Sa Pananampalataya
ni Michael Rey Orlino

Mula sa Kataga II: Antolohiya ng Malikhaing Akda

Sa paglaki mo, anak, hiling ko,
panalangin ko’y hindi mo makilala
ang diyos na walang mata
na di makikita ang lahat ng pagdurusa,
ang diyos na walang bibig
kaya di mautusang tumigil ang delubyo sa daigdig,
ang diyos na bingi
sa ilang misteryo ng panalangin at hiling,
ang diyos na manhid
sa lahat ng sugat at hapis,
ang diyos na di nakatikim
ng tuyo o kaya’y ulam na asin.
Marinig nawa ang panalangin ko,
anak, sa paglaki mo, hiling ko.



earl john Orio