" بـوتيـــكات "

لحن : الشيخ إمام
كلمات : أحمد فؤاد نجم
أداء : الأوله بلدي
مقام : حجاز
ــــــــــــــــــــــــــــــــــــ

بوتيكات النات كوا النَّات 
وشقق مفروشه وعمولات 
يا حلاوه الناوه كوا الناوه 
يا بلدنا يا آخر فتاكات 
بوتيكات النات كوا النات 
** 
شبيك لبيك فتح مخك 
لبيك شبيك غمض عينك 
حتقفّل مخك ح نطخك 
ونلوشك لو تفتح عينك 
ركب قرنين تركب مازدا 
وتعيش سلطان في البرواز دا 
مش عاجبك فالجبنه الفازده 
والعيش والفول والكرَّات 
يا حلاوه الناوه كوا الناوه 
يا بلدنا يا آخر فتاكات 
بوتيكات النات كوا النَّات 

مين فيكوا ما يعرفش عليوه 
شيّال المينا الكحيان 
في ثواني اتمول واتحول 
بقي مسيو عليوه عليَّان 
إزاي؟ 
ما هي بوظه ومفتوحه 
على حس ولاد المفضوحه 
وأرانب صاحيه ومدبوحه 
تتأستك تبيع البنوكات 
يا حلاوه الناوه كوا الناوه 
يا بلدنا يا آخر فتكات 
بوتيكات النات كوا النَّات 

حتقول الفقرا ومشاكلهم 
دي مسائل عايزه التفانين 
وأنا رأيي نحلها رباني 
ونموّت كل الجعانين 
وبهذا ما حدش 
ح يجوع 
لو نعلن هذا المشروع 
وح نقفل هذا الموضوع 
نهائياً 
ونعيش في تبات 
يا حلاوه الناوه كوا والناوه 
يا بلدنا يا آخر فتكات 
بوتيكات النات كوا النات

بوتيكات

" الفـلاحــين "

لحن : الشيخ إمام
كلمات : زين العابدين فؤاد
أداء : الأوله بلدي
مقام : عجـم
ــــــــــــــــــــــــــــــــــــ

الفلاحين بيغيروا الكتاني بالكاكي
ويغيروا الكاكي بتوب الدم
وبيزرعوك يا قطن ويا السناكي
وبيزرعوك يا قمح سارية علم
وبيدخلوكي يا حرب فحم الحريقة
وبيزرعوكي يا مصر شمس الحقيقة
***
وانتي ميدان الحرب.. سينا البداية
وانتي جنينة الصلب.. والنصر غاية
وانتي البكا والغلب.. انتي الرحاية
وانتي البارود والحب.. والحرب جاية
***
غنوا التلامذة الصبح للحرية
الفلاحين ضموا غيطان القمح
رفعوا الرايات في الفجر متندية
رفعوا السنابل بنادق
عبوا البنادق بارود
الرمل قادت حرايق
والنار في دم الجنود
***
والحرب زي جناين الحرية
مهرة ومالهاش حدود
والحرب لسة ف أول السكة
اتفجري يا مصر
اتفجري بالحرب ينطلق النهار
اتفجري بالحرب ضد الجوع ضد القهر ضد التتار
اتسلحي للحرب بالحرية
واتفتحي وردة بدم ونار
واتجمعي من ألف صرخة وضحكة
والحرب لسة ف أول السكة

الفلاحين

" حلاويلا "

لحن : الشيخ إمام
كلمات : أحمد فؤاد نجم
أداء : الأوله بلدي
مقام : بياتي


حلاويلا يا حلاويلا                          
يا خسارة يا حول الله 

الثوري النوري الكلمنجي                 
هلاب الدين الشفطنجي
قاعد في الصف الاكلنجي                  
شكلاطة و كاراميلا

يتمركس بعض الايام                       
يتمسلم بعض الايام
و مصاحب كل الحكام                      
و بستاشر ملة 

يا حلاولو لو شفتو زمان                
مهموم بقضايا الانسان
بيتكتك لتقول بركان                      
و لا بوتجاز و لا حلة 

ايش حالك يا قريبي اليوم               
وايش جاب التفاح للدوم
و ايش جاب الأوضه ببدروم            
للعربية و فيلا

جرانين و مسارح و ادارة              
و معلق طلبة و زمارة
يسلك اهو بيزمر                          
يعطل يجيبولوا المنافيلا

وا ترستق هلاب الدين                  
بقى عاقل جداً و رزين
و ياعيني علينا يامجانين               
عشنا و متـنا بعلة

حلاويلا يا حلاويلا                      
يا خسارة يا حول الله

حلاويلا

"اتجمعوا العشاق "

لحن : الشيخ إمام
كلمات : زين العابدين فؤاد
أداء : الأوله بلدي
مقام : نهاوند
ـــــــــــــــــــــــــــ

يتجمعوا العشاق في سجن القلعة         
يتجمعوا العشاق في باب الخلق
والشمس غنوة من الزنازين طالعة       
و مصر غنوة مفرعة م الحلق
يتجمعوا العشاق فى الزنزانة              
مهما يطول السجن مهما القهر
مهما يزيد الفجر بالسجانة                 
مين اللي يقدر ساعة يحبس مصر
 
يتجمعوا و العشق نار في الدم            
نار تحرق الجوع و الدموع و الهم
نار تشتعل لما القدم ينضم                 
لما الايادي تفور تلم اللحم
و اللحم متنتور في رملة سينا            
و الكدب بيحجز على أيادينا
قدم العدو غارزة في لحم ترابي          
و الكدب عشش مخبرين على بابي
و المخبرين خارجين كلاب سعرانة     
بيجمعوا العشاق في الزنزانة
مهما يطول السجن مهما القهر          
مهما يزيد الفجر بالسجانة
مين اللي يقدر ساعة يحبس مصر

مصر النهار يطلقنا في الميادين             
مصر البكا مصر الغنا و الطين
مصر الشموس الهالة من الزنازين        
هالة و طارحة فى دمنا بساتين

مصر الجناين طرحة مين يقطفها           
مصر الجناين للي يرفع سيفها
مهما يطول السجن مهما القهر              
مهما يزيد الفجر بالسجانة
مين اللي يقدر ساعة يحبس مصر


اتجمعوا العشاق

" يــا فلسطينيــة "

لحن : الشيخ إمام
كلمات : أحمد فؤاد نجم
أداء : الأوله بلدي
مقام : صبـــا
ــــــــــــــــــــــــــــــــــــ

يا فلسطينيه                        والبندقاني رماكو
بالصهيونيه                 تقتل حمامكو في حداكو
يا فلسطينيه                  وانا بدي اسافر حداكو
ناري في ايديا                    وايديه تنزل معاكو
على راس الحيه            وتموت شريعه هولاكو

يا فلسطينيه                    والغربه طالت كفايه
والصحرا                 أنت م اللاجئين والضحايا
والارض                   حنّت للفلاحين والسقايه
والثوره غايه                   والنصر اول خطاكو

يا فلسطينيه                     والثوره هي الاكيده
بالبندقيه                       نفرض حياتنا الجديده
والسكه                     مهما طالت وبانت بعيده
مدّ الخطاوي                هوه اللي يسعف معاكو

يا فلسطينيه                   فيتنام عليكو البشاره
بالنصره طالعه            من تحت ميت الف غاره
والشمعه والعه               والامريكان بالخساره
راجعين حيارى             عقبال ما يحصل معاكو

يا فلسطينية

" بحبك يا مصر "

لحن : الشيخ إمام
كلمات : أحمد فؤاد نجم
أداء : الأوله بلدي
مقام : نهاوند
ــــــــــــــــــــــــــــــــــــ

بحبك بحبك
بحبك بحبك
بحبك بحبك بحبك يا مصر
مسايا و صباحى أسبح بحبك
و حبك شفايا و جراحى يا مصر
و اسافر بحبك
و اميل زى ميلك
وتحلا الخطاوى
فى حبك يا مصر
واحب اغترابى
فى صبحك و ليلك
و احب الونس بالرفاقه
يا مصر
***
تنام الدموع فى العيون الهواجع
و تسهر دموعى
فى حبك يا مصر
تهون السجون
و الشجون
و المواجع
و يغلا مع القهر حبك يا مصر
ولو يحبسونى ولو يشنقونى
ولو فكروا بالعذاب يبعدونى
ح أقرب و أقرب
ومش ممكن أهرب
و تنزل دموعى على خدودى تشرب
تلاقى الرموش و الخدود و المباسم
مراسم و صورتك عليهم يا مصر
بحبك بحبك
بحبك يا مصر

بحبك يا مصر

" على الربابة "

لحن : الشيخ إمام
كلمات : أحمد فؤاد نجم
أداء : الأوله بلدي
مقام : عجم
ــــــــــــــــــــــــــــــــــــ

أصلي ع النبي قبل البداية               
نبي عربي مشفع فى البرايا
واسلم بالوتر والقوس عليكم           
يا كل السائرين ع الشوك معايا
يقول الشاعر المجروح فؤاده          
من الاندال ومن عشق الصبايا
غرامي فى الحروب يسبق سلامي     
وأملي فى الشعوب يخلق غنايا
وعشقي للكلام غالب سكوتي          
وكرهي للسكات جالب شقايا

******
يقول ابن العرب والجرح نازف       
صديد الذل ودموع السبايا
ونار الغل من أيلول ويونيه            
وريق المر من طعم الرزايا
رضانا بالقليل والخوف رمانا          
لحكام المواكب والهفايا
وايش بعد المسيرة التصفوية           
على درب الخيانة للنهاية
وبيع الأرض بالعرض لعدوي         
على عينك يا تاجر فى المرايه

******
ويا شعب العرب يا ابن الفوارس      
يا رافع للنضال بيرق وراية
يا واهب للزمن أيام وضية              
بنور البذل والجود والعطايا
صلاح الدين ينادي من منامته         
على النايمين على دم الضحايا
لاأنا منكم ولا إنتو من ولادي          
إذا رضيتم بغير النصر غاية
ولا غير السلاح فى الحرب يحكم      
ويحسم فى المشاكل والقضايا


على الربابة

أنا أتوب عن حبك

يا إسكندرية | الأوله بلدي

الأوله بلدى I حلاويلا

لحن : الشيخ إمام
كلمات : نجيب سرور
مقام : عجم
ـــــــــــــــــــــــــــ
البحر بيضحك ليه            
وانا نازله ادلع املا القلل

البحر غضبان ما بيضحكش         
أصل الحكاية ما تضحكش
البحر جرحه ما بيدبلش                 
وجرحنا ولا عمره دبل

والبحر بيضحك ليه                 
وانا نازلة ادلع املا القلل
***
مساكين بنضحك من البلوة        
زي الديوك و الروح حلوة
سارقاها من السكين حموة             
و لسة جوا القلب أمل

والبحر بيضحك ليه                 
وانا نازلة ادلع املا القلل
***
قللنا فخارها إناوي                   
بتقول حكاوي و غناوي
يا قلة الذل أنا ناوي           
ما شرب و لو في المية عسل

والبحر بيضحك ليه                 
وانا نازلة ادلع املا القلل
***
ياما ملينا وملينا                        
لغيرنا وعطشنا ساقينا
صابرين وبحر ما يروينا             
شايلين بدال العلة علل

والبحر بيضحك ليه                
وانا نازلة ادلع املا القلل
***
في بالي ياما وعلى بالي             
واللي بيعشق ما يبالي
ما يهمنيش من عزالي           
يا حلوة لو مرسالي وصل

والبحر بيضحك ليه ليه            
وانا نازلة ادلع املا القلل
***
بيني وبينك سور ورا سور        
وانا لا مارد ولا عصفور
في إيدي عود قوال وجسور    
وصبحت انا في العشق مثل

والبحر بيضحك ليه            
وانا نازله ادلع املا القلل


البحر بيضحك ليه

لحن : الشيخ إمام
كلمات : أحمد فؤاد نجم
مقام : نهاوند
ــــــــــــــــــــــــــــــــ
شيد قصورك ع المزارع 
 من كدنا وعمل إدينا

الخمارات جنب المصانع 
 والسجن مطرح الجنينه 


واطلق كلابك في الشوارع 
 واقفل زنازينك علينا

و قل نومنا في المضاجع 
ادي احنا نمنا ما اشتهينا

واتقل علينا بالمواجع 
احنا اتوجعنا واكتفينا

وعرفنا مين سبب جراحنا 
وعرفنا روحنا والتقينا

عمال وفلاحين وطلبه 
دقت ساعتنا وابتدينا

نسلك طريق ما لهش راجع 
والنصر قرب من عنينا

النصر أقرب من ايدينا


شيد قصورك

لحن : الشيخ إمام
كلمات : أحمد فؤاد نجم
مقام : بياتى
ـــــــــــــــــــــــــــــــــ
يا بهية وخبرينا 
ع اللى قتل ياسين
فى الصحرا وفى المدينة 
اليوم ده ومن سنين
ناس تمشى وناس تجينا
واحنا متبعترين
ولا صارى ع السفينة
ولا مربط للهجين
والدنيا بتجرى بينا 
واحنا متوخرين
يا بهية ولملمينا
نطرح مليون ياسين

يا بهية وخبرينا

لحن  : الشيخ إمام
كلمات : أحمد فؤاد نجم
مقام : صبا
ــــــــــــــــــــــــــــــــ
ناح النواح و النواحة 
على بقرة حاحا النطاحة
والبقرة حلوب    ..              حاحا
تحلب قنطار         ..              حاحا
لكن مسلوب         ..              حاحا
من أهل الدار        ..              حاحا
و الدار بصحاب     ..              حاحا
و احداشر باب       ..              حاحا
غير السراديب       ..              حاحا
و جحور الديب      ..              حاحا
و بيبان الدار        ..              حاحا
واقفين زنهار       ..              حاحا
و ف يوم معلوم      ..              حاحا
عملوها الروم       ..              حاحا
زقوا الترباس       ..              حاحا
هربوا الحراس     ..              حاحا
دخلوا الخوجات    ..              حاحا
شفطوا اللبنات      ..              حاحا
و البقرة تنادي      ..              حاحا
و تقول يا ولادي   ..              حاحا
و ولاد الشوم      ..               حاحا
رايحين ف النوم  ..               حاحا
البقرة انقهرت     ..               حاحا
ف القهر انصهرت ..              حاحا
وقعت ف البير      ..              حاحا
سألوا النواطير     ..              حاحا
طب وقعت ليه      ..              حاحا
وقعت م الخوف    ..              حاحا
و الخوف ييجي ليه   ..          حاحا
من عدم الشوف       ..          حاحا
وقعت م الجوع و من الراحة
 البقرة السمرة النطاحة
ناحت مواويل النواحة 
على حاحا و على بقرة حاحة 


بقرة حاحا

لحن  : الشيخ إمام
كلمات : أحمد فؤاد نجم
مقام : حجاز
ــــــــــــــــــــــــــــــــ
يسبق كلامنا سلامنا 
يطوف ع السامعين معنا
عصفور محندق يزقزق 
كلام موزون وله معنى
عن أرض سمرا وقمرا 
وضفة ونهر ومراكب
ورفاق مسيرة عسيرة 
وصورة حشد ومواكب
فى عيون صبية بهية 
عليها الكلمة والمعنى
***
مصر ياما يا بهيه
يا ام طرحه وجلابيه
الزمن شاب وانتي شابه
هوا رايح وانتي جايه
جايه فوق الصعب ماشيه
فات عليكي ليل وميه
واحتمالك هوا هوا
وابتسامتك هيا هيا
تضحكي للصبح يصبح
بعد ليله ومغربيه
تطلع الشمس تلاقيكي
معجبانيه وصبية       
يا بهيه
***
الليل جزاير جزاير 
يمد البحر يفنيها
والفجر شعلة هتعلى 
وعمر الموج ما يطويها
والشط باين مداين 
عليها الشمس طوافة
ايدك فى ايدنا ساعدنا 
دى مهما الموجة تتعافى
بالعزم ساعة جماعة
وبالاصرار نخطيها
***
مصر ياما يا سفينه
مهما كان البحر عاتي
فلاحينك ملاحينك
يزعأو للريح يواتي
 اللي ع الدفه
 صنايعي
واللي ع المجداف
 زناتي
واللي فوق الصاري كاشف
كل ماضي وكل اتى
عقدتين والتالته تابته
تركبي الموجه العفيه
توصلي بره السلامه
معجبانيه وصبيه          
يا بهيه
***
ويعود كلامنا بسلامنا 
يطوف عالصحبة حلوانى
عصفور محنى يغنى 
على الافراح ومن تانى
يرمى الغناوى تقاوى 
تبوس الارض الارض تتحنى
تفرح وتسرح وتطرح 
وترجع تانى تتغنى
اللى بنى مصر 
كان فى الاصل حلوانى
***
مصر ياما يا بهيه
يا ام طرحه وجلابيه
الزمن شاب وانتي شابه
هوا رايح وانتي جايه
جايه فوق الصعب ماشيه
فات عليكي ليل وميه
واحتمالك هوا هوا
وابتسامتك هيا هيا
تضحكي للصبح يصبح
بعد ليله ومغربيه
تطلع الشمس تلاقيكي
معجبانيه وصبية       
يا بهيه


مصر ياما يا بهية

لحن : الشيخ إمام 
كلمات : أحمد فؤاد نجم 
مقام : رست 
ـــــــــــــــــــــــــــــــــ 
فرحانين .. فرحانين .. فرحانين 
كل ثورة وإحنا دايما فرحانين 
اللي ماتوا فى المعارك .. فرحانين 
واللي حضر واللي شارك.. فرحانين 
واللي ساكنين الخنادق.. فرحانين 
واللى ماسكين على المبادئ.. فرحانين 
واللي شايلين شوق لفكرة.. فرحانين 
واللي حاملين هَمّ بكرة.. فرحانين 
اللي كلمتهم أمانة.. فرحانين 
واللي معدتهم جعانة فرحانين 
إحنا ملح الأرض وتراب العجين 
كل صناع الورود والمبدعين 
عد موج البحر ونجوم الليالي 
عد رمل الأرض واكتر من السنين 
كل ثورة وإحنا دايما فرحانين 
فرحانين .. فرحانين .. فرحانين

فرحانين

لحن : الشيخ إمام 
كلمات : أحمد فؤاد نجم 
مقام : عجم 
ــــــــــــــــــــــــــــــــــــ 
هلى يا شمس البشاير 
طابت وآن الأوان 
طلي وحلي الستاير 
نور الأشاير يبان 
وارخي الضفاير مناير 
فوق المكان والزمان 
مصر الشباب العزيزة 
قامت وكان اللي كان 
*** 
مصر اللي خاضت ليالي 
بحر الضلام الرهيب 
تسهر عليها المبالي 
تزعق ولا من طبيب 
عرفت بلاها ودواها 
بعيون شبابها النجيب 
تسلم عيون الأطبا 
ويعيش حكيم الزمان 
*** 
قال الشباب المداوي 
شقشق يا نور الصباح 
تظهر أصول البلاوي 
تطهر عيون الجراح 
يخضر عود الأغاني 
يسري العبيرفى البراح 
تسرح فى مصر الأماني 
زي النشيد والأدان 
*** 
مصر العلوم والصنايع 
والفلاحين والغيطان 
مصر الجنود بالمدافع 
متسلحين للميدان 
مصر السلام بالمعارك 
يفرش يغطي المكان 
ينده يا شمس الحقيقه 
طلي عليكي الأمان

هللى يا شمس البشاير

لحن : الشيخ إمام 
كلمات : زين العابدين فؤاد 
مقام : عجم 
ـــــــــــــــــــــــــــــــــــــــ 
أنا الشعب ماشى وعارف طريقى 
كفاحي سلاحي وعزمي صديقـي 
أخوض الليالي وبعيون أمالي 
أحدد مكان الصباح الحقيقي

أنا الشعب ماشي وعارف طريقي 
*** 
أنا الشعب كفي تقيد الحياة 
تخضر صحاري تبيد الطغاة 
تعلي الحقايق رايات في البنادق 
ويصبح تاريخي منارتي ورفيقي

أنا الشعب ماشي وعارف طريقي 
*** 
أنا الشعب مهما يقيموا السجون 
ومهما كلابهم تحاول تخون 
حيطلع نهاري وأدمر بناري 
جحور الكلاب والسجون من طريقي

أنا الشعب ماشي وعارف طريقي 
*** 
أنا الشعب والشمس وردة في كمي 
ونار النهار خيل بترمح في دمي 
وتقضي ولادي على كل عادي 
ومين اللي يقدر يقف في طريقي

أنا الشعب ماشي وعارف طريقي


أنا الشعب ماشى وعارف طريقى

لحن : الشيخ إمام 
كلمات : أحمد فؤاد نجم 
مقام : رست 
ــــــــــــــــــــــــــــــــــــ 
صباح الخير علي الورد اللي فتح في جناين مصر 
صباح العندليب يشدي بألحان السبوع يا مصر

صباح الدايه واللفه 
ورش الملح في الزفه 
صباح يطلع بأعلامنا 
من القلعه لباب النصر

سلامتك يامه يا مهره 
يا حباله يا ولاده 
يا ست الكل يا طاهره 
سلامتك من آلام الحيض 
من الحرمان من القهره 
سلامة نهدك المرضع 
سلامة بطنك الخضرا

هناكي وفرخة الوالدة 
تضمي الولد يا والده 
يصونهم لك ويحميهم 
يكترهم يخليهم 
يجمع شملهم بيكي 
يتمم فرحتك بيهم

صباح الخير علي ولادك 
صباح الياسمين والفل 
تعيشي ويفنوا حسادك 
ويسقوهم كاسات الذل

وبلغ يا سمير غطاس يا ضيف المعتقل سنوي 
بصوتك دا اللي كله نحاس صباح الخير على الثانوي

وأهلا بيكو في القلعه 
وباللي في الطريق جايين 
ما دامت مصر ولاده 
وفيها الطلق والعاده 
حتفضل شمسها طالعه 
برغم القلعه والزنازين

صباح الخير علي الورد اللي فتح في جناين مصر 
صباح العندليب يشدي بألحان السبوع يا مصر 
صباح الدايه واللفه 
ورش الملح في الزفه 
صباح يطلع بأعلامنا 
من القلعه لباب النصر


صباح الخير على الورد اللى فتح

لحن : الشيخ إمام 
كلمات : نجيب شهاب الدين 
مقام : كرد 
ــــــــــــــــــــــــــــــــــــــ

يا مصر قومى وشدى الحيل 
كل اللى تتمنيه عندى 
لا القهر يطوينى ولا الليل 
آمان آمان بيرم أفندى 
*** 
رافعين جباه حرة شريفة 
باسطين أيادى تأدي الفرض 
ناقصين مؤذن وخليفة 
 ونور ما بين السما والأرض

يا مصر عودى زى زمان 
ندهة من الأزهر وأدان 
يا مصر عودى زى زمان 
تعصى العدوين وتعاندى

آمان آمان بيرم أفندى 
*** 
الدم يجرى فى ماء النيل 
والنيل بيفتح على سجنى 
والسجن يطرح غلة وتيل 
نجوع ونتعرى ونبنى

يا مصر لسه عددنا كتير 
لا تجزعى من بأس الغير 
يا مصر ملو قلوبنا الخير 
وحلمنا ورد مندى

آمان آمان بيرم أفندى 
*** 
يسعد صباحك يا جنينة 
يسعد صباح اللى رواكى 
يا خضرا من زرع إدينا 
شربت من بحر هواكي

شربت من كاس محبوبى 
وعشقت نيل أسمر نوبى 
وغسلت فيه بدنى وتوبى 
وكتبت إسمه على زندي

آمان آمان بيرم أفندى

يا مصر قومى وشدى الحيل 
كل اللى تتمنيه عندى 
لا القهر يطوينى ولا الليل 
آمان آمان بيرم أفندى


يا مصر قومى وشدى الحيل

لحن : الشيخ إمام 
كلمات : أحمد فؤاد نجم 
مقام : بياتى 
ــــــــــــــــــــــــــــــــــ

بعد السلام والمرحبة 
يا ولاد بلدنا يا طيبين 
نِفرِش كلام المصطبة 
واضح لكل السامعين 
مصر الحبيبة الطيبة 
أم البنية والبنين 
اشحالها في عز الصبا 
اشحال ولادها المخلصين 
وسط العواصف مركبة 
بين ريح شمال وريح يمين

جابوا الطبيب ابن الحلال 
كشف ما خاف وشاف وقال 
أهل البصيرة في البلد 
جواب لكل السائلين 
قالوا البلد عايزة ولد 
يأخذ بثار المظلومين 
ولد يعوِض اللي راح 
ويعلى فوق كل الجراح 
ويمد إيده في الضباب 
يشدّ أنوار الصباح 
فيكم ولد يا سامعين ؟ 
أجدع ولد 
طب هو فين ؟ 
وهو مين ؟ 
ابن البلد 
يابن البلد يا ابن البلد 
الوقت وقتك يا ولد 
يا قلب مصر ونبضها 
يا ابن البلد 
يسري بطولها وعرضها 
يا ابن البلد 
يا صبحها 
يا ابن البلد 
يا ربحها 
يا ابن البلد 
يا قمحها 
يا ابن البلد 
يا رمحها 
يا ابن البلد

يا ابن البلد يا ابن البلد 
الوقت وقتك يا ولد 
آدى آدى 
آدى كلام المصطبة 
يا ولاد بلدنا يا طيبين 
بعد السلام والمرحبة 
واضح لكل السامعين


كلام المصطبة

" أهيم شوقا "

لحن : الشيخ إمام
كلمات : أحمد فؤاد نجم
أداء : الأوله بلدي
مقام : بياتى
ــــــــــــــــــــــــــــــــــــ

اهيم شوقا اعود شوقا الى لماكي وسلسبيلي
ياسمرا ياللي الهوى رماني
وتهت فيكي وضاع زماني
يحدفني بحرك لبر تاني
يجيبني شوقي او تندهيلي
اهيم شوقا اعود شوقا الى لماكي وسلسبيلي
هربت منك لقيتني فيكي
بعدت عنك قربت ليكي
سهرت وحدي اتونست بيكي
غلب حماري وتاه سبيلي
اهيم شوقا اعود شوقا الى لماكي وسلسبيلي

أهيم شوقا

" الاوله بلدي "

لحن : الشيخ إمام
كلمات : أحمد فؤاد نجم
أداء : الأوله بلدي
مقام : رست
ــــــــــــــــــــــــــــــــــــ

الأولة بلدي 
و الثانية بلدي 
و الثالثة بلدي 
الأولة بلدي باسلطن جو موالي ودا الموصوف 
والثانية بلدي باقول الكلمة بالعالي و ع المكشوف 
والثالثة بلدي ياكنزي و عزوتي و مالي و ملو الشوف 
الأولة بلدي باسلطن جو موالي و دا الموصوف 
دوا العيــــــــــــــــــــان 
والثانية بلدي باقول الكلمة بالعالي و ع المكشوف 
و ف المليـــــــــــــــان 
والثالثة بلدي ياكنزي و عزوتي و مالي و ملو الشوف 
أوانـــــــــــــــــــــك آن 

تحدي الحد يا بلدي 
ما بين الحق و البهتان 
و رايتك تعلا يا بلدي 
دليل عن صحة البنيان 
و دا الموصوف 
و الاولة بلدي 
و الثانية بلدي 
و الثالثة بلدي

الاوله بلدى

(الأوله بلدي) فريق غنائي ولد من رحم ثورة يناير العظيمة محاولة في المساهمة في التوعية السياسية والاجتماعية والارتقاء بالذوق العام من خلال الاهتمام بتراث الراحل العظيم الشيخ/ إمام عيسى وتقديمه بجودة فنية تليق بجمال ألحانه وجمال كلمات الشعراء الذين غنى لهم.
بدأ تكوين الفريق في مارس عام 2012 على يد الأستاذ/ علاء الدين إبراهيم صديق الشيخ إمام وتلميذه تنفيذا لوصية الشيخ إمام بنشر رسالته وإكمال مسيرته وتعتبر (الأوله بلدي) تكليلا لجهود الأستاذ/ علاء الدين إبراهيم واجتهاده على مدى 17 عاما منذ رحيل الشيخ إمام عن حياتنا عام 1995 في تنفيذ وصية أستاذه بتكوين فريق غنائي متكامل يقدم أعمال الشيخ إمام.
يؤمن الفريق أن الفن الجاد من أقوى وسائل التعبير عن الرأي وأسرعها انتشارا وأن الفن وسيلة لنشر الأفكار قبل أن يكون وسيلة للاستمتاع والترفيه.

Popular tracks by ElawelaBalady