شعر

قصيدة : يا عاشقين اتجمّعوا جنب الدفا
كلمات وإلقاء : مايكل عادل
إهداء : للاجئين والمحرومين من الحق حتى في الهروب

بسم الإله
خالق وطّننا والحياة
بسم الشعوب والناس ولقمة العيش الحلال
بسم الجبال
بسم المزارع
والشوارع
والمَطَر
بسم المطارح
والمسارح
والخَطَر
بسم اللي عاشوا دفيانين وقت الشتا
بسم اللي ماتوا بردانين
وسط العراء
وسط الحَجَر
بسم الطوفان اللي هايقلب كل شيء
بسم الزمايل في المعارك والطريق
يا عاشقين وجه النبي
صلّوا عليه
يا عاشقين
واستعطفوا قلب الشتا ع اللاجئين
والغلبانين
والمحرومين
م الحق حتى في الهروب
قولوا لأطنان الجليد فوق القلوب
تنزل سلام
تحمل رسالة دفيانين من قلبنا
قولوا لأبناء العراء
يستحملوا
قولوا لسكّان العراق
أن يُمهلوا
قلب الحياة مهلة سنين
فوق السنين
يمكن يداوي جرح كل المحرومين
يمكن تعود الأرض
يمكن بعد حين
يا عاشقين وجه النبي
سمّوا على اللي يموت بضربة من البارود
صلّوا على المقتول بجوعه
واللي بردان من عهود

بسم الحياة والمغفرة
والعفو وقت المقدرة
بسم اللي ساكنين الشوارع
والمزارع
والنجوع
بسم اللي سايبين البنادق
والخنادق
والربوع
يا عاشقين وجه النبي
إدعوا الإله
يكفينا شرّ الأجنبي
إدعوا وناجوا في الصلاة
قلب الحياة يعرف معاني الطبطبة
على قلب عيّل كان مُناه
يعرف ملذّات الحياة
إدعوا ف صلاتكم كُل حين
للمحرومين
يلقوا مكانهم في قلوب المدّعين
يلقوا مكانهم جوّة صورة مع فلانة
جنب ذلك ولّا ذاك
يا عاشقين اتجمّعوا جنب الدفا
جانب نيران شعلة غضب
من قلب محروم مـ الحياة
ردّوا الندا
من ده و ده
حاوطوا بقلوبكم كُل حين
اللاجئين
والمحرومين
والأفئدة
كُل ذنوبها إنها
خايفة تموت
متجمّدة


يا عاشقين إتجمّعوا جنب الدفا | مايكل عادل

هيحزّموك زي الجنيه ف الأستك
هيسيبولك الفُتات
و يبيعولك الأمل ف الإعلانات
و الهجرة لبلاد البلاستيك
و ف خطبة الجمعة عن الجنة
و قُولِة استنى.. فات الكتير هانت خلاص
لحد ما خيل الحكومة..
 يدوسه عَجَل الميكروباص
 النظام العالمي بيقتل
أوقات كتير ..
من غير رصاص
الهوا ..
هيحَصّل المَيّة اللي بقت ماركات
تعددية تعني.. تعدد الشركات
حرية تعني حق فتح القفص ..
على الناس اللي ملهاش باب
الأخطبوط الرأسمالي اتساب
على الناس اللي ملهاش حظ
على الناس اللي ملهاش فرص
حياتك 
مهمة لبياعين الحلم 
وفاتك
 مهمة لبياعين القُرَص
حسابك حتى في قبرك مهم
رخصة الجنة مهمة لبياعين الرُخَص
و لبياعين الدين 
و لبياعين الآخرة اللي هتنصف المساكين
 "العالم بيتطوّر"
يمشي إسم مسرحية..
أما الحقيقة المضحكة المُبكيّة..
العصاية اللي بتوقّف و بتدوّر..
بتمشي..
من إيد صحاب الجنة..
لصباع صحاب البندقية..
لجيوب صحاب البنك...
دم الغلابة بيتحرق ف التانك...
شامم ريحتهم و انتا بتفوّل...
الغرب هيموّل..
إعمار ِبيار النفط..
لضمان زيادة منسوبات الشفط...
و ضمان بقائك عبد متسوّل...
يا زميل الكوكب المنكوب..
رَكب الحضارة ماشي بالمقلوب...
يا زميل المنطقة المنكوبة...
رَكب الحضارة كان لازم له ركوبة...
العالم بيتطوّر...
و انتا شمعة بتتحرق علشان ..
برج التجارة ينوّر..
..العصاية هي هي و شكلها بيتحول
العالم بيتغوّل
و انتا واقف ف وش الطيارات بالطوبة.. هتعيش حمار و تموت حمار...
أخرك تحس بإنتصار لما...
بتولّع الأعلام..
و تدوس على صورة إصحاب الدولار و القرار بالجزمة..
 القناة ..في نشرة الأخبار.. 
هيقولوا عنك فوضوي و قاتل..
نفس القناة وقت اللزوم ..
هتطلّعك مقتول و بتناضل..
فيه ناس كتيرة أكل عيشها الأزمة..
و ده عيبه..
إن هذا العالم صوته من جيبه.
و مفيش حقيقة صعب تتأوّل..
و دي ناس تعرف تبيع الآه
زي ما بتعرف تبيع اللأ 
الميديا بائع حق...
متجول..
بشرى لابناء العالم التالت م العالم الأول
بشري لابناء العالم الهمجي
م العالم الإنسان
العالم الحر اللي ما بيضربش ف المليان
بس بيجوّع بلاد لحد الموت
القاتل الشيك المحترف
 أبو طلق من غير صوت
فيه الجيوش ما بقوش
 لابسين هدوم ميري
و الطيارات ما بقتش بتوزع منشورات اليأس
و البنوك مش هيسيبوك تتحبس ...بالعكس
النهارده حاطط إعلانات ع التاكس
علشان عليه أقساط
بكره تتعلق على هدومك 
زي اللعيبة ف الماتشات
عالم جديد 
هتخشه بمزاجك قبل ما نزُقّك
الكهنة فيه لابسين بدل و كرافتات
هيأكِّلوك الحقيقة بمعلقة ف بقك 
و كسر حُقّك ياللي مش عايز
عالم ديمقراطي رأسمالي سعيد
الشركة فيه اقوى من الاوطان
غضبان ؟...أكيد غضبان
مربوط ف ساقية و بتجري في مكانك
مسجون و مش عارف وش سجّانك
عايز تخبّط كوبايات الحبس ع القضبان لكن هتعمل إيه ...معذور
أمريكا عملت سجن من غير سور
أمريكا رابطة الناس ف بعضيهم
أمريكا رابطة الناس و مربطّاك بيهم
تدّن في مالطا قد ما هتدّن
أمريكا هتفضل بتحب البشر جدا...
و بتعمل جِميل فيهم..
فيها الخير يا هل ترى
 ولّا فيها فلوس؟
أمريكا فيها الحلم
و بلادنا فيها كابوس
الناس تخاف
امريكا تحميهم
الناس تجوع
امريكا تديهم
تِكسي بالإيد اليمين اللاجئين 
بعد ما إيديها الشمال تعرّيهم
شركة بتهِدّ البلاد
 و شركة تبنيهم
شركة بتبيع السلاح
و شركة بتطبطب على اللي يموت
العالم بيتقسّم دول
العالم بيتقسّم بيوت
العالم بيتقسم لبني آدم
و لبنكنوت
مكتوب على شهود البلاد الممسوحين بأستيكة
أنتَ حر
ما لم تضر
أمريكا



www.facebook.com/Mostfa.Ibrahim

هندسة صوتية : رفيق عدلى
One Take Studio

البنكنوت - مصطفى إبراهيم

شَرع التسالي- بصوت فؤاد حداد

من ديوان - "نور الخيال و صنع الأجيال"

ياسامعين : أبناء بلد واحده

تحت السما الواحده وياما جرى

مرت سنين ع الدنيا متقدره

الغرب سماها العصور الوسيطه

ونظر وقال كان الزمن مظلم

أما الحقيقة البسيطة

بتقول فى دار الشرق

مهما جرى ومهما يجرا

من أول تاريخ الهجرة

كان عندى فجر أنشق

نوره فى عين الجبارين مؤلم

حتى اذا ما ألتقوا بالفارس المسلم

عرفوا الحقيقة وعظموا فارس

صلب القوام والدرع تحت العمامة

حتى اذا مانزل من السرج ونصب خيمة

سهل الدموع الا أبتسام الراضي

مايل بجسمه لأستماع الأراضي

وعلى العيدان الطرية

ايديه نديه كيف أيدين الفارس الغارس

هذا الذى رد الثغور البهيه

وبنى باسماء الأئمة المدارس

وحضر مع الخصم لمقام القاضي

وأعاد الى الأم الصليبيه ابنها

أما عن المنكر نهى

وأما فى ليلة شجن بالشام

حلف يمين أفضل له

يفقد ولاده ومؤنسته ولا يهدم

هذا صلاح الدين فتى مقدم

حامل لواء الفتيه والأجناد

فوق الخيول المسرجات الجياد

وهى ليله من ليالى ربيع

أو هى ليله من ليالى جماد

القاهرة أولى رايات الجميع

عند المقطم كبرت للجهاد

يارب تشفى الصدور

يارب توفى الأمهات الندور

يارب تمنع عن ولادنا الويل

زاحفين على السواحل سلاسل نور

والبحر من دمياط يحيي السيل

واترتبت ع الخطوة رجلين الشهور

والصبر أملك من عنان الخيل

حتما على قدام وحتما ندور

والحصن فى عكة عظيم الليل

يلقى الآذان بيشق فوق السور

الحق ياولاد العرب منصور

فى كل أرض اتكلمت عربى.

************

الأرض بتتكلم عربى وقول الله

ان الفجر لمن صلاه

ماتطولش معاك الآه

الأرض بتتكلم عربى

***

الأرض بتتكلم عربى ومن حطين

بترد على قدس فلسطين

أصللك ميه وأصلك طين

الأرض بتتكلم عربى

***

الأرض بتتكلم عربى سبل وكروم

تجرى اللقمه على المحروم

ما تثبتش حصون الروم

الأرض بتتكلم عربى

***

الأرض بتتكلم عربى ياخيال

بيعد سيفك أم عيال

ظهرك ياما من الأجيال

الأرض بتتكلم عربى

***

الأرض بتتكلم عربى حتى البور

بنت الساقيه والطنبور

حتى فى بطون الأرض قبور

الأرض بتتكلم عربى

***

الأرض بتتكلم عربى بوجد وشوق

الفرع اللى يهم لفوق

لأجل الجدر يشم الضوء

الأرض بتتكلم عربى

***

الأرض بتتكلم عربى جدورها جدود

مد اتوسع زى العود

انت الباكر والمولود

الأرض بتتكلم عربى

***

الأرض بتتكلم عربى ولا ترتاح

واصل كالسيل المجتاح

فتحك ياعبد الفتاح

الأرض بتتكلم عربى

لما العواطف تكتمل بالعقل
الأرض أطيب من مزاج الحليب
والأرض هى الحاكمة بالعدل
بين ابنها والمستبد الغريب
الجبارين اللى احتموا بالصليب
داسوا على عيسى وكتاب المحبة
عملوا الدمار والقتل والتخريب
والأرض صنعتها الأمل والبشاير
والشمس دوّاره عليها تشاور
تاخد وتدى فى خيال الشاعر
تلقاه عجب فى الدنيا هلل وراج
فى الشام ومصر تنادت الأبراج
الفتح تم فى ليلة المعراج
صلوا على طه الرسول الحبيب
أفتح أيدىَّ لفوق والاقى المجيب
يا قاهره نجومك ملاليه
فيها الهدايه لآخر المعمور
أما رياحك حامله ليه
صوت المرتل فى آيات النور:
” نصرٌ من الله وفتحٌ قريب “

الأرض بتتكلم عربي - بصوت فؤاد حداد

مايكل عادل - فوبيا الأمل

محمد إبراهيم - 24 ساعة

أحمد النجار - رقم غريب

البحر بيضحك ليه

حسابي على الفيسبوك
www.facebook.com/ramywafapoet/
حسابي على الانستجرام
www.instagram.com/ramywafapoet/
حسابي على التيكتوك
tiktok.com/@ramy.wafa

رامي وفا | غاوون

أحمدالطحان | مع انه كان نص ساعه

احمد الطحان_رباعيات

مايهمش ..
قالها المِتهمش 
أول ما اتقال له : يا مِتهمش ..

مايهمش ..
قالها المتكلبش
في السجن لصاحبه المسجون ..

قالها 
الدكتور للمجنون 
علشان مايحسش بالربكة ..
قاله : إن العالم مجانين 
أما العاقلين جوة الخانكة ..

مايهمش ..
قالها الجعانين 
لصحاب العالم و الشركة ..

قالها اللي ماخشش ميادين ..
و ماشافش الموت وسط العركة ..

قالها 
الأدباء لما الناس
مابقتش تآمن بكتابة ..

قالها 
النسناس للنسناس 
بعد انتخابات ملك الغابة ..

قالها 
المتداس للمتداس
ساعة ما داستهم دبابة ..

مايهمش ..
قالها القناص
لما القناص قاله : غلابة ..
قالها 
و بيشاور ع الكاس 
" الخمرة حلال عند الميديا " ..

مايهمش 
قالها النشال 
لما المحفظة كانت فاضية ..

قالها 
المنشول لما اتقال 
" الحق !! محفظتك مسروقة " ..

قالها 
أما إيديه كات محروقة 
" مالناش أجازات يا فواعلية " ..

قالها السهران في نباطشية ..
قالها الهربان م البلدية ..
قالها العيان للمداوية ..
ساعة ما قالوله : ماهتخفش ..

الكل بيعشق (مايهمش) ..
عايش لو كان .. أو مقتول ..
الكل بيعمل بنهاوي ..

علشان كدا مثلا لو ناوي ..
تبعت شكاويك للمسئول ..
توصف له الوضع المأساوي ..
و توضح كل المتنغمش ..

فماتستغربش أما يقول :

بما إن الشعب اللي اختارني ..
بيقول (مايهمش) على طول ..
انا برضو هقولك 
مايهمش ..
..

#حسام_ابراهيم

مايهمش - حسام ابراهيم

الياسين 

السن..  عام ورا عام من الف عام و ل ألف عام قدام

عنواني..  مصر

الديانة.. رزق رباني

.إن كنت مسلم ولا نصراني

و الأسم..  محمود الكيلاني 

في رواية اخرى قالوا اسمي ياسين

المهنة.. شاعر مهندس بس اي كلام

الظرف..  هي البهية بنت عم حنين

مليان بهم يملا عين البحر و الايام

و فقدت نظري من غياب الشمس




خفاش بخبط في الحيطان أسمنت

عايش سنين مَرمي فِ صحاري ربنا 

الكون شِتا و الدنيا برق و رعد

واقف و باصص للسما من غير هدوم عريان

أخرس بـ اشاور من بعيد و البشر عِميان
بـ اجري بِـعِزم ما فيّا على صاحبي

أتاري صاحبي من سنين مانيكان


مُقرِئ  فقد صوته-

رسام و رَعشة غبيّة عايشة معاه

رجلين بيانو إيطالي مَبتورة

ملكة جمال صابها البَرَص
حاكم و بـ يخونه الحَرَس

-و كنيسة مش لاقية الجَرَس


و أنا لسّة بـ استنى الفُرَص

و إيديا جوّه المَصيَدة بـ تشُر دم و حِبر 
و سنين دراسة
و سنين فُراق و مُجلدات
وسنين تعاطي مُخدرات و بنات

و ميدان و كَر و فَر على إفيهات

و عملنا للموت أراجوزات

صَلِّينا في قلوب البارات
مُحرمات على دَروّشة
مُحللات على فرفشة
مُسكنات على مَحشَشَة
و سنين عَرَق على إعدامات
كَسّرت كل الإعلانات

و كتبت "يسقط النظام"

ماسقطش غيري


بعد كل الدَعك دة

و إيديا جوّه المَصيَدة بـ تشُر دم

مِسِكت إيدك قولتلك هانعيش جديد

عندي لسّة ألف إيد

رَميت بِـ نَفْسي جوّه صف عبيد

رايح محاجر شركة في الدقي

و بـدق فيّا و بـصنع الأصنام

نَصَبولي خَيَّه و رَموني عضم لـ ديب


رغم كل الدعك ده 

.إنسان 

بغضب بدون تجريح 

و صريح بعاتب

.بس بالتلميح



إسمي "الياسين" إبن السنين الهَم
و إيديا جوّه المَصيَدة بـ تشُر دم
و إنتي "البهيّة" صاحبة الموقف
إنتي إللي جايّة من بعيد بـ الشال
وراكي عسكر وسط حراميّة
من كل كوم الحرام إنتي الحلال
و إنتوا العيال بـ تخونوا بعض عشان

لُقمة حلوة و علبة الدُخان


مُقرِئ فقد صوته -

قرأ بـ عِنيه


رسام ورعشة غبية عايشة معاه
رَسَم بـ خياله مش بـ إيديه

رَسَم نِيّه


رجلين بيانو إيطالي مَبتورة

جابوله رِجل صناعيّة


ملكة جمال صابها البَرَص

نِزِل عيسى شافها و إتصَلَب تاني


حاكم و بـ يخونه الحَرَس

عادي الشعب بِـ يعاني


كنيسة مش لاقية الجَرَس
رِجِع عيسى و عَلَق الجَرَس بـ إيديه

خانوه وإتصَلَب تالت ...


قوانين القدر بتقول

ربع المحاولة بتبطل المفعول 

و بتلهم المبدع قصيدة

بتنجح الفاشل 

و تنصر الصعلوك على المسئول

قوانين القدر بتقول 

نص دعوة بتنقذ المقتول

و بتلعن القاتل 

و بتسخط الحاكم لمسخ


اسمي الياسين 

و الناس من هول الحياة "

"موتى على قيد الحياة


صديق لشابلن

و في كربلاء 

كنت انا سيف الحسين


أسمي الياسين 

فلاح من عصر مصري قديم 

لابس كوفية و جزمة سيفتي و جينس

رغم الظروف انا برضو لسة برنس

على اي قهوة في مصر بشرب شاي

صاحب حقيقة و مراقب التواريخ

ربك خلقني خلط طين بخيال


اسمي الياسين 

لعنة تمرد عايشة في الاجيال .


-محمود الكيلاني -

-الياسين "  -محمود الكيلاني

صلاح جاهين - الشاى باللبن

آكونت الفيسبوك :

www.facebook.com/ahmedsaid14

كلام هنقولُه في الذكرى - أحمد سعيد بكير

 -------------(م)-------------- 
ماسبيرو أخطر م الرصاص و القصر
ملّى عنيك بالدم...قبل الطلوع قدام
ما تسيبش جيشك تِقسمه الأعلام
مش كل مين جنبك....جواه بيهتف مصر
 
--------------(ا)---------------
الوقفة جنب النار ..بتقلل الدخان
- إهتف هتاف إبن المكان و الظرف
- إضرب بعزمك ... أو ما تضربشى
إرجع بضهرك ... أو ما تهربشى
إمسك عصاية ثورتك م الطرف
التاريخ ضمن الغنايم ..و بيكتبه الكسبان
 
 
 
--------------(ن)--------------
نقى دايما طوب صغير حدفتك توصل بعيد
نفترق ساعة المطاردات ..أربعات
نشّن الباراشوت ناحية الصف العريض
نجرى فجأة.. نردّ فجأة.. نص قوتنا المفاجأة
ندّم اللى يعورك........و إقطعله إيد
 
--------------(ي)--------------
يؤتَى الحِذر من مكمنُه
يأتِى الغبى باللص ثم يحلّفه
يؤتَى الهتاف... رَّجاً بممن يَهتِفه
- يؤتَى الجدع... قلبا بمما إتجَدعنُه
 
--------------(ف)--------------
فّرق ما بين....الجرأة و القلب الحديد... و الرمى جوا التهلكة
فتش بإيد ع المستفيد ..و بإيد عن الصاحب الجدع
فتح اذا الناس غمضت....غمض إذا نظرك خدع
فرّغ عياطك ع الصحاب... دم و خميرة... مش بكا
 
--------------(س)--------------
 
سمى الحاجات دى بإسمها...الكدب... و الخوف... و الخيانة
سجادة المسامير... تتحط ع الناصية ...غطّيها بالدخان ..ولّع قصادها كاوتش
سد الطريق لورا علشان ما تترددش
سيب باب لجيشهم يهربوا منه
سلّم رايات الحلم لحد من سِنُّه
سلّم قراركوا لأكتر كفّ عرقانة
 
--------------(ت)--------------
تبّت يدا من ساب رفاق المعركة بطولهم
تمن القضية اللى اندفع مبقاش يجوز يرجع
تتعب تبص ف عين.. إصحابك الطايرة....شوف مين من الآخر دفع....لو زيهم... إدفع
تلت الرصاص نحو العدو... .تلتينه للخاين..الطعنة جاية من هنا مش من هناك
تعب النهاردة غير تعب بكرة....الوقت مش دايما معاك.
تحتك فيه ناس عاوزة الأمل...مش عاوزه؟... سيبهولهم
 
--------------( و )--------------
وسّع الجبهة لو إنتوا كتير... و .ضّيقها لو إنتوا أقل
ولع شماريخ وسطكوا اول ما تلقى الرتم قل
وقّع لمض كل العواميد اللى كاشفة ناحيتك
وّدى الإعاشة قبل ما تدوق لقمتك
وجّب مع السكان و أهل المنطقة...حتى لو فاهمين غلط...فيه ناس كتير متلخبطة ...إكسب عدد ....و إكسب غطا
وزع عيونك فوق و تحت....و خاف من اللى يصورك
وطّى و عينك باصّة فوق ع الطوب و إلا يعوّرك
وقّف إذا سحبوك على شارع طويل
وفّر بديل
وافق على الهدنة إذا سحبوا الكلاب...لو سابوا خليك انتا آخر حد ساب
واحد بيفرق ف العدد جدا
- و عشان كده.... أول ما تلقى إن الصفوف ناقصاك -
 وسع مكانك... للى جاى وراك


https://www.facebook.com/Mostfa.Ibrahim


موسيقى و هندسة صوتية : رفيق عدلى
تم التسجيل بأستوديو بداية 
شكر خاص لأحمد العايدى 



المانيفستو - مصطفى إبراهيم

الموسيقى ترافق أرواحنا وتجتاز معنا مراحل الحياة 
تشاطرنا الأرزاء والأفراح وتساهمنا السّرَّاء والضّرَّاء 
و تقوم كالشَّاهد في أيام مسرّتنا وكقريبٍ شفيقٍ في أيام شقائنا
جبران خليل جبران-

أحمد النجار - رقم غريب

Ayman Ehab

Related tracks