجاكت 
عشرين جنيه مادفعتهاش ولا خدت بالي منها 
وَصلْ الايجار ، كارت شحن قديم خدشته ومارميتوش 
لكنها ،،،
بتنسى دايماً إنها 
تغسل ريحتها م القماش 
لو هي كانت دوّرت ، كانت هتلقى ف الجيوب أغنيتي 
هتلاقي بنت ف جيب قصاد القلب 
طلقة رصاص أثر الفراق المشترك 
بس احتراماً للشَرَك 
كان لازم أمي تسيبها للذكرى 
وتسيب لبكره ذكرى مانسيتهاش
زي باندا ،، 
كل شيء ليها انقرض 
إلا السجاير .. والمرض .. بالبرد والخوف والزحام 
باصحى وانام 
وكإني دوبلير حد تاني بالتمام 
وكإني باصحى عشان انام 
زي باندا بامُر وحدي ف الشوارع
باسمع موسيقى تردني ليها 
واهرب إليها تردني ليا 
كلمت صاحبي الصبح وعزمته 
" صاحبي اللي فاضل ف الحاجات الملح " 
اقسم معاه دخان سجاير ربما 
يعمل سما واعمل مراكب من ورق 
احكيله عن عمر اتسرق 
يشتمني بيا وبالوجع 
" لساك وسخ ، انا كلب أصلا اني جيت .. مانا كنت قاعد باشا مبسوط ف الكافيه ، رديت عليك علشان تنكد ع اللي جابني بشكوتك ؟ اشرب يا زفت ف قهوتك وتعالى نعمل شيء جديد " 
صاحبي اللي فاضل ف الوريد 
ظهر النهاردة ف صورة الدم بكثافة 
ضحك الطبيب وكتبلي حقنة مسكنة 
أنا ليا مين غير الصحاب والأمكنة ؟!
رتب صحابك ع الورق حسب الوجود وقت الألم 
واعمل خطوط تحت اللي فاضل منهم 
تحت اللي لسه بيفهمك ويكلمك 
تحت اللي لما بتنسى هو يفكرك 
تحت اللي غاوي يقدرك 
وان كنت عاجز .. يحضنك ككمنجة قابلت لحنها 
يولع كلامكم جنب حاجة بحبها 
انا كل ما اجي وافُك جسمي واعلقه 
ما قابلش جزء بصدقه الا الكفوف ف الضهر 
الا الضوافر وقت حضن مابعد شوق 
وكإني غيمة ومطرت على فوق 
وكإني باندا كل شيء ليها انقرض ولا زلت عايش لجل اكون عبره 
بما اني خبره ف أغنيات فيروز 
ولإني جداً أو لإني يجوز 
ولإني فعلاً م الفراق ادمنت 
أنا خُنت نفسي لما كنت اتخَنْت 
وحرقت بنزين رحلتي على ايه ؟
واحدة ف يناير ماشية ف الشارع 
خليتني ليه بصتلها 
ركبت ناس مركبتي ليه ؟ 
الكل عامل نفسه نوح ورماني وحدي للطوفان 
طيب عبيط صدقتهم من امتى كان الموج ضمان ؟؟
هو انتوا مين ؟
ومليتوا ليه كل الصور لما انتوا هتبيعوا ببلاش 
الكادر صادق ناحيتي والغلطة جاية من الفلاش 
هو انتوا مين ؟؟ وانا ليه حزين على ترككم ؟؟
انا ليه لقيتني باحبكم 
أو ليه لقيتكم م الاساس !
أنا باندا تعبت م الخسارة المفرطة 
بدلّت كل الراحلين بأغاني كانت زيهم 
القهوة فن اللاشفاء من حُب خلق كرهتهم
والروج بتاع البنت لساه ع الجاكت 
غنيت وصوتي ف المدى لاصوت :
خماره جسمك ضحكتك بيره 
يا اللي انتي ذكرى صغيّرة كبيرة 
مريّت عليكي كرسي مش مليان 
وشربت فنجانك يا ست الأوليا
كان السحاب القطن ممزوج بالنزيف 
سمّوه غروب وطاوعتهم ف التسمية 
وانا من ساعتها اتنين ف واحد باشربك 
باستغربك ...
ولقيتني باندا مهددة بالانقراض 
على افتراض انك بجد على افتراض 
وعلى افتراض اني بجد 
مابقيتش بتفائل بحد 
مابقيتش بتقرّب لحد 
عايش مجرد تكملة لشريط قديم 
مستني باندا ف عصر ما 
تؤمن بتوزيع الحياة 
وتكون كمثلي مهددة بالانقراض 
نقسم سوا الفنجان ف دهشة من البشر
دبّين ف عالم خالي الا من حجر 
وساعتها يمكن تبتسم فيروز 
والقهوة تبقى قهوتين بالوقت 
أنا كنت باندا بس صرت تمام 
أو هابقى باندا بس مش دلوقت .

باندا

جوابي ده الأخير ليكي 
يامعاليكي 
ياست الحسن 
ياسبب الحزن والعلة 
ياشجرة حسبتها ضله وطلعت نار 
بداية القول : مساء الفل ع الأزهار على خدودك 
مابنجرّحش 
ومابنسمحش حد يقول كلام عنك 
لذلك ثم أما بعد ،
أنا الطفل اللي كان ف عنيكي متشعبط 
يشوفك روحه تتلخبط 
وقلبه ابن الحرام يضعف ويستعبط 
كإنك زار وانا الدرويش
كإنك غار وانا الحرافيش 
كإنك كنتي قرش حشيش 
دخل رئتيني وملاني 
كإنك دار وانا اللي ماليش 
سوا الدار اللي لمّاني 
بغض الجرح مين خان مين 
ومين قصّر مع التاني 
وغض الطرفْ عن اسمك 
وطعم خروجه ف لساني 
أنا مليّت من القصة ومن لعبة خلاص لسه 
لقيتك غيمة ف حياتي حسبتك مطره قمت جريت 
وفجأة لقيت مفيش غير ليل 
سحابة ضلمة كنتي انتي
اشوفك ف الوجع بنتي 
واحسك ارضي وسفينتي 
وشمس بتملا ليلي شروق 
مافيش كام يوم لقيتني بافوق 
واشوف القاتل الفعلي 
لقيتك أرض ماتضمش سوى المطاريد 
وانا عيل بيفتح إيد يشوفك خط على كفه 
عنيا عيال اذا بصيتي يتدّفوا 
حسبتك أم بتدوّر رحى الأحضان على عيالها
لقيتك ماسكة كاتم صوت 
رصاصك فات وجع جواي
وهو ياحلوة يعني الموت
بيفرق شكله كان ازاي 
وهو الجرح للستات ومش لينا ؟ 
ما فيه رجالة بتعيّط 
وفيه رجالة بتفكّر ف عز الليل ف ناس باعوا 
وفيه راجل اذا فات ف المحيط وجعه مابيساعه
وفيه عناوين بتتلخبط 
وفيه بكره بيتشخبط 
وفيه أطفال مايتولدوش ف مستقبل ماجاش قدام 
وفيه زفة مابتقومشي 
وفيه فرحة مابتدومشي
وفيه نغزة ف صميم الروح 
ما دام ف القصة فيه دابح 
أكيد ف القصة فيه مدبوح 
ولو كان القتيل راجل 
ف دمه بيبقي مش بالسهل 
خسرتي معاه وجود الأهل 
خسرتي الضهر والضمه 
خسرتي الجمع واللمة 
وبكره هتندمي لما 
تحسي البرد من دونه 
ياريتك شوفتي ف عيونه دموع الأب 
أنا الشخص اللي كله ذنوب
لكن مليان حاجات تتحب 
ــــــــــــــــــــــــــــــــــ
عملت حاجات لأول مرة بعملها 
وكِملِت أغنيات بيكي 
لأول مرة اكملها
اشِمِّك ريحه وانا ماشي وأقول ماشي
واكلّم ربنا عنك وجع وغروب 
عكستي المشهد المكتوب
ماكانش الفيلم دي نهايته 
كده الكاتب لعب ف النص
وفيه لزق ف حياتي وقص 
وفيه تركيب لناس تانية 
فيه مشهد خارجي مش محطوط 
أنا وانتي 
ومطرة بتغسل الشارع من الاحزان 
حضنتيني زمان ومكان 
وقولتيلي مافيش غيرك 
نزلت ف لحظة على ركبي وانا ف ايديا كام وردة 
ضحكتيلي 
وطبطبتيلي علي خدي 
كانك كنتي بتعدي على قلبي بروح حافية 
مسكت الدمعه بالعافيه وضميتك ف عز البرد 
لقيتني الفيلم بالكامل مافيش ولا لقطة ماسك ورد 
طلع فيه حاجات بتتصور 
بتتقصقص من المونتاج
وأول ما المطر لمسك 
لقيتك دوبتي ف المكياج 
عروسة حلاوة أو صورة 
ملامح فازة مكسورة ف اخر جزء ف الذكرى 
خسارة تكمّلي بكره 
يا نور ساطع بيعمي العين ما بينوّرش
انا هافضل كده عيّل ومابيكبرش 
وبكره يجوز تقابليني ف أي مكان 
هاشوفك وقتها دخان 
بقوة ست هاعشقها ف زمان تاني 
ولمسة طفل يشبهني مايشبهكيش 
انا جوايا كام ميّت وحابب اعيش
لا هاتحوّل 
ولا هارجع من الأول 
ولا هاكتب عشانك شعر 
هبيعك دون نظر للسعر 
مكانك وردة ماسقيتهاش ف دبلت من خريف موجوع 
دموعي رصيد باحوش فيه لناس مستاهلة مني دموع 
وحلمي معاكي م الأول 
خطيئة لابد اكفّرها 
رميتك طفل ببراءته 
ندم على حاجة وكسرها 
يا أسوأ حلو كان فيّا
يا أطيب شر ف النية 
كسبت حاجات تسيء ليا 
وجه الوقت اللي انا اخسرها . 

كمان : بدر مصطفى
ناي : محمد مصطفي
ايقاعات : كريم صلاح 
كيبورد : صهيب النجار
تسجيل : من حفل الساقية اكتوبر 
رؤية موسيقية الفنان محمد مصطفي 

جوابي الأخير - من حفلة الساقية 2015


مابتحبكش 
بتتعب ليه وتزرع أرض مش أرضك 
وليه سهران 
وليه قلقان ومش نايم
وليه قاعد وليه قايم تجيب ف سيرتها ومشاعرك تسيل ع الارض ! 
مابتحبكش والله
وكل اللي اتعمل بينكم حكاية وقت مش اكتر 
كلامك كله كان عادي 
ووردك مرمي ف الشارع من الشباك 
بتضحكلك وتبقى معاك 
وتحلفلك تكون وياك
وبعد ماتمشي بتسيبك تاريخ مهجور 
حكيت وياها عن نفسك فتاجرِت بيك 
واديها ياسيدي بتعايرك باسرارك وبعياطك قصاد منها 
تجيب سيرتك واخبارك وتسبكها بدموع عينها 
ولا صانت كلام بيبنكم 
ولا قدرت تراعي حتى حلفانها 
ياراجل ده انت علشانها 
بقيت واحد ماتشبهلكش
مابتحبكش
بتبني ف ايه ؟
بتنكر ليه كلام واضح كضي الشمس 
بقالك قد ايه مشتاق 
لواحده كان لقاها فراق 
وكنت معاها طفل كبير 
حكيت للكل عنها بدون ماتتكلم 
وكنت تشوفها فتسلم 
وكنت تشم بارفانها فتعرف دارها ومكانها 
وتعرف كل الوانها بلمسة ايد 
ادي العيل ف وصف العيد 
لا نفع الشاي ولا الحكايات 
ولا الاحلام ولا البدايات 
ولا الحواديت ولا السلامات
ولا الحرُمات
ولا حتى الكلام بينكم
ف اول لحظة تختلفوا تهين ضلك 
وتشتم فيك 
وتدعي عليك 
ولا بتقول ده كان طيب وكان فيه بيننا ضحك دموع 
ولا بتقول ده صان وجعي ولا حافظ على المجموع 
مسافة ما الكلام بيموت بتنسى كل شيء له أصل
وتترك للمشاع سيرتك 
بتعمل ايه ؟؟ 
ياخي والله عيب فعلاً 
عشان امك ياخي حتى 
عشان حلمك 
عشان لو شفت ف مرايه انعكاس صورتك ماتتعرِّش وماتوطيش 
يادنيا رخيصه مابتديش 
لواحد حد يستاهله 
يشوف الشخص لما يعيش 
نتيجة موقفه وجهله 
نصيبك وانتي من أهله 
هموم الناس مابتضحكش
مابتحبكش
شكلك زفت 
اديك وعرفت
ف ايه ردك ؟
كفايه خيابه من حدك 
كفايه سنين بتتسرسب عشان ولا شيء 
مافيش ف الدنيا حد يبيع وهو بريء 
مقامك وسط كل الناس مقام عالي 
ووزنك في عيون اهلك دهب غالي 
وروحك نجمه بتلالي وقلبك ناي 
رميت نفسك لقلة قيمة بس ازاي 
طلع خوفك عليها ف عينها ضعف شديد 
وقربت بمشاعرك بس هي بعيد 
خيالها مريض بناس عدّوا 
بتتلذذ ببيع وجعك على الرصفان 
وتيجي انت وبتسامح بأي ضمان
لا والأعجب بتطلع منها غلطان 
وتطلع حد مش شاري 
كإن العرض كان ساري يومين بالظبط 
لا منك غِبت ولا قرّبت 
وادي الأيام بتثبتلك وبالاوراق 
غلط نظري ف نظرك فجأة ع الأشياء 
قعدت كتير عشان تفهم وربك شاء 
تضيع أحلى ما ف عمرك عشان انسانه ماتحسكش 
مابتحبكش صدقني 
مابتحبكش.

شكر : ستديو زين داوود 

مابتحبكش

معاد مناسب للقيامه

موسيقى ديوان مثلاً

بالنسبة لواحد زيه اتوفّى اتناشر مرة بأساليب مختلفة 
واترمى ف الأوضه لحد ما ضاقت روحه عليه 
بقى صعب يواجه أي مشاكل من نوعية امتى وليه 
بقى كل مشاكله تخص المزيكا 
مواعيد السينما وطعم الشاي ، درجات الطقس ونوع الأكل وتمن الوحده 
والبُعد لاخر بُعد متاح 
انما موضوع تتعب علشان ترتاح 
مابقاش له معنى مع الصدمات 
فلسفة فارغة 
وكإنه حوار بين واحد وصديقه اللي ماجاش 
مسألة الموت أملاً ف حاجات تتعاش بتخلي الواحد يضحك على نفسه
بيقول : 
" يومياً باطلب قهوة زيادة عشان البنت اللي انا ماعرفش مكانها 
بافتكر الفايت وبافكّر كان مين ساب مين " 
يتأمل ناس بقوا بني أزمات مش بني ادمين 
يتذكّر نصه اللي اتسحّب منه 
وازاي بقا واحد بيعيط بس ف مكانين 
ويقول بحنان معجون بحنين :
" واحشاني حبيبتي ومش هانكر ، وواحشني كلامي معاها بجد ، بقى مرعب انك تتعلق وتعلق مفاتيحك مع حد ، تتمشى مكان ما انتوا مشيتوا ، تتذكّر ساعة مابكيتوا ، وتخش السينما وتنسى فتحجز تذكرتين ، الكون بقا شيء مضروب ف اتنين "
يتنهد ويبصلى فجأة ويكمل بهدوء شخص حزين : 
" للدرجة اللي تخليك وانت بتشرب سكر معلقة واحدة 
اول هي ماتيجي ف خاطرك تتناسى وتشرب معلقتين ! "
كان طقس بيشبه هبه طوجي ف تراك " لابداية ولانهاية "
والدنيا فلاش باك التفاصيل 
نسيت سجايرها ف يوم عنده وهو مبطّل من ست سنين 
لو كان ممكن بايديه مثلاً انه يبطلها مع التدخين 
كان ممكن جداً يتحسن 
بس الادمان درجات ياما 
أعلاهم إدمان الغايبين 
بيقول والخمره ف ايده بتطوّح : 
بقى فين أيامنا وليالينا 
حكاوينا وشوقنا وغناوينا 
كان لينا ايدين بتشبّك قدام الأيام 
بقت الأيام بتشبّك بُعد ف ايادينا
ويحط الكاس على طرف البار 
ويزيح بايديه كل الموجود 
" ادي اللي كسبته معاك ياحليم ، مفقودٌ مفقودٌ مفقود " 
بعدها بينام زي ماهو 
ودموعه تسيل منه لجوه 
فتغرّق روحه عياط مدفون 
مش كل جراح شرطها ف جروح 
ولا كل البكا تلزمله عيون
شُفت يا صاحبي 
الورد اللي انت مشيت تلاتين كيلو علشان تعرف تتأسف بيه 
امبارح شُفته ف مدخل بيت قاعد خايف 
اترمي بايدين ناعمه وبارده 
الورد اللي انت فضلت تكوّن فيه وردة بوردة 
اتوفى الصبح من الإهمال 
شُفت ياصاحبي 
وفضلت احرّك فيه علشان يتهز ويرجع لحياته 
انما كان قرر يتحول مزيكا ماتسمعش نصايح 
الحب ازاي كله فضايح
وازاي الجاي أصبح رايح 
نفس الشخصين بقوا أي اتنين غير نفس اللي زمان اتقابلوا 
هي ف آخر العالم يمكن 
يمكن دلوقتي بتتعرف على شخص جديد 
ف مكان بيقل رومانسيه عن أول مطرح يجمعهم 
يمكن بتحط ف ماكياجها علشان سهره 
او نايمه ومش حاسه بحاجه 
يمكن ناسية ومش محتاجه بحد يفكرها بعهد قديم 
او يمكن زيه ف طرف البار بتعيط على حس حليم
ادخل بيته 
ابيض واسود من بيت ألوان أيام هي ماكانت ساكناه 
كان بيها بيقعد مع نفسه كان زي لوحده وهي معاه 
يادي المعاناه 
الكل اتورط كده وياه 
البيت اللبس الطفايه ، الشجر الميت ف المأساه
الأكل هدومه القصافه ، الفازة البارفان اللي معاه 
بقا كل جماد له روح وحياه 
الليلة 
لقيته بيتمشى ف شارع كان ليهم فيه قصه 
لحيته أطول من خوفي عليه 
كان ماشي بيتطوح وايديه فيها سجاره بعد مابطلها لست سنين 
دخل المطعم قلقوا القاعدين 
قاله الجرسون : 
كل ده محجوز 
وقبل ماتنزل منه دموعه 
مال على رجليه وبرق للنور 
بقا ميّت بعد ماكان مكسور 
ادي الفنان 
وادي الجمهور 
ادي اللي ماجاش ف خيالها اهو كان 
قتلت انسان 
كسرته بالبُعد وبالخذلان 
واتكاترت على نفسه همومه 
ماقدرش يكمل بقا يومه ريّح وارتاح 
ادي المايسترو 
بيموت ف مكان فيه مزيكته والناس سمعاها ومش سامعاه
فيه يوم هتخشوا عليا البيت 
تلاقوني مشيت 
من غير اسباب ولا شرح عبيط 
قالي وانا نسيت 
واديني باقول 
احترموا المتعوّر من دول 
حاوطوا المهموم قبل فراقه 
ان كان ساكت يبقى لأسباب
اوعوا تشيلوا ايديكم م الباب 
املوا حياته بحب وأحباب 
قبل ما يدبل قدام عينكم 
وان شوفتوا حبيبته ف يوم بينكم 
خلوها تكون عارفه مقامه 
وانها عدت من قدامه وخلته مقتول بغياب أعمى 
ملعونه ايدين مجرمة ناعمه 
مادتش الفرصه لحد يعيش 
مع انه اتوفى قصاد منها اتناشر مرة 
واترمى ف الأوضه لحد ماضاقت روحه عليه.

المايسترو

بقيت عادي 
كإني ديكور 
مابتكلمش عن حاجة ومابعلقش
ومبكدبش حد ف شئ، ومبصدقش
ومش مهتم بالدنيا ولا بالحرب
ومش باحزن علي الرايح ولا الآتي 
ومش حابب ادخل حد ف حياتي 
بقيت مبقتش من ساعة وجع ف الروح
ولاشرير ولاطيب ولاحساس ولا سادي
بقيت كما طيف
بقيت كما ضيف
بقيت عادي
ع الحال ده بقالي زمان
بقالي كم سنة يمكن
ماحدش منكم خد بال
روبوت تشغيله بحجارة
وطول ماحجارته فيه شغال
شجر أخضر مابيجرحش عين الناس
فانوس بيقيد ونوره سبيل 
ده مش تمثيل
ولاتطويل ف مشهد ما
لكن أسلوب وشكل حياة 
فماتلومنيش ع غيابي انا موجود
فاعيادكم
واحزانكم
صديق ف كفاية بيسرح ف اللي ضاع منه
شريك منزل 
نزيل غرفة 
وجع بيبص من الشرفة 
انا موجود ومش بفسد فرح بينكم
ولابزعل قوي منكم 
انا علي غير ما جوايا
مهرج باسعد الشلة
وصاحب إفيهات حاضره
وعامل لجلكم حضره
تقولوا ف وصفها الله 
فلو وجعاكو كلمة اه هابطلها 
يومين عزلة واكون أحسن
وهارجع تاني للشكل اللي كان بادي
انا عادي 
فخد راحتك
وقول عني اللي بتقوله
انا وكتير من الناس اللي بقوا زيي
مابنقربش من العالم عشان يحلو
ومابنفسدش ابداً جو
ومبنأذيش
لكن بنخاف من التجديد
من الناس اللي بيخشوا الحياة فجأة
وبيفاجئونا بوجودهم
عملنا سياج علينا عشان
ماتتعشمش ناس فينا
ف كل مساحة تلاقينا
نميل لأغاني شتوية
ولون غامق ف لبس عتيق
ريحتنا بيوت فارقناها
وهدومنا ناس قلعناها
وسميعة
بنعرف نكرم العالم ونقراهم
مبنملش من الحكايات
ولينا ف كل صدر نبات
ولينا الجدعنة الكاملة
ماننساش عيد ميلاد صاحب
ومبنبخلش بالمواعيد 
جدير بيكم تساعدونا 
تغنولنا .. وتحكولنا .. وتسقونا
يجوز دون قصد تحيونا
وتدون امل ف الضئ
يجوز نتراضي علي روحنا
ونتطمن لبكرة الحي
يجوز بالوقت نتطمن 
ونرجع نبتسم عادي.

وما أدراك ما الفوبيا

مع قفل اخر باب 
وقت اختلاط الأعادي بزمرة الأحباب 
وانا درجة من سلِّم عَشَم مكسورة بإيدين اكتئاب
مالقتش غيرك وقت الرماح ما اتملِّكت منّي 
والدنيا كشفت وشها البايخ 
مانكرش اني قبل ما الجألك شديت خيوط التجربة للحرف
ومشيت لحد الطرف
وقبل روحي ماتتمنع م الفرح 
قبل فعلي مايتمنع م الصرف
انا كنت جاي الدنيا مليان بالندى 
قلبي السواقي الخضرا وعيوني المدى 
وضميري سعي اللي ابتدى ماوصلش
حصّلت أملي وللأسف ماحصلش 
واديني جيتلك ف احتياج لأمان
أمان لا جالي مع الصحاب والوقت 
ولا جالي بالحب ولا اللجوء لمكان
ظني في سُليمان لما ماداسش على نمله 
خلاني أقول فما بال إله سليمان 

جايلك بريء م المرض 
لكن مصاب بالعرَض 
وف صدري حادثة قديمة ما حكيتهاش 
بيني وبين الانتحار كسرة
وف ايدي فتحه وفعلها ما أتاش 
مضطر خايف أو كفيف شايف 
راجف شفايف أو قتيل بالشك 
مهتم عارف منطوي جارف 
داير لفايف درب ، منك لك
لا ف ايدي سيف ولا ف الخيال حيلة
فك البراح سكُّه ولما سكُّه اتفكّ
طمنني زي اللي اتطمننوا ومرّوا 
وعّيني عيني ماليها حزن و عكّ
أنا مين حبايبي ومين عدوّيني 
الدمع حاجب عيني وعّيني 
امتاى ؟ كيفي ؟ وفيني ؟ وفّيني 
ركضت سنين وقلبي داق واتدّك 
قلبي يتيم السؤال 
روحي احتلال 
والدنيا محض جدال والخوف عليه الرّك

واقف على قمة جبل 
محتار مابين حليّن
كلاهما شكّين وكلاهما وحلين
لولا ان غضبك جمّ
 وانت النهاية الأهم 
لـ كنت نطيت من زمان 
من ساعة الأغراب ما اتحوّلوا سكان 
والدرب ضاق ع الغلبانين ملّوا 
من ساعة الأصحاب ما قلوا والرعاه ضلّوا 
قبل الحروب الكبرى 
غزوات الفلوس 
قبل النفوس ما تهج من ذات النفوس
والدنيا تبهت زي درب طويل 
لكني متمسك بحبل إيمان
وصلي ف دوام الوصل منك إليك وصلان 
وانت حبيبي الوحيد 
وانت المكان اللا مكان 
 انت المسافات اللي مش ممكن أقدّرها 
وانت السبيل اللي مش ف خيالي أخسرها 
انت سبيل الحب 
مُتع الدرب 
وقف الحرب 
وبإيدك انت تندلع نارها 
سوّيها علشان الحساب طوّل 
وفي ناس غلابه مظلومين مساكين 
ناس لسه بني ادمين 
بيغيبوا عنك بس مش ضالين 
مستنيين ضحكه يحسوا أمان 
أو ف انتظار دعوه يردّوا آمين 
انا منسحب منها
بكل ملاعينها 
لا ايد تعين ميلها ولا قيد ملا عينها 
سايبها بسنينها 
وبكل شياطينها 
مش معتذر عن شيء 
ولا معتزل من شيء
انا منعزل م الكل
ماشي لضوء الضل 
أملى ف حياه بحياه 
نجيني م المعاناة 
واوهبني نعم غياب 
اخر قصيدة شعر 
طمعاً في أول باب

Voice Recorder

سبعة مارس

الحلوة قالت: 
ماله ده؟
 فارد جناحه ف الفضا وراسم خطاه 
امّا اعرفه وازرع جناينه واخطفه
 واطلب رضاه 
تسلّية برضه ومعرفة ورسم وصفه 
بكره هيلحس الارصفه
 علشان اخلّي اللأه آه
والواد بسيط ولاجاش ف باله 
شادد رحاله ماكانش بيأمّن وراه 
شارد ف عينها اللي اكتشف منها البكا 
طايح ف حضن معلقُه وجارح صِباه 
أمّنتها .. ومقام نبينا المصطفى
حلّفتها .. بحق نور اللي اصطفاه
تضم قلبي اللي اتأذى
وتصون لقانا وليل صفاه
قتلتني وف ليلة العزا 
قالت: وماتصلوش وراه!!
على ايه ياست ؟
على ايه و ليه ؟ 
هو احنا داخلين معركة؟
أمّمت طين الباشا والدك وانتي جايه ترديهالي؟
بيني وبينك دم يعني ولا تار؟
مش يوم ما شُفتيني ابتسمتي وقيدتي نار؟
مش ده صباعك اللي شاور! 
مش ده خيالك اللي ناور 
مش ده لسانك اللي حاور لجلي خلق وناس كُتار؟
طب ايه بقى؟
ولّا انتي اكل وبحلقه؟
عجباكي حاجه
 ياتشتريها يا روّحي!
عمّاله ليه تطوّحي؟ 
ولا انتي متربيه تاخدي وتشطحي
 وترمي ودادي يجيب جديد؟
انزفك شعر وقصايد واحكي للناس غنوتك
امدح بصوتي محبتك
وافرد ف توبك 
بتحدى نوري بضلمتك واستر عيوبك
وانتي التهم متجهزه صفّين طوال 
خاين وضيع وكذا وكذا وسفيه وضال 
وانتي الأمان والاحترام 
وانتي التمام والمايُرام
انتي اللي صلحتي الترام
وانا اللي وقفّت النضال 
على ايه ياست؟
مانفُضها 
بفرة مناهدة نرولها وشكراً سلام 
من غير كلام 
من غير مانهري ف مين غلط او مين تمام 
دلوقتي فعلاً مستعد اني امسحك 
مسحة عظيمه تريّحك من ذكرياتي 
سكران وفُقت وخمرتي كانت وجودك ياحياتي
يا اللي جيبالي الكلام والغمز واللمز السخيف
وان كان على لحس الرصيف 
اديه بقى صف مرايات 
اذا كان على الحزن اللطيف 
دول مش صوابعي دول نايات 
وانا بعترفلك بالصواب في كل شيء 
انتي الأماكن والطريق 
انتي الطريق الدولي والفرعي البطيء 
انتي علامة النصر 
صوت الحب 
سيدة الغناء العربي والوجه الرقيق 
وانا زكي رستم
 هتلر
 موسوليني
 تشرشل
متعالي فضولي اناني ومش مظبوط وبذيء
وانتي بتقولي لصحابك قد ايه
انا شخص قاسي وطبعي في غاية السئالة 
ابقي قولي ان انا سبب البطالة 
سبب انخفاض منسوب مياه النيل
وان وقتك ضاع ف تخفيف دمي التقيل 
وان لبسي كله ذوقك
واني بتمرمغ ف شوقك بس جاحد
اشتميني تعلي مني 
ذّمي سيرتي هتمدحيني 
خرجي الطبع اللي فيكي وفرحيني 
دول كاسين منقوعهم ايه اللي يجيبوني 
ارمي عمري بين ايديكي وأقول يادوب 
خمرة ايه اللي تاخدني لواحدة بتكسّر قلوب 
كنت بستحمل مصايب مش ببيّن 
عشت أقول ع الغلطه شاردة
كنت اشوف الشوكة وردة
واوصف القاسي انه هيّن
سُكر بيّن
هانج أوڤر
كنتي ليه ف هدومي رقعه وقلبي معمولك بلوڤر؟ 
كنت مش بصعب عليكي وانتي بتلمي السيناريو وتنشريه 
كل شيء من قلبي عامله تكدبيه 
ده انتي شككتيني فيا لدرجة اني 
قولت كتر خيرها واخده بالها مني 
وانت ابعد واحده عني
اللي عاش بيبوس ايدك تضلي 
جي يبوسها عشان توريه التخلي 
اللي طول العمر بيقولك هينفع 
جي يقولك مش هينفع 
السنين اللي اترموا ف الأرض حتى مش هتشفع 
قولي ان انتي اللي سايبه 
وان انا مصاص دماء وانتي غلبانه بغباء وعبيطه خايبة
واني جيبتك بالطريقه 
وان اغراضي دنيئة 
وان خطواتي بطيئة 
والحبال ف الوصل دايبه 
اللي عاوزاه يتعمل وتحلّي عني
عاوز ارجع للي راح ف الزحمه مني 
عاوز اكسر وحدتي واخرج براسي
عاوز اوهب مر كبي لغير المراسي 
ارمي للايام شراعي 
اتركه للناس تراعي والقى منهم كلمه تفرح
حد م الناس اللي خسرانهم عشانك
ييجي ويحل ف مكانك 
يبتسملي ويملى عيني 
عاوز اسمع حد بيقول اني طيب
واني لسه قلبي صافي 
حد يمشي ف روحي حافي وهو آمن 
واحدة تحلفلي ان ممكن ييجي بكره 
انتي مش غلطانه فيا 
كله غلطي 
كله كان زرعي وحصادي 
قلبي بعد سنين معشش صاحي فاضي 
واتكسر كاسك ف ايدي وخمره طار 
النهاردة 
خدت بالي م النهار 
خدت بالي من ملامحي 
ثغري باسم لوني قمحي
قلبي عيل 
النهاردة 
التئم جوايا جرح مكانش هين او قليل
فُقت بعد ما وقت فات
بس فُقت
بالسلامة 
سايبه فيا علامه عادي
فيها ايه ماتسيب علامه 
بس سابت بعد منها 
حد اطيب من سنينها 
حد مش هتشوفه عينها 
من هنا ليوم القيامه

Amr Hassan

Popular tracks