
الـــكـــلــــمــــات

من وهو لسه صغير و الجيران بتحلف بيه
المتفوق ، المؤدب ، اللي جامع دنيا و دين
كبر و دخل جامعة و آن أوان تاء التأنيث
يمكن مشافش بورنو بس إتفرج علي ونيس

و رغم طول الرحلة فالوصول بينسي التعب
أخينا لقي أخيرا اللي تحبه و يحبها
دايما كان بيكلمها عن إن التعليم تجهيل
واحد زيه في بلد بتفهم كان زمانله شأن كبير

فهمها حاجات كتير ، في الآخر فهمته 
إن حوا مش لآدم، حوا لفلوسه و شقته
و في عز ما هو حزين ، الأتوبيس وقف في كمين
الظابط قاله "إنزلي" ، نزل ، زقه للأمين 

شاف بطاقته ، بدأ تفتيش ، "إقلعلي الكوتش" ، يا باشا معيش
ممنوعات ، فمتحرجنيش ، "طب جنب إخواتك يا برستيج"
روح بعد يوم طويل ملوش تعازي مقبولة
يمكن حزين من الأول بس نفسه مش مكسورة

كان ممكن يبقي حاجه لو البلد قدرته 
كان ممكن يبقي آدم لو مكانتش حوا سابته
كان ممكن يبقي حاجه ، و كل حاجه رجعته
من طريق كان ماشي فيه مُتجاهل كل اللي بيحبطه (x2)

أخينا في عز الوحده قابل شلة ثانوي اللي 
كانوا خدوا طريق معاكس للى هو فيه بالمللى 
قالوا فُك يابنى وشك وإبدأ واجه الحياه 
واذا كنت مش مُتكيف ، ف العلاج مكيفات 

أخينا خد الرحلة لحد القاع دحرجة 
بس اخينا لسه اخينا ، فـعايش مع نفسه في معركة 
يقع ، يبطل مدة ، تيجى فلوس ، تيجى بكتره
تيجى بفكرة ، تيجى ببودره ، تيجى بقعده ، تيجى في سوسته 

فجأه حوا رجعت لما ابو شقه سابها 
والغريبة حال أخينا الحالى لسبب ما جذبها 
طبعا أجر نفسه ليها روميو بالفلوس 
ونام معاها ضمان لإنه يلاقي لما يعوز 

وزى كل كدبة صعب للآخر نداريها 
عيلة حوا صعايده ، عمر موتها ما يكفيها 
أخينا إتقتل ، هو ميت في الحالتين 
لو كان إنتحر بدرى شويه مكانش مات اتنين 

كان ممكن يبقي حاجه لو البلد قدرته 
كان ممكن يبقي آدم لو مكانتش حوا سابته
كان ممكن يبقي عالم لولا الصحبة عرفته 
على المخدر اللى جاب المخدر المعروف آخرته

كان ممكن يبقي حاجه لو البلد قدرته 
كان ممكن يبقي آدم لو مكانتش حوا سابته
كان ممكن يبقي حاجه ، و كل حاجه رجعته
من طريق كان ماشي فيه مُتجاهل كل اللي بيحبطه
________________________________________­_

A5ina

Written by: El Joker
Music: Free Beat
Vocals: El Joker
Master and mix by: El Joker
© 2016 El Joker

El Joker - A5ina L الجوكر - أخينا

الـــكـــلـــمـــات

عصفوره حكيتلي إنها فى يوم عدت من جنب غرزة
فوجئِت بإن الله والرُسُل والوجود أغلب ما يُذكر
شافت من كل سن كل شكل ، واللى رابطهم
جايين ينسوا الحياه اللى شيلتهم فوق طاقتهم

وقالتلي إنها إتفاجئت فى المدرسه بإن التلاميذ
جايين لكل غرض تتخيله إلا التعليم
بس قالتلى: فى وسط السيرك شوفت طالب علم بجد
منتبه للشرح ، بيكتب ، وملوش أى دعوه بحد

للأسف تانى مره شافت الطالب ده بكِت
كانت طايره جنب قسم صُدفه وفوجئت لما لقت
ظابط بيكهرب الطالب ويقوله علشان تبقى
تكتب "وطن بلا تعذيب" كويس على تيشيرتك

وحكيتلى إنها فى يوم كانت على شجره قدام باب
مستشفى ، شافت دكتور خارج مـ الإستقبال
و واحده ماسكه فيه .. بتقوله: أرجوك ، جوزى بيموت
قالها: وأنا مالي يا ستّي ، هدفعلك من جيبي فلوس ؟

صعب توصف الحياه فى شكل مُعادله فيزيائية
سيمفونية ، كل آله فيها تبانلك عشوائيه
مفيش حال بيدوم ، والتغيير ملوش قانون
لا الوِحِش بيفضل وِحِش ، ولا هدايته شيئ مضمون

العصفوره غابت عنى يومين ، ورجعت بحكايات
منها إن واحد من مجموعة الغرزه مات
وواحد تانى فاق ، قال: يا إخوانّا كفايه نسيان
بس دماغهم أعلى من إنها تستقبل الكلام

وفى شارع لقت خلق بتهتف "تسقط الداخليه"
طارت ورا المُظاهره ، وعند القسم وقفت هىّ
لما لقت كل واحد لابس ميري بيغيره
وياويل اللى كان بيعذب ناس ، وفى ناس حافظين منظره

أما الطالب اللى إتعذب فرد فى مجموعة سلمية
الدرع اللى حمى القسم من الأعمال التخريبية
أول ما إتصاب برصاصه قالت: هيموت من الإهمال
استقبله طبيب حقيقى مخدش نفسه إلا أما فاق

طارت شافت ناس محتاجه تحس بـ الناس المحتاجه
شافت كتير منكرش ، لكن مشافتش كل حاجه
سألتنى عن نظام الكون ، قلتلها: هما دول
كل فرد إختار لنفسه شيئ ،إختار لغيره مليون

صعب توصف الحياه فى شكل مُعادله فيزيائية
سيمفونية ، كل آله فيها تبانلك عشوائيه
مفيش حال بيدوم ، والتغيير ملوش قانون
لا الوِحِش بيفضل وِحِش ، ولا هدايته شيئ مضمون
________________________________________­______________

Symphonia

Written by: El Joker
Music: Free Beat
Vocals: El Joker
Master and mix by: El Joker
© 2016 El Joker

El Joker - Symphonia L الجوكر - سيمفونية

من حضن البيت لـ كف الدنيا ... نقله كبيره
قالوا صعبه ، بس لقيتها مستحيله
آخرك تغير فكره ، مش هتغير التصرُف
دى ناس بتحارب التطرُف بالتطرُف

قولت موجه .. نطيت .. محدش نط
أتارى ده إرتفاع المياه على الشط
والعادى إن انت تغرق شخص ، تنجى شخص جديد
قادر ياخد خطوه تانيه لمركز المُحيط

الواحد ليه من فتره محسش إنه تِعِب
خدى اللى نحّس ، ولا كفك اللى نِعِم ؟
أومال إيه بقينا تُقال أوى ، إنتى مش واخده بالك ؟
مرضاش تتاخدى منى وآخد أيا كان بدالك

بدون شك إختياري ، أنا اللى عارف ناري
إرتفاعي حقي ، وإنت هبوطك إضطراري
دول مش فاهمينى ، ومفيش أمل يفهموا
مفيش شخص عاش قمة إنتصار مذهبه

إنت اللى بتخسّرنى ، أنا اللى بكسب ليك وليا
إنت خطوة الجنون ، أنا الثبات عـ العبقريه
صح ـك بيبقى مُضر ساعات ، والغلط مُفيد
لوم عليا مع إن التناقض فيك

أيامى بينوكيو كانت مناخيره بتطول لو يكدب
أنا مُجرد إنت عاش وضوح أيام الأبيض وإسود
مُذنب ، وميشفعلكش إنك فى الأول كنت بريئ
عمرك ما هتغلب شخص بتبقى هو بالتدريج

مش مهم رأى الأحدث ، المهم رأى الأفضل
فكرك إنت إمبارح رأيه إيه فى إنت النهارده ؟
وهل إنت اللى عايش كل دول إرتحت كده ؟
ولا يادوب أنقذت منك اللى توصل بيه مركبه

خليك مسئول ، مش مُتماشى مع الموجود
إضرب السايب ، وإدى الفرصه للمربوط
ومتقولش مذهب بس .. إحنا مذهبين من مذهب
سيب اللى عاشنا يدى كل حاجه مقاسها

مفيش نظره تكشف دايرة المعارف
مفيش حد سعيد وأنا سعيد لإنى عارف
هو اللى يقول النار فى الآخر طلعت إيه
التواضع ضافلى نُقطه .. درس لينا إحنا الأتنين

إنت اللى بتخسّرنى ، أنا اللى بكسب ليك وليا
إنت خطوة الجنون ، أنا الثبات عـ العبقريه
صح ـك بيبقى مُضر ساعات ، والغلط مُفيد
لوم عليا مع إن التناقض فيك
________________________________________­___

Abyad w Eswed

Written by: El Joker
Music: Free Beat
Vocals: El Joker
Master and mix by: El Joker
© 2016 El Joker
Category
Music

El Joker - Abyad W Eswed L الجوكر - أبيض وأسود

Uploaded by Øsmåñ El Fannan
https://www.facebook.com/ana.osman.11

مهرجان اوكا واورتيجا - العلبه الذهبية

Uploaded by Øsmåñ El Fannan
www.facebook.com/ana.osman.11

صعبة الحياة - عصام كاريكا

Coca'Cola - Etganen
Uploaded by Øsmåñ El Fannan
www.facebook.com/ana.osman.11

Cairokee.Ft.Aida.El-Ayouby.Etganen.ASD

Uploaded by Øsmåñ El Fannan
www.facebook.com/ana.osman.11
01125248057
01201229073

Oka_Ortega_eltangeed_2_fannan-01125248057

مهرجان اللى روحى فيه - اوكا واورتيجا 8%

اغنية عايدة الايوبى وكاريوكى يا الميدان

Android Developer
Whatsapp: 01126024180
Birthday: December 12, 1996

Popular tracks by Osman Ibrahim