Ein ósunn skipan á einum arbeiðsplássi kann føra til kynismu, sigur Eina Andreasen, ráðgevi

Tá ið ein skipan verður forráað, kenn ein leiðsla gerast kensluleys, rá ella harðrend, í bæði tonkum og framferðarhátti, og tað kann skjótt føra til valdsmisnýtslu.

Hetta eru nøkur av orðunum, sum Eina Andreasen setir á leiðslur, sum eru forráaðar. Hon hevur skrivað høvuðsritgerð um evnið, men hon hevur eisini sjálv upplivað hetta á egnum kroppi, og tað er oftast samskiftið - ella vantandi samskifið - sum liggur í buktini.
- Tað er sum ein múrur er fyri. Um eg síggi okkurt, sum ikki virkar, og royni at siga frá, men bara verið møtt við tøgn, so førir tað eina stóra frustratión við sær, sigur Eina millum annað í hesi samrøðuni.
Vandin er, um ein skipan ikki rúmar ósemjum ella at fólk verða hoyrd.
Eina er útbúgvin ergoterapeutur, og hon hevur við tíðini tikið aðrar útbúgvingar, m.a. diplomútbúgving í leiðslu, har hon skrivaði høvuðsuppgávu um "Forráan innan leiðslu".
Hoyr alla samrøðuna her.

Tá ið leiðsla verður forráað

Eg eiti Eina Andreasen og eri upprunaliga útbúgvin ergoterapeutur. Eg havi drúgvar royndir sum ergoterapeutur í fleiri almennum skipanum, flestu árini innan psykiatriska økið.

Eg havi við tíðini tikið aðrar útbúgvingar, so sum supervisari frá DISPUK (Dansk Institut for Supervision, Personaleudvikling, Undervisning og Konsultation), mediator frá Turið Debes Hentze, og eri júst liðug við Diplomútbúgving í Leiðslu frá Glasir.

Umframt at vera leiðari innan dagstovnaøkið og eldraøkið, havi eg hesi seinastu nógvu árini arbeitt sum sjálvstøðug vinnurekandi, har eg í høvuðsheitunum havi fingist við supervisión, mediatión, undirvísing og ráðgeving á nógvum almennum stovnum. Samstundis havi eg havt nógvar ymiskar uppgávur fyri Barnaverndartænastur kring alt landið sum m.a. familjuráðgevi.

Í 5-6 ár var eg fakfelagsforkvinna í Ergoterapeutfelagnum.
Øll hesi árini á arbeiðsmarknaðinum havi eg altíð verið forvitin eftir at læra nýtt, so eg kundi blíva enn betur før fyri at loysa tær kjarnuuppgávur, eg havi havt ábyrgd av, og tær avbjóðingar eg havi møtt á vegnum. Í tí samanhanginum havi eg tikið nógv skeiðir innan m.a. ergoterapi, barnaverndararbeiði,  samskifti, leiðslu og fyriskipan.

eina.fo