واللي بيعلى بيعلي
وقولة القلوب عند بعضها
واصلة السما بأرضها

وبني آدم سلاح نفسه وصاحب رأي
وقبل الناس ماتكبر السنين كانت كتيرة
افرش حصيرة وخلي البساط أحمدي
الليل بساط يا مصادفني من آخر السكة
قرب من الناحية دي

ماليش خيال إلا ان رميتني بنور هادي
ورميت عليا السلام

في مرة طالع من حسن الأكبر
على باب الخلق بين مغربية وعشا
لاقيت القمر في وشي كبير وقريب
تطلع عيونك سلم سطوح بيت
على حدف الدراع من هنا القلعة ومن هنا العتبة
والقمر لون الحنان الصيفي
والماضي الصغير
زي اللي خجلان شوية
من بهجته وحسنه

وعلى مذهب شارع محمد علي
الترامايات قاطعة الخليج بجرس يجري
والقمر ميال لكل الدنيا مالي الدنيا
فوق العباسية ولبعد الزيتون على نخل
لبلاد تقول نجع
وبلاد تقول كوم
في نفس اليوم
على مزلقان الجيزة ومقبل، سارح غيطان

واقف على كل محطات السكة الحديد
واسكندرية
في باب الخلق
اتملى القرطاس
بفول أخضر
رمت عليا السلام
نورت يا ولدي
نورت يا ولدي

موال باب الخلق .. كلمات فؤاد حداد .. ألحان وغناء سيد مكاوي

أم كلثوم - (قصيدة) هذه ليلتي ... عام ١٩٦٨م

الشارع
قميص يوسف 
شاهد دم ع الذنب وعالبراءة 
على معنى الأخوة، والأبوة
وعلى رد الإساءة..
أوقات يكون صباح الخير مستعجلة
من غير ما تسمع ردها
وأوقات يكون مساء الخير
اوزن لي كيلو من أختها..
وبين المساء والصباح 
الشارع كان زي ما هو..
ما بيفرقش في القسوة وقت المنابات
ما بين طبلية وسفرة، أو أرض وكراسي
وكان اللي بيأذن في الزاوية تحت بيتنا
صوته..
ما يمنعش مجرم عن جريمته 
ولا يأنب ضمير عاصي..
لكن ولمده على استقامته
بيليق بشكل عجيب مع دوشة الشارع
وبيوقف لعب العيال ندا ربنا بلغوشة
من ميكرفون الجامع..

والجامع..
صديق ثانوي القديم قبل ما يصبح جار
وطريقه أسهل صحيح من سكة البازار
وليهم نوادر التلاتة ومالهمش إختيار..

لكن..
الخمرة والجامع ما يجتمعوش حتى في مفارقة
وفي دي الجميع اتفقوا على إختلاف كل فرقة 
وصاحبنا كان متهم في كل حادثة سرقة..

هل عشان كده كان بياخد جنب؟
هل مات بدري لإحساسه الدفين بالذنب؟
هل لأنه لما راهن على كل شيء
فضل محتفظ بالقلب؟
كلها اسئلة مالهاش إجابات
خاصة 
لو تجتمع بالشرب..
لـ اللي ليلاتي كان يسجن في روحه
بعد ما ينصُب محكمة..
الأب مات قبل ما يشم في قميصه
والأخوة..
بردو روايتهم مُحكمة
أما الأم 
الشاهد العيان، والأولى بالمظلمة..

٩ سنين حدوته ودبايح
٩ سنين ودا جي ودا رايح
٩ سنين م الشُرب ما كويتش جرح
ولا دارت روايح..
٩ سنين!
وإيه اللي لسه ما اتعرضش في أسواق النخاسة؟
ولمين تآمن لحضنه لو ربى كلب حراسة؟
وإن شموا ريحة الكحول
ازاي هيشموا المصحة 
٦ شهور في ٦ شهور
في إنتكاسة؟

مذنب؟
نمسك رقبته للحدوتة تدبحه
بريء..
نقراها بشويش لـ كلمة تخرج تجرحه
معنى..
الناس احتارت في تفسيره
معني..
لكن الدم دا دمه
مش دم حد غيره..

ننظر في أمره ونخوض في موضوع 
ونطلع قلبه المدفون جوه في ضلوعه
ونشهد الأتنين إبليسه ويسوعه
لكن هيفضل سؤال..
لو كلكم شاهدين على لسانه
مين يشهد على دموعه؟

بكتشف المعنى ولا بستكشف القيمة؟
ورقة جديدة في كل هدمة قديمة
كنا إيه غير أسئلة 
بنعيد إنتاج الأمثلة
نضحك سوى على مشاكلنا
ونبكي على فيلم في السيما..

حتى في العزا
تخيلتك بترمي إيفهات ع العزا
وعزاني..
ما أذاني غير منظر المقريء بيضحك للكاميرا 
وللمقريء التاني
وطعم البن من غير النوى في لساني
خلاني بعد الربع أسمع ربع تاني..

ودورت عليك بين الوشوش
ولقيتك..
مش كبرنا ع الإستغماية!
لو كنت اعمى كنت لومتك 
وقلت بتستغل عمايا
لكن مفتح..
مش قصدي زي الشهدا
أقصد زي عيني في المراية..

ازاي رسول من غير رسالة!
علشان ما يعني سيبتنا بنفس الحالة؟
والحرب دايرة على حدودنا الشرقية 
وفي الجنوب فيه حرب أهلية
في الغرب ليبيا لسه ما اتردتش
أما الشمال..
يكفيني م السببين 
إنهم بنوا سور على بحر إسكندرية..
كل الجديد اللي فايتك 
إني كتبت لك قصيدة
مش أغنية..

كنا ببراءة هتاف العشرينات في الثورة
حماس المناقشة والإيمان بالناس
علموك الكدب بدري
وبقيت تقول دا آخر كاس..

شوفنا الوباء والثورة 
موت الصحاب وسجنهم
شوفت المصحة، وشوفت الجيش
اليُتم بدري والتلطيش
كنت العقل وكنت الطيش
مين يفهم المعنى وبيعيش؟
..

في الفجر 
ابتسم الإمام نُص ابتسامة 
لما شم ريحة الكحول في الركعة الأولى هبت ع المكان
كانت اعذب مرة يقرا فيها صورة الرحمن..
وكأنها..
رقوة وحيد الصف التالت 
طافت صفين خدهم فضولهم خلفهم
كانت ودنهم مع الإمام، وذهنهم مع الغريب
مشهد مهيب..
وكانهم صفين ما بين إمامين..
وكان الكحول متوزع زي الأسباب..
ما بين ريحة إسلامي، وڤودكا رخيصة
هنا..
من مُستصغر الشرر
تبصر آيات العذاب..
والمرارة اللي بتسكر الناس في همومهم
فوقتهم في الصلاة من نص نومهم..
ممكن تقول: الكل سارح في الصلاة
ممكن تقول: ماصدقش حد إلاه..
لكن مش ممكن تقول
غير إنه كان في الكادر أو براه
غير مقبول..
وإنهم بعد ما سلموا ولفوا 
كان مشي على طول...

دبايح الحواديت - حازم عمر

بس كفاية إن الواحد يصطبح على الشيخ إمام وهو بيصبح علينا ، اليوم يكون مُبهج وجميل! :))
==
طلع الصباح كل الجمال في طلعته
والنور سرح كحل عينينا بفتنته
والطير صدح للمولى جلّت قدرته
الحان جميلة تنعش القلب الحزين
يسعد صباحكم كلكم ياشغالين
الشمس طالعة بابتسامة الاْمل
شعلة ياقوت زي الخدود وقت الخجل
بتقول يا نايم قوم بدا وقت العمل
دي الدنيا خيرها وعزّها للشقيانين
يسعد صباحكم كلكم يا شغالين
يا ولاد بلدنا من جنوبها لشرقها
يا مشمرين عن السواعد كلها
النور حضن بلادنا و ضمّها
والشمس هلّت بالامل ع الشقيانين
يسعد صباحكم كلكم يا شغالين
طلع الصباح كل الجمال في طلعته
والنور سرح كحل عينينا بفتنته
والطير صدح للمولى جلّت قدرته
الحان جميلة تنعش القلب الحزين
يسعد صباحكم كلكم يا شغالين

غناء : الشيخ إمام
كلمات : أحمد فؤاد نجم

#قاوم! 

الشيخ إمام - طلع الصباح

http://misrfone.org
يا ما شاء الله ع التحفجية .. أهل اللطافة و المفهومية
إجعلها ليلة مملكة يا كريم
ده الكيف مزاجه إذا تسلطن .. أخوك ساعتها يحن شوقا
إلى حشيشي ميتى ميشي
إسأل مجرب زى حالاتي .. حشاش قِراري يسفخ يوماتي
خمسين جرّاية .. ستين .. سبعين
ها .. يا مرحب
صدّق و آمن بالذي خلقها .. و قال كوني جوزة لكل من يدوقها
ما يسلى أنفاسها بملايين
بس الأكادة حبس و ظلومة .. يكفينا شرّك يا دي الحكومة
أول ما نسمع زنة ناموسة .. تبص تلقى كل الشخوصة
إكسبريسات راحم طايرين
ها ها هأ .. يا مرحب
هو إحنا يعني علشان غلابة .. لا بتوع قراية و لا كتابة
تهينونا؟ فلتحيا التفانين
كان يبقى شنبي من غير مؤاخذة .. على كلب رومي ولا على معزة
أول ما تنده و تقول يا قُرقُر .. آجي مشمّر من غير تقُرقُر
هو ابن مصر حيخاف من مين؟
ها .. يا مرحب
ورينا أجدع بيه ولا باشا .. يقدر يعايب ع الحشاشة
فشر يا دقدق .. صلاة ع الزين
و أقولك الحق يوم ما نلقى .. بلادنا طبّت في أي زنقة
يحرم علينا شربك يا جوزة .. روحي و انت طالقة مالكيشي عوزة
دي مصر عايزة جماعة فايقين .. يا مرحب
---
كلمات: بديع خيري
ألحان: سيد درويش 
-----
من ارشيف راديو مصرفون 

الشيخ زكريا احمد - الحشاشين (التحفجية

مونولوج  لثريا حلمي كلمات فتحي قورة وألحان علي إسماعيل 
وهو عبارة عن تلت فوازير وفعلا فتحي قورة بيأكد اسم الأغنية اللي هو لو راجل حلها..
مقال المونولوج الفكاهي: الميلاد، والتأميم، والاحتضار
https://goo.gl/bAX5i5

د. حسن عبدالحافظ

ثريا حلمي - إن كنت نبيه للغاية

youtube.com/watch?v=rtStCfGt47w

نجاة الصغيرة ( قالوا ) , وأرق أنغام العبقري بليغ حمدي

المحتويات:

عبدالفتاح ضرغام - وصف عايدة
عزيز مرقة - مين قالك
ليلي بونيش - أنا في الحب
Egyptian Project - سقاني الغرام
نجاة - دوّارين في الشوارع
مدحت صالح - عينيكي سكة سفر
محسن محي الدين - حدوتة مصرية
محمد عبد المطلب - في قلبي غرام
عبد الفتاح ضرغام - التيمة
تامر أبو غزالة - حب
ليل وعين - وكأني من حقي أحضنك
The Synaptik - Ritalin
أحمد قطليش (صوت) - خايمي سابينس - إلى جانبي عندما يعضني الغضب
عبد الفتاح ضرغام - ما يكنّه عبدالفتاح لعايّدة
لطفي بوشناق - أنا في سبيل الله
ياسين التهامي - تمكّن مني الحب
فرقة ابن عربي - عذِّب بما شئت
Celine (Before Sunset) - Waltz Song
أحمد قطليش (صوت) - الشاعر أنسي الحاج - أخاف أن أعرف
Pink Floyd - Wish You Were Here
جورج وسوف - روحي يا نسمة

يمكن يا نفسي هتتراضي - عمّار الشريعي

anas ahmed

Recent comments

ashrakat rady

Related tracks