يا منه - عبد الرحمن الأبنودي - مزج ناي - Yamnah

القصيدة الأصلية: https://soundcloud.com/ashraf_tawfik/iprxp94feexs

الموسيقى:
https://soundcloud.com/ghazy4ever/orintal-covermusic-only

Mix By Ehab Elkhatib

استحملي_أشرف توفيق_مزج موسيقى

قصيدة ناصر 
عبد الرحمن الابنودي


الله يجازيك يا عم عبد الناصر
الليل مليّل
والألم عاصر
لسه اللى بيبيع أمته كسبان
وكل يوم
أطلع أنا الخاسر
=========

أما أنت خميت مصر دى خمة
يوم ما ناديت بالعشق للأمة
ورطتنا نعشق خريطة عبيطة
وبشر ما نعرفهاش
وبلاد.. ما بنزورهاش
إلا.. فواعلية وبنايين وسواقين
وخدامين.. وطباخين.. وكناسين
بلاد أسافرها سعيد
أرجع حزين
حبيتها زى ما قلت لي.. وأكتر
ع الأجنبى ما استكترتش.. عليا تستكتر
ع الأجنبى ما اتنقورتْش عليا تتنقور.
تطمع فى دمعي
وف تعاسة راتبي.
مُلهم أنا.. وأعمل غبى
وأدى الألم يا عم عبد الناصر
زاحف وبيحاصر
وآدى الجميع خاسر
وآدى فجر أمتنا الجميل مغلوب
وآدى انتحار الأمة بالمقلوب
وأنا… غريب الدار..
لابسنى توب العار
ساكن فى وطنى بالإيجار
=========

قاعد أنا ع الجسر فى القيَّالة
من قلب اللهيب مِنشالة
وقلبى.. ساقية حزن سَيالة
باغنى..
ما أعرف مغنى وألاّ عديد
زى افتكار الميتين.. فى العيد.
باعانى وحدانى
شياطينى لابسانى
والأمة قدامى.. مفارقانى
يا رب…
ما تحببنى فى الناس الملاح تانى
يا رب
ما ترجعنى أعشق
ضحكة إخوانى
يا رب
كرهنى فى أوطانى
=========

ما أخيبك أمَّة
ما أتعسك أمة
لا عقل… ولا همة…
لا مصدقه فعلك
ولا تحفظى كلمة.
أمة.. تدور وتلف..
تقيلة.. مش حتخف
حماسية… وحماسها
بكتيرُه ساعة.. يجف.
أمة بتتخابِط
أمة بتتعابط
أمة ومالهاش
لا زابط ولا رابط
ولا كبير عيلة
ولا قرابةْ دم
وفكرة وهمية
ما تورث إلاّ الهمّ…
ما تحل عنى يا عم..
إحنا ورثنا كلام
إحنا تاريخنا كلام
علشان كده لما تقول..
على طول أقول:
وبكام؟؟
ما هو حب؟؟ دبرنى
وتاريخ؟.. فكرنى
وطريق؟.. نورنى
ومصير؟.. بصرنى
ده انا بقيت عربى
من قبل ما ألقى
اللى يمصرني.
أنا انتمائى لأمتى…
ممسخرنى.
محسوبة فى الأحزان على
فى الفرح تنكرنى
ياللى إنتى لا أمة
ولا أنتى أم..
فيه أم
ما تعرفش ساعة الألم..
تضم؟..
=========

قد ما ننورها
هيه مضلمة
قد ما نعلمها..
مش متعلمة.
كل ليلة بايتة مظلومة
وهيه الظالمة!!
آخرة السكك الوعار
مجد.. متلطخ.. بعار.
قد ما نحجمها…
تفلت م الإطار!!
السلاح من صنع بره
والكلام من صنع بره
المآكل
الملابس
والهوا البارد فى بيتى..
صنع بره.
لا نسجْت الهدمة..
لا زرعْت.. ولا اكتفيت
شفتها.. جريت اشتريت.
جلاّبيتى.. عمامتى.. سجادتى
وحواديت الصغار
والحلاوة: حلوة.. مرة
شغل بره.
إيه يهم
إن مت من أجل البشر
ولا سبت الديب يصرَّخ
واتغابيت؟…
أو نسيتها؟ أو اتناسيت؟؟..
الشهادة مجانية…
والبطولات…
نفحات استعراضية
والليل مليّل
والألم… عاصر
لسه اللى بيبيع أمته
كسبان..
وكل يوم..
أطلع أنا الخاسر…
الله يجازيك
يا عم عبد الناصر

الله يجازيك ياعم عبد الناصر

كلمات إيهاب الخطيب 
 الحان وغناء صوفيا لارا

لأني أحبك .. تعجز عن وصفك الكلمات 
لأني أحبك .. أبقى بصمتي حتى الممات 
لأني أحبك .. عيني تنام .. ويبقى كلام فؤادي عليكِ ولو في السُبات

لأني أحبك .. يصمت مِني لسان الغزل 
لأني أحبك .. تبقين أنتِ لعمري الأمل 
لأني أحبك .. عيني تقول .. وصمتي يطول ..ولا تسمعين سوى همسات

أحبك قلبا وعقلا وروحا.. 
أحبك سكنا وأملا طموحا.. 
أحبك وطنا من الأمنيات.

لأني احبك

جايز ترتاحيلي ف لحظة!... وجايز برضو ارتاحلك .. 
وجايز نتخنق من بعض.. وجايز تحكي واسمعلك 
جايز نبتدي موضوع تكون افكاره من عقلك 
او احكيلك كلام عني تلاقي كلامي كان عنك 
جايز تدخلي دنيايا قبل ما عقلي يسمحلك 
وجايز تلقي نفسك جنبي فرحانه عشان جنبك
وجايز تبقى مبسوطة عشان جايلك وبتلكك 
وجايز كل ده ميحصلش ولا توافقي ولا اقولك 
يا ريتك تقبلي الفرصه وحاولي تغلبي شكك 
انا محتاج تكوني صديقتي انا بصراحه محتاجلك 
انا عاوز اكون موجود وانتي بتكتبي حكايتك 
وجايز كل ده يكون وهم ولا انتي هنا ولا انا شفتك

جايز

ساند على الأحلام وخايف ييجي يوم من ضعفها تتهد
ماشي مع الأيام وعارف ان آخر السكه سد 
بعد امعافره مع السنين بين الوصال والصد 
شاء القدر رغم اني جامد ان اللي يكسر قلبي ..حبة بعد 
إيهاب الخطيب

ساند على الأحلام

اهو ده اللي صار وكُّله كان ف علم الغيب مسَطَر
قبل متقرر طريقك اللي كاتب كان مقرر
الحياه ايام بتمشي يوم يحَلِّي ويوم يمرر
تبتدي بيك الحكايه لسه مشوارك صغير
يبتدي حلمك ينادي وانت ف الاحلام تفكر
يكبر الحلم ف خيالك وانت غصن جديد واخضر
تنصفك دنياك فتفرح تظلمك دنياك تكشر
طالعه نازله حلوه مره والسنين مشهد مكرر
كل متقابل تفارق وان فرحت الحزن اشطر
كل ما حولك رمادي وانت ف طريقك مسير
يدبل الغصن الصغير والورق يقلب لأصفر
و ف معاد ساعة رحيلك تلقي قطرك جاي يصفر
تكتشف عبث المحاولة يا غريق ع البر دور
كل ابوابك هتقفل زي ما المكتوب مقدر
مافي غير باب الكريم رحمته اوسع واكبر

#إيهاب_الخطيب_يكتب
#شوية_كلام
#أهو_ده_اللي_صار

أهو ده اللي صار _ شعر

ابتديت ما ابقاش اسير
ابتديت احلم اطير
ابتدا عقلي اللي فتّح
من جمودي يستجير
كنت عايز افهم أكتر
كنت بتأكد وادور
كل حاجه رايحه فين 
جايه ليه 
إيه النتيجة وإيه المصير
أسئلة وصعبة الإجابة 
شمس من فوق السحابة
صعب اشوفها وانا الضرير
عمري ما اتأكدت أبداً 
عمري ما اطمنت جداً
غصب عني حاولت اشوف
عقلي ما فهمش الظروف 
قلبي قال طب سيبني اغمّض
واما غمّض.. شاف كتير

ايهاب الخطيب 
ابتديت

ابتديت

كلام جوايا من قلبي اللي مش ناوي يجيبها لبر
عن اللي لو قريت جواها تعرف ان فيها سر
هي .. اللي اول مره اسمعها  عرفت اني لقيتلي صديق
مكمل جنبي ف الرحله مهما طال بعمري طريق
طب اعمل ايه وانا والاصل فيا اني اصلا باعشق الحلوين
ودي حلاوتها جوه القلب وتشوفها ف نني العين
برغم القوه في الظاهر ضعيفة وهشه من جوه 
وقدام اللي يحتاجها لا حول ليها ولا قوة 
جميله بجد وجمالها ف طيبتها اللي ملهاش حد
ورقة قلبها الوردي وحنية تشدك شد
وطفله عنيده جواها تلاعبها فتضحكلك
وكام حدوته فاكراها وحلم كبير بيتحرك
وصوتها يقول كلام متقالش وتحسه بيسحر سحر
وضحكتها نتور ليلك الحالك كانها بدر
وكل كلامي عنها اكيد لا هيكفي ولا انا هاعرف اجيبها لبر

ايهاب الخطيب

هي..

لما آخر حته عايشه فيك.. فجأة بتقرر تسيبك
واما رغم النور قصادك.. تبقى مش شايف طريقك
تبقى كل حاجه فيك بتبكي بالدموع ..الا عينك
والزحام حواليك ولكن.. حاسس الوحدة ف ضلوعك
واما تبقى طول نهارك.. ف انتظار.مستني ليلك
ييجي ليلك بس نومك.. لسه مش عارف يجيلك
تفتكر واحد ف ساعة الاختيار.. اختار يبيعك
اهدا حبه وخد قرارك بالحياة من غير دموعك
هي اعراض الانسحاب صعبه لكن شد حيلك 
كلها كام يوم وتنسى.. ومن جديد تعرف طريقك 
ابتدي تاني وتالت.. لسه ايامك ف ايدك
بكره تنسى حتى انه كان ف يوم اسمه حبيبك
ايهاب الخطيب

Ehab Elkhatib

Popular tracks