شوارعك القديمه
وشمسك ونيلك وناسك
وصوت إللى ماتو فى شوارعك بغيظهم
وطينك وزرعك
وبردك وحرك
وشوش إللى ماتو فى قلب المظاهره
وشوش إللى قالو أرحل يا خاين
وقلب إللى ماتو
وقلب إللى مرضو
وقلب إللى تاهو
فى قلب الطابور
وقلب إللى حبك هيقدر يعيش
ساعات الوجع مابتنتهيش
وجرحك وأرضك
وطينك وعرضك
هنقدر نعيش
ولو ألف خاين يوم حكمو أرضك
مايهمنيش
بقولك غناوى
وا قولك حكاوى
وأقولك
جراحى
وأقولك يابلدى
هنفضل نعارض
هنفضل نعارض
هنفضل نعارض
هنقدر نعيش
بلادى الحزينه
هنقدر نعيش
ولو ألف خاين هايخدو البراءه
ولو ألف فاسد هيفضل يعيش
دروبك حزينه
وناسك فقيره
وخيرك وفير
حرامى وحاكم
وفاسد وظالم
وميت ألف نائب
وميت ألف لجنه
نظامك عجيب
بيقتل أمانى
ويقتل ف حلمى
ويقتل ف أملى
ويقتل ف شمسى
وقمرى وضلى
ويقتل ف ولدى وخالى وعمى
ويقتل ويقتل ويقتل ويقتل
ويأخد براءه
ويأخد ميداليه
ف قتل الأمانى
وقتل إللى حلمو
. وقتل إللى قالو حبيبتى يا بلدى
ويأخد نيشان
ف قتل الجعان وقتل المريض
وقتل المهاجر وقتل إللى خاف
ويأخد مكافأة
ف قتل الوليد
و قتل إللى غنو ف موكب شهيد
وقتل إللى عارضو نظام العبيد

هنقدر نعيش

إيهاب صدقى


هنقدر نعيش

أنا كل يوم ببيع أحزان
والبضاعه ماشيه 100/100
خط انتاج الهموم شئ رهيب مألوش مثيل
أحسن بضاعه عندنا
وعندنا أحسن ضمان
والفروع ماليه البلد
بنبيع كمان المشاكل بالمقاس وبالطلب
أسعارنا ايه أرخص كتير بين الدول
بنبيع بكل المميزات
تقسيط وكأش
ونصلح الحزن القديم
وبنجرح الجرح اللى خف
من غير وجع
إيهاب صدقى

بنبيع وجع

فتافيت ضحك العيال ...
وصوره ابويا .... وهو حاضن بايده السيجاره
وشكل البرواز القديم
وكل الحاجات اللى ساكته ....فـ عيون الواد الصغير
انا كنت بضحك زمان لما تلاعبنى !!
دلوقتى بضحك واخاف تعدى الليالى
وضحكى يكون بنفس الملامح !!
وتطلع فى صورتى ... نفس الحاجات اللى ساكته فـ عمرى
وتقدم حيطان البيوت اللى فاتت ..
وترحل ملامح ضحكه ابويا ....
مع انه عايش
ولسه بتحضن ايديه السيجاره ... ونفس الملامح
بتسكن فـ وشه  ... ولو حب يضحك بيرجع بعمره
لصوت العيال اللى فارق زمانه ...
فممكن يبروز شويه وشوش فى ذهنه وخياله
يفكر عيونه بملامح عياله   
ويضحك معاهم شويه بخياله
ويرجع بفكره  ... فى لحظه ميلادهم
ويوم السبوع   .... واول ما يسمع يا بابا بودانه
تعدى اليالى
يفوت عمرى منه ... وارجع اشوف الواد الصغير
بيضحك علىا .... فى صورتى القديمه
وشكل الحاجات اللى ساكته فى عنيا
بتاكل ف عمرى
ولسه بتحضن ايديه السيجاره .. فى صورتى القديمه
مع انه عايش  .. معايا وبس فى صورى القديمه
بتكبر ملامحى وتكبر ملامحه
ويفضل لقانا فى صورتى القديمه

إيهاب صدقى

فتافيت ضحك العيال

شويه صور

الكادر .. مليان بالحضور 
والشهداا ماليين السكك
الكادر مليان بالحضور مابينش فيهم انتماء غير للوطن 
كان الشهيد موجود هنا .. وسط الحضور لاكنه مات 
 والغدر كملت فرحته..
مكتبش غير الانهزام على صفحته 
هتف اللى مات علشان يعيش انسان جبان  على خطوته 
سكت الميدان .. ساعه ماقالو ان التنحى فى الطريق وان الشباب قال كلمته 
قال الخطاب .. سيبنا الميدان .. نوى الرحيل .. والشعب كملت فرحته 
الكادر .. مليان بالحضور 
والشهداا ماليين السكك
مبيهتفوش الميتين غير فـ الميدان 
خلص الكلام
واللى بيقتل فــ الهتاف انسان جبان 
مبيوجعوش الامتهان 
ضاعت حقوق شهدا الميدان 
والثوره نجحت ف الجرايد والصور 
ترديد هتاف فـ ذكرى موت المقتولين تحت الرجول 
فـ ذكرى موت المقتولين تحت العجل 
فـ ذكرى موت المقتولين علشان نعيش   ( لحظه كرامه ف الوطن )
ترديد هتاف 
علشان يعود حق الشهيد 
بيموت عشانه شهيد جديد 
ولسه فيكى راح يموت الفين كمان 
جوه الميدان 
ولسه فيكى انا بتقتل وسط الكلام 
وسط الشوارع والزحام 
وسط الوجع .. هوه الامل .. ليه يا مصر مالهوش مكان 
لحظه كرامه يا وطن بلاش كفايه انتقام 
الكادر مليان بالحضور 
والكلام بين اه ولاء 
والطابور مليان بشر 
مبيعرفوش معنى الوطن 
مش مؤمنين غير بالجوامع والكنايس والصور 
الدين هنا من غير بشر 
وقف الهلال بيقول كلام 
وقف الصليب بيقول كلام 
وقف الوطن يسمع هنا ومن بعيد تاااااه عننا 
والاختيار اصبح غلط 
الكادر  مليان بالحضور 
والحر مات مالوش مكان 
والثوره نجحت فـ الجرايد والصور 
9 / 10 / 2013
إيهاب صدقى

الثوره نجحت ف الجرايد والصور

مفتتح ..

الرب خالق كل الشموس للعباد  
الخلق مش محتاج عناد 

علم هناك كل البشر 

الحق 
والظلم 
والكفر 
والايمان 
والعدل 
وعلاقه الكون بالميزان 

★★★★

علم هناك كل البشر 

الكلام 
والسكات 
والكذب 
والصدق 
وعلاقه الانسان باللف والدوران 

★★★★

علم هناك كل البشر 

الحقيقه 
والخيال 
والاحتمال 
والتصور 
والمُحال 
وعلاقه الانسان بالحلم ف حدود الخيال 

★★★★ 

 نبتدي وانا 
مندهش من وجودي ف الحياه 
و ف قلب الصور 
وف دور ممثل ف الوجود من غير نصوص 
من غير كلام 
كومبارس ف بدايه الطريق 
لكن بطل ف المنام من غير كلام
والطفل فيك شايف سما 
شايله الحمام 

...كل اللي فوق كلام عيال
..
....
.......
..........
عدت سنين 
نفس الحاجات كبرت معاك 
بس زاد يادوب هناك حلمين كمان 
ولسه فيك نفس السكات 

متخلينيش احزن  قوي 
عاوز اكون 
رافضني ليه 
الحمل زاد 
شايفك بعيد 
تايه انا 
نفس السكات 
مفيش طموح 
الحلم مات 
عايش هنا 
سكات 
سكات 
سكات 
 ..... 
كل اللي فوق كلام عيال 

متصدقوش 

 عدت حاجات 
من غير عدد 
ومفيش حضور 
عايش هنا 
من غير ما اشوف 
من غير ما اكون 
يدوب بقول سورتين صغار ف الركعتين 
وارجع عشان اعمل ذنوب 
وارجع اتوب 
وارجع اتوه 
واتوه كمان 
واغيب هناك 
عند الوجود 
واحلم هناك حلمين حلال 

الخلق مش محتاج عناد 

كل اللي فوق سطور هموم متقرهاش 
الحلم فيه حاجات كتير  مقولتهاش 
وكلام عيال وحاجات كتير مفهمتهاش 
وحاجات حرام عملتها ومعملتهاش 
..
انا نفسي اتوب 
وارجع هناك 
واحلم كمان حلمين حلال 
وميتحكوش 

إيهاب صدقي 
٢٧ \ ٥ \ ٢٠١٦

حلمين حلال

الجواب التالت

الصُحاب

فتافيت ضحك العيال ... وصوره ابويا .... وهو حاضن بايده السيجاره وشكل البرواز القديم وكل الحاجات اللى ساكته ....فـ عيون الواد الصغير انا كنت بضحك زمان لما تلاعبنى !! دلوقتى بضحك واخاف تعدى الليالى وضحكى يكون بنفس الملامح !! وتطلع فى صورتى ... نفس الحاجات ال

Sounds from الجمعة afternoon

في حضره ابويا

العيله ..جوف مليان وجع

بيرمي الزهر ويقوله 
يجيب هابيك 
فمايجبش 
يسيب الحظ ع القهوه 
يقوم يمشي 
ويقفل حلمه ف الخشبه 
مابين قواشيط 
يحاول برغم العمر
 يبقي حويط
ميعرفش
ولسه برغم العمر دا كله 
لسه عبيط 

إيهاب صدقى

ehab sedki

Popular tracks