#انا_لما_هموت 

"عارف ..
أنا لما هموت 
ولا شئ راح ينقص في غيابي
كام حد يجوز راح يشتاقلي 
و الباقي انا في عنيهم عادي 
الدنيا هتمشي كما السابق
و العالم هيكمل سيرة 
والشمس هتطلع من المشرق
و الكل بيسعى  لتدبيرة 
أوقات بتخيل تأبيني ..
أب و أمين 
و تلاته اخوات مش من دمي 
و شقيقتي في جمب بتدعيلي 
يمكن هيكون في اتنين اصحاب 
انا عشت حياتي بطولها وحيد
فماحدش ييجي يعزيني 
أنا كنت هناك ..
عدت أيام 
و انا زي التلج على سريري 
ولا حد يخبط على بابي
ولا واحد رن يشوف فيني 
كتبوني غياب
و انا كنت حضور من كام زفه 
ولا حد أشتاق 
اتسابت وحيد و بدون شفقه 
سكرات الموت بتكتفني ..
جسمي بيبرد 
رجلي بتتشد 
روحي بتطلع 
و الدمع بينزف ع الخد 
آخر أنفاسي بتهجرني 
الضلمه استولت على عيني 
و العفن أهو عشش في جبيني
لوني بيتغير من أبيض لأزرق غامق 
و ببص عليا بشوف جثه 
شبه الأفلام 
بوقها مفتوح وشها باهت 
في عنيها كلام 
و فوقيها جواب و معاه ورده 
فاتت أيام .. 
و ماحدش حس ان انا غايب 
ولا اسمي اتقال صدفه مابينهم 
و ياريتهم قالوا واحشني فلان 
دانا اقوى دليل كان لوجودي 
ريحة موتى  
كلها أوهام 
و انا جمبك عايش اهو ياسيدي
لكن عارف
انا لما هموت
هيكون اليوم ده يوم عيدي " 
#ورده 


https://instagram.com/warda_981998?igshid=dt0a3h17xheh

قصيده "انا لما هموت " #ورده_Dec 11.mp3

#دنيا
"مش عاوز اخسر كل شئ
ولا قادر اجري في السباق
لابسه الحياه توبها العتيق 
بتعزي روحي ع اللي فات 
و بدم بارد تبتسم 
شمتانه ليه في قلبي اللى مات ؟!
عمري اللي ضايع في السكات 
دمعه حنيني و البكا !؟
قلبي اللي عمرة ماشتكا .. سامح كتير 
شال الهموم م الخلق 
هون سنين ع الغير 
يا دنيا ليه بتعذبي روحي البريئه 
و تعلى صوت الكدابين فوق الحقيقه 
و تهتكي عرض الأماني و تؤديها
يا دنيا ليه قاسيه كدا 
ولا فيش طريقه للهدى 
ولا في سبيل ألاقيني فيه 
بتمني روحي بالهنا !
دا منايا يوم أرجع أنا
و ابدأ حياتى من جديد "

#ورده

قصيده "دنيا" , #ورده .mp3

#لكن
" أنا مش عاوز يهديني الكون
دره المكنون 
ولا مال الدنيا 
و كنز قارون 
انا عاوز بس طريق أمشيه 
و يكون سالك ، سهل و مضمون 
أو شخص حنون ، حضنه يساعني 
و يشارك معظم اوقاتي
أو شخص يكون هو حياتى 
أنا نفسي في صاحب يحتاجني 
يهديني أمان 
و بخفه يطبطب على جرحي  
فيزيل الخوف ، و يقول إجمد 
دي الدنيا بلاء 
هتساعك و قت ماتقبلها و ماتبقالهاش 
فبلاش ، تحزن 
**
أنا نفسي في حد يشوف روحي 
و يآمن بيا و بطموحي
و يشوفني جميله و أستاهل 
و ندوبي عيوب بتميزني
هيكون الشخص اللي فايزني 
انا حد وحيد جدا لكن 
موجود للكل 
ألطف من قلب الأم عليك 
بيساع قلبي الدنيا بحالها 
و براح الدنيا مابيساعنيش 
و مايشغلنيش
تفكيري في بكرة و في امبارح 
أو مين بيحب و مين جارح 
انا حد بيحلم بجناحه ، طاير في الكون 
عاقل ، مجنون
بيشوف الدنيا بعين أطفال
ورد و أزهار ، بتلون في ربيعه و رسمه 
فراشات مالين السما حواليه ، بتنادى بإسمه
انا نفس الشخص اللي بيحلم 
و يبات مهزوم
انا شحص سعيد جدا لكن 
جواه مليان كراكيب و خدوش 
عالم بوشوش 
و الوحده أمان رغم سكوتك
و أرحم من حد ،
يقول مالك
انا شخص ابان من برة تمام 
لكن و الله انا من جوه ، إنسان هالك "
#ورده 

القصيده الأقرب لقلبي , قصيده "لكن" #ورده .mp3

#مشاوير

"كل المشاوير 
بتكون وياك قيمة ثانيه 
و الكون دا  يادوب 
من ايدك دي لإيدك التانيه 
و العين عالم و الحب حظوظ 
و انا عوضي بقلبك م الدنيا 
يا ساقيني الحب اشواط اشواط 
يا سفينه بتبحث في الأنقاض 
و بتنقذ اخر نور فيا
قربك علمنى ان المسكين 
اتمسكن بعد ما زال جودك  
دا القلب بيضحك في وجودك
و جفاك سهرنا ليالي طوال
ماتسلم بقا كف جنودك 
دنا حبك علم مواويلي 
ازاي تحتار 
و الشعر عشانك بقا يكتب 
في الهوا اشعار 
و قصيده عمري تكون انت 
و تكون أب و اكون بنتك 
و نلحن سوا تغريد الريح
آخر أيار 
آه يا أقرب ليا من التنهيد 
آه يا قرب وريد 
و وليف القلب و دقاته 
بعرف وياك ان المشاوير
بسنين العمر و أوقاته "

 #ورده 


قصيده "مشاوير" ، #ورده

#ورده شاعرة عاميه 💜🌼

"عزيزي الشعر هحكيلك
بكايا بيوت على نيلك 
و قلبي دكه ع الكورنيش
يروحو الناس يفوت غيرهم
و أنا سارح كما الدراويش "

ward

Popular tracks