Lyrics : Vayalar
Vocals : Madhusoodhanan Nair

ആരണ്യാന്തരഗഹ്വരോദരതപ-
സ്ഥാനങ്ങളില്‍ , സൈന്ധവോ-
ദാരശ്യാമമനോഭിരാമപുളിനോപാന്ത പ്രദേശങ്ങളില്‍ 
ആരന്തര്‍മ്മുഖപ്രഞ്ചപരിണാ-
മോത്ഭിന്ന സര്ഗ്ഗക്രിയാ 
സാരം തേടിയലഞ്ഞൂ പണ്ടവരിലെ-
ചൈതന്യമെന്‍ ദര്‍ശനം .

ആ മന്‍ മെത്തകളാറ്റുനോറ്റ മധുര-
സ്വപ്നങ്ങളില്‍ , ജീവിത-
പ്രേമം പാടിയ സാമഗാനലഹരീ-
ഹര്‍ഷാഞ്ചിതാത്മാക്കളായ്,
ഹാ, മന്വന്തരഭാവശില്പികളെനി-
ക്കെന്നേക്കുമായ് തന്നതാ-
ണോമല്‍ കാര്‍ത്തിക നെയ്‌വിളക്കെരിയുമീ-
യേകാന്തയാഗാശ്രമം‌.

നാദം‌ ശൂന്യതയിങ്കലാദ്യമമൃതം‌
വര്‍ഷിച്ച നാളില്‍ , ഗതോ-
ന്മാദം‌ വിശ്വ പദാര്‍ത്ഥ ശാലയൊരിട-
ത്തൊന്നായ് തുടിച്ചീടവേ
ആ ദാഹിച്ചു വിടര്‍ന്ന ജീവകലികാ-
ജാലങ്ങളില്‍ , കാലമേ
നീ ദര്‍ശിച്ച രസാനുഭൂതി പകരൂ
മന്‍ പാന പാത്രങ്ങളില്‍ 
ഓരോ ജീവകണത്തിനുള്ളിലുമുണര്‍ -
ന്നുദ്ദീപ്തമായ്, ധര്‍മ്മ സംസ്-
കാരോപാസനശക്റിയായ്,ചിരതപ-
സങ്കല്‍പ്പ സങ്കേതമായ്,
ഓരോ മാസ്മരലോകവുമുണ്ടതിലെനി-
ക്കെന്നന്തരാത്മാവിലെ-
ത്തേരോടിക്കണ,മെന്റെ കാവ്യകലയെ-
ക്കൊണ്ടാകുവോളം വരെ!

വാളല്ലെന്‍ സമരായുധം‌,ത്ധണത്ധണ-
ധ്വാനം മുഴക്കീടുവാ-
നാളല്ലെന്‍ കരവാളു വിറ്റൊരു മണി-
പൊന്‍ വീണ വാങ്ങിച്ചു ഞാന്‍ !
താളം‌ രാഗലയശ്രുതിസ്വരമിവയ്-
ക്കല്ലാതെയൊന്നിന്നുമി-
ന്നോലക്കുത്തുകള്‍ തീര്‍ക്കുവാന്‍ കഴിയുകി-
ല്ലെൻ പ്രേമതീര്തങ്ങളില്‍ !

ഓണക്കോടി ഞൊറിഞ്ഞുടുത്തൂ കമുകിന്‍ 
പൊന്‍ പൂക്കുല ചാര്ത്തുമായി 
പ്രാണപ്രേയസി, കാവ്യകന്യ, കവിള-
ത്തൊന്നുമ്മ വച്ചീടവേ..
വീണക്കംബികള്‍ മീട്ടി, മാനവമനോ-
രാജ്യങ്ങളില്‍ ചെന്നൂ ഞാന്‍ ;
നാണത്തിന്റെ കിളുന്നുകള്‍ക്കു നിറയേ –
പ്പാദസരം നല്‍കുവാന്‍ 

കാടത്തത്തെ മനസ്സിലിട്ട കവിയായ്
മാറ്റുന്ന വാല്മീകമു;
ണ്ടോടപ്പുലുക്കുഴലിന്റെ ഗീതയെഴുതി-
സ്സൂക്ഷിച്ച പൊന്നോലയും;
കോടക്കാര്‍ന്നിര കൊണ്ടുവന്ന മനുജാത്-
മാവിന്റെ കണ്ണീരുമായ്
മൂടല്‍ മഞ്ഞില്‍ മയങ്ങുമെന്നുമിവിടെ-
പ്പൂക്കും വന ജ്യോസ്നകള്‍ !

ഞാനിജ്ജാലക വാതിലിന്‍ ചെറുമുള-
തണ്ടില്‍ ഞൊറിഞ്ഞിട്ടതാ-
ണീ നീല തുകില്‍ ശാരദേന്ദുകലയെ-
പ്പാവാട ചാര്തിക്കുവാന്‍ 
ഹാ, നിത്യം ചിറകിട്ടടിച്ചു ചിതറി-
ക്കീറിപ്പറപ്പിച്ചുവോ
ഞാനിസ്സര്‍ഗ്ഗതപസ്സമാധിയിലിരി-
ക്കുമ്പോള്‍ കൊടുങ്കാറ്റുകള്‍ 

കോടക്കാറ്റിലഴിഞ്ഞുലഞ്ഞ ചിടയും
ചിക്കിക്കിടന്നീടുമാ-
ക്കാടങ്ങിങു ചവച്ചെറിഞ്ഞ തളിരും പൂവും പിടഞ്ഞീടവേ
നാടന്ത:പ്രഹരങ്ങളേറ്റു കിടിലം-
കൊള്കെ , മുലപ്പാലുമായ്
പാടം‌ നീന്തി വരുന്ന പൌര്ന്നമി , നിന-
ക്കാവട്ടെ ഗീതാഞ്ജലി.

Buddha Art Cafe

Popular tracks