ساعات تبقي عاوز تكتب حاجة .. وتطلع حجة تانية خالث
... 
دي بمناسبة عيد ميلاد أولادي الإتنين 
عبدالله وعلي
26-9-2013
.................
ويا بابا أنا بكبر أهو
ليه قلقان؟؟؟
وانا هقلق ليه يا حبيبي!!
...
بس أنا قلقان
عايش بحلم والحلم جنان
خف برجلك بس شوية
دقة قلبك صافية بريئة
ليه بتسرع.. ؟؟
نفسك تكبر!!!
وإنت بطهرك أحلي حقيقة
عمال تسأل ..
نفسك تعرف
اه يا وليدي لما هتعرف
إن الناس مش دايما بابا
وإن كتير في العمر ديابة
إيه راح تعمل ؟؟
راح تتندم ..؟!!
ولا هتصرخ وتقول يا آبا؟؟
ولا هتحلم زي ببكره ؟؟
نسمة حب وصفا وميدان
.....
زود دبة رجلك خطوة كمان
زود خوفي وقلقي الخيبان 
مش بإيديا أكون قلقان..
بس أنا قلقان
.....
ترجع فرحة صوتك تعلي
أنا نفسي أكبر
ليه قلقان؟؟
أقلق ليه يا حبيبي؟؟
مش قلقان!!
..
بكدب أيوه عليك 
أصل أنا قلقان
..
أعمل إيه لما إنت بتكبر ؟؟
وفي ضل الحلم المتكسر
إيدي بتتقل
وعمري بيقصر
ويوم راح أسيبك 
تشحت حضن ابوك مع غيري
وأنا ما شبعتش فيك أحضان
.......
نفسي أشوفك حاجة كبيرة
وخايف تكبر
 وسط الدنيا المسعورة
وخايف تعلي معاك الحيرة
وانت بتكبر
وافضل جوه عيونك صورة
مجرد صورة
وانت في قلبي اطهر صورة
إوعاك تكدب
إوعاك تكبر جواك  غيرة
واوعي عنيك ترجع مكسورة
وانت بتلعن غدر الأحزان
إكبر عالي الهمة وواقف
عودك  ناشف
وقلبك دايما صافي وشايف
مهما بيصرخ
غدر الزمن الخزيان
.....
إكبر يا بني كمان وكمان
أنا راح أعاند إيه ف عنيك
وإنت بتكبر غصب عني
ومش بإديك
وأنا  قلقان
إكبر يا بني كمان وكمان
شايفك كلك مني
لما بتحبي
واما بتشكي
وأما بتبكي 
وأما بتزعل مني كمان
إكبر يا بني كمان وكمان
زود خوفي وقلقي عليك 
وانا بعنيك
زاد العمر حنان
إكبر يا بني كمان وكمان
هكتم قلقي ف جوفي 
واكسر حزني وهمي وخوفي
ومها أكون قلقان
ضحكة عينك 
وضي جبينك 
بيخلوني أكون فرحان
....

Ashraf Mady 1