الاسود لون نفوس الناس اللي هنا

لو فشلنا ادينا حاولنا . ده هيدى الامل لغيرنا ع الاقل سيب سجاده لغيرك ف اتجاه القبله

الجوكر💞

سايبة ريحة الخوف ع المخدة وحالفة لية تبعدى
لية تنطى فى موج حلم الطوق وتسيبى مركبى
هنغير اية ؟! بردوا لآ شئ 
افروديت على ضفتين .. نهر حب افلطونى قاسم اليوتيبيا اتنين
سهل تكسر عضم صعب تدى حد كالسيوم
اضطراب دقات القلب معاكى مكنش نقص بوتاسيوم
متقوليش الفترة الجاية هتبعدينى عنك
صدقينى هشوف عنيكى احلى بعد وقوع حواجبك 
مش بجمل الحقيقة وقت نومى جنبها 
ياما شرحتلك جريمة فايدة كرة حبها
اه علمت موناليزا تشوف الدنيا فلسفة !
سبت القلب فى الايموشن مع ان الملاك اختفى
حاطط احتمال ان الكلام مش هيبطلكوا الاذى
لو الى مات مات ع الاقل تيجو العزاء
مش تروحوا تقتلوا الى بعدوا بعدوا وهكذا 
المهدى ياقطر الدجال ركبك لجل ما يوقفك

نقول بس الحقيقة ولا نقول كلام بزيادة .. تكون فرد ف لعبتهم ولا يدمنوا العابك ..
 هتلاقيها ف الحقيقة زى ماتمنتها فى احلامك .. ولا تروحلها الجحيم عشان تهاديها بالتفاحة


نقول بس الحقيقة ولا نقول كلام بزيادة .. تكون فرد ف لعبتهم ولا يدمنوا العابك ..
 هتلاقيها ف الحقيقة زى ماتمنتها فى احلامك .. ولا تروحلها الجحيم عشان تهاديها بالتفاحة

فاكر كل لحظة حلوة راحت تانى مجتش
 فاكر لما قلتلى لآ كداب مبصدقكش
فاكر لما قلت لنفسى خلاص لازم تتوبى
فاكر حُرقة اهلى عليا لآ وكمان فاكر ذنوبى
ويعدى شريط قدام عنيا عن الى عملتة فيها
ضحت عشانى كتير ومضحتش عشانها دقيقة
فاكر ايوة فاكر مش قادر انسى
دانا الى عملتة فيها اترد عليا نكسة
كنت عايزها بس لغاية عمرى ما يوم فرقت معايا 
كنت انا قلم رصاص رامى نفسة ع البراية
بحلم جوا حلم جوا احلام كتيرة
عايش جوا فيلم الصورة فية قديمة

سيما دنيا سيما والمشهد لية بيتكرر
الكنز ملهوش قيمة وانا كنت علية بدور
فاكر هفضل فاكر مهما تفوت عليا سنين
فاكر ضعفى قدام ذنبى لما بقيت مش عارف انا مين 


نقول بس الحقيقة ولا نقول كلام بزيادة .. تكون فرد ف لعبتهم ولا يدمنوا العابك ..
 هتلاقيها ف الحقيقة زى ماتمنتها فى احلامك .. ولا تروحلها الجحيم عشان تهاديها بالتفاحة


نقول بس الحقيقة ولا نقول كلام بزيادة .. تكون فرد ف لعبتهم ولا يدمنوا العابك ..
 هتلاقيها ف الحقيقة زى ماتمنتها فى احلامك .. ولا تروحلها الجحيم عشان تهاديها بالتفاحة

Tofa7et 7awa - El Joker Ft Mohab  الجوكر و مهاب - تفاحة حوا

الجوكر - 2014 - نسعيناتي راب جامد

الجوكر - 2014 - تسعيناتي راب جامد

فولو و اسمع راب بلدك
My Acc : www.facebook.com/OnlyForZamalek1

أسكت - الجوكر

فولو و اسمع راب بلدك
My Acc : www.facebook.com/OnlyForZamalek1


El Joker - W El Oghnia De 7aram | الجوكر - و الأغنية دى حرام

ماسك القلم ، ودى مناسك الألم
آسف حاسس إن أنا ، ندمان إنك شوهتها
بظهورك بس ، ظهرت ليه ؟
كنت إمشى بس ، صلحت ايه ؟
فكرك موناليزا تروح منى كـ جوكر فين ؟!

تروح مطرح ما راحت ، اللى عملته ده لمصلحة
الجزء اللى باقى على اللى باقى من جملة إتصلحت
ماتمنيتش شيئ يتهد ، أعتقد حبيت بجد
مهما بان فى شبه بينى وبينهم ، أنا مش شبه حد "شبح حد"

بس
أوضح مشهد كان ، أكتر مشهد فاضح ساب
أذكى شخص رابح بان ، آخر شخص يلبس تاج
روحى
خدى المهلة كاملة ، فرغى الطاقة الكامنة
أهم حاجة لما تيجى تانى تكونى مآمنه

خايف يطلع ذكائك خانك ، وتكون مش رجعالك
تطلع كانت علامة ، ربك قاصد إنه يوريهالك
تفتكر عينى بتيجى فى عينها كل حياة علشان
لازم أفهم بس إن إحنا عشنا فى كذا مكان وزمان

يمينى جثة فيل ، ده مش المشهد الأخير
مع إنى ماشى مُبتسم وفى ضهرى الواشى على الصليب
يعنى إحنا مكملين ، وهما هيفهموا التشبيه
أصل أكيد هيبقوا جوكريانز زى ما بقينا مسلمين

ياترى كل جسمين كُنا فيهم إتألموا
فكرك مـ المرة الكام عن التكرار بيتكلموا
آه كان ممكن يبقى طفرة "لولا غباء الكاتب"
مش أعظم مئة رجل ، أعظم مئه رجل واحد

أيوه الورقة غضبت إنى لمستك أكتر منها
رغم إنى عايزك إنتى بس قوى أكبر عايزينها
معقولة إحنا اتقاطعنا كل مرة مرة واحدة
بعدين روحتى ناحية ، وأنا ومعجزتى طبعًا روحنا ناحية

لما القلب بيقف العقل بياخد كل الطاقات
فـ بيهديك تناسى آمن كمجرد عربون صداقة
برضه ماقتنعتش إنى مش هكون معاها
وإنى علشان أؤدى الغرض منى لازم أعيش بعاهة


طب هى عارفة أنا مين ؟ ولا هى للتذكير ؟
وقبل أول إحتياج لإنى أفتكر ، عشنا كتير ؟
كـ جوكر يرضى غرورى تكون دى كينونتها
كـ أحمد خايف لـ منساهاش ، تفضل خلفيتى صورتها

مكنتش أعرف إنك مش معاه وإنك رجعالى
فصنعت منها آلى شبه يحاكى حياتى معاكى
وهدفعها تمن ، كل جرة قلم ، لحظة ندم
رد أى سؤال الفترة الجاية سؤال مين اللى بدأ ؟

فى مواضيع بناقشها فى سطور انت متفهمهاش
بالمعنى اللى يبين إنى مسبتش حاجة ماقلتهاش
مش بجرى ومش هلحق لقب ، أنا النظام جابنى هنا
لو دى أول مرة ليك عـ الكوكب تبقى مش زينا

فى أسئلة كتير ماتجاوبتش غير سؤالك
لازم ما خلف الحياة مش الحياة اللى تشغل بالك
كان لازم يبقى ليها معنى ، يبقى ليها كمالة
كان زمان العصر الحجرى أذكى لولا عصر الآلة

El Joker - Manasek El 2alam l الجوكر - مناسك الألم

الجوكر-فصلة

من وهو لسه صغير و الجيران بتحلف بيه
المتفوق ، المؤدب ، اللي جامع دنيا و دين
كبر و دخل جامعة و آن أوان تاء التأنيث
يمكن مشافش بورنو بس إتفرج علي ونيس

و رغم طول الرحلة فالوصول بينسي التعب
أخينا لقي أخيرا اللي تحبه و يحبها
دايما كان بيكلمها عن إن التعليم تجهيل
واحد زيه في بلد بتفهم كان زمانله شأن كبير

فهمها حاجات كتير ، في الآخر فهمته 
إن حوا مش لآدم، حوا لفلوسه و شقته
و في عز ما هو حزين ، الأتوبيس وقف في كمين
الظابط قاله "إنزلي" ، نزل ، زقه للأمين 

شاف بطاقته ، بدأ تفتيش ، "إقلعلي الكوتش" ، يا باشا معيش
ممنوعات ، فمتحرجنيش ، "طب جنب إخواتك يا برستيج"
روح بعد يوم طويل ملوش تعازي مقبولة
يمكن حزين من الأول بس نفسه مش مكسورة

كان ممكن يبقي حاجه لو البلد قدرته 
كان ممكن يبقي آدم لو مكانتش حوا سابته
كان ممكن يبقي حاجه ، و كل حاجه رجعته
من طريق كان ماشي فيه مُتجاهل كل اللي بيحبطه (x2)

أخينا في عز الوحده قابل شلة ثانوي اللي 
كانوا خدوا طريق معاكس للى هو فيه بالمللى 
قالوا فُك يابنى وشك وإبدأ واجه الحياه 
واذا كنت مش مُتكيف ، ف العلاج مكيفات 

أخينا خد الرحلة لحد القاع دحرجة 
بس اخينا لسه اخينا ، فـعايش مع نفسه في معركة 
يقع ، يبطل مدة ، تيجى فلوس ، تيجى بكتره
تيجى بفكرة ، تيجى ببودره ، تيجى بقعده ، تيجى في سوسته 

فجأه حوا رجعت لما ابو شقه سابها 
والغريبة حال أخينا الحالى لسبب ما جذبها 
طبعا أجر نفسه ليها روميو بالفلوس 
ونام معاها ضمان لإنه يلاقي لما يعوز 

وزى كل كدبة صعب للآخر نداريها 
عيلة حوا صعايده ، عمر موتها ما يكفيها 
أخينا إتقتل ، هو ميت في الحالتين 
لو كان إنتحر بدرى شويه مكانش مات اتنين 

كان ممكن يبقي حاجه لو البلد قدرته 
كان ممكن يبقي آدم لو مكانتش حوا سابته
كان ممكن يبقي عالم لولا الصحبة عرفته 
على المخدر اللى جاب المخدر المعروف آخرته

كان ممكن يبقي حاجه لو البلد قدرته 
كان ممكن يبقي آدم لو مكانتش حوا سابته
كان ممكن يبقي حاجه ، و كل حاجه رجعته
من طريق كان ماشي فيه مُتجاهل كل اللي بيحبطه

الجوكر اخينا

كلمات التراك
----------------------------------------------
كطفل كان عبقري ومع الوقت اكتشف ده
يعرف شدة وإتجاه الهوا أو يحتفظ بالسهم
كان كاره ظروفه ومش شايف في حياته حاجه مهمه
مولود القاع الي رافض ياخد نفسه غير ع القمة

شاطر في كل الي بيعمله لكن مش مؤمن بيه
فاكر متعة الحياه الوصول فعانى في الطريق
وعلشان متربي وسط ناس في عينهم كل شيء وسيلة
مترددش لحظة في إنه يدوس ع السلمه الأخيرة

بدأ يلعب على كبير بقى بيلعب على الدين
بدأ يشد ناس كتير بقى إمام مجاهدين
انا فاهم انتوا مش فاهمين
أطيعوني لو انتوا مؤمنين
الآيه كذا معناها كذا ، وانا اصطفيتكوا للتفجير

أتدعى إنه صاحب فكر ، وأتدعى إنه عنده خطة
وإنه هيقطع راس الأفعى .. من الآخر شاف فانديتا
وعلشان محاط بغرقانين في غل وخوف ونقص
كل ما يعزف سيمفونية الجنة يتسابقوا على الرقص

عارف إن منكوا كتير مروا بظروف مؤلمة
انا واحد م الي مش طايقين حال الدول المسلمة
ظلم فقر جهل ولسه الأسوأ في انتظارنا
نص العالم انتهكنا وأكتر من نصه احتقرنا

بس لا إنتوا مجاهدين ، ولا ده الحل ، ولا الدين
بالعكس ده انتوا حجر مربوط في رجل غرقانين
لو الي استغلك زاهد في الحياة كان هيسيبهالنا
هيسيبلك ليه الحزام الناسف لو طريق الجنة

ده كإنك فاكر قوة دينك من قوة دولته
وكإنك إله يأست من فلان فبتموته
أو كإنك لو حكمت العالم دينك كده إنتصر
يعني شويه حظ لهتلر كان بقى المهدي المنتظر

خليك مسلم حقيقي في كل فعل وكل كلمة
سلوكنا في الحياة دعايا حية لديننا
يا شيوخنا كفايه افتا في حرمانية الوشوم
أ ب الإسلام لناس كتيره لسه مش مفهوم

 الاسلام وسيلة والأهداف كلها شخصية
والمسيحية مش مسئولة عن قرنين حروب صليبية
ولا عن تاريخ من كره وقتل أتباع اليهودية
اللي أكيد بريئة من إنتهاك فلسطين الأبية

لكن احنا مجتمع عيان .. مجتمع عميان
تتفجر كنيسة تلاقي ال100 مليون نقاد أديان
قبطي ينشر م القرآن آيات القتل والتمثيل
يرد مسلم بآيات دعوة عيسى للسيف الي في الإنجيل

وده نتيجة ضخ بعض رجال الدين روح الكراهية
مش كل اللي مداسش ع الزناد بريء م المسئولية
ده غير الأم بتاعت متآمنش لأربعه ريشة
وبتاعت خليك مع اللي عارفينهم من الكنيسة

صدرنا إن الأديان لا تناسب هذه الألفيه
وخفى طوفان التعصب كل ملامح الإنسانية
اتدعاء وجود عداوة بين التلات أديان معناه
إن مصدرهم غرضه فتنه .. هل دي رؤيتك لله

الجوكر - السلمه الاخيره | Eljoker -Elselema_ela5era

الــكــلــمــات
_________

زي ما تكون الحياه معانداك ، وحالفه لتوقعك 
عندك أمل تتقدم مهما كل شيء رجعك
كل ما يبقى فاضلك خطوه ..تتوجد ظروف تمنعك
إحساس إنك مش واخد حقك أكتر ما بيوجعك
وتقول لعله خير ومن تكرارها تشك في انه
لا خير ولا عمره كان .. ده شر ولنفسك زينته
انت ادعيت الزهد بركه اننا سيبنالك خيش
آخر مره السما تساعدك كانت أيام قريش

عايز تفصل بيننا وبين خالقنا عشان نعيش في غابه
عايزنا نثور على إمتحانه .. بدل ما تشوف إجابه
هتموت بتحارب الحياه ، ومدوقتش طعم صلح
كن جميل ترى الجمال .. كن قبيح فترى القبح

لم تدع هذه القرية العفة لشخص أو لجهه
ربما لا تعني هذه القرية شيئا للآلهه
كلها بتقول كلام كبير وبتعرف تلفت نظر
كلها بتقول ربنا كبير ، وتلف تاخد حذر
.
يحصلك خير تقول ثواب .. شر تقول مصاب
يحصلي خير تقول ده فضل .. شر تقول عقاب
الحياه يا أذكى أخواتك عشوائية نتيجة إن
ممكن فراشه في ليبيا تكون سبب إعصار في الهند

ومين اللي قالك إنه لو حصل فمش مكتوب ؟
ربك بيسبب الأسباب وكل شىء محسوب

اما هو عارف مين هيتوب ومين هيموت حرامي
ما نتخلق ونخش نار وجنه بدون سياق درامي

وساعتها مش هتقول أنا اتظلمت؟

مانا مظلوم
بس هو مين يوم الحساب هيكونله حق يقول؟

لأ محدش إتظلم ومكانش قدامه اختيارات
ومحدش مبياخدش الأربعه وعشرين قيراط

ده أفيون بيضربوه المتدينين فميشوفوش
إن في أشخاص معاها فلوس متملكهاش شعوب

الناس دي قيمة المال في عينها غير في عينك انت
خلفة مشتاق لخلفه غير السابعة لأب سته
.
حاسس بيك وعارف كل شىء فكرت فيه
ضاقت الحياه عليك .. ظنيت إنه السبب في الضيق
حسيته مش مهتم بيك .. أو كإنه بيعجزك
تستقيم إزاي .. والمستقيم بيتدهس بالجزم

كل الظروف كانت ضدي لكنني في المقاومه قدوة
ما لم تعطيه لي السماء .. قد اقتلعته عنوة

وياترى كام حاجه م اللي حاربت لأجل ما توصلها
ندمت اما وصلتلها عشان منابكش غير شرها

أنا عشت واتعلمت .. وانت لا عشت ولا هتعيش

لأ عشت لكن مجريتش ورا حاجات متكتبتليش

كان ممكن تاخد أكتر .. تفرح اكتر .. لولا غبائك

الدنيا اللي بتدعي إنك فاهمها هفهمهالك
أغني الناس رغم كل فلوسه .. عاشها يوم ويوم
يوم مرتاح ، يوم على أتفه حاجه مكانش يجيله نوم
أفقرهم عاشها بنفس الحسبه .. يوم ينام جعان
ويوم يرزق بعشا .. ينام الدنيا مش سيعاه
.

ربك كان قادر يصلح العالم فقط بظهوره

دي حجة أي شخص أضعف من الإيمان بوجوده

مش الصعوبة في الإيمان .. الصعوبة في الأعمال
عشان فرضها عليا إله .. وجوده مجرد إحتمال

كتر المعاصي حطك على أول طريق الكفر
شيطانك أشطر من حنين .. لن تعود بخف

انت بالنسبالك احتمال عدم وجوده مخيف
مش في صالحك تبقى غابه .. لإنك الطرف الضعيف

انت اللي فشلت تمشي صح .. فلما ذنوبك تقلت
أصبح عدم وجوده آخر أمل إن انت تفلت

انا براعي كل الاحتمالات ؛ عشان مخسرش حاجه
لو مش موجود انا عشت .. لو موجود قلت الشهادة

كان كله عمل زيك لو الجمله هي الدين

مش التوبه باب مفتوح؟ .. خلاص نتوب على الستين

طب لو مت قبل كده ؟

تبقى أكيد متكتبتليش

لأ تبقى أخترت لآخر لحظه إنك متسمعنيش

El Joker Ft. Sam - Enfsam 7ad Part 2 L الجوكر و سام - إنفصام حاد الجزء الثاني

Enfsam 7ad Part 2 L الجوكر و سام - إنفصام حاد الجزء الثاني

الجوكر - متهمش

الــكــلــمــات❤

المنبه رن ، لكن الهدف من الصحيان سخيف
تكملة النوم مش إختيار ... المستقبل مخيف
مفيش جنب بترتاح عليه عشان سريرك حجر
مشيت ورا كل خيط ، وإنجازاتك ... رف بكر

حتى القهوة بتستناك تسرح للحظه عشان تفور
الطفل اللي خاف م الضلمة كبر بقى يخاف م النور
أول ما بتبقى إنفراد ، وباقي بس تشوط
بتبدأ تسأل نفسك عن حقيقة الوجود

الفرق بين العبقرية والجنون بهتان
أكيد النص الفاضي أنضف من نصي المليان
عشان فشلت في التعايش .. جيت جهنم الإنتقام
قسوة العلامة إنها بتمنع رحمة النسيان

خلي نصك يسأل نصك عاد علينا ايه من جريه؟
مادام بنعيش نفس النهاية في آخر السيناريو
وليه بنكون أشخاص مش احنا طول ما الضوء علينا
آدي تاني منبه رن لا مننا نمنا ، ولا صحينا

مفيش شىء متمش ، وكإن غيابك متمش
كل الناس جراحها لمت ، جرحك ليه ملمش؟
بعيد عشان متهمش؟ ، ولا عشان بعيد متهمش؟
عنيك فضيت فضا جماد .. مكرهش ، ومحبش

ولد صغير .. حلم كبير ، ولما كبر الحلم مات
عجيب ضعف البشر ، وعجيبة قوة الكلمات
كلنا أسباب .. ده صاب عشان ده خاب
بس طول ما البشر سلالم إعرف إن اللي فوق كلاب

ملحقناش نشوف النور ... وصلنا والشعاع مكسور
سيبنا الأرض لأجل بذور ... رجعنا لقينا الأرض بور
والأوضاع متحسنتش ، لكن مبقيتش صاحب قضية
مضيت على إن مستقبلي مش أحسن من ماضيا

أسيب الجامع أقلع القفطان ... ألبس قبطان
أسوق سفينة .. تغرق .. أرقص رقصة القرصان
بطريقة غير مباشرة الدنيا قالتلي أقف بعيد
لما كل شىء قربت منه مات ببطئ شديد

هعمل ايه في قفص بجناح؟ .. سؤال ايه اللي انا جوابه؟
تملي في إيدي في مفتاح معرفش بابه
مقدرش أختار ما بينكوا ، وأخسر نعمة المحايد
حب واحدة ميتنسيش بواحدة ... يتنسي بوحايد

مفيش شىء متمش ، وكإن غيابك متمش
كل الناس جراحها لمت ، جرحك ليه ملمش؟
بعيد عشان متهمش؟ ، ولا عشان بعيد متهمش؟
عنيك فضيت فضا جماد .. مكرهش ، ومحبش

نفس المطعم ، والأوردر .. متخاطرش دقيقة
طعم الملل أحلى من خسارة جديدة
رص مزيد من لا شىء ... مزيج من الحمول عليك
بص .. عمرك من قدامنا عدى .. نسيك ده ولا ايه؟

بتعمل مش مهتم ، ولا مش مهتم فعلا؟
ضد أو مع الغريزة لما الموجة تعلى؟
الأقوى دايما صح ، والأضعف مقالش أشمعنى
مهو لو كل واحد طلب حقه .. الدنيا مش هتسيعنا

قريتنا وش فقر ، وناسها وش خوف وجهل
البنا ما بينهم صعب ، بس الهد بيهم سهل
متقولش زي العامة إن الفشل محتاج شماعة
نار القلق تحرق كيلو نيكوتين في ساعة

كل عيون كلاب حارتنا مفارقتكش لحظة
مخالش عليهم إنسحابك قبل كل رقصة
عيب المبدأ إنه فضحي ، والذكاء له ريحة
مهما دبحت نفسك مش هتبان دبيحة

مفيش شىء متمش ، وكإن غيابك متمش
كل الناس جراحها لمت ، جرحك ليه ملمش؟
بعيد عشان متهمش؟ ، ولا عشان بعيد متهمش؟
عنيك فضيت فضا جماد .. مكرهش ، ومحبش

El Joker - Met.hamesh L الجوكر - متهمش

Met.hamesh L الجوكر - متهمش

الــكــلــمــات
__________

سلامنا على نفوس في حلقة البحث عن الضوء
مذئوب في ليلة البدر مال مع الدراويش بشوق
نجمه بتوعد ، ونسمه بتطبطب في ليلة شقا
سقانا بل ريقه لما آخر شخص اتسقى

كل وعود السما مرسومة في عيون المريد
مختار حارتنا قال للظلم "لأ" بصوت عنيد
وردة خافت ع الحبيب .. شاعرنا قال الليلة عيد
حامينا بأمر من سلطاننا حشد جيش من العبيد

رجال حارتنا اجتمعوا حوالين الربابه الليلة
مختار بيتكتبله غنوة زي أبو زيد وغيره
دخل رسول حامينا برسالة .. عكر صفا ليلتنا
يا نسلم مختار ونعيش .. يا نموت وتدفن حارتنا

غضب سريع .. وقف ، وقال: هندبح المرسال
مختارنا قال قتل الرسول مش من شيم الرجال
مشي الرسول ، وسكتت الربابه ، وهتف صوت
رجال بتبايع المختار ع الحرب حتى الموت

طول الليل ذكي وجريء بيرسموا في خطتنا
وجيوش من العبيد بتزحف بإتجاه حارتنا
في الصباح كان طبل جيشهم جنب تكبيراتنا همس
والحامي الكلب لزم خيمته عشان مش حمل شمس

أما أسدنا كان على رأس جيشنا .. مخافش سهم غدر
قال هما كتره ، واحنا قله ، والنهارده بدر
من بينهم خرج فارس بيطوح عبيده بدرعه
وقال: أعتاكوا يجيلي .. وللأسف في مننا رجعوا

مختارنا قال أبارزك ، واللي يفوز يفرض شروطه
نحسمها بموت نفر ، بدل ما رجال كتير يموتوا
فارسهم ضحك زهوا ، وهجم بسرعة شديدة
مختارنا إتفادى الضربة ، وقتله بضربة سيف وحيدة

وفي عز تكبيراتنا ، وعز ما جيشهم كان مصدوم
الكلب قائدهم خان العهد ، وأمر بالهجوم
مختارنا قال هنحارب .. احنا رجال وبيننا ميثاق
والويل لجيش عبيد اتساق للحرب بالكرباج

كل شهيد من بيننا مات قصاده منهم سته
خبر صمودنا بدأ يلف كل بيوت الحته
ولقينا رجال من كل حواري الحي بينضمولنا
حسينا بكترتنا لما الأرض إتهزت تحت رجولنا

هابوا العبيد .. رموا السلاح .. وهربوا م الميدان
مختارنا قال: سيبوهم. الحياة عقاب الجبان
لفينا نعلن الإنتصار وسط إحتفال حوارينا
كل بيوت الحي حيت كل راجل فينا

وردة جت .. بخجل قالت للمختار: قلقت عليك
العيون بتقول كتير ، والبق بينطق: أنا بخير
شاعرنا قال يا فاكر إن البرق قبل الرعد
آدي اتنين بينهم مسافه ، لكن روحين في حضن بعض

قضينا الليل بنمجد كل راجل راح مننا
وبنتحاكى بإن مهدي الحي بحاله من عندنا
مختارنا قال: كفى إحتفال. اجمعوا شيوخ حارات الحي
اللي فات يادوبك خطوة ، والمشوار بحاله جاي
___________________________________________

El Joker - El Mo5tar l الجوكر - المختار

El Mo5tar l الجوكر - المختار

الــكــلــمــات

بنقدم قبل النوم عرض شاش وميكروكروم
تهزيئاً لدراكولا .. بطولة الفيلم لفص توم
فاضل ألف جنيه على أول ألف في المليون
أو شفرة موس ، يا حبل في نجفة الصالون

آدي اللي إتلصم عطل .. الواقع يخذلك تتسطل
صعب تعيش بـ اللي منك فِضِل ، وصعب اللي فاضل فيك يتقتل
راسه مش في الطين عشان كرامته سوى البلاطة
لأ ،كان عنده إرادة .. بس هبت ريح وطاطا

في قمة الهيكل ده عين ترى الجميع
في أرض الذئب جُرِم إجتماع قطيع
ونادى منادي بكوننا اتنقذنا .. بحال المراكب اللي غرقت وعظنا
شكر كل اللي شارك ببصمة .. لقانا بنغرق نادى لقراصنة

صاحب الشيطان ومتصاحبش فكرة
الشر واقع ، والبلد دي خرم إبرة

اليأس سلاح ، وتلم .. يعشق اللي خاف فـ سِلِم
أما باني اللي بيتهدم .. لو مفاقش مكانش حِلِم
وطننا ضاق ، لكنه عشق .. الوضع ساء ، تحليته غش
وزيرنا مات ، وملكنا كِش ... وإتقال معلش

صمتك مش علامة رضا .. علامة الفرهده
كلنا أطراف في صراع على حتة جبنة في المصيدة
اللي متسطلش كفايه عاز فنون تسطله
ديلرات الكار نجوم طريق مخطيناش أوله

انا لما قولت لأ .. كنت بقولها عشان شاريكي
انا عند حسن ظنك .. قالب الدنيا ومش لاقيكي
قالولك إني طايش .. وإني مش بفكر فيكي
قسموني أتنين إتغدوا ببعض .. عشان يتعشوا بيكي

قالي ملفك كِبِر .. جملة سياسة كمان وشكرا
قولتله متهددنيش .. انت متعرفش انا مين في شبرا
هما اللي إتمادوا ؛ فـ مخدتش الدوا في ميعاده
كُنا سته .. وسته مننا ماتوا

طموحك نازل أرض الواقع .. هيبططك
اللي عوزته ، واللي إتحقق .. شىء ، وعكسه .. وده أحبطك
نِداك في مالطا ربى فيك الكسل
معادش فيها حاجه حلوة ، أو سوادها عسل

مربوطين في ساقية أكل العيش .. من تعليم لـ جيش
لـ حب قتله سعر السوق .. فقالوا عنه طيش
مش صدفة كل الناس دي بقت بتحلم بـ اللجوء
محدش غيرنا بيعزف .. تيتانيك بتغرق .. فوق

البلد دي فيها ظلم والسكوت عليه جريمة
فاضل ايه عشان تحس إنك ملكش قيمة
إتهانت جوه قبل بره .. ألف بدل مرة
سكرهم يا نمل مرر .. إتحرر

El Joker - Mosem El Ze2ab L الجوكر - موسم الذئاب

الــكــلــمــات:

زي ما يكون الشقى من أجل الشقى مطبوع في چيننا
كل ده ، ويادوب عارفين نوفر اكسچيننا
العالم سلبي .. بوجودنا ، أو من غيرنا
معوزناهاش على طبق من فضة ... وعهد الله عافرنا

أما بعد ... مقدرش أديكي وعد
من خبرة رُبع قرن لقيت إني مش وش سعد
بُكرايا فوق كف العفريت ، وكل يوم تهديد
انا زي ما تقولي سبرتو ، والزمن عيدان كبريت

لا عوزت تاج وعرش ، ولا مفيش ... عوزت أعيش
مش كل من قبل مقام الدنيا صار درويش
اتكاتروا عليا ، ومكانش شىء في إيديا
ميعادنا في الحياة اللي جاية ، لو الشمس حية


لا صوت يعلو فوق صوت الإعلام الأُحادي
حتى لو فتحت القفص .. الطير بقى إعتمادي
بوصل خط النهاية لكن مبقفش للميدالية
من مسرح مصر الله يمسيك بـ الخير يا وليم

غضبان غضب مُبالغ فيه .. كان محال انا أميل
كان سؤال انا مين؟ .. بيطاردني للنفس الأخير
ياما شاورتلك عـ الشر واستنيت تطرحي
وجهة نظر من مطرحي .. عشتي ايه عشان تنصحي!

آسف عـ الإزعاج ، والإحتياج ، وقلة المزاج
آسف على إن الطريق معايا كان زجزاج
مش بتعلم بسرعة ، وبليد في ظبط الجرعة
وعنيد ، وعندي مبيراعيش أمور وجب أن تُرعى

على قبر أرسطو نحتوا راس فنان مُسف
لو كانت في حتة تانية كنت أقول ممكن نخف
مسير الطين يجف ... أثينا بينا بتستخف
الأرض واقفة حداد ، والكون مأجبرهاش تلف

عزف العود الأبدي مش في صالح اللي انا عليه دلوقتي
أفضل أواجه الهلاك بشكل فردي
اهربي بلاش تعاندي .. هتقعي مش هتساندي
الدنيا مالت عليا ، والزمن موقفش عندي

ياريتني قولت لأ .. عمري ضاع على المدق
كانت بقت اكسچين خلاص أما ابتدت تغمق
شفت موت ملوش ميعاد .. في فراغ ملوش أبعاد
عشت ست سنين .. أربعة وعشرين ساعة بتتعاد

عيونهم مراية بايظة .. كان قرباني ليها
إني أشوه وشي لأجل ما يطلع شكلي حلو فيها
مفرحتش أما طلعلك صوت ؛ لإنك بنت موت
الكاس في إيد اصحاب الكاس من قبل أول شوط

تخيل .. اللي انت فيه من أجل ناس مُدركة
إن الخوف أمان ، ونزعة الواجب مُهلكة
خيوط الصح والغلط في بلدنا متلعبكة
كله ضهره لـ حيط ؛ عشان محدش أهل ثقة

كنتي فين وانا بصرخ إن نهجك استنزفك
وإن آلاتك اللي عزفتي عليها أصبحت تعزفك
فـ معادش تجزيء الحقيقة يستر العورات
ولا عاد معاكي إبرة وفتلة .. كل دي مقصات
_____________________________________

El Joker - Resala Rakam 1000 L الجوكر - رسالة رقم

الـكـلـمـات

زيي زيك .. نمت صحيت لقيت
فجأة عدى العمر خيط .. بعده بالتدريج بقيت
عجوز في جسم عشريناتي ، وفي أحسن حالاتي
مملُكش طاقة كافية لإني مع الظروف أهاتي

فجأة ظهر وسطنا علاج للمشاكل
سيجارة تنقذ روح الشلة اللي بتتاكل
كُنا خلاص على وشك نفقد طعم اللذة
شغفنا مات .. محدش عزى ولا اتعزى

وفجأة .. من سيجارة لكاس لخط .. كله إتلط
مفيش للدنيا شط .. مين بكيفه نط؟
لطشت بإيد ، وإدت بإيد الكيف هدية
فرجعنا نضحك زي ما كُنا في اعدادية

والقطر مبيوقفش ، واتارى الكيف محطة
دنيا تسيب تسيب .. تلم الدين في حطة
لبس واحد واحد مننا في حيط وشطب
فواحد واحد مننا رجع البيت يبطل

طول وعرض عيشنا معرفناش نوسطن
عملنا دماغ مش فاكرينها أصلا
وكبرنا ياسطى ... كبرنا ياسطى
بقينا نمشي ، ونحوش حق المواصلة

تهرب من سجن الضرب للحياة تتأسر
تتفاجئ إنك شخص عادي بسهولة بتتكسر
تشحن نفسك عزيمة ، وتبدأ بالواقع تتصل
تاخد خطوة في طريق والناس بتبارك للي وصل

من يوم ما فوقنا بين يارب وبين ياريت
محدش غيرنا من دفعتنا كان مفتحش بيت
عيشنا ومحدش حط في حساباته الزمن
سرقنا سنين ، وطلعت السنين التمن

تيجي الأيام وتولد فكرة بكرة أولى
الدنيا كيف بيرفض فكرة المناولة
فـ النزول يقل ، والخروج يقل
لازم بيت وشبكة قبل مـ التلاتين يهل

بقت بولة .. كله همه ميده
خصوصا بعد أول واحد مننا دخل بيته
محدش سأل ساءت عيشته ولا ارتاحت
كل واحد خاف ليبقى آخر واحد

طول وعرض عيشنا معرفناش نوسطن
عملنا دماغ مش فاكرينها أصلا
وكبرنا ياسطى ... كبرنا ياسطى
بقينا نمشي ، ونحوش حق المواصلة

الجوكر-يسطا

الكلمات 

وحشته .. الدوامة اللي ياما بلعته
صبتله كاسين فنسيها .. صبت تاني عشان نسيته
متعرفناش .. فقالت دنيا .. قال عاشت الأسامي
جم البار في حضن بعض ، وطلعوا في حضن بعض تاني

جيت م المستقبل عشان انقذك .. بدل ما دنيا عليك ما تميل
قولتلها انا هو لما يكبر ، وبقولك ده عيل
للفشل ماشي ، ومـ الفشل للكسل ماشي غاطس
مش عايز مني قرص ملكش عندي عسل خالص

اتفقنا؟ بنراهن على نفسنا لما بنخسر مبدأنا
بنحضر فينا الجن ، ونقرا الآية اللي بتحرقنا
أكتر حاجة عملنا حسابها الوقت اللي بيسرقنا
رغبتنا في كوننا سوقنا خوف لـ نكون اتساقنا

خايف يطلع اللي شيلته مش أتقلك
حتى لو هتقولي لأ مش هسألك
تلات تربع حروفنا مش في مستقبلك
محدش مـ العساكر دي بيترقى ملك

سيبها .. مش دايمة .. خليك انت قاعد .. هي اللي قايمة
مكنتش جيت من بكرة لو المراكب كانت عايمة
مش زايمة! لا مش بتحلم .. هي اللي نايمة
هتصحى ، وهتقلب عليك الطرابيزة زي ما بتعمل دايما

بتكابر ، وعندي ، وراسك بتسيب على سور الفرص علامات
صباعك يتحرك .. يقولوا بـ الهمس: مش كان المفروض إنه مات!
انت بذرة الصوت اللي رافض أنحني .. مهما الدنيا تهدني
وانا لو عارف أتجاهل الصوت آجي أحاول ليه إني أمنعه يتبني؟

خايف يطلع اللي شيلته مش أتقلك
حتى لو هتقولي لأ مش هسألك
تلات تربع حروفنا مش في مستقبلك
محدش مـ العساكر دي بيترقى ملك

بكرة هتكبر ويومك يتزحم
وتبدأ من بعض الحاجات تنسحب
هتبدأ تبقى مادي ، وفجأة تتسحل
وتفشل تهدي ؛ تعوز تنتحر
وكله إلا اللف من نص الطريق
كل اللي شك كان موته بطيئ
ننجح نسدد ضريبة توفيق
نجوم وبنشيل غلطات الفريق
كله إلا اللف من نص الطريق
كل اللي شك كان موته بطيئ
ننجح نسدد ضريبة توفيق
نجوم وبنشيل غلطات الفريق
هتكبر ويومك يتزحم
وتبدأ من بعض الحاجات تنسحب
هتصبح مادي وتتسحل
وبالتدريج هتعوز تنتحر

خايف يطلع اللي شيلته مش أتقلك
حتى لو هتقولي لأ مش هسألك
تلات تربع حروفنا مش في مستقبلك
محدش مـ العساكر دي بيترقى ملك

El Joker - Donia  الجوكر - دنيا

فولو و اسمع راب بلدك
راب مصر لكل رابر في مصر 

أسكت - الجوكر

EgyptianRap

Recent comments

Mazen Mostafa

حسن عبد الغني

𝐻𝐼𝑆𝐻𝐴𝑀 𝐸𝑈𝐿𝑌𝐴𝑁

Momen Elsayed

Related tracks