عودة البطريق

Photo by: Caroline Tabet

تحت
أيام بترك حالي تحت
بعرف كيف بطلع عقلي بس ما بكون ارتحت
تحت فتحت للضباب باب للجليد سرداب
مش اكتئاب قفز مظلي وفوق راسي كتاب
سميها التهاب دوري لغدة الروح
لما عدة الصلاة إنك تعدد جروح
بكتب عالحيط: انتبه، إن الأشياء أقرب مما تبدو في المرآة
رماديات شفق، حساسيات عبق، تجليات ورق
قلب زحط عالمعدة من كتر ما العصب خفق
حفر بالعضم نفق واصل جلدي بالفراغ رائد فضاء
بالكون الداخلي معلق برسن براق إسراء
إصرار عالإبصار جفن جبين ومسمار
تجميع أثر نواة بعد مسار إنشطار
سالب وموجب وللفصل إعصار
فجر طاقة بعدها النشاط صار بخار

يا صاحب الألوان اتركني بالرمادي هادي
من رمادي بادي سكة اشتعال الإعتيادي

تسكين أول حرف كالمغاربة
تكوين هامش بعد عن قوالبي
قواربي احرقها مرحلياً، فيه صمت تحت المي والقاع مش مبين
والسطح بدم مزين بدون هدف معين
سيان بين ريان وغيان
وشتان بين الهدوء ببالي والروحاني الإنعزالي
قالت إلهة الصمت الحب بصوت خلخالي
عالرنة ياللي بتبقى رغم الصمت اتكالي
بالعتمة بتبقى هالة
من برا أي حالة برجع بتعرف عحالي
والدولة والعيلة والمجتمع والدين
كانوا عصدري قاعدين قبل ما تشرحه سورة
تركت المؤسسات قبل ما يخترق سورها السما
يبتلع وهمها الحلم ومن زماني انحرم
مش سحر شرم برم
بل توجيه أعصاب: ياللي بتعمله بيعملك، ياللي بتملكه بيملكك
وكل جزء منك بيتمسى بيتسمم
بين صفاتي بتسلل وبتعلم اتحمل
ضغط الظروف المحيطة بدرع الحياة البسيطة
لحد ما يتجلى: فكرة بتستاهل كلمة، كلمة بتستاهل عقل
فيه راب أفكار وفيه راب جمل
ما برش أمل عجرح ما اندمل
فتش عالدوا، بعصر الهوا وبرده ألف مقصورة قبل ما انكوى
مندس بلون باطون تما انشاف بعيون
ايام بشبه ركام غزة حتى قوم
لا شؤم بوم ولا هلوسات هدهد
لا لهفة كلب ولا قوقعات قنفد
كل الروس الحمرا هيدي بكرا بترجع تبرد
فمش رح ينفع تركض
بلش من قبل، أسس من تحت
تحت، أيام بترك حالي تحت

يا صاحب الألون اتركني بالرمادي هادي
من رمادي بادي سكة اشتعال الاعتيادي
.....

تسفيه مش ترفيه
تسخيف وتتفيه، يا بيطفيك يا بتطفيه
لو تعرف بس حشيشك شو بينحط فيه وسألت مين المستفيد
مينا استشهد بماسبيرو، سم ممنوع المس فيه بس فيق
بغطي إعلان البيرة بشوف المش بصفي
وبصفيه، كونه أراؤه بتصفي محصورة بالبار والإفطار
وبحرض شعبي المؤمن هو اللي عليه بيكفي
يا ريت تجيبه ليلى، بركي بتقرالي كفي، عوجها
هي مجرد قجة حولها حية ملتفة
تنبؤات لتغفي، 
ولو بكرا مكتوب ما بدي ياه عرفي
إغراق بالمشهد والحرق ما بيدفي
تشتيت للمخ ورا التشبيك متخفي
تشتيت نضالك، تقطيع أوصالك
متل قطاع وضفة
ترويض شهواتك فاخترعولك عفة
تتشوفي الكون من قفة
وتقفي معاني القصيدة
شعرك كله تصيري تقفي
عوزن مألوف، هيدا عوزنا المعروف
حفل اغتصاب بزفة
والأعمى داير دفة 
والدواجن مصتفة، والكاس عميدور كل دجاجة تاخد شفة
حتى ما يصيهم هلق لما نوصل عالحفة
وانت حامل سطح مراية ونازل عم تحف فيه
في موقف فوق مجازر شاغر يالله قرب صف فيه
طيب والجريح؟ ادعيله الله بيشفيه
وشفلي العريفي كام عار فيه؟
مش عاجبك طب شرفي
ناقشي وما تحرفي
اللي بقوله أنا حر فيه 
وعرفي كل يوم من أهدافي عالواقع جيب غرفة
فما تحطني بدرفة تمني تلاقي صرفة
والسؤال المطروح ما تضطر تقر فيه
هروب كاسة شاي من رشة قرفة




الراس و مونما - تحت/شاي بيقرفيه

كلمات "الفالوس الأعظم":
لقى فانوس، حكّه طلع منه شكل فالوس
حكي طلع منه ثالوث بدون تأنيث
قاموس مكتوب بخط الرئيس، بفكر الرئيس
من غدة بأسفل ظهر الرئيس
تحيا فحولة الزعيم، والموت الزؤام للشعب العقيم
نعم، قلتها فصيح، لزوم الأبوة والجو النصوح الرخيص بمعجم ركيك
مصدرها عجم تيضل متاح ومطلوب التشكيك
إعادة تدقيق أعجام، إعادة تنقيط إسلام
قبل ما تقدس الكتاب افهم آلم
الله بأحرف لاتين؟ اسم علم عبد وثن عشكل الفالوس العظيم
عبرة عرب وha purim
مفرد جمع elohim
إبهام وبهيم من نفس الجذر
جهل وتجاهل نفس العذر
باع واشترى بنفس السطر
احتلم احتكم بنفس العمر
ناس فوق فالوسها دولار
وناس تحت لعلي وعمر
سايكو انبهر بعالم سحر بعدما الحد اللي عنده انفجر 
بين الرمز والواقع
مش منحوس مش ملبوس بقلب مثلث محبوس
خصوك وعلموك كيف تركع للفالوس
العين بصيرة اليد قصيرة ولما تطول القص مصيرها
من جذر الشجرة لغصنها ممالك الخوف وزيرها
من الجليد إلى الجزيرة الغزيرة بقبائل مغيرة
من الحضيض إلى القصور المشادة عحقول محبوس عبيرها
من رؤوس أكلة رؤوس لصدور مسموع صفيرها
وهاوية استعمار كابوس عم يصارع كابوس عشفيرها
شو السياسة إذا خياري الأساسي بين عون وجعجع عالرئاسة؟
بين بغدادي وbig daddy
ثورة مش ثورة علقوا الشباب
مع إنه تنيناتن هون ورا الباب، متراس ورا كتاب
تار بالوكالة، تحمم بالكيلة وتدين تتسلح العيلة
خيلة
العب طرة نقشة كل مذهب عميلة، زعيمي بيحافظ عديلي
فتقطعه داعش بيرع بينبت، الطايفة حنونة عكتفي بتربت
وفي أصيل فبرد الجميل، بيرجع زعيمي بيصالح عميل
مقلب كما كميل، وهيك التاريخ، نمر العروبة كميل؟
اوباما بالخندق زميل؟
لازملي ضل فقير؟ ويضل الخندق غميق؟
ما تسمع كلامي وتقول عميق
تتضلك عالسطح غريق
حتى ضحية بتضلك شريك، 
شريك ما في بريء
نشوة السلطة، أو سلطة النشوة؟
تعويض القساوة بسطوة القسوةة
خصبة بالذروة، زر ملى عروة
تربة ما بيروي مش صدفة تكلف وكلفة
تسلط تزاوج تفلت وعفة
تكلس بالخفة ما لاحظ الرفة: "بس خلص لوحدك بتكفي
وما تنسي تطفي"
"sure mon amour"
كذبة بتوفي، عفيلتر اللذة الناس بتصفي
حيط بالفرشة وحيط للدولة
حرر السلطة عمم النشوة،
استرجل استرجي

الراس و مونما - الفالوس الأعظم

On Some Ryda Shyt

See you tomorrow  | بشوفك بكرة

جيمي في بلاد العرب
Prod. by Munma
When we take a break we rise the middle finger to orientalism, from Amman to Beirut.
شايفينك وله


الرأس والفرعي-است/شراك El Rass & El Far3i-E-stichrak

Lyrics & Vocals By El Rass
Production By Munma
Photo By Wajdi Elian


أنا راء ألف سين أنا رغبة ألم سرّ أنا لسان التنين أنا عبد الحق الحرّ أنا مش كافر أنا طافر أنا ميم بسورة غافر أنا مدمن معنى الفكرة أنا سمكة حسن الشاطر أنا مش أنا أنا غيري أنا راهب أنا متصوف غارة غيرة بتنسف ديري أنا صوت سعلة مسلول أنا سوسة بصحن الفول أنا عكس الكول أنا فحص البول بعمله نص البول/أنا عائد إلى حيفا أنا مسافر عن عطول/أنا اللي قتلت الحنش لما  سنه بصدري خدش/ أنا مش تبع الاوتوبيس/ عبد المنعم مدبول/أنا إشي أنا شيّ أنا شي/ التشي سيجاره الكوبي أنا بصابيعي حاشيه/حاشاني قول أنا/أنا شقائق النعمان مش أحلام أبو الهنا/أنا منتحر متفائل/استشهادي الإرادة بس علجنة مني سائل/دمعي من البصل سائل/أنا المجرم الفاشل/أنا  هيبي عخط النار/أنا تكنو بقندهار/أنا اللي لمات عوينات عمر المختار/ أنا أصيع إبن بار/أنا أرضى ولد عاق/أنا جسمي حبس مؤبد/وأنفاسي عمل شاق/أنا فلو ألطاي تدفق الفرعي ورشاشات مقاطعة/أنا بسمة بوج الموت/ أنا نكتة بنص الفاجعة/أنا كاشف سر العادة/لنسف العادي بالمراجعة/أنا عاشق في الصلاة وخاشع في المضاجعة/أنا سنّي من الروافض/أنا شيعي من النواصب/أنا ميكس بين أبو بكر وعلي بن ابي طالب/أنا منشق عن النظام أنا النظام بالانشقاق/إذا في البدء كلمة سميني الاشتقاق/أنا معترف بالواقع/بس معتمد علسامع/أنا محترف بالطابق السابع/أنا البواب/أنا مخترق لصوت المدافع/أنا السحاب/أنا كاشف العورات/ثائر ناقد للثورات/أنا حافظ رأس المال والانجيل والتورات/أنا مسلم للإله مش مسلّم لعباده/أنا كاره للإكراه ولو كانت حمرا السجادة/أنا حبل عرقبة مرت ابو لهب (الأسد)/أنا حفّار القبور دافن حرير ودهب.

بعبع ببؤبؤ العين كنت أحمر/تكتك ففكفكه المخ صرت أخطر/صفصف بنهزهز/جرجع بنمزمز/طقطق بنفزفز بتسخّف بنجهبذ/بتفجّر الأطفال/بنفجر براكين/إنت واو راء ميم أنا راء ألف سين/

الرأس و مونما -  16 (أنا مش أنا) تحية

دق المي مي بعدها، بوس الوحش وحش برضه
سكّت سما اسرق رعدها، زوس الجحش باع أرضه
هذا البيت ليس براقص
كمل صورة اللي كان تما يضل فعل الماضي ناقص
مثل الصاد بدون صفاقس
وانت عم  تفاقس أخوك اجوا الوحوش صوروك
بكرا لما بيعتقلوك أحلى غروب علفيسبوك
سعود حبسوا الناطور باعوا العنب بتبوك للي صلبوك
أقدم قافية باللغة بنردها عالموضة في شي 3 آلاف وحش تحت تختي هون بالقوضة
الله لا يستحي أن يضرب مثلا ما بعوضة فما فوقها
أنا بالمقلوب
وما الحوقلة؟
يعني الايمان مصدر قوة حتى لو للأصنام
قوة الايمان ايمان بالقوة
فيك تفكر حالك نسر وانت دودة بقعر الهوة
درب الرب بلا حواجز عالمريد بتفرض خوة
بدون ضغط بتطرى 
بتذوب عتخت النظرة
بين سطور العقل الأعصاب بتكتب سطرها
بوسه بوسه خذ رفاهية
الراحة حجة واهية نفاق داعية داهية
عقول طافية ساهية بفقه البورنو لاهية
يي يي منطق: ما فيك عليه بوسه
إيه لا لا يا نوسه، الكابوس انا كابوسه
نجوم الحماسة بينوسوا فبتقمص انا بسوسه
بهرله من جوا ضراسه
عطّل علكة الفجعان بتهزه من أساسه
ما بضرب كاسه إلا اذا بكاسي سم
ما بعاشر ناسه إلا بحضرة الدم
خدعة الكم، أكل صيني هل تشتم؟
هذا لسان أم جلد تم تم؟
لو كان نمام كان وطى صوته تمتم
تعولم تم من أيام بوغي وطمطم
التوحد حل: لن يفتح سمسم

بدك بوس الوحش يعني بدك بوس ايده
بكرة بضيفه شاي وبيحسبني من عبيده
لأ انا من النوع اللي بيحط انتراكس ببريده هو وسيده
بطلعله من القنينة ستايل فيدو ديدو
سأل العرب بنت العرب، قالت: أبد ما أريده
بس الطرب دمعك ضرب والأوف عم تعيده
هل ناوي تحرر فلسطين بالايكيدو؟ 
وانت بتنقز من فرقاع بعلبة نيدو؟
إذا في ألف مؤامرة، ضيف الراس عاللائحة
التسلل مغامرة فبلحق الرائحة
عمطبخ الوحوش تسمم الكروش
حبيبتي وانا ستايل لولو وطبوش
يا بنغير طعم الطبخة المعدّة لصحوننا
يا بنصير نحن النكهة بتتسكر جفوننا
بس مش رح سلّم من هلق، وقف جرب كوننا
نحن اللي عم نولد من ضلوعنا المكسورة
عم نفهم ان الوحش واحد بمليون أسطورة

الراس و هايج -(مش رح) بوس الوحش

بيناتنا بحور بيناتنا حروب، بيناتنا فروق بين شروق وغروب
بيناتنا دم، بيناتنا ثار، بيناتنا مشنقة عمر المختار
آسف عالتكرار، بس الأفكار عدوار الاستعمار
مع إنه المليحة رجعت لبست الخمار
تحته تسريحة وبقبو البيت بار
يا ريت هالبيت ميت بار

بيناتنا تكبّر والصدى تكبير
بيناتنا نسيج واختلط كتير
بيناتنا بلفور توتال وكارفور
بيناتنا بهار استشراق وعطور
بيناتنا جهاد ابو حمزة بلندن
بيناتنا استخدامات الكوندوم
حسين-مكماهون، نحن الذين خنتم
بيناتنا سماء بغداد والفانتوم
بيناتنا فوارق بين نيوتن وكوانتم 
بنك ليبيا المركزي وسؤال:من انتم؟
بيناتنا صليب رسمتوه عالدروع، لتجرحه الأرض اللي بترابها مزروع
بيناتنا مصارف والقمار عالجوع
بيناتنا جيوش تماسيح الدموع
تماثيل الخضوع لتخليد ذكرى جيل عبيد
الصورة توع مبيد تشنج بالمبيض
تحديد للنسل او النوم بالعسل
بيناتنا تبادل خوف وكسل
بيناتنا جوازات سفر عمتولع
بيناتنا هزات جسر عميوقع
بيناتنا حوار مخنوق بالحكم
بيناتنا انفصام الدين والعلم
بيناتنا غريق
بيناتنا انتقال فلسفة اغريق
بيناتنا ثورة بتأثير منحرف
بيناتنا قناص اقتصادي محترف
بيناتنا اوهام إن الآخر المختلف
بيناتنا عبد مربوط بحديد أو مستلف
بيناتنا...صار بيناتكم السلف
نحن العرب معروفين برد جميل وقبيح
لما تثور ضواحيكم عندنا تمويل وتسليح

بيناتنا اوروبا عظهر ثور طارت صارت ميدوزا
قلب قلبها حجر لما واجهت المراية عشط لامبيدوزا


الراس و المهدي- لامبيدوزا El Rass & El Mahdy - Lampedusa

Prod by @muqataa

وقائع كثيرة أكثر من خلايا الدماغ 
صار الراس بعرض الأرض فما بيلفّه الشماغ
جلود سريعة التبدل، شعبّ دبّاغ، زمن صباغ،
اختر لونك برجك انفتاح فرجك
اختر حزبك تصالحك مع كذبك،
زئبق سامّ، بنلفّه بأعلام، تعليب امواج اوهام
تعريب باسم الشرق للشرقيين، استشراق حكام
ضحية مزدوحة التغريبة الثالثة
عداؤه للغرب بس بالسراويل السالتة
رابعة اختارت الصحرا لما تكون الخاضعة
مقاومة ومراجعة صوفية المقاطعة
خمس أصابع بالايد محتكرك الثالث
شريط أحمر سميك، شريط أزرق فالت
من 6 أجيال وارث الخيانة باليأس
جاهل بالأرقام فصار ال 666 شيطان
سورة آل عمران الحكمة السابعة*
آيات متشابهة بيتبعها شيخ الفتنة
أنا سفينة نوح والأفكار على متني
ما بحضر تلفزيون فالاشلاء ما عمتني
بالعكس، صار الموت إلي إرث
بحافظ عليه مبتسماً، الشهيد على أعمالي مرتسماً
اللي أكلك عامل حمية فسحب دسمك، رسمك، بالعار وصمك
بدلوا بنبوءاتك اخترعوا النار الثامنة*
حتى مستوطناتهم عأرضك تظل آمنة
الهندي الأحمر ياللي بقصيدة درويش،
فتح كازينو بلاس فيغاس خلوله عراسه الريش
يتسلى السائح، 
شيراك بيحب الحريري، بس تزعجه "الأصوات والروائح"*
إسلام رأسمال، ما بده ياك تقرأ، بده ياك تحضر "إقرأ"
تيبيعك بلا فائدة
MCمنسف حلال، سوق مصرف، مجال جديد للاستغلال
أسلمة بنوك، أو تهويد للإسلام؟ 
سلام...عطيني علامة استفهام.
مش رح كون مثل الجيش التاسع النازي الألماني
نصفه استسلم للروس والنصف للأميركاني
أنا واحد فاعل لآخر قطرة، الموت جايي جايي 
مش رح عيش حياتي نطرة.
عجلدي وشم ناري بدون خطوط واضحة
بقلبي رحم دامي أوجاع جنون فاضحة
من روحي حبر أحمر آلام الحيض جارحة
كل يوم صلاة جنازة وانتم مختلفين عالفاتحة
بشرية مراهقة، رغم عمرها الطويل
انقسام السلاح مش بس من التمويل
حتى ورا المايك، ألوية وأساطيل
البلاد عم تتفتت والانا عم تتضخم
صار طبيعي اللي يموت عالجبهة يتفخّم
لما العقل بصراع أناني سخيف، مع نفسه بيتوخم
عادي إنه الجسم المكبوت ما يتوخى الحذر
كرش انفزر، العرش ثقل عكتاف الملائكة وزر
ميثولوجيا الخطر
فصيلة محبطة، دواها كيميا ودين
قصيدة مربطها إسطبل خيول حطين
عناوين بس الجلد ثوب طين،
والعلم طاب تين، حطّه بالعين تدمع
ملعب كرة بطابتين فعلى مرماك عم ترجع
عاشق وكفيف، إمام وعزّة بلبع*
سألته بربك من وين الأمل ينبع
.... ثلاث نقاط يتبع

*الآية السابعة من سورة آل عمران تقول:
هُوَ الَّذِي أَنْزَلَ عَلَيْكَ الْكِتَابَ مِنْهُ آيَاتٌ مُحْكَمَاتٌ هُنَّ أُمُّ الْكِتَابِ وَأُخَرُ مُتَشَابِهَاتٌ فَأَمَّا الَّذِينَ فِي قُلُوبِهِمْ زَيْغٌ فَيَتَّبِعُونَ مَا تَشَابَهَ مِنْهُ ابْتِغَاءَ الْفِتْنَةِ وَابْتِغَاءَ تَأْوِيلِهِ وَمَا يَعْلَمُ تَأْوِيلَهُ إِلَّا اللَّهُ وَالرَّاسِخُونَ فِي الْعِلْمِ يَقُولُونَ آمَنَّا بِهِ كُلٌّ مِنْ عِنْدِ رَبِّنَا وَمَا يَذَّكَّرُ إِلَّا أُولُو الْأَلْبَابِ
*النار الثامنة هي نبوءة ألصقها الكنديون في موروث السكان الأصليين، على أساس أنها نبوءة بقدوم مرحلة تصالح السكان الأصليين مع المستوطنين.
*"الأصوات والروائح"، عبارة عنصرية استخدمها جاك شيراك لوصف الأوضاع في الضواحي الفرنسية، خلال فترة انتخابية لاستقطاب أصوات اليمين العنصري.
*عزّة بلبع هي معشوقة الشيخ إمام.

الراس (انتاج مقاطعة)-دار الفلك Dar el Falak (Prod. Muqata'a)

Prod By: @wardenclyph
Lyrics and performed: Soot Gilgamesh

الكلمات


عشناها بمرها و ما اشتكينا 
عشناها احرار / و ضلينا احرار
يوم اللباعوا احنا انتمينا 
بسوق التجار ضلينا احرار
الي اخوة كتار و ما التقينا 
بفصل بينا استعمار حدود و اقطار 
احتلينا الكوكب و ما سمّينا 
نوينا الثورة باستمرار و اصرار

اجيال بتعيش بدها تاخد الثأر
أنذال بتعيث هون فسادا بالدار 
وانا معيش غير ذاكرتي والنار 
تكوي قلبي بس عارف دربي و خاوا الوصال
عشان اعيش بسلك درب النضال 
مش زلمة ريش.. احنا نصنع رجال
وانا بشيل ما تقدرلي جبال
تشوفني بعييييد راكض ورا المحال 

زلمتي نسهر للصبح..بفش الخلق انا وقح 
ضلني اكتب معلقات بداوي جروح مش للربح
بحكي الحقيقة فصح .. بعمل اللبدي تنح 
راضي عن كل اللكتبتو طالما في شخص واحد فرح 

و بلادنا راحت بس ضلينا هون 
احتلينا الكوكب بكرة دور الكون 

عشناها بمرها و ما اشتكينا 
عشناها احرار / و ضلينا احرار
يوم اللباعوا احنا انتمينا 
بسوق التجار ضلينا احرار
الي اخوة كتار و ما التقينا 
بفصل بينا استعمار حدود و اقطار 
احتلينا الكوكب و ما سمّينا 
نوينا الثورة باستمرار و اصرار

نوينا الثورة عمرها ما كانت فورة 
متكمشين بالحق احنا القابضين على جمرة
حكوماتنا ذياب .. حكامنا كلاب مجترة 
و ذنب الكلب اعوج لو قولبته مية مرّة

و بلادنا راحت بس ضلينا هون 
احتلينا الكوكب بكرة دور الكون

Dallina Hon - ضلينا هون

هيدا راسي أيام بنطح الكوكب أيام بنطح صدر ماتيرازي

الراس و هايج -(مش رح) بوس الوحش

الراس El Rass

Recent comments

Mahmoud

Lynn Bassem

illuminati_714

Heba Hesham 11

Related tracks